Tshapita 31

Wambona nanula lushi la Sabato

KEM’EDJA, Yeso nde l’ambeki ande wayanga mumɔ oma la Jerusalɛma dia vɔ nkalola la Ngalileya. Tekɔ l’eleko kamɔnga akatshi, ndo l’etena kɛnɛ ko nanula yambotshundanɛ lo dikambɔ. Ambeki wa Yeso wôka ndjala. Diɔ diakɔ dianawɔ nanula ndo diayilɛwɔ. Ko lam’ele ɛlɔ lushi la Sabato, kɛnɛ kotshewɔ hakoke mbishɛma lo asho w’anto.

Ewandji w’ɛtɛmwɛlɔ wa la Jerusalɛma oma la nyanga dia ndjaka Yeso l’ɔtɛ w’ɔnɛ nde kɔnyɔla lushi la Sabato. Kakianɛ, Afarisɛ wamboya dia ndjowawa. Vɔ lande vate: “Enda, ambeki aye wambutsha dikambu dieli ekila ntsha lushi [la sabato, NW].”

Afarisɛ mbutaka ɔnɛ muna nanula ndo ndjishisha l’anya dia ndjilɛ, ekɔ woho akɔ ɔtɔi la muna asami ko mbatɔ. Koko, olembetshiyelo awɔ wa wolo efula wa kɛnɛ kelɛwɔ kamba olimu mbetɛka Sabato wotsho, tete lushi lɔsɔ pombaka monga lushi l’ɔngɛnɔngɛnɔ ndo etena k’ekeketshelo lo nyuma. Ɔnkɔnɛ, Yeso ambokonya Afarisɛ ewo lo mbakɔndɔlɛ diɛnyɛlɔ dia l’Afundelo dia mbaɛnya ɔnɛ Jehowa kema la lokanyi la tshutshuya anto dia vɔ kitanyiya ɔlɛmbɛ Ande wa Sabato lo tshambandeko.

Yeso ambowatɛ ɔnɛ lam’akoke Davidi nde l’ɛlɔngɔ w’apami waki kâmɛ la nde ndjala, vɔ wakemala lo tabɛrnakɛlɛ ko wakale mapa wakakitshamaka la ntondo ka Jehowa. Mapa ɛsɔ wakanyema oma la ntondo ka Jehowa ko mapa ekina w’eyoyo wakakitshama lo dihole diawɔ, ndo paka ɛlɔmbɛdi eto mbakahombaka ndɛ mapa ɛsɔ. Koko l’etena kɛsɔ, Davidi nde l’ɛlɔngɔ w’apami waki kâmɛ la nde kokongola onongo lam’akawale mapa ɛsɔ.

Yeso ambowasha ɛnyɛlɔ kekina, ata ate: “Undi, nyu nyatali lu elembe nyati: Elombedi watulingulaka ekila ka lushi la [Sabato lo tɛmpɛlɔ, NW], ku vo hawuyala la unungu?” Mɛtɛ, kânga lushi la Sabato, ɛlɔmbɛdi tetemalaka la pembola nyama kingo ndo la sala elimu ekina dia nɔngɔsɔla elambo wa nyama! Yeso ambowatɛ nto ate: “Keli dimi lambunyutela nti: One luleki [tɛmpɛlɔ, NW] wuki, eko lane.”

Oma lâsɔ, ɔnɛ ahangwɛnde Afarisɛ ate: “Utunyeya diui ne ati: Ketshi kalangami aha ulambu, tshiki nyu kumamia antu waha la unungu.” Ko nde ndjodihiya ate: “Ne dia On’a untu keli uwandji a lushi la [Sabato, NW].” Kakɔna kalanga Yeso nembetshiya lam’atande ɔsɔku na? Yeso ekɔ lo ntɛkɛta dikambo dia Diolelo diande dia wɔladi di’ɛnɔnyi kinunu.

Kakianɛ, ambeta ɛnɔnyi 6 000, anto wa lo nkɛtɛ k’otondo wambosowa heyama lo lɔhɔmbɔ laki Satana Diabolo, kâmɛ l’akambo wa ngala ndo l’ata wasalema lushi la lushi. Koko Sabato ka woke, lowandji la Kristo, kayotshungola anto tshɛ oma l’asui la ɛhɛnyɔhɛnyɔ. Mateu 12:1-8; Akambu w’Asi Lewi 24:5-9; 1 Samuele 21:1-6; Walelu 28:9; Hosea 6:6.

▪ Dikambo diakɔna diambowɔsɔngɔlɛ ambeki wa Yeso, ko Yeso atena watande lo dikambo diakɔ sɔ?

▪ Munga kakɔna kele l’Afarisɛ kambotondja Yeso lo sɛkɛ?

▪ Woho akɔna wele Yeso “uwandji a lushi la [sabato, NW]”?