Tshapita 40

Wetshelo wa mbokana kɛtshi

ONDO Yeso êke l’osomba wa Nayina, lɛnɛ akinde oma la mbolola ɔn’aki wadi aki odo, naka aha l’osomba okina wa suke. Ofarisɛ ɔmɔtshi, lokombo lande Simɔna, nangaka mɛnana l’osadi wakambo wa mamba wa ngasɔ elungi l’elungi. Diɔ diakɔ dielende Yeso dia ndjosanga la nde lonya lo lokenga.

Oko wambondɛna ɔnɛ l’etena kɛsɔ nde ayotokondja diaaso dia sambisha wanɛ wayoyala lâwɔ, Yeso ambetawɔ leeta lɔsɔ, oko wakandetawɔka ndjeta dia tosanga l’elungudi w’elambo la atshi wa pɛkato lonya lo lokenga. Koko, wonya wɔ̂twɛnde lo luudu laki Simɔna, Yeso halongwami oko wahomba angɛnangɛnda nongwama.

Naka onto oma la sala lɔkɛndɔ l’otale la sabata l’ekolo l’otadimbo wa ditshu, ekolo ande ndjalaka dja ndo mongaka l’otoko, omalɔkɔ, ɔnɛ lalongola angɛndangɛnda pombaka mbɔtsha ekolo awɔ l’ashi wa tshitshi dia nde mɛnya ɔnɛ nde ambâlongola dimɛna. Koko, vɔ hawosudi ekolo wa Yeso wonya wokuminde. Ndoko onto loye dia ndjowoka ɛlɔmɔ dia mbotɛ ɔnɛ: yayo, tshelo ya loshilambo yasala anto tshɛ. Ndo ndoko onto lôkitshi esɔ l’ɔtɛ, lo ndjela mbekelo kasalɛwɔ angɛndangɛnda.

Wonya walɛwɔ mma, lâsɔ ko wanɛ welame wambodjasɛ lo mɛsa, omoto ɔmɔtshi lewɔ kombelɛ ambɔtɔ lo luudu ɔkɔkɛ ɔkɔkɛ. Anto tshɛ wa l’osomba mbeyaka ɔnɛ nde ekɔ la lɔsɛnɔ la mindo. Aha la tamu, nde akoke wetshelo wa Yeso, ndo leeta lakandelɛ ‘wanɛ tshɛ wɛna pâ la wetsho dia vɔ ndja oya le nde dia ndjokondja ekeketshelo.’ Nɛ dia kɛnɛ kakandɛnyi ndo kakandoke kakananda otema ande efula, omoto ɔsɔ ambotayangaka Yeso edja ndo lam’amondoyowɛna lo dihole nɛ.

Nde ambeta l’ɔkɔngɔ wa Yeso lodjashi la mɛsa ko ambokusama l’ekolo ande. Nde ambɔlɔya ekolo akɔ l’asɔi ande, ko ambâkitola la divo diande. Ndo nto, nde ambɔsa esɔ k’opumu oma l’ɔlɔndɔ ko ambokihokosa l’ekolo akɔ ndo ambâkumbatɛ. Simɔna ekɔ lo mɛnga dikambo ndo diɛngɛku. Nde ekɔ lo ndjatɛ ate: “Utunduyala untu one eko umvutshi, tshiki ndi uteya umuntu one luwunandji wuhu wendi, ati: Untu a kolo kendi.”

Oko weyande tokanyi tande, Yeso nd’ande ate: “Simona, dimi la diui dia nkutela.”

Ongo mbôkadimolande ate: “Umbetsha, uta.”

“Osondjanyi omotshi aki la akanga w’abasa andi ahendi: omotshi aki la dibasa dia denariyo kama tshanu la ukina akumi atanu. Lam’akiwo kundjala la engo ka mbufuta, ndi akâdimanyia abasa vo ahendi. Okone l’atei awo, akona ayuleka mbûka ngandji?”

Ondo Simɔna akanyisha ndo yimba, afɔnya ɔnɛ dimbola sɔ hadiɔtɔnɛ ndo la kɛnɛ kataso, ko nde ambokadimola ate: “Dimi lambukana nti: One lakandadimanyia dibasa diuleki.”

Ko Yeso nde lande ate: “We ambusambula ololo.” Oma lâsɔ, ɔnɛ asekesɔnde otsha le omoto akɔ ko nde la Simɔna ate: “We menaka umuntu one? Dimi lakotwe lu luudu laye, we hambisha ashi wa mbotsha ekulu ami. Keli ndi amboloya ekulu ami la asoi andi, ambekitula la divu diandi. We hakanyi la mi wumbu. Keli umaka lam’akamotwe edja ndu kakiane, ndi hakimo mbikami wumbu l’ekulu ami. We hankitshi iso l’ote ami. Keli ndi ambunkita malashi l’ekulu ami.”

Ɔnkɔnɛ, omoto ɔnɛ ambɛnya ɔnɛ nde amboyatshumoya l’otema ɔtɔi l’akambo wa mindo wambondosalaka. Diɔ diakɔ diambodihiya Yeso l’ɛtɛkɛta ɛnɛ ate: “Dimi lambukutela nti: Kolo yandi yeli efula, yambudimanyema, ne dia ndi [ekɔ la] ngandji efula. Keli one layuwudimanyia tshitshe, ndi ayuka ngandji tshitshe.”

Yeso hangɛnangɛna akambo wa mindo ndo hetawɔ di’anto mbasala. Koko, dikambo diosadinde mɛnyaka ɔnɛ nde ekɔ la lohokamu ndo la kɛtshi le wanɛ watsha pɛkato lo nsɛnɔ yawɔ ko wambɛnya ɔnɛ vɔ wamboyatshumoya l’otema ɔtɔi, diɔ diakɔ diambowoya oya le Kristo dia ndjokondja esambelo. Yeso ambosha omoto ɔsɔ ekeketshelo k’efula lam’awotɛnde ate: “Kolo yaye yambudimanyema. . . . Mbetawo kaye kambukushimbela; utshu la ki.” Luka 7:36-50; Mateu 11:28-30.

▪ Woho akɔna wolongwami Yeso oma le Simɔna, ɔnɛ lakawele?

▪ Akɔna oye dia ndjayangaka Yeso, ndo lande na?

▪ Wɛɛla akɔna wamboka Yeso, ndo dia mbisha wetshelo akɔna?