Tshapita 41

Wamanu lo dikambo dia Yeso

YEMA l’ɔkɔngɔ wa nde nongwama laka Simɔna, Yeso ambonda lɔkɛndɔ la hende l’olimu w’esambishelo la Ngalileya. Lo lɔkɛndɔ la ntondo lakandasale lo lɛtshi lɔnɛ la nkɛtɛ, nde aki kâmɛ l’ambeki wa ntondo anɛ: Petero, Andɛlɛ, Jakɔba, la Joani. Koko lo lɔkɛndɔ la hende, apɔstɔlɔ 12 la amato amɔtshi wekɔ lo tôtshindɛ. L’atei wa amato akɔ, ekɔ ndo Mariya Mangadala, Suzana, la Jɔana wadi aki okambi wa Nkumekanga Hɛrɔdɛ.

Oko watatetemala olimu wa Yeso pama, mbataleke ndo wamanu tomba lo dikambo di’olimu akɔ. Wambela Yeso kanga ɔdiɛngɛ ɔmɔtshi lele tshungu ndo lumi. Lam’owɔkɔnɔdi Yeso, lo mbotshungola oma lo lɔhɔmbɔ l’ɔdiɛngɛ, nde ambotatɛ ntɛkɛta ndo mɛna, ko elui w’anto wamamba woho w’anyanya. Wôtatɛ mbuta ɔnɛ: “Aha [Ɔna, NW] Davidi one?”

Elui w’anto wambodinga luudu lodjashi Yeso, ɔnkɔnɛ nde l’ambeki ande hawokoke ndo ndɛ kânga yangɔ. Lâdiko dia wanɛ wakanyiya ɔnɛ ondo nde mbele “[Ɔna, NW] Davidi,” ekɔ ndo afundji la Afarisɛ woye oma la Jerusalɛma dia ndjowɔnyɔla. Lam’oki ewotɔ wa Yeso lofunguso lambotomba l’ɔtɛ ande, vɔ wamboya dia ndjowonda. L’ɔkɔkɔ akɔna?

Mɛtɛ, kânga anango Yeso hawetawɔ polo ndo l’etena kɛnɛ ɔnɛ nde ekɔ Ɔna Nzambi. Ndo nto, vɔ hawokanyiya ɔnɛ Yeso, ɔnɛ lakole lo asho awɔ la Nazarɛta, kokaka tondja lofunguso la wamanu wa ngasɔ. Diɔ diakɔ diakanyiyawɔ ɔnɛ Yeso ambongayɔ. Vate: “Ndi ambudjo dadi,” ko wôlanga monda dia ntshɔ la nde.

Koko, tolembetelo t’ɔnɛ Yeso akakɔnɔdi pami kaki l’ɔdiɛngɛ mɛnamaka hwe. Afundji la Afarisɛ mbeyaka mɛtɛ ka dikambo sɔ ndo vɔ hawokoke dianguna. Ɔnkɔnɛ, dia vɔ mɔnyɔla Yeso, vɔ wambotɛ anto ɔnɛ: “Untu one hatundja edienge tshikima lu wulu wa Belezebulu, uwandji w’edienge.”

Oko weyande tokanyi tawɔ, Yeso ambelɛ afundji l’Afarisɛ oya le nde ko ambowatɛ ate: “Diulelu tshe diatana, diatulanaka. Usumba tshe kana khumbu tshe katana heyi nshikikala. Naka Satana atutundjaka Satana, keti ndi ambatana. Ku ukundi ayushikikala diulelu diandi?”

Ande ɛtɛkɛta wahakoke mbidja tamu lee! Lam’ele Afarisɛ mbutaka ɔnɛ amɔtshi wa l’atei awɔ tondjaka ɛdiɛngɛ, Yeso ambowambola ate: “Naka dimi oso atutundjaka edienge la wulu wa Belezebulu, ku an’anyu wat[â]tundjaka uma lu wulu wa na?” Kɛdikɛdi, akambo wahindɛwɔ Yeso mendanaka ndo la wɔ. Oma lâsɔ, Yeso ambota ate: “Naka dimi latutundjaka edienge uma lu wulu wa [n]yuma ka [Nzambi, NW], ke[t]i diulelu dia [Nzambi, NW] diambuyakaka le nyu.”

Dia nde mɛnya ɔnɛ woho watondjande ɛdiɛngɛ ekɔ djembetelo yɛnya dia nde ndeka Satana wolo, Yeso ambota ate: “Wuhu akona wukuki untu mboto lu luudu la kanga wulu, la nanya diango diandi tshe, naka ndi hatakeleki kanga wulu? Tshikima ndi ambutawukeleki, ku ndi ndjufunda luudu landi. One laha kame la mi, kantuna. One lahasanganya la mi diango kadianganya.” Mɛtɛ, Afarisɛ wamboyaɛnya ɔnɛ vɔ wekɔ ekambi waki Satana nɛ dia vɔ wekɔ lo ndɔshana la Yeso. Vɔ wekɔ lo mengesola Ase Isariyɛlɛ oma le nde.

Ɔnkɔnɛ, Yeso ambewola atunyi ande, ekambi wa Satana, ɔnɛ: “Untu tshe lateketa diui dia kolo lu dikambu dia [nyuma k’ekila, NW], hadimanyiama l’etena kene, kana l’etena kayayi.” Afundji asɔ l’Afarisɛ wambosala pɛkato kahadimanyiamaki nɛ dia, l’okonda tshɛ, vɔ wekɔ lo manguna dihindo dimɔtshi diotshami oma l’ekimanyielo ka nyuma k’ekila kaki Nzambi ko mbutaka ɔnɛ oma lo wolo wa Satana mbotshamidiɔ. Mateu 12:22-32; Mako 3:19-30; Luka 8:1-3; Joani 7:5.

▪ Woho akɔna wotshikitanyi lɔkɛndɔ la Yeso la hende losadinde la Ngalileya la lɔnɛ la ntondo?

▪ Lande na kayanga ewotɔ wa Yeso dia monda?

▪ Woho akɔna wambohemba Afarisɛ dia mɔnyɔla ahindo wasala Yeso, ndo woho akɔna wambɛnya Yeso ɔnɛ awui tshɛ watawɔ wekɔ kashi?

▪ Afarisɛ asɔ wekɔ l’onongo wa dikambo diakɔna, ndo lande na?