Tshapita 42

Yeso ambohangwɛ afarisɛ

YESO ambolembetshiya ate: Naka oma lo wolo wa Satana mbatondjami ɛdiɛngɛ, kete Satana ambatana. Nde ambotetemala mbuta ate: “Nyuluwanya utamba, nyuluwanya ndu elua awo; kana nyulanya utamba, nyulanya ndu elua awo, ne dia utamba ateyamaka uma l’elua awo.”

Onto lata ɔnɛ Yeso ekɔ lo ntɔ elowa w’ɛlɔlɔ, mbuta ate tondjaka ɛdiɛngɛ, oma lo wolo waki Satana, ekɔ kanga enginya. Naka elowa wekɔ ɛlɔlɔ, kete otamba awɔ hawokoke ndjâla ɔhɔndju. Lo wedi okina, elowa w’ɛhɔndju waki Afarisɛ, mbuta ate awui wahindɛwɔ Yeso, mɛnyaka ɔnɛ vamɛ mbambɔhɔndaka. Yeso ambowatɛ ate: “Nyu ana wa akhuha! ukundi weyanyu mvuta akambu w’ololo, lam’enyu kolo? Ne dia unyo atoteketaka uma lu efula k’akambu weli l’utema.”

Lam’ele ɛtɛkɛta aso mɛnyaka kɛnɛ kele l’etema aso, lâsɔ oma lo kɛnɛ katondjaso oma l’onyɔ mbayotolomboyama. Yeso ate: “Dimi lambunyutela nti: Lu lushi l’elumbwelu, antu wayuta dikambu dia aui tshe a wutata wakawataka. Ne dia we ayuyindjama uma lu aui aye, ndu ayanyema uma lu aui aye.”

Koyanga mbambosala Yeso akambo wa mamba, afundji la Afarisɛ wambowotɛ ɔnɛ: “Umbetsha, shu nangaka mena djimbitelu motshi uma le ye.” Kânga mbahɛnyi anto asɔ wa la Jerusalɛma ahindo wasala Yeso la asho awɔ vamɛ, tolembetelo tɛnama la asho ndo tahakoke mbidjama tamu tekɔ. Diɔ diakɔ diambotɛ Yeso ewandji w’Ase Juda ate: “Wa lu lolonga la kolo la luseka watuyangaka djimbitelu. Keli hawuwasha nduku djimbitelu, tshikima djimbitelu ya umvutshi Jona.”

Oma lâsɔ, Yeso ambolembetshiya kɛnɛ kalangande mbuta, ata ate: “Uku aki Jona l’utema a lusi la wuki tanyi tusatu la etshu esatu; osoku mbayuyala On’a untu tanyi tusatu la etshu esatu l’atei a kete.” L’ɔkɔngɔ wa lose mbɔmɛna, Jɔna akatombe, oko onto lambolɔ, ɔnkɔnɛ Yeso ekɔ lo mbuta ɔnɛ nde ayovɔ ko mbolɔ lushi la sato. Koko, kânga lam’ayondoyolɔ, ewandji w’ɛtɛmwɛlɔ wayoyokasha “djimbitelu ya Jona.”

Ɔnkɔnɛ, Yeso ekɔ lo mbuta ɔnɛ Ase Niniva, wanɛ wakakadimola etema l’esambishelo kaki Jɔna, wayolɔ l’etena k’elombwelo ndo wayoyanya Ase Juda watona Yeso. Nde ambɔtɛkɛta nto dikambo diaki nkumekanga ka omoto ka Shɛba kakaye oma lo tokoma ta nkɛtɛ dia ndjôka lomba laki Sɔlɔmɔna ko akayɔngɛnangɛna kɛnɛ kakandɛnyi ndo kakandoke. Yeso ate: “One luleki Solomona wuki eko lane.”

Oma lâsɔ, Yeso amboka wɛɛla w’onto ɔmɔtshi lambotomba ɔdiɛngɛ oma lo demba. Koko, onto ɔsɔ halodjisha dihole dia hwe diotshikadi l’akambo w’ɛlɔlɔ, ɔnkɔnɛ, ɛdiɛngɛ esambele woleki kɔlɔ wamboyowɔtɔ. Yeso ate: “Osoku mbayuyala le wa lolonga lone la kolo.” Wodja w’Isariyɛlɛ wakɛdiama ndo ɛlɔngɔswɛlɔ efula wakasalema l’atei a wodja akɔ—wate kana oko otombelo w’ɔdiɛngɛ lo tshanda mɔtshi. Koko, lam’ele wodja ɔsɔ mɔnyɔlaka amvutshi wa Nzambi, polo ndo lo mɔnyɔla otondo wa Kristo, dikambo sɔ mɛnyaka ɔnɛ kɔlɔ kawɔ kamboleka ndo kɛnɛ kaki lawɔ ntondo.

Wonya watɛkɛta Yeso, nyango l’anango wamboya ko wamboyemala l’olui w’anto. Onto ɔmɔtshi amboyowotɛ ate: “Enda, nyo l’ananyo ane wemadi l’andja, wayanga nkutela diui.”

Yeso mbambolande ate: “Akona eli nyomi? Ndu wana weli analingu?” Mbatshumande ambeki ande lonya, ko nde ate: “Wane mbeli nyomi la analingu! Ne dia untu tshe latutshaka lulangu la Papa le l’ulungu, keli onalingu, ndu kadiemi, la nyomi.” L’ɛtɛkɛta ɛsɔ, Yeso ambɛnya ɔnɛ oyadi diokanelo diasande la nkumbo kande ka l’emunyi diekɔ wolo ngande, diokanelo diasande l’ambeki ande ndeka wolo. Mateu 12:33-50; Mako 3:31-35; Luka 8:19-21.

▪ Lande na kakokaso mbuta lo dikambo di’Afarisɛ ɔnɛ “otamba” la “elua” bu ɛlɔlɔ?

▪ “Djimbitelu ya Jona” kɛdikɛdi na, ndo woho akɔna wayoyokadjema djembetelo yakɔ shɔ l’ɔkɔngɔ diko?

▪ Woho akɔna wafɔna wodja w’Isariyɛlɛ wa l’eleko ka ntondo l’onto lambotomba ɔdiɛngɛ oma lo demba?

▪ Woho akɔna waka Yeso epole ɔsɛkɛ dia mɛnya diokanelo di’oshika diasande l’ambeki ande?