Tshapita 45

Ndoko lakafɔnyaka ɔnɛ nde ayoyala ombeki

ANDE dikambo dia wɔma diambotomba lokumi Yeso l’okongo lee! Apami ahende wa ngala ka mamba wambotomba oma la waombo wele suke ko wambokungusɔ oya le nde. Vɔ wekɔ l’ɛdiɛngɛ. Bible ndekaka tɛkɛta dikambo di’ɔtɔi a l’atei awɔ nɛ dia ondo nde mboleki ngala ndo mbambosowa edja k’efula lo lɔhɔmbɔ l’ɛdiɛngɛ oleki onyande.

Ay’edja efula, pami kengo ka kɛtshi efula ekɔ lo teteta otakataka lo waombo. Nshi tshɛ, yanyi oko yanyi, otsho oko otsho, nde pangɔhangɔka ndo ndjahumuyaka ave. Lam’ele nde ekɔ ngala efula, ndoko onto lakoka mbidjɛ lo mboka kɛsɔ. Wakahembe weoho tshɛ dia mbokeleka, koko nde pembolaka mɔlɔla ndo mbolaka lowete la mbolo lawodjawɔ l’ekolo. Ndoko lakoka mbâhemɛ.

Pami kakɔ ambosukana oya le Yeso, amboyɔkɔ l’ekolo ande, ko ɛdiɛngɛ wawâhemɛ wambôtshutshuya dia nde pangɔhangɔ ɔnɛ: “Dikambu diakona diasami la ye, we Jesu, we On’a [Nzambi, NW] Khum’Ulungu? Dimi lambukutshiba lu lukumbu la [Nzambi, NW] nti: Tunsuyaki!”

Koko Yeso nde lande ate: “We odienge, utumbi uma le untu one.” Mbawombolande ate: “Lukumbu laye na?”

Ko ɔsɔ nde l’ande ate: “Lukumbu lami leli ‘Ului a Wuki.’” Ɛdiɛngɛ ngɛnangɛnaka lam’ɛnawɔ anto wahemɛwɔ wasowa, ondo vɔ ngɛnangɛnaka lo woho wa kɔlɔ dia tshumana olui ko sangatɛ onto ɔtɔi dia mbosalɛ kɔlɔ. Koko, lam’ambowohomana la Yeso, vɔ wôwɔsɛngasɛnga di’aha nde mbatoma lo difuku diaha l’ekomelo. Dikambo sɔ tɛnyaka nto ɔnɛ Yeso ekɔ la wolo efula; nde mbahemɛ ndo ɛdiɛngɛ wa ngala. Diɔ mɛnyaka nto dia ɛdiɛngɛ mbeyaka ɔnɛ yɛdikɔ ya komelo yakawaɔsɛ Nzambi ele dia vɔ ntshɔ lo difuku diaha l’ekomelo vɔ l’owandji awɔ, Satana Diabolo.

Lemba lɔmɔtshi la sombo suke la 2 000 lekɔ lo ndɛ lo dikona diele suke. Diɔ diakɔ diambota ɛdiɛngɛ vate: “Ututumi le sumbu ku, tutuyôto.” Mbokɛmaka dia, ɛdiɛngɛ mbokaka ɔlɔ lam’ɔtɔwɔ l’alemba wa ditongami dia l’emunyi dia disalɛ kɔlɔ. Lam’ambowasha Yeso dikimɔ dia vɔ mbɔtɔ sombo, 2 000 yakɔ tshɛ yambokungusɔ oma l’oholola, yambotoyatambiya lo ndjale, ko yɔ tshɛ yambovɔ.

Lam’ɛnyi wanɛ walama sombo dikambo sɔ, vɔ wambolawɔ l’oshimu dia totɛ ase osomba l’ase toshamba. Lam’okiwɔ dikambo sɔ, anto wamboya dia ndjenda kɛnɛ kotumbi. Vɔ wambokoma ko wambɛna pami kakɔ kotumbi ɔdiɛngɛ oma lo demba. Vɔ wambamba heyama, nɛ dia nde akalɔtshi dihɔndɔ ndo yimba yande yaya ki, odjashi l’ekolo wa Yeso!

Wanɛ wɛnyi dikambo sɔ la asho awɔ vamɛ wambɔkɔndɔlɛ akina woho wɔkɔlɔnganyi onto akɔ. Vɔ wambowatɛ ndo woho wovwe lemba la sombo nyɔi ka diambo. Lam’oki anto dikambo sɔ, vɔ wambondama la wɔma wa mamba, ko wambɔsɛngasɛnga Yeso dia nde mumɔ lo wodja awɔ. Ɔnkɔnɛ, Yeso ambetawɔ awui awɔ ko ambɔtɔ lo wâto. Ɔnɛ laki l’ɛdiɛngɛ ɔ̂sɛngasɛnga Yeso dia nde ntshɔ la nde. Koko Yeso ambowotɛ ate: “Utshu lakaye, le engenyi aye. Utâsanyia akambu a waki wukutshedi Khumadiondjo, la ketshi kakandakuki.”

Mbala tshɛ, Yeso mbutɛka wanɛ wakɔnɔyande di’aha vɔ mbutɛ ndoko onto, nɛ dia nde halange anto ndjoyala la tokanyi tɔmɔtshi oma l’eshimu wa lofudja. Koko nde ambosala dikambo sɔ lo yoho ya lânde nɛ dia onto ɔsɔ laki l’ɛdiɛngɛ ayotosambisha anto wele ondo Yeso hatokondja etena ka mɛnana la wɔ. Ndo nto, pami kɛsɔ ayoyala oko tshondo ya djembetelo yɛnya ɔnɛ Yeso ekɔ la wolo wa sala akambo w’ɛlɔlɔ, ko dikambo sɔ diayɛnya kashi k’awui wa kɔlɔ wakokawɔ tɛkɛta lo dikambo di’ovwelo wa sombo.

Lo ndjela kɛnɛ kowote Yeso, pami kaki l’ɛdiɛngɛ ambotshɔ. Nde ambotatɛ sambisha lo Dekapɔli di’otondo akambo tshɛ wôsale Yeso, ko anto wekɔ lo mamba. Mateu 8:28-34; Mako 5:1-20; Luka 8:26-39; Enyelo 20:1-3.

▪ Ondo lande na kaleka Bible tɛkɛta dikambo di’onto ɔtɔi laki l’ɛdiɛngɛ lam’ele anto ahende mbewɔ?

▪ Kakɔna kɛnya ɔnɛ ɛdiɛngɛ mbeyaka dia vɔ wayokadjema lo difuku diaha l’ekomelo?

▪ Lo menda mɛtɛ, lande na kalanga ɛdiɛngɛ mbahemɛ anto la wa nyama?

▪ Lam’ele Yeso halange anto wakɔnɔyande mbekola lokumu lande, lande na kambondotɛ pami kaki l’ɛdiɛngɛ ntondo dia nde tosanyɛ anto akina dikambo diambondosalɛ?