Tshapita 49

Yeso ambotshɔ nto dia tosambisha la Ngalileya

ONDE Yeso ayotatɛ mbɔladia olimu ande dia mumuya yema l’ɔkɔngɔ wa nde sala lotumu efula l’esambishelo suke l’ɛnɔnyi ehende w’etondo? Atonga, koko nde ambɔhɛtshahɛtsha olimu akɔ lo munda lɔkɛndɔ lokina, lɔkɛndɔ la sato la la Ngalileya. Nde ekɔ lo takindola l’esomba tshɛ ndo lo tongelongelo ta lɛkɔ, atalakanya anto lo mvudu y’ɛtɛmwɛlɔ ndo atasambisha lokumu l’ɔlɔlɔ la Diolelo. Kɛnɛ kɛnyinde lo lɔkɛndɔ lɔnɛ kamboleka mbɛ̂nya ohomba wa nyomoleka monga l’ohetoheto l’olimu w’esambishelo.

Lo dihole tshɛ diatshɔ Yeso, nde mɛnaka elui w’anto wele l’ohomba w’ɛkɔnwɛlɔ ndo w’ekimanyielo ka lo nyuma. Vɔ wekɔ oko ɛkɔkɔ waha l’olami, wahɛnyahɛnyama, ndo bu l’ekimanyielo, ko nde ambowaoka kɛtshi. Nde ambotɛ ambeki ande ate: “Diango dia dinela dieko efula, keli ekambi mbeli tshitshe. Okone nyolombe Khumadiondjo, kanga dinela, keli ndi atumi ekambi lu dinela diandi.”

Yeso mbeyaka woho wahombande sala dikambo sɔ. Nde ambotshumanya apɔstɔlɔ ande 12, wanɛ wakandasɔnɔla ambeta oko yɛdikɔ y’ɔnɔnyi w’otondo. Nde ambâkakitola l’elui esamalo w’ahende ahende, ko ambowasha alako amɔtshi. Nde ambâlembetshiya ate: “Tanyutshokaki l’atei w’asi wedja, tanyotoki l’usumba tshe w’asi Samariya. Keli nyutshu le ekoko wakashisho lu khumbu ka Isariyele. Lam’ayunyutatshokaka, kanyutasambishaka nyati: Diulelu dia l’ulungu diaya suki.”

Diolelo diahombawɔ sambisha ele diolelo diakawaetsha Yeso dia vɔ nɔmbaka lo dɔmbɛlɔ di’ɛnyɛlɔ diakandâlakanya. Diolelo diambosukana lo yoho yele, Yeso Kristo, Nkumekanga kakasɔnama oma le Nzambi, ekɔ lâwɔ. Di’ambeki ande shikikɛ ɔnɛ sho mɛtɛ tekɔ ɛmɛnyi wa lowandji lɔsɔ laki Nzambi, Yeso ambowasha wolo wa vɔ kɔnɔla hemɔ ndo wa mbolola kânga edo. Nde ambowatɛ dia vɔ sala akambo asɔ tshɛ aha la nɔmba falanga kana diangɔ dimɔtshi.

Oma lâsɔ, nde ambotɛ ambeki ande di’aha vɔ ntshɔ la diangɔ dia l’emunyi lo lɔkɛndɔ lawɔ l’esambishelo. “Tanyudjaki paunyi, fesa, kuyanga ohotela lu atapa wa lu eya anyu. Tanyukimelaki tapa lu lokendo lanyu, kuyanga ekutu ehendi, kuyanga sabata, kuyanga danga, ne dia ukambi kukuki dia nkundja mbu yandi ya nde.” Wanɛ wetawɔ losango latawɛmbɛ wayokadimola etema ndo wayowasha pango la diangɔ dia ndɛ. Diɔ diakɔ diambota Yeso ate: “Lam’ayunyukuma l’usumba kana lu ngelu tshe, kanyuyangi untu lukuki nyulungula. Kanyudjase la ndi, edja ndu lam’ayunyunela.”

L’ɔkɔngɔ diko, Yeso ambâlakanya woho wakokawɔ sawola l’ase luudu dia mbaewoya losango la Diolelo. Nde ambowatɛ ate: “Lam’ayunyoto lu luudu, kanyusha wane weli loko moyo. Naka wane weli lu luudu lako weko ololo, ki kanyu kayali loko. Keli naka vo kema ololo, ki kanyu kakaluli le nyu. Untu lahunyulungula, kuyanga mbuka aui anyu, lam’ayunyutumba lu luudu lako kana l’usumba ako, kanyuhumeli ditshu di’uma lu akaka anyu.”

Yeso ambɛnya ɔnɛ osomba tshɛ wahetawɔ losango lawɔ wayoyala l’elombwelo koleki wolo. Nde ambolembetshiya ate: “Mete kanyutelami nti: Lu lushi l’elumbwelu, fono ka usumba ako kayuleka ka kete ya Sodoma la Ngomora.” Mateu 9:35–10:15; Mako 6:6-12; Luka 9:1-5.

▪ Etena kakɔna kambomɛ Yeso lɔkɛndɔ lande la sato l’olimu w’esambishelo la Ngalileya, ndo kakɔna kambondɛna?

▪ Kakɔna kambotɛ Yeso apɔstɔlɔ ande 12 lam’amondâtoma dia vɔ tosambisha?

▪ Lande na kakoka ambeki mbetsha anto ɔnɛ Diolelo diaya suke?