Tshapita 57

Yeso mbokaka amɛnyi fɔnu kɛtshi

L’ƆKƆNGƆ wa manya Afarisɛ l’ɔtɛ wa mbekelo yawɔ y’ashidi ya lokaki, Yeso ambotshɔ l’ambeki ande. Ondo wɛ mbohɔka ɔnɛ yema la ntondo, nde akalange ntshɔ l’ambeki ande dia tomuya yema, koko nde kokoka ntshɔ nɛ dia olui w’anto wakâyedi. Kakianɛ, nde l’ambeki ande wambotshɔ lo bɛtshi dia nkɛtɛ dia Tura la Sidɔna diele lo kilɔmɛtɛlɛ mɔtshi lo lɛkɛ la ngɛl’a nkushi. Ondo ɔnɛ mbele lɔkɛndɔ lâmɛ lambondosala nde l’ambeki ande l’andja wa wodja w’Isariyɛlɛ.

L’ɔkɔngɔ wa vɔ kondja luudu la mbidjasɛ, Yeso ambota ɔnɛ halange onto mbeya dihole dieso. Koko, kânga lo lɛtshi lɔnɛ la nkɛtɛ l’Ase Wedja, nde hakoke ntshikala lo woshɛshɛ. Omoto ɔmɔtshi l’Ose Ngirika, lakotɔ la Finikiya ka la Suriya, ambowɛna ko ambomɛ mbolelɛ ate: “We Khumadiondjo, kanula ya Davidi, umbuki ketshi! On’ami a umuntu ambusuyama wulu l’odienge.” Koko Yeso hôkaloya ndoko dui.

L’ɔkɔngɔ wa tshanda mɔtshi, ambeki mbatɛwɔ Yeso vate: “Ûkaluya, ne dia ndi eko lu ndjahangohango l’okongo asu.” Dia nde mɛnya lande na kahandalange nkaloya dui, Yeso ambota ate: “Dimi lakatumama paka le ekoko wakashisho lu khumbu ka Isariyele.”

Koko omoto hahekɔ. Nde ambosukana oya le Yeso ko ambokusama la ntondo kande. Nde ôwɔsɛngasɛnga ate: “Khumadiondjo, unkimanyia.”

Asolo wa Yeso mɛtɛ wambonandema lam’okinde woho wɔ̂sɛngasɛnga omoto ongo oma ka tshina di’otema! Koko nde ambɛnya ɔnɛ ɔkɛndɛ ande wa ntondo ele dia nkambɛ Isariyɛlɛ, wodja wa Nzambi. Wonya akɔ wâmɛ, ondo dia nde pemba mbetawɔ kande mbambondɔtɛkɛta dikambo dia ndjambiya kele l’Ase Juda otsha le ase wedja ekina, ata ate: “Hasungana dia mbosa ma dia ana, ku mbukela [ana wa mfɔ, NW].”

Mɛtɛ, dui dia Yeso dioludi la ngandji ndo elungi kande mɛnyaka kɛtshi kokande wanɛ wele kema Ase Juda. Nde ambokitshakitsha ndo wɛdikelo w’Ase Wedja la wa mfɔ lo mbaelɛ ɔnɛ “ana wa mfɔ,” kana tɔfɔfɔ. Lo dihole dia nde mboka kandji l’asolo, omoto ɔsɔ amboyela paka kanyi yotshi Yeso lo woho wayadiya Ase Juda lâdiko di’anto akina ko ambota la ndjakitshakitsha ate: “Elu, Khumadiondjo, ndu [ana wa mfɔ, NW] mbatolekaka fusa yatokokaka uma lu mesa a khumewo.”

Yeso mbôkadimolande ate: “Umuntu, mbetawo kaye keko wuki! Diatshami le ye uku alangaye.” Ko dikambo sɔ diambotshama! Omoto ambokalola lakande, ko ambototana ɔnande la omoto lo tange, ambɔkɔnɔ tshɛ.

Yeso l’ambeki ande wambotenyanya wodja akɔ oma lo lɛtshi la nkɛtɛ la Sidɔna, suke la ndjale, ko wambotshɔ otsha la diko di’Ɔkɛdi wa Jɔrɔdana. Aha la tamu, vɔ wambotenyanya Jɔrɔdana l’ekolo, la diko dia Ndjale ka Ngalileya, ko wambokoma lo lɛtshi la nkɛtɛ la Dekapɔli, lo lɛkɛ la ndjale la l’ehotwelo ka wonya. Lam’okumiwo lɛkɔ, wambodɛ lo dikona dimɔtshi, koko elui w’anto wamboya le wɔ ko wambela Yeso akanga wa tshumbe, akanga a dikɔmɔ, tutshungu, nyumi, la ɛkɔnyi ekina efula. Vɔ wambâkitsha l’ekolo wa Yeso, ko nde ambâkɔnɔla. Anto wamamba efula lam’ɛnyiwɔ akanga wa lumi wɔtɛkɛta, akanga wa tshumbe wɔkɛndakɛnda ndo akanga wa totshungu wɛna; ko wambotatɛ ntombola Nzambi k’Isariyɛlɛ.

Yeso amboleka mbidja yimba yande le pami kɛmɔtshi kele kanga lohoke ndo dikokoma. Akanga a poke hawoviya la ndjakiyanya, djekoleko l’atei w’olui w’anto. Ondo Yeso ambɛna obalobalo wele la pami kakɔ. Ɔnkɔnɛ, nde ambowɔsa la kɛtshi tshɛ ko ambotomba la nde oma l’atei w’olui w’anto. Lam’ayawɔ vamɛ ato, Yeso ambowɛnya kɛnɛ kayangande mbosalɛ. Nde ambodja mpita yande lo atui ande, ko l’ɔkɔngɔ wa nde pɔngɔla nsɔi, nde ambonanda lolemi lande. Oma lâsɔ, Yeso ambâlɛ l’olongo, ambosikuma, ko ambota ate: “Udihwami.” Wonya akɔ wâmɛ, atoyi wa pami kakɔ wambodihɔ, ko nde ambotatɛ tɛkɛta dimɛna.

L’ɔkɔngɔ wa vɔ mɛna Yeso ambɔkɔnɔla anto efula, elui w’anto wambotatɛ mɛnya lowando lawɔ. Vɔ wota vate: “Ndi ambutsha akambu tshe ololo. Ndi mbukiaka ndu akanga a puki, ndu nteketshaka ndu akanga a nyumi.” Mateu 15:21-31; Mako 7:24-37.

▪ Lande na kele Yeso hakɔnɔdi ɔn’aki omoto l’Ose Ngirika ko wonya akɔ wambondɔ̂sɛngasɛngaka?

▪ Lende ambotshɔ Yeso l’ambeki ande l’ɔkɔngɔ diko?

▪ Woho akɔna wambɛnya Yeso kɛtshi kokande ehoke kele la dikokoma?