Tshapita 59

Yeso ênde mɛtɛ na?

WÂTO watɛmbɛ Yeso nde l’ambeki ande wambemala la Bɛtɛsayida, ko anto wamboya la kanga tshungu oya le Yeso, wambɔ̂sɛngasɛnga dia nde munanda pami kɛsɔ ko mbɔkɔnɔla. Yeso ambôkimɛ lo lonya, ambotomba lande oma lo ngelo, ko l’ɔkɔngɔ wa nde mbotɛ nsɔyi lo asho, nde ambowombola ate: “We menaka engo kemotshi?”

Ko pami kakɔ ambôkadimola ate: “Dimi lambena antu, keli lambuwaena wakendakenda uku etamba.” Ko Yeso ambonanda asho ande, ambɔ̂sɛnya, ko nde ambotatɛ mɛna dimɛna. Oma lâsɔ, Yeso ambɔ̂kɛndja otsha lakande koko ambowotɛ di’aha nde mbɔtɔ lo ngelo.

Kakianɛ, Yeso ambotshɔ l’ambeki ande otsha la Kayisariya Filipi, lo lɛkɛ la ngɛl’a nkushi la Palɛstina. Kayisariya ekɔ ngelo katanema lo dihole dia dimɛna efula, lo mɛtɛlɛ 350 lâdiko dia yɛdikɔ ya ndjale, ndo di’onto koma lɛkɔ, nde pombaka munda lɔkɛndɔ la kilɔmɛtɛlɛ 50 la mɔtshi. Lɔkɛndɔ lakɔ mbɔsaka ondo nshi hiende.

L’atei a mboka, Yeso ambɔ̂ngɔ ko ambotshɔ ndamɛ dia tɔlɔmba. Nde ekɔ lo ndjakiyanya efula lo dikambo di’ambeki ande, nɛ dia ambotshikala paka ngɔndɔ divwa kana dikumi tsho la ntondo ka nyɔi kande. Ambeki efula wakatshike mboyela. Mɛtɛ, akina wekɔ l’okandokando ndo wambɔkɔmɔ otema nɛ dia Yeso kombetawɔ di’anto mbodja nkumekanga, ndo nɛ dia nde kombisha atunyi ande djembetelo y’oma l’olongo yɛnya lowandji lande lam’akawawodjaka tamu. Lo tokanyi t’apɔstɔlɔ ande, akinde mɛtɛ? Vɔ wamboya le nde lo dihole dialɔmbande, ko Yeso ambowambola ate: ‘Anto atawɔ eemi?’

Ko vɔ wambôkadimola ɔnɛ: “Amotshi mvutaka vati: Joani Ubatizanyi; akina vati: Elidja; akina vati: Jeremiya, kana otoi omotshi w’amvutshi.” Mɛtɛ, anto kanyiyaka ɔnɛ Yeso ekɔ ɔmɔtshi a l’atei w’anto asɔ lambolɔ oma lo nyɔi!

Yeso ambowambola ate: “Ya ukundi atanyu, emi?”

Aha la tshimbatshimba, Petero ambokadimola ate: “Kristu keye On’a [Nzambi kasɛna, NW].”

L’ɔkɔngɔ wa nde mbetawɔ okadimwelo waki Petero, Yeso ambota ate: “Dimi lambukutela nti: Petero keye; lu dive ne kayumuhika ekelizia ami. Ku wulu wa nyoi hawukileka wulu.” Lanɛ mbambota Yeso mbala ka ntondo ɔnɛ nde ayohika etshumanelo ndo kânga nyɔi hatokimɛ ase etshumanelo kakɔ oko fumbe l’ɔkɔngɔ wa lɔsɛnɔ lawɔ la kɔlamelo lanɛ la nkɛtɛ. Oma lâsɔ, nde ambotɛ Petero ate: “Dimi layukusha sapi ya diulelu dia l’ulungu.”

Lam’otshinde ɔsɔku, Yeso ambɛnya ɔnɛ Petero ayokondja waɛsɛ wa lânde. Koko aha ɔnɛ Petero kaya owandji w’apɔstɔlɔ, ndo aha nde mbele etshina k’etshumanelo. Yeso ndamɛ mbele Dive di’Etshina kayohikama etshumanelo kande. Koko, Petero akakondja sapi shato yahombande kamba layɔ, lo yoho ya didjidji, dia ndjiholɛ elui w’anto diaaso dia vɔ mbɔtɔ lo Diolelo dia l’olongo.

Petero ayoyokamba la sapi ka ntondo lo Pɛntɛkɔsta ka l’ɔnɔnyi 33 T.D. dia nde mɛnya Ase Juda wanɛ wamboyatshumuya kɛnɛ kahombawɔ sala dia kondja panda. Nde ayokamba la sapi ka hende yema l’ɔkɔngɔ, dia ndjiholɛ ambetawudi w’Ase Samariya diaaso dia vɔ mbɔtɔ lo Diolelo diaki Nzambi. Oma lâsɔ, nde ayokamba la sapi ka sato l’ɔnɔnyi 36 T.D. dia ndjiholɛ Ase Wedja wele kombahema ohekele, Kɔnɛliyo nde l’asekande, diaaso diakɔ diamɛ.

Yeso ambotetemala sawola l’apɔstɔlɔ ande. Vɔ wambosowɔ alemba lam’owatende ɔnɛ layanga tosowa ndo tovɔ la Jerusalɛma. Lam’ele vɔ haweye ɔnɛ Yeso ayolɔ dia tɔsɛna l’olongo, Petero ambowɔsa otsha lo diɛta. Nde lande ate: ‘Ɔdia solo Nkumadiɔndjɔ. Dikambo sɔ hadiotokokomɛ ndoko yema.’ Yeso mbasekesɔnde ko nde ate: “Satana, utshimbi l’okongo ami! Utamba a ntakanyami mbeye, ne dia we kema [la tokanyi ta Nzambi koko t’anto, NW].”

Mɛtɛ, aha paka apɔstɔlɔ ato mbatɛ̂ngɔla la Yeso, koko ndo anto akina, diɔ diakɔ diambowaelɛ dia ndjâlembetshiya ɔnɛ kema dikambo dia wɔdu di’onto monga ombeki ande. Nde ate: “Naka untu alanga ndjelami, ndi embe utamba andi [w’asui, NW], andjeli. Ne dia untu tshe lalanga mamela lumu landi, ayulushisha. Keli untu tshe lashisha lumu landi dikambu diami, ayulutana.”

Eelo, naka ambeki wa Yeso nangaka mbetawɔma le nde, kete vɔ pombaka ndjâla la dihonga ndo la yimba ya ndjasɛka. Nde ate: “Untu tshe l’atei a lolonga lone la luseka ndu l’akambu wa kolo layumbuka dimi la aui ami sonyi, ndu dimi, On’a untu, layuwuka sonyi lam’ayumuya lu lutumbu la Papa, kame la andjelo w’ekila.” Mako 8:22-38; Mateu 16:13-28; Luka 9:18-27.

▪ Lande na kakanyiya Yeso lo dikambo di’ambeki ande?

▪ Lo ndjela tokanyi t’anto amɔtshi, Yeso ênde?

▪ Sapi yakɔna yambowosha Petero, ndo woho akɔna wayondokamba layɔ?

▪ Lohango lakɔna lambowohangwɛ Petero, ndo lande na?