Tshapita 64

Dako dia nyimanyiyanaka

ONDO Yeso êke paka lo luudu la la Kapɛrɛnauma nde l’ambeki ande. Nde oma la mbalembetshiya woho wakokawɔ kandolaka ekakatanu watomba l’asa onto la onyande, diɔ diakɔ diambowombola Petero ate: “Khumadiondjo, unyami ayuntshela kolo tena dingana dia dimi mbudimanyia?” Lam’ele ewandji w’ɛtɛmwɛlɔ w’Ase Juda mbetawɔka di’onto nyimanyiya onyande polo ndo lo mbala shato, ondo Petero amboyaɛnya ɔnɛ nde ekɔ l’otema w’ɔlɔlɔ efula, nɛ dia nde ambombola ate: “Edja ndu tena esambeli?”

Koko, mbalaka esangɔ engana wakotshɛ onto kɔlɔ kema dimɛna. Yeso ambongola Petero, awotɛ ate: “Dimi hankutedi nti: Edja ndu tena esambeli, keli nti: Edja ndu akumi esambeli [l’esambele, NW].” Ɔsɔku mbambondɛnya Petero ɔnɛ nde hahombe mbidja olelo lo mbala yahombande nyimanyiyaka ɔnango.

Dia nde tɔtɔmiya lo wɛɔngɔ w’ambeki ɔkɛndɛ wele lawɔ wa nyimanyiyanaka, Yeso ambowaokɛ wɛɛla ɔmɔtshi. Nde ambɔtɛkɛta dikambo dia nkumekanga kɛmɔtshi kalanga mbikoya l’ase olimu ande. Wambela ose olimu ɔmɔtshi lambɔtɔ dibasa dia woke efula dia dɛnariyo 60 000 000. Nde bu ndoko l’ɛngɔ ka mbɔngɛlɛ. Oko walembetshiya Yeso, nkumekanga ambotoma dui dia vɔ mbosondja nde la wadiɛnde la anande woho wa vɔ ngɛla dibasa.

Lam’okinde ɔsɔku, ose olimu akɔ amboyakɔsha l’ekolo wa nkumɛnde ko ambɔ̂sɛngasɛnga ate: “Utukumbete, ku layukongela diango tshe.”

Nkumɛnde ambowoka kɛtshi ko ambôkimwɛ dibasa sɔ dia woke. Yeso ambotetemala mbuta ate, yema tshitshɛ l’ɔkɔngɔ diko, ose olimu akɔ ambotomba ko ambotohomana la onyande ose olimu lokolami dibasa diande dia dɛnariyo 100 to. Pami kakɔ kɛsɔ ambokimɛ onyande lo wodi ko ambotatɛ mbodja kumbɛ, ata ate: “Ongele dibasa diami.”

Koko onyande ose olimu bu ndoko la falanga ya mbɔngɛlɛ. Ɔnkɔnɛ, nde ambɔkɔ l’ekolo wa onyande lôkole ko ambotatɛ mbɔsɛngasɛnga ate: “Utukumbete, ku layukongela dibasa.” Otshikitanyi la nkumɛnde, ose olimu ɔsɔ bu la kɛtshi, nde ambodja onyande lo lokanu.

Yeso ambotetemala mbuta ate, lam’ɛnyi ekambi ekina dikambo diotshami, vɔ wambotshɔ ko wambototɛ nkumɛwɔ. Nkumɛwɔ amboka nkɛlɛ efula ko ambelɛ ose olimu akɔ. Nde lande ate: “We ukambi wa kolo! dimi lakakudimanyia dibasa diku tshe, ne dia we akansengasenga. Taki ololo ndu we mbuka unyaye ketshi, uku akamakuki?” Nkumɛnde ambondama la nkɛlɛ ko ambokimɔ ose olimu ɔsɔ lahokana kɛtshi le asoyanyi edja ndo lam’ayondɔngɛla dibasa diokolaminde.

Ɔnkɔnɛ, Yeso ambodihiya ate: “Osoku mba[yu]nyutshela ndu Papa leli l’ulungu, naka nyu hanyudimanyiya anyanyu kolo uma l’etema anyu.”

Ande dako dia dimɛna diatotɛ dia sho nyimanyiyanaka lee! Naka sho mbɛdika la dibasa dia woke, mbuta ate pɛkato, diakatokimwɛ Nzambi, kete oseka munga tshɛ kakoka ɔnangɛso Okristo tosalɛ kekɔ mɛtɛ tshitshɛ efula. Lâdiko dia lâsɔ, Jehowa Nzambi todimanyiyaka mbala nunu ko nunu. Mbala efula, shamɛ hateye ndo pɛkato yawosalɛso. Ko lâsɔ, onde hatokoke nyimanyiya kana kimwɛ ɔnangɛso esangɔ engana eto, kânga naka tekɔ lo mbonyangɛ lo dikambo dimɔtshi? Ohɔ kɛnɛ kaketsha Yeso lo Dako diande dia lo Dikona: Nzambi ‘ayotokimwɛ abasa aso, oko wakimwɛso ndo sho lawɔ akolami aso.’ Mateu 18:21-35; 6:12; Kolosai 3:13.

▪ Kakɔna kambotshutshuya Petero dia nde mumbola esangɔ engana wahombande nyimanyiyaka ɔnango, ndo lande na kakokande kanyiya ɔnɛ kanyi yande ya nyimanyiya edja ndo mbala esambele yekɔ ɔlɔlɔ efula?

▪ Otshikitanelo akɔna wele l’asa kɛnɛ kosadi nkumekanga lam’akɔsɛngisɛngi ose olimu ande ɔmɔtshi dia nde mbôka kɛtshi ndo kɛnɛ kambosala ose olimu akɔ lam’owɔsɛngisɛngi onyande?

▪ Wetshelo akɔna wakondjaso oma lo wɛɛla waki Yeso?