Tshapita 66

Lo difɛstɔ dia Tabɛrnakɛlɛ

YESO amboyala la lokumu efula l’edja k’ɛnɔnyi suke l’esato, tatɛ oma lo batismu kande. Nunu di’anto diamboshila la mɛna ahindo ande ndo nsango y’akambo watshande yambodiangana lo wodja w’otondo. Kakianɛ, anto wotshumanyi la Jerusalɛma dia ndjosala Difɛstɔ dia Tabɛrnakɛlɛ wambotatɛ mboyanga. Vɔ woyambola ɔnɛ: “Lendi endi na?”

Owanu wambotomba lo dikambo dia Yeso. Amɔtshi wekɔ lo mbuta ɔnɛ: “Untu ololo kendi.” Koko akina vate: “Kema, ndi atunganyiyaka antu.” Wekɔ lo ngunanguna awui efula wa ngasɔ l’edja ka nshi y’etatelo ka difɛstɔ. Koko ndoko onto lele la dihonga dia tɛkɛta akambo w’ɔlɔlɔ lo lokombo la Yeso la ntondo k’anto tshɛ. Vɔ hawokoke ntsha ɔsɔku, nɛ dia vɔ wekɔ lo mboka wɔma wa nongola dilanya oma le ewandji w’Ase Juda.

Yeso ambokoma l’atei atei wa difɛstɔ. Nde ambɔtɔ lo tɛmpɛlɔ, ko anto wambotâmba woho w’anyanya lo menda yoho ya dimɛna efula yalakanyande. Lam’ele Yeso kɔmbɔtɔ ndoko kalasa y’ewandji w’Ase Juda, Ase Juda wambotatɛ ndjambola ɔnɛ: “Ukundi weya untu one mukanda efula, lam’akindi kumbeka?”

Ko Yeso ambâlembetshiya ate: “Wetshelu ami aha wami, keli wa one lakantumi. Naka untu ayutsha lulangu la [Nzambi, NW], ndi ayeya wetshelu, kana uma le [Nzambi, NW] mbewo, kana dime kayata.” Wetshelo wa Yeso mamemaka ɛlɛmbɛ wa Nzambi. Ɔnkɔnɛ, mɛnamaka dia nde hayange lotombo lande hita, koko ekɔ lo nyanga lotombo la Nzambi. Yeso ambowambola ate: “Mose kunyusha elembe uka?” Ko nde ambâhangwɛ ate: “Keli nyu tshe, nduku untu [latowakitanyiyaka, NW].”

Oma lâsɔ, Yeso ambowambola ate: “Okoko wana wayanganyu ndjakami?”

Ampokami ande, ondo angɛndangɛnda woye oya lo difɛstɔ, haweye ɔnɛ ewandji w’ɛtɛmwɛlɔ wekɔ lo nanga ndjaka Yeso. Vɔ hawokoke mbetawɔ ɔnɛ onto ɔmɔtshi mbeyaka ndjâla la kanyi ya ndjaka ombetsha w’ɔlɔlɔ efula nganɛ. Diɔ diakɔ diakanyiyawɔ ɔnɛ Yeso ambekɔ yimba. Vɔ lande vate: “We eko la odienge? Akona ayanga nkudiaka?”

Oyadi olui w’anto mbeya kana haweyi, ewandji w’Ase Juda nangaka ndjaka Yeso. Ambeta oko ɔnɔnyi w’otondo l’etenyi, vɔ wakayange mbodiaka lam’akakɔnɔla Yeso onto ɔmɔtshi lushi la Sabato. Ɔnkɔnɛ, Yeso ambɛnya tokanyi tawɔ ta kashi ndo ta kɔlɔ lam’amondowambola ate: “Naka untu atahemaka uhekeli lushi [la sabato, NW], ne dia olembe wa Mose tawuvokaki, ya ukundi ambukanyu kele ne dia dimi lambokonoya untu lushi [la sabato, NW]? Tanyalelaki untu uku awenanyu, keli nyuwaleli la sambu k’ololo.”

Ko Ase Jerusalɛma, wanɛ weya dikambo diakɔ, wambotatɛ ndjambola ɔnɛ: “Aha ndi layangawo ndjaka one uka? Nyendi, ndi latuhunwelaka antu diui, ku vo hawuwutela nduku diui! Embuledi mbeyaka vati: Kristu kendi, uka?” Oma lâsɔ, Ase Jerusalɛma asɔ wambolembetshiya lande na kahawetawɔ ɔnɛ Yeso mbele Kristo, wata vate: “Shu mbeyaka lene uyi untu one. Lam’ayene Kristu, nduku untu layeya lene uyendi.”

Ko Yeso ambâkadimola ate: “Dimi kundja lu lulangu lami. Nyu mbeyakami, la nyu mbeyaka lene uyemi. One lakantumi eli mete ku nyu hanyeyi. Dimi mbêyaka, ne dia dimi lambuya uma le ndi, ndi kakantumi.” Lam’okiwɔ ɔsɔku, vɔ woyanga mbonda, kana ɔnɛ kele towodje lo lokanu ko kana dia mbodiakisha. Koko, ndoko lakoka ntsha dikambo sɔ, nɛ dia etena ka Yeso mvɔ katakoke.

Koko anto efula wamboyala la mbetawɔ le Yeso, ndo vɔ bu latɔ oyalayala. Nde akakɛndakɛnda lâdiko di’ashi, akɔ̂ladia lɔpɛpɛ, akɔ̂ladia asuku wa lo ndjale, akalesha nunu di’anto la mapa engana eto ndo la tosese, akakɔnɔla akanga a hemɔ, akakɛndjakɛndja akanga wa tshumbe, akasɛnya akanga a totshungu, akakɔnɔla akanga a sudi ndo akolola edo. Diɔ diakɔ diayambolawɔ ɔnɛ: “Undi, lam’ayene Kristu, ndi ayutsha tulimbitelu tuleki tone tatsha untu one?”

Lam’oki Afarisɛ olui w’anto wangunangna akambo asɔ, vɔ l’ɛlɔmbɛdi wa lâdiko wambotoma apulushi dia tonda Yeso. Joani 7:11-32.

▪ Etena kakɔna kambokoma Yeso lo difɛstɔ, ndo kakɔna katawɔ lo dikambo diande?

▪ Lande na kata anto amɔtshi ɔnɛ Yeso ekɔ l’ɔdiɛngɛ?

▪ Wanɛ wakadjasɛka la Jerusalɛma akanyiyawɔ lo dikambo dia Yeso?

▪ Lande na kamboyala anto efula la mbetawɔ le Yeso?