Tshapita 69

Wamanu lo dikambo dia shɛwɔ

WONYA wasalema difɛstɔ, owanu wamboleka fulanɛ lam’asa Yeso l’ewandji w’Ase Juda. Yeso ambetawɔ ate: “Dimi mbeyaka nti: Tukanula t’Abarahama mbenyu. Keli nyu nyatuyangaka ndjakami, ne dia diui diami kema la dihuli l’etema anyu. Dimi latutaka akambu wakamenyi uma le Papa, ndu nyu nyatutaka akambu wakanyenyi uma le Shenyu.”

Kânga mbahandatshi lokombo la shɛwɔ, Yeso ambɛnya hwe ɔnɛ shɛwɔ bu oko she. Oko wahaweye ɔnɛ lata Yeso, ewandji w’Ase Juda vɔande vate: “Abarahama keli [shɛso].” Vɔ wekɔ lo kanyiya ɔnɛ vɔ wekɔ la mbetawɔ kâmɛ oko kɛnɛ kaki l’Abarahama, ɔnɛ laki ɔngɛnyi wa Nzambi.

Koko, Yeso ambowasha sɔnyi lo mbâkadimola ate: “Utunduyala tukanula t’Abarahama mbenyu, tshiki nyututshaka uku akatshaka Abarahama.” Mɛtɛ, ɔna l’oshika mbokoyaka she. Yeso ambowatɛ nto ate: “Keli kakiane nyu nyangaka ndjakami, dimi lunyutedi akambu wa mete, wakamuki uma le [Nzambi, NW]. Keli Abarahama kuntsha osoku.” Diɔ diakɔ diambowatɛ Yeso nto ate: “Nyu nyatutshaka uku atutshaka shenyu.”

Polo ndo l’etena kɛnɛ ko ewandji w’Ase Juda watashihodia ɔnɛ lata Yeso. Vɔ wambonyomota nto ɔnɛ vɔ wekɔ ana wa mɛtɛ mɛtɛ waki Abarahama, wata vate: “Shu kumbuto lu [monanyi, NW].” Omalɔkɔ, oko wayatawɔ ɔnɛ atɛmɔdi wa mɛtɛ mbeso oko Abarahama, vɔ wamboshikikɛ ɔnɛ: “Teko la Shesu otoi, ee, [Nzambi, NW].”

Onde Nzambi mɛtɛ mbele Shɛwɔ? Yeso nde lawɔ ate: “Utunduyala [Nzambi, NW] keli Shenyu, tshiki nyutunanga, ne dia dimi lambuya uma le [Nzambi, NW]. Dimi kundja lu lulangu lami, keli ndi kakantumi. Okoko wana wahanyashihudia aui watami?”

Yeso amboyatshutshuya dia mɛnya ewandji ɛsɔ w’ɛtɛmwɛlɔ etombelo wahombawɔ kongɛ oma lo woho wahawawetawɔ. Koko mbala kɛnɛ, nde ambâhonwɛ ate: “Ana wa [Diabolo, NW] shenyu mbenyu. Nyu nangaka ntsha uku shenyu.” Diabolo ekɔ ombutshi a woho akɔna na? Yeso ambowelɛ ɔnɛ ondjakanyi ndo ambota nto ate: “Kanga kashi kendi, ndu shi kashi.” Diɔ diakɔ diambodihiya Yeso ate: “Untu a [Nzambi, NW] atutaka akambu a [Nzambi, NW]. Nyu hanyuwauki, ne dia nyu kema wa [Nzambi, NW].”

Ase Juda wamboka nkɛlɛ oma l’ɛtɛkɛta ɛsɔ wambowatɛ Yeso ko vɔande vate: “[Shi diɔ diakɔ diotshiso shate wɛ ekɔ Ose Samariya ndo ekɔ la ɔdiɛngɛ, NW]?” Vɔ wambowelɛ ɔnɛ “Ose Samariya” dia mbɔ̂nyɔla ndo dia mbɔtɛnga, nɛ dia Ase Juda mpetshaka Ase Samariya.

Yeso hasɔmbɔyisha lɔtɛngɔ lɔ̂tɛngiwɔ ɔnɛ wɛ ekɔ Ose Samariya, koko nde ambokadimola ate: “Dimi kema la odienge, keli latolemiaka Papa, nyu nyatomonyolaka.” Lam’atandatetemala la tɛkɛta, Yeso ambosha daka nɛ dia diambo efula: “Naka untu ayukitanyia diui diami, ndi havu pundju.” Mɛtɛ, Yeso hatshi ɔnɛ wanɛ tshɛ woyela hawovɔkaki lushi lɔmɔtshi. Nde ekɔ lo mbuta ɔnɛ vɔ hawotshɔkaki l’elanyelo ka pondjo, kana “nyoi ka hendi” kele kema l’eolwelo.

Koko, Ase Juda wekɔ lo mbɔsa ɛtɛkɛta wa Yeso lo nna ndo lo nna. Diɔ diakɔ diambowota vate: “Kakiane shu tambeya shati: Kanga odienge keye. Abarahama akavu, ndu amvutshi. Keli we mvutaka wati: Naka untu ayukitanyia diui diami, ndi hunganela nyoi pundju. We kuleki tshesu Abarahama lakavu, ndu amvutshi, uka? [Wɛ ayaɔsɛ mɛtɛ, NW]?”

Lo ɔkɛtshanyelo ɔsɔ tshɛ wosadiwɔ, mbokɛmaka dia Yeso akalangi mɛnya anto asɔ ɔnɛ nde mbele Mɛsiya wakalakema. Koko, lo dihole dia nde mbahonolɛ lonto lande, Yeso ambâlembetshiya ate: “Naka dimi layuyatumbula, lutumbu lami leko anyanya. Papa k[a]tuntumbulaka, one latunyutaka nyati: [Nzambi kaso, NW] mbendi. Nyu kumbêya. Utunduyala dimi layuta nti: Halaweyi, dimi lutuyala kanga kashi uku nyu.”

Yeso ambowatɛ nto di’Abarahama, kanga kɔlamelo, ate: “Tshenyu Abarahama akangenangena dia mena lushi lami. Ndi akalenyi, ku akangenangena.” Mɛtɛ, la asho wa mbetawɔ, Abarahama akangɛnangɛna ntondo lo dikambo di’oyelo wa Mɛsiya wakalakema. Oko wewɔ la lonyû l’etema, Ase Juda wambokadimola vate: “Deku diaye diatakuki akumi atanu, we akenyi Abarahama uka?”

Ko Yeso nde lawɔ ate: “Mete, mete, kanyutelami nti: La ntundu watuti Abarahama dimi laki kamemi ane.” Mɛtɛ, Yeso ekɔ lo tɛkɛta dia lɔsɛnɔ laki lande ntondo ka nde ndjoyala onto lanɛ la nkɛtɛ, lam’akinde oko etongami ka lo nyuma ka wolo l’olongo.

Ase Juda wamboka nkɛlɛ l’ɔtɛ wotshi Yeso ɔnɛ dimi lakikɔ la ntondo k’Abarahama, ko vɔ wambɔtɔngɔna ave dia mbôka. Koko nde amboyashɛ ko ambotomba oma lo tɛmpɛlɔ, tshondo tsho. Joani 8:37-59; Enyelo 3:14; 21:8.

▪ Woho akɔna wambɛnya Yeso ɔnɛ nde l’atunyi ande kema la shɛwɔ ɔtɔi?

▪ Kakɔna kolangi Ase Juda mbuta lam’elewɔ Yeso ɔnɛ Ose Samariya?

▪ Lo yoho yakɔna yata Yeso ɔnɛ ambeki ande hawovɔkaki pondjo?