Tshapita 72

Yeso ambotoma ambeki 70

TEKƆ l’eleko kɔ̂lɔ akatshi ka l’ɔnɔnyi 32 T.D., ɛnɔnyi esato w’etondo wambeta tatɛ oma lam’akabatizama Yeso. Nde l’ambeki ande waki oma lo Difɛstɔ dia Tabɛrnakɛlɛ la Jerusalɛma, ndo ondo l’etena kɛnɛ, vɔ wêke lo ngelo ya l’emamu. Mɛtɛ, lo ngɔndɔ shamalo yambotshikala ya nde sala olimu ande, Yeso ayolekaka tanema la Judeya kana la wedi w’Ɔkɛdi wa Jɔrɔdana, lo lɛtshi la nkɛtɛ la Pereya. Nde pombaka kindjakindja lo lɛtshi lɔsɔ la nkɛtɛ.

Mɛtɛ, l’ɔkɔngɔ wa difɛstɔ di’Elekanelo dia l’ɔnɔnyi 30 T.D., Yeso akasambisha suke la ngɔndɔ enanɛi la Judeya. Koko l’ɔkɔngɔ w’Ase Juda nyanga dia mbodiaka lɛkɔ lo difɛstɔ di’Elekanelo dia l’ɔnɔnyi 31 T.D., nde ambosala ɔnɔnyi w’otondo l’etenyi lo sambishaka paka la Ngalileya oto. L’etena kɛsɔ, nde akasale ɔlɔngɔswamelo a woke w’esambisha wakalowanyema, dikambo diakinde kosala ntondo. L’etena kɛnɛ, nde ambotatɛ sala olimu w’esambishelo wa komelo ndo wa woke la Judeya.

Dia nde ntsha olimu ɔsɔ, Yeso ambɔsa ambeki 70 ko ambâtoma ahende ahende. Ɔnkɔnɛ, lo tshɛtshɛ, vɔ wekɔ elui 35 w’esambisha wa Diolelo watakindola lo lɛtshi lɔsɔ la nkɛtɛ. Vɔ wekɔ lo tatshu la ntondo ka Yeso l’osomba tshɛ ndo l’ahole tshɛ wasangoyande dia ntshɔ, ondo kâmɛ l’apɔstɔlɔ ande.

Lo dihole dia nde mbutɛ ambeki asɔ 70 dia vɔ tâtshɔka lo mvudu y’ɛtɛmwɛlɔ, Yeso ambowatɛ dia vɔ tɔ̂tɔka lo mvudu y’anto: “Lu luudu tshe layunyoto, kanyuti ntundu nyati: Ki kayali lu luudu lone! Naka on’a ki eko loko, ki kanyu kayusambela le ndi.” Losango lakɔna latatshu lawɔ na? Yeso ate: “Kanyuwateli nyati: Diulelu dia [Nzambi, NW] diaya suki la nyu.” Lo dikambo di’olimu w’ambeki asɔ 70, dibuku Commentaire de Matthew Henry (l’Angɛlɛ) mbutaka ɔnɛ: “Lo ndjela ɛnyɛlɔ k’Ombetsha awɔ, dihole tshɛ diakawatshɔkaka, vɔ wakatasambishaka lo luudu la luudu.”

Alako wambosha Yeso ambeki 70 hawotshikitanyi la wanɛ wakandasha apɔstɔlɔ 12, ambeta oko ɔnɔnyi w’otondo lam’akandâtome dia tosambisha la Ngalileya. Nde ambotawate dia ɔhɛnyɔhɛnyɔ wayowakomɛ, ambâlakanya woho wa vɔ mbutɛ anto losango, ndo ambowasha wolo wa vɔ nkɔnɔla hemɔ. Ɔnkɔnɛ, lam’ayokoma Yeso yema l’ɔkɔngɔ awɔ, nde ayotana anto efula wele la saki ka wolo ka mɛnana l’Ombetsha wakanga ambeki wasala akambo wa diambo wa ngasɔ.

Olimu w’esambishelo wosadi ambeki 70 ndo olimu woyosala Yeso l’ɔkɔngɔ haviyisha edja efula. Kem’edja, elui 35 w’esambisha wa Diolelo wambotatɛ nkalola oya le Yeso. Vɔ wamboyowotɛ l’ɔngɛnɔngɛnɔ tshɛ vate: “Khumadiondjo, ndu edienge wambutolembela lu lukumbu laye.” Nsango y’amɛna ya ngasɔ y’oma l’olimu yambɔngɛnyangɛnya Yeso, nɛ dia nde ambokadimola ate: “Dimi lakenyi Satana ako uma l’ulungu uku dingadimu. Nyulungi, dimi lambunyusha wulu wa mbikamela elui la kutu.”

Yeso mbeyaka ɔnɛ l’ɔkɔngɔ w’eotwelo ka Diolelo diaki Nzambi, l’etena k’ekomelo, Satana l’ɛdiɛngɛ wayotshanyema oma l’olongo. Koko kakianɛ, woho wakoka anto k’anto mbitshanya ɛdiɛngɛ wahɛnama amboleka shikikɛ ɔnɛ dikambo sɔ diayosalema. Diɔ diakɔ diatɛkɛta Yeso dikambo dia wotshanyelo wa Satana oko dikambo diamboshila ntshama. Ɔnkɔnɛ, lo yoho ya didjidji mbambolongola ambeki 70 wolo wa mpɔtshahɔtsha elui la nkoto. Koko, Yeso ambota ate: “Tanyongenangenaki ne dia edienge wambunyukela, nyongenengene ne dia kumbu yanyu yambufundama l’ulungu.”

Yeso ambɔngɛnangɛna efula ko ambotombola She lo sɛkɛ nɛ dia nde ambokamba l’anto asɔ wele la ndjakitshakitsha lo yoho ya diambo. Yeso ambosekesɔ otsha le ambeki ande, ko ambowatɛ ate: “Ashu wena akambu wenanyu, weko la otshoko, ne dia amvutshi efula la khumi ya dikanga wakalangi mena akambu wenanyu, ku vo kumbaena; wakalangi mbuka akambu wukanyu, ku kumbauka.” Luka 10:1-24; Mateu 10:1-42; Enyelo 12:7-12.

▪ Lende akasambisha Yeso l’edja k’ɛnɔnyi esato wa ntondo w’olimu ande, ndo naa lɛtshi la nkɛtɛ lambondokindjakindja l’edja ka ngɔndɔ shamalo ya komelo l’olimu ande wa lanɛ la nkɛtɛ?

▪ Lende ambotoma Yeso ambeki 70?

▪ Lande na kotshi Yeso ɔnɛ nde akɛnyi Satana akɔ oma l’olongo?

▪ Lo yoho yakɔna yakoka ambeki 70 mpɔtshahɔtsha elui la nkoto?