Tshapita 74

Dako le Mata ndo adjango w’endana la dɔmbɛlɔ

LAM’ASALANDE olimu ande la Judeya, Yeso ambɔtɔ lo ngelo kelɛwɔ ɔnɛ Bɛtaniya. Lɛkɔ mbodjashi Mata, Mariya la ɔnangɛwɔ Lazaro. Ondo Yeso akahomana lawɔ ntondo lam’akandasalaka olimu ande, ndo ondo lâsɔ ko nde ambotashilaka ndjâla ɔngɛnyi awɔ wa mamba. Koko kakianɛ, Yeso amboya laka Mata ko nde ambôlongola dimɛna efula.

Mata ekɔ la saki k’efula ka ntsha tshɛ dia ngɛnyangɛnya Yeso. Ande diɛsɛ dia woke dia nongola Mɛsiya wakalakema lee! Ɔnkɔnɛ, Mata ambotatɛ katɛ dambo dia lɔ̂ka ndo nɔngɔsɔla akambo akina woho wa ngɛnyangɛnya Yeso l’edja tshɛ kayondotshikala.

Koko, Mariya wa kadiyɛnde akadjashi l’ekolo wa Yeso dia mbohokamɛka. L’ɔkɔngɔ wa tshanda mɔtshi, nde ambosukana lale Yeso ko amboyowotɛ ate: “Khumadiondjo, we heyi wati: Onalingu akantshikedi ulimu dime? Telandi ayi la ndjunkimanyia.”

Koko Yeso hate Mariya ndoko dui. Nde ambolaka Mata di’aha nde ndjakiyanya ɔtɛkɔya lo dikambo dia diangɔ dia l’emunyi. Nde ambôhangwɛ la lotutsha tshɛ ate: “Mata, Mata, we ambuleka ndjakananya la ndjahenyahenya di’akambu efula, keli dikambu otoi mbeli uhumba.”

Mata ekɔ l’eyango w’ɛlɔlɔ; nde nangaka mɛnya ɔnɛ nde mbeyaka nongola angɛndangɛnda. Koko, lam’ele nde ekɔ lo ndjakiyanya lo dikambo dia diangɔ dia l’emunyi, nde ambohandja diaaso dia mbetshama oma le Ɔna Nzambi ndamɛ! Diɔ diakɔ diambodihiya Yeso ate: “Mariya ambosonola leke l’ololo, lo haluyosama uma le ndi.”

L’ɔkɔngɔ diko, lo tena dikina, ombeki ɔmɔtshi amombola Yeso ate: ‘Nkumadiɔndjɔ, otetsha woho wa sho nɔmbaka oko waketsha Joani ambeki ande.’ Ondo ombeki ɔsɔ komonga lawɔ lam’akalakanyaka Yeso anto dɔmbɛlɔ di’ɛnyɛlɔ lo Dako dia lo Dikona, ambeta ɔnɔnyi w’otondo l’etenyi. Ɔnkɔnɛ, Yeso ambonyomoyosha alako wakandasha nto, oma lâsɔ ko nde ndjoka wɛɛla ɔmɔtshi wɛnya ohomba wa monga la tshete lo dɔmbɛlɔ.

Yeso ambotatɛ mbuta ate: “Akona l’atei anyu leli la ongenyi, lam’ayundutsho le ndi l’asa [deke], ati: Ongenyi, osondja dikenga satu dia ma; ne dia ongenyi ami omotshi ambuya uma lu lokendo, dimi kema la engo kambusha, ku one leli lu luudu, ayûkaluya diui ati: Takumimbiya, lukuki lambudihama kakiane, an’ami weko la mi lu tangi, dimi haleyi mbeto dia ndjukusha diango? Lambunyutela nti: Kuyanga ndi heto dia ndjuwusha diango ne dia ndi eko ongenyi andi, keli ne dia limbiya landi, ndi ayeto, ayuwusha diango tshe diahumbandi.”

Oma l’ɛnyɛlɔ kɛsɔ, Yeso hatshi ɔnɛ Jehowa halange tosha kɛnɛ kawɔlɔmbaso, oko ɔngɛnyi wa l’ɔkɔndɔ ande. Kema, koko nde ekɔ lo mɛnya ɔnɛ naka ɔngɛnyi wele kema l’otema w’ɔlɔlɔ ndjetawɔka nkimɔ kɛnɛ kawɔlɔmbawɔ l’etete, kete hoke Shɛso lele l’olongo loludi la ngandji! Diɔ diakɔ diambotetemala Yeso mbuta ate: “Dimi lambunyutela nti: Nyolombe, ku wayunyusha; nyuyangi, ku nyayena; nyokokole, ku wayunyudihula. Ne dia untu tshe latolombaka, atulungulaka; latuyangaka, atenaka; latokokolaka, wayûdihula.”

Oma lâsɔ, Yeso ambɔsa ɛnyɛlɔ k’ombutshi wele onto k’onto, otshi wa pɛkato ndo kema kokele, ko ambota ate: “Untu akona l’atei anyu leli umbutshi a pami, lam’ayolomba on’andi la pami lusi, ku ndi mbusha ului lu dihuli dia lusi? Kana ndi ayôlomba ukeli, ku ndi mbusha kutu? Okone, naka nyu, antu wa kolo, mbeyaka mbisha an’anyu eshasha w’ololo, Shenyu le l’ulungu huleka mbisha wane wôlomba [nyuma k’ekila, NW]?” Yeso mɛtɛ ambotosha ekeketshelo ka dimɛna efula dia sho monga l’etete lo dɔmbɛlɔ. Luka 10:38–11:13.

▪ Lande na kayakananya Mata lo dikambo dia Yeso?

▪ Kakɔna kasala Mariya, ndo woho akɔna wambowândola Yeso lo dihole dia nde mandola Mata?

▪ Kakɔna kambotshutshuya Yeso dia nde nyomosha alako lo dikambo dia dɔmbɛlɔ?

▪ Woho akɔna wambɛnya Yeso ohomba wa monga l’etete lo dɔmbɛlɔ?