Tshapita 78

Nyambalɛke!

L’ƆKƆNGƆ wa nde mbewola elui w’anto lo dikambo di’ɔkɔmiya, ndo mbewola ambeki ande di’aha vɔ ndjakiyanyaka ɔtɛkɔya l’ɔtɛ wa diangɔ dia l’emunyi, Yeso ambâkeketsha ate: “Tanyukaki woma, nyu limba la tshitshe l’ekoko, ne dia Shenyu [ambetawɔ, NW] nyusha diulelu.” Oma l’ɛtɛkɛta ɛsɔ, nde ekɔ lo mɛnya ɔnɛ paka djui ya tshitshɛ tsho (yakayoshikikɛma l’ɔkɔngɔ diko oko anto 144 000) mbayoyala lo Diolelo dia l’olongo. Efula ka wanɛ wayokondja lɔsɛnɔ la pondjo wayoyala ambolami wa lanɛ la nkɛtɛ wa Diolelo diakɔ sɔ.

“Diulelu,” ande losha la dimɛna efula lee! Lam’atshutshuyande ambeki ande dia vɔ ntsha tshɛ dia nongola difuto diakɔ sɔ lo yoho yasungana, Yeso ambowatɛ ate: “Nyusundja dieli la nyu; nyusha antu diango la ketshi.” Eelo, vɔ pombaka kamba la diangɔ diawɔ lo dikambo dia wahɔ wa lo nyuma wa anyawɔ, nɛ dia ɔsɔku mbakokawɔ ndjaombɛ ‘okundji wa l’olongo wahashile.’

Oma lâsɔ, Yeso ambokeketsha ambeki ande dia vɔ mambalɛka okalwelo ande. Nde ambowatɛ ate: “Nyolote eya lu kindi yanyu; nyohetsha atala anyu. Nyame nyuyali uku antu walungamela khumewo lam’ayundukalula uma lu dambu dia diwala. Okone lam’ayunduya, lam’ayundokokola, wayûdihula esadi. Ekambi ako wayuyala la [ɔngɛnɔngɛnɔ, NW] lam’ayuya khumewo, lam’ayundâtana wasena. Mete kanyutelami nti: Ndi ayolota uya, ayuwadjasha lu mesa. Ndi ayuya, ayâkambela ulimu.”

Lo wɛɛla ɔnɛ, ambeki mɛnyaka ɔnɛ vɔ mambalɛka okalwelo wa nkumɛwɔ lam’onyiyawɔ ekutu awɔ w’etale ko mbakeleka l’ekaba ndo tetemala kamba olimu polo ndo l’otsho oma l’ekimanyielo k’osase w’atala woludi l’esɔ. Yeso ambolembetshiya ate: ‘Naka nkumɛwɔ amboya lo djɔ ya hendi [suke l’eshidi divwa polo ndo l’atei a deke], kana lo djɔ ya sato [oma l’atei a deke polo ndo suke l’eshidi esato wa pindju], ko ambowatana woyalɔngɔsɔdi, kete ɔlɔ le wɔ!’

Owandji ɔsɔ ambofuta ekambi ande lo yoho ya diambo. Nde ambowadjasha lo mɛsa ko ambomɛ mbakambela olimu. Nde ambowaɔsa, aha oko ɛhɔmbɔ nto, koko oko angɛnyi wa kɔlamelo. Ande difuto dia dimɛna efula diambowolongola l’ɔtɛ wakawatetemadi kambɛ nkumɛwɔ otsho tshɛ lo kongɛka okalwelo ande lee! Yeso ambodihiya ate: “Ndu nyu [nyambalɛke, “NW”], ne dia On’a untu ayuya lu unya wahanyalungamela.”

Wonya ɔnɛ, Petero ɔnɛ awombolande ate: “Khumadiondjo, shame mbukediye wela one, kana antu tshe?”

Lo dihole dia nde mbokadimola mbala kakɔ ɔtɔi, Yeso amboka wɛɛla okina. Nde amombola ate: “Ulami akona weli la kolamelu la yimba, wayukitsha uwandji andi ladiku dia [olui w’anto ande, NW], dia mbakahelaka mbu ya nde lu tena diayo? Ukambi oso ayuyala la [ɔngɛnɔngɛnɔ, NW] lam’ayuya uwandji andi, lam’ayundutana atsha osoku. Mete kanyutelami nti: Ndi ayûkitsha ladiku dia kene tshe keli la ndi.”

“Uwandji” watawɔ lanɛ ekɔ mɛtɛ Yeso Kristo. “Ulami” ekɔ didjidji dia “limba la tshitshe l’ekoko” lo tshɛ kawɔ, ndo “olui w’anto” kɛdikɛdi olui akɔ wâmɛ w’anto 144 000 wayokondja Diolelo dia l’olongo, koko tshɛkɛta shɔ mbikaka epole ɔsɛkɛ l’olimu wakambawɔ onto l’onto. ‘Diangɔ’ diakakitshama l’anya w’olami dia nde dilamaka kɛdikɛdi wahɔ wa lanɛ la nkɛtɛ waki nkumekanga, l’atei awɔ mbele ndo ambolami wa lanɛ la nkɛtɛ wa Diolelo.

L’etenyi kayela ka lo wɛɛla ande, Yeso ambɛnya ɔnɛ aha wanɛ tshɛ wele l’atei w’olui ɔsɔ w’olami kana w’ɔhɔmbɔ mbayotshikala la kɔlamelo, nde ambolembetshiya ate: “Lam’ayuta ukambi ako l’utema ati: Uwandji ami huya esadi; lam’ayundutatela nkomola ekambi w’apami la ekambi w’amantu, la ndekaka, la nokaka, la mbidjoka wanu, uwandji w’ukambi oso ayuya lu lushi lahandûlungamela, . . . Ndi ayuyôkomola wulu.”

Yeso ambɛnya ɔnɛ oyelo ande wambɔhɛtsha dja l’atei w’Ase Juda, nɛ dia amɔtshi wekɔ lo mbetawɔ wetshelo ande ndo akina hawetawɔ. Ambeta ɛnɔnyi esato l’ɔkɔngɔ wa nde batizama l’ashi, koko batismu kande ka lo nyɔi kaya suke la nkomɛ, diɔ diakɔ diamondota ate: ‘Otema ami wekɔ la lonyangu edja ndo lam’ayokotshama dikambo sɔ!’

L’ɔkɔngɔ wa nde mbutɛ ambeki ande awui asɔ, Yeso ambɛlɛ nto otsha le olui w’anto. Nde ambokiyana efula l’ɔtɛ wa lohokotui lawɔ, nɛ dia kânga mbɛnawɔ tolembetelo hwe hwe, vɔ hawolange mbetawɔ lonto lande ndo ohomba alɔ. Yeso ambowatɛ ate: “Lam’atunyenaka dingi diatambela lu leke l’ehutwelu ka unya, nyu nyatutaka esadi nyati: Mvula kuyayi, ku to katuyakaka. Lam’atunyenaka lopepe uma lu leke la diku dia kushi, nyu nyatutaka nyati: [Yanyi ya tɛ yayowalɛ, NW]; ku atuyalaka osoku. Nyu akanga a lukesu, nyu mbeyaka nimbitela elundji ka kete la ka ulungu, keli ukundi ahanyalimbitela akambu w’etena kene?” Luka 12:32-59.

▪ Anto angana wakenga “limba la tshitshe l’ekoko,” ndo kakɔna kayowokondja?

▪ Woho akɔna wambɛnya Yeso ambeki ande ohomba wa vɔ mambalɛka?

▪ Lo wɛɛla wa Yeso, alembetshiya “uwandji,” “ulami,” “olui w’anto ande,” ndo ‘diangɔ’?