Tshapita 80

Nkoto la olami w’ɛkɔkɔ

YESO amboya la Jerusalɛma lo Difɛstɔ di’Ekidielo, kana Hanoukkah, difɛstɔ diohɔwɔ lushi lakawalambola Jehowa tɛmpɛlɔ nto. L’ɔnɔnyi 168 N.T.D., ambeta oko ɛnɔnyi 200, Antiochus IV Epiphane akɔshi osomba wa Jerusalɛma l’anya ande ko akasowola tɛmpɛlɔ la ediakelo katɔ. Koko l’ɔkɔngɔ w’ɛnɔnyi esato, Jerusalɛma akayokalola l’anya w’Ase Juda ndo wakayolambolaka Nzambi tɛmpɛlɔ nto. Oma lâsɔ, lushi lɔsɔ lakawalambola tɛmpɛlɔ nto le Nzambi lekɔ lo mbohɔma ɔnɔnyi l’ɔnɔnyi.

Difɛstɔ sɔ di’Ekidielo salemaka lo ngɔndɔ ka Kislev 25, ngɔndɔ kɛsɔ k’Ase Juda mbɔtɔnɛka la etenyi ka hende ka Tshaka Fudu ndo l’etenyi ka ntondo ka Diɛla Woke lo ndjela alamanaka aso wa nshi nyɛ. Ɔnkɔnɛ, ambotshikala paka oko nshi lokama la mɔtshi la ntondo ka difɛstɔ di’Elekanelo dia l’ɔnɔnyi 33 T.D., difɛstɔ diayotshikala pondjo lo wɛɔngɔ w’anto. Ɔsɔ ekɔ eleko ka tshitshi, diɔ diakɔ diakielɛ ɔpɔstɔlɔ Joani ɔnɛ ‘etena ka tshitshi.’

L’etena kɛnɛ, Yeso amboka wɛɛla ɔmɔtshi, lɔkɔ nde ambɔtɛkɛta dikambo dia nkoto shato ndo di’ɔkɛndɛ wele lande oko Olami w’Ɔlɔlɔ w’Ɛkɔkɔ. Lokoto la ntondo latɛkɛtande kɛdikɛdi sheke y’Ɛlɛmbɛ wa Mɔsɛ. Ɛlɛmbɛ waki oko ehele kakakitola Ase Juda oma lo ditshelo dia kɔlɔ diasala anto wele kema lo sheke shɔ ya lânde yakawadje vɔ la Nzambi. Yeso ambolembetshiya ate: “Mete, mete kanyutelami nti: One lahoto lu suku dia lukumbu l’ekoko, lambela amakina, uvi la opotodi mbendi. Keli one latotoka lu suku, eko ulami w’ekoko.”

Amɔtshi wakaye ndo wakayataka ɔnɛ: Mɛsiya kana Kristo mbeso, koko vɔ mɛtɛ kema olami w’ɛkɔkɔ wata Yeso lo dikambo diande ate: “Ulami a suku atûdihulaka; ekoko watukaka diui diandi. Ndi atetaka ekoko andi kumbu, at[â]lombolaka utsha l’andja. . . . Vo hawuyeli untu ukina, keli vo wayûlawo, ne dia vo haweyi diui dia antu akina.”

Joani Obatizanyi mbaki “ulami a suku” dia lokoto la ntondo. Oko olami wa soko, Joani ‘akadiholɛ’ Yeso lokuke lam’akandawɛnyanya le ɛkɔkɔ wa didjidji wahombande nɔmbɔla otsha l’andja dia tâlesha. Ɛkɔkɔ ɛsɔ welɛ Yeso lo nkombo yawɔ ndo walɔmbɔlande otsha l’andja, wamboyɔtɔ lo lokoto lokina, oko walembetshiyande ate: “Mete, mete kanyutelami nti: Suku di’ekoko mbemi,” kɛdikɛdi soko dia lokoto l’oyoyo. Ɛkɔkɔ ɛsɔ wayetawɔma dia mbɔtɔ lo lokoto l’oyoyo lam’ayodja Yeso sheke y’oyoyo nde l’ambeki ande ndo lam’ayondotshulola nyuma k’ekila oma l’olongo oya lâdiko diawɔ lo Pɛntɛkɔsta.

Oma lâsɔ, Yeso ambotetemala nembetshiya ɔkɛndɛ ande, ata ate: “Suku mbemi: layoto le mi ayushimbamela, ayotoka, ayutumbaka, ayutanaka adiyu wa nde. . . . Dimi lakayi dia antu ndjala la lumu, la dia vo ndjala la lo efula. . . . Dimi leko ulami w’ololo w’ekoko. Dimi mbeyaka ekoko ami, ndu vo mbeyakami. Uku ambeya Papa, mbaweyami. Dimi lambukimo lumu lami lu dikambu dia ekoko ami.”

Atete ndoko edja, Yeso akakeketsha ambeki ande ate: “Tanyukaki woma, nyu limba la tshitshe l’ekoko, ne dia Shenyu [ambetawɔ, NW] nyusha diulelu.” Lemba lɔsɔ la tshitshɛ l’ɛkɔkɔ, layoyokoma anto 144 000 lo tshɛ, lambɔtɔ lo lokoto lɔsɔ l’oyoyo kana la hende. Koko Yeso ambotetemala mbuta ate: “Dimi leko la ekoko ekina waha lu lukumbu lone. Dieli la mi dia mbêla ndu vo. Vo wayuka diui diami, wayuyala ului otoi ndu ulami otoi.”

Lam’ele “ekoko ekina” kema lo “lukumbu lone,” vɔ pombaka monga lo lokoto lokina, mbuta ate lo lokoto la sato. Nkoto shɔ hiende ya komelo, kana nkombo, yekɔ l’elongamelo kotshikitanyi. “Limba la tshitshe l’ekoko” la lo lokoto lɔmɔtshi wayolɛ kâmɛ la Kristo l’olongo, ndo “ekoko ekina” wa lo lokoto lokina wayɔsɛna lo Paradiso ka lanɛ la nkɛtɛ. Koko, kânga mbewɔ lo nkoto hiende, ɛkɔkɔ ɛsɔ hawokana kandjema, ndo hawɛnyi di’oko wambowaɛngiya, nɛ dia oko wadita Yeso, vɔ wamboyala “ului otoi” walɔmbwama oma le “ulami otoi.”

Yeso Kristo, Olami w’Ɔlɔlɔ w’Ɛkɔkɔ, mbetawɔka nkimɔ lɔsɛnɔ lande lo dikambo dia nkoto hiende shɔ y’ɛkɔkɔ. Nde ate: “Dime lambulukimo. Dimi la wulu wa lukimo, ndu la wulu wa losa ntu. Olembe oso mbakamalungula uma le Papa.” Lam’otshi Yeso ɛtɛkɛta ɛsɔ, Ase Juda wambotatɛ mbatwana.

L’atei w’olui w’anto, efula wota ɔnɛ: “Ndi eko la odienge; ndi ambudjo dadi. Ukundi alunganyu aui andi?” Koko, akina wambohɔ mɛtɛ ɔnɛ ambeta oko ngɔndɔ hiende Yeso akakɔnɔla pami kakotɔ tshungu, ko vɔ wambota ɔnɛ: “Odienge mbeyaka nsenya akanga a tutshungu?” Joani 10:1-22; 9:1-7; Luka 12:32; Enyelo 14:1, 3; 21:3, 4; Osambu 37:29.

▪ Difɛstɔ di’Ekidielo kɛdikɛdi na, ndo etena kakɔna kasalemadiɔ?

▪ Ele lokoto la ntondo, ndo akɔna ele olami wa soko dialɔ?

▪ Woho akɔna wambodiholɛ olami wa soko Olami w’Ɛkɔkɔ soko, ndo lende ambotɔtɔ ɛkɔkɔ?

▪ Wa na wakenga nkoto hiende yaki Olami w’Ɛkɔkɔ, ndo nkoto ngana yayawɔ vɔ tshɛ?