Tshapita 82

Yeso ambotshɔ nto la Jerusalɛma

KEM’EDJA, Yeso ambokimɛ lɔkɛndɔ nto, atalakanya anto l’osomba l’osomba, ndo lo ngelo la ngelo. Ondo mɛtɛ nde ambokoma lo lɛtshi la nkɛtɛ la Pereya, lo wedi wa Jɔrɔdana, mbɛlanɛ la Judiya. Koko otsha la Jerusalɛma mbatandatshu.

Lo ndjela filɔzɔfi k’Ase Juda, paka yema y’anto tshitshɛ tsho mbayokoka kondja panda, diɔ diakɔ diamombola pami kɛmɔtshi ɔnɛ: “Khumadiondjo, antu tshitshe mbayushimbamela?” L’okadimwelo ande, Yeso ambotshutshuya ampokami ande dia vɔ kana yimba lo kɛnɛ kahombawɔ sala dia kondja panda, nde lawɔ ate: “Nyukalangani [kɛdikɛdi, nyɔlɔsha, nyɛnyi pâ] dia mboto lu suku dia tshitshe.”

Pombaka mbidja weolo wa ngasɔ esadi eto, nɛ dia Yeso ambotetemala mbuta ate: “Antu efula wayulanga mboto loko, keli vo hawuyala la wulu wa mboto.” Lande na kahawakoke mbɔtɔ na? Nde ambolembetshiya ɔnɛ ‘lam’ayetɔ kanga luudu ko ndjiha lokuke, anto wayemala l’andja wayɔkɔkɔla, wata vate: “Khumadiondjo, utudihula,” koko nde ayowatɛ ate: “Haleyi uma lene uyenyu. Nyumo uma la le mi, nyu atshi wa kolo tshe!”’

Ondo wanɛ wambotshikala l’andja wakaye lo wonya wakawɛnyi ɔlɔlɔ le wɔ vamɛ. Koko lokuke, mbuta ate diaaso di’ɔlɔlɔ, diambodihama. Dia mbɔtɔ l’etei, vɔ wotohomba ndja la ntondo, oyadi kânga wonya akɔ hawosungana le wɔ. Mɛtɛ, fɔnu kekɔ lo kongɛ wanɛ wɔsa etena ka tɛmɔla Jehowa ko kitshindjaka l’ɔkɔngɔ, lo dihole dia vɔ mbidja dikambo sɔ lo dihole dia ntondo lo nsɛnɔ yawɔ!

Efula k’Ase Juda, wanɛ wakawatomɛ Yeso dia nde ndjâkambela olimu, kɔmbɔsa diaaso dia dimɛna efula dia vɔ mbetawɔ tɛdikɔ takɔshi Nzambi dia mbisha anto panda. Diɔ diakɔ diata Yeso ɔnɛ vɔ wayolela ndo wayɔkɛkɛtanya wanyu lam’ayowokadjema l’andja. Koko, “antu wayuya uma lu leke l’ehutwelu ndu uma l’edjelu ka unya,” ɛɛ, oma lo wedja tshɛ, “wayudjase lu diulelu dia [Nzambi, NW].”

Yeso ambotetemala mbuta ate: ‘Wanɛ wele l’ɔkɔngɔ [ase wedja wakɔnywamaka, kâmɛ la Ase Juda wakasɔkishamaka] wayoyala la ntondo, ndo wanɛ wele la ntondo [Ase Juda waki l’ɛngɔnyi ndo l’ahole a wake l’ɛtɛmwɛlɔ] wayoyala l’ɔkɔngɔ.’ Akanga a nɛndɛ asɔ ndo wele kema la lowando wayoyala l’ɔkɔngɔ, kɛdikɛdi vɔ hawotɔtɔ lo Diolelo diaki Nzambi.

Kakianɛ, Afarisɛ wamboya oya le Yeso ko wamboyowotɛ vate: ‘He tamwe oma lanɛ, ntshɔka lɛkɛ lokina, nɛ dia Hɛrɔdɛ [Atipa] ekɔ lo nyanga dia kodiaka.’ Ondo Hɛrɔdɛ ndamɛ mbakekola lokumu lɔsɔ ɔnɛ kele Yeso alawɔ oma lo lɛkɛ lɔsɔ. Ondo Hɛrɔdɛ ekɔ lo mboka wɔma dia ndjaka omvutshi okina waki Nzambi oko wakandadiake Joani Obatizanyi. Koko Yeso ambotɛ Afarisɛ ate: “Nyutshu, nyututeli mbulu keso nyati: Elo la lui, dimi layutundja edienge, layokonoya antu, ku lushi la satu dimi layushidiya ulimu ami.”

L’ɔkɔngɔ wa nde shidiya olimu ande lɛkɔ, Yeso ambotetemala la lɔkɛndɔ lande otsha la Jerusalɛma, nɛ dia nde ambolembetshiya ate: “Umvutshi heyi mvo amakina, tshikima la Jerusalema.” Lande na kahomba Yeso ndjakema la Jerusalɛma na? Nɛ dia Jerusalɛma mbele osomba wa nkumekanga, lɛnɛ odjashi Ase Sheke 71, wanɛ wakenga tuminadi ta lâdiko ndo lɛkɔ mbalambwama elambo wa nyama. Ɔnkɔnɛ, “[Ɔna Ɔkɔkɔ wa Nzambi, NW]” pombaka ndjakema paka la Jerusalɛma.

Yeso amboyakiyanya ate: “Yee! Jerusalema, Jerusalema, latudiakaka amvutshi, latukaka wane watuwutumelaka ave li! Ndi tena efula diakamalangi nsanganya an’aye, uku atusanganyaka wali a koko an’ato la tshina di’ahafu ato, ku nyu kunanga li! Enda, khumbu kanyu kambukalema.” Wodja ɔsɔ wambânyema nɛ dia vɔ hawetawɔ Ɔna Nzambi!

Lam’atatetemala Yeso la lɔkɛndɔ lande otsha la Jerusalɛma, wambowelɛ laka owandji ɔmɔtshi w’Afarisɛ. Anto wekɔ lo mboholamɛ, nɛ dia ekɔ lushi la Sabato ndo pami kɛmɔtshi ekɔ lâwɔ la hemɔ ka kuta, mbuta ate otshumanelo w’ashi l’anya la l’ekolo. Yeso mbambolande Afarisɛ l’ambewi w’Ɛlɛmbɛ wele lâwɔ ate: “Nkonoya untu lushi la [sabato, NW] eko ekila, kana kema?”

Vɔ tshɛ wambotshikala enyɔ ku. Ɔnkɔnɛ, Yeso ambɔkɔnɔla pami kɛsɔ ko ambɔ̂kɛndja. Oma lâsɔ, ɔnɛ ambolande ate: “Untu akona l’atei anyu, ayuyala la punda kana ngombe, lam’ayutoko lu difuku di’ashi, ku ndi hakitundja esadi lushi la [sabato, NW]?” Ndo mbala kɛsɔ nto, vɔ tshɛ wambodiha enyɔ. Luka 13:22–14:6; Joani 1:29.

▪ Lo ndjela kɛnɛ kotshi Yeso, kakɔna kahomba onto ntsha dia nde kondja panda, ndo lande na kambotshikala anto efula l’andja?

▪ Wa na wele ‘l’ɔkɔngɔ” ko wambeta la ntondo, ndo wa na wele la ‘ntondo’ ko wambeta l’ɔkɔngɔ?

▪ Lande na katawɔ ɔnɛ Hɛrɔdɛ ekɔ lo nanga ndjaka Yeso?

▪ Lande na kahakoke omvutshi mvɔ amakina, tshikima la Jerusalɛma?