Tshapita 85

Oyangelo a wanɛ wakashishɔ

YESO ekɔ la tshete lo nyanga wanɛ walanga kambɛ Nzambi la ndjakitshakitsha. Diɔ diakɔ diatshɔnde le anto tshɛ, kânga le atshi wa kɔlɔ wa mamba dia tâsambisha akambo wa Diolelo. Atshi wa kɔlɔ mboye l’etena kɛnɛ dia ndjohokamɛ awui ande.

Lam’ɛnyiwɔ dikambo sɔ, Afarisɛ l’afundji wambotatɛ mɔnyɔla Yeso l’ɔtɛ w’ɔnɛ nde mbêkesanɛ l’anto wɔnyɔlawɔ. Vɔ wambotatɛ ngunanguna vate: “Untu one atulungulaka antu wa kolo, atolekaka la wo.” Kɛdikɛdi vɔ kondjakitshakitshaka ndoko lushi dia sala dikambo sɔ! Afarisɛ l’afundji mbɔsaka anto k’anto oko ditshu dia la tshina di’akaka awɔ. Mɛtɛ, vɔ mbaelɛka ɔnɛ ‛am ha·’aʹrets, “anto wa lo ngelo [nkɛtɛ],” dia vɔ mɛnya woho wawaɔnyɔlawɔ.

Koko, Yeso mbɔsaka onto tshɛ la nɛmɔ, mbôkaka ngandji ndo kɛtshi. Diɔ diakɔ diele, efula k’anto asɔ wele la ndjakitshakitsha, kâmɛ ndo atshi wa kɔlɔ wa mamba, wekɔ la saki k’efula ka mbohokamɛ. Ko kayotota lo dikambo dia wɔnyɔdi w’Afarisɛ, wanɛ wambomala l’ɔtɛ w’ɔnɛ Yeso ekɔ lo mbidja weolo dia kimanyiya anto wɔnyɔlawɔ na?

Yeso ambâkadimola l’ekimanyielo ka wɛɛla ɔmɔtshi. Nde ambɔtɛkɛta dia kanyi y’Afarisɛ wayaɔsa oko anto w’ɛlɔlɔ ndo wele la diokanelo la Nzambi otshikitanyi la wa ‛am ha·’aʹrets w’anyanya wakanganɛ ndo wakashishɔ. Nyolonge kɛnɛ kawatɛnde:

“Untu akona l’atei anyu, lam’endi la ekoko lukama, naka ndi ambudimanya omotshi, ku ndi hatshiki akumi divwa la divwa l’usui dia ntuyanga one wushishwi, edja ndu lam’ayunduwena? Lam’ayunduwena, ndi ayuwahe l’aheka, ayongenangena. Lam’ayundukuma lakandi, ndi ayeta engenyi andi la asukanyi andi; ayuwatela ati: Nyongenengene la mi, ne dia lambena okoko ami wakashisho.”

Oma lâsɔ ko Yeso ndjosha kitshimudi y’ɔkɔndɔ ande, ata ate: “Dimi lambunyutela nti: Wuhu ako mbayuyala ongenongeno utamanya l’ulungu lu dikambu dia untu a kolo otoi lukadimudi utema, uleki dia antu akumi divwa la divwa wahahumbi nkadimula etema.”

Afarisɛ ndjaɔsaka oko anto w’ɛlɔlɔ ndo wele kema l’ohomba wa kadimola etema kana ndjatshumuya. Amɔtshi wa l’atei awɔ lam’akawɔnyɔla Yeso l’ɔtɛ w’ɔnɛ nde ambɔlɛ kâmɛ l’elongodi w’elambo l’atshi wa pɛkato, ambeta ɛnɔnyi ehende, nde akawatɛ ate: “Dimi kundja dia ndjeta antu w’ololo, keli lakayi dia ndjeta antu wa kolo.” Afarisɛ, wanɛ wayata ɔnɛ anto w’ɛlɔlɔ mbewɔ, hawɛnyi ndoko ohomba wa vɔ ndjatshumuya, hawɔngɛnyangɛnya ase olongo. Koko, ɔngɛnɔngɛnɔ ndjalaka l’olongo lam’ayatshumuya atshi wa pɛkato l’otema ɔtɔi.

Dia nde shikikɛ kanyi y’ɔnɛ woshwelo w’atshi wa pɛkato mbelaka ɔngɛnɔngɛnɔ a woke l’olongo, Yeso amboka wɛɛla okina. Nde ate: “Umuntu akona, lam’endi la tenyi dia fesa dikumi, naka ndi ambushisha etenyi kemotshi, ku ndi hahetsha tala, hombe luudu, la hayangi l’eteti, edja ndu lam’ayundukiena? Lam’ayundukiena, ndi ayeta engenyi andi la asukanyi andi. Ndi ayuwatela ati: Nyongenengene la mi, ne dia lambena etenyi kakamashisha.”

Oma lâsɔ ko Yeso ndjosha kitshimudi ya woho akɔ wâmɛ. Nde ate: “Okone dimi lambunyutela nti: Ongenongeno ndjalaka lu ashu w’andjelo wa [Nzambi, NW] lu dikambu dia untu a kolo otoi lambukadimula utema.”

Ekɔ dikambo dia diambo di’ɔnɛ andjelo wa Nzambi ndjashaka la ngandji tshɛ lo dikambo dia woshwelo w’atshi wa kɔlɔ! Dikambo sɔ ndeka tâmbia nɛ dia wa ‛am ha·’aʹrets asɔ, anto wele la ndjakitshakitsha ndo wɔnywama, wekɔ la diaaso dia ndjâla atɔi amɔtshi wa lo Diolelo diaki Nzambi. Oma lo diaaso sɔ, vɔ wayokondja dihole dia woke l’olongo, ndeka ndo nɛ diele l’andjelo! Koko, lo dihole dia vɔ mboka kandjema kana kɛlɛ, andjelo mbeyaka la ndjakitshakitsha tshɛ ɔnɛ anto asɔ wa pɛkato wekɔ lo pomana ndo wekɔ lo kandola ekakatanu wawalowanya dia vɔ tokamba olimu l’olongo oko nkumi ya dikanga la oko ɛlɔmbɛdi woludi la ngandji ndo la kɛtshi. Luka 15:1-10; Mateu 9:13; 1 Koreto 6:2, 3; Enyelo 20:6.

▪ Bonde katshɔ Yeso le atshi wa kɔlɔ wa mamba, ndo woho aɔna wawɔnyɔla Afarisɛ l’ɔtɛ wa dui sɔ?

▪ Ngande wɔsama anto k’anto lo asho w’Afarisɛ?

▪ Wɛɛla akɔna wamboka Yeso, ndo wetshelo akɔna wakondjaso lɔkɔ?

▪ Bonde kele ɔngɛnɔngɛnɔ w’andjelo ekɔ dui dia diambo efula?