Tshapita 86

Ɔkɔndɔ w’ɔna lakashishɔ

L’ƆKƆNGƆ wa nde kadimola Afarisɛ oma l’ekimanyielo ka wɛɛla w’ɔkɔkɔ wakashishɔ la w’okenga wa dikuta wakashishɔ ko ndjɛnama, Yeso ambotetemala la wɛɛla okina. Wɛɛla ɔsɔ tɛkɛtaka dikambo di’ombutshi woludi la ngandji ndo kɛnɛ kamondosalɛ anande ahende wele vɔ tshɛ la munga ya weke.

Ntondotondo, ɔna la kose mbele onto loleki tɛkɛtama lo wɛɛla akɔ ɔsɔ. Lushi lɔmɔtshi, nde ambɔlɔmba etenyi kande ka sango, ko she ambowoshatɔ aha la mengenga. Oma lâsɔ, ɔnɛ amɔnde oma lakawɔ, ko toyatambiya tshavu lo lɔsɛnɔ la mindo. Koko, totokohokamɛ Yeso lam’atɔkɔndɔlɛnde ɔkɔndɔ akɔ, kele tênde kana tayeya anto asɔ ahende didjidji dia wa na diɛnyawɔ.

Yeso ambotatɛ kɔndɔla ate: “Untu omotshi aki la ana apami ahendi. Ona kushi akatela shi ati: Papa, umbisha etenyi ka diango diayuyala le mi. Ku [she] akâkahanya diango diandi.” Ɔna ɔsɔ la kose amondosala la diangɔ diolongodinde na?

Yeso ambolembetshiya ate: “Kem’edja, ona kushi akasanganya diango diandi tshe, akatshu lu lokendo lu kete y’etali. Ndi akatuhandjula diango diandi lu akambu wa lutshitu, wakandatshaka.” Kɛdikɛdi, nde ambomana falanga yande lo talanganaka la wa numba. Oko wadiɛnya Yeso, ekakatanu wamboyoyala l’ɔkɔngɔ diko:

“Lam’akandamani diango diandi tshe, ndjala ka kasha ka wulu kakayala lu kete sho. Ndi akatatela mpumba diango. Ku ndi akatshu, akatekesanela la untu omotshi la lu kete yako. Ku untu ako akûtumi dia ntuleshaka sumbu l’usui. Ku ndi akalangi ndutsha dikundju diandi la pusu yakalekaka sumbu. Nduku untu lakawusha ema a nde.”

Mbidjangemɛ dia namaka nsombo aki dikambo dia nsɔnyi efula le Ose Juda, nɛ dia nyama shɔ yaki mindo lo ndjela Ɛlɛmbɛ! Koko kɛnɛ kakaleke pɛnyahɛnya ɔna ɔsɔ ele ndjala kakayokonyaka lo nde ndjokombola ndo diangɔ diakawaleshaka sombo. L’atei wa fɔnu kɛsɔ, oko wakatotɛ Yeso, ‘nde akayokana yimba.’

Yeso ambotetemala l’ɔkɔndɔ ande, ata ate: “Ndi [akayatɛ] ati: Ndi ma efula dieli la ekambi wa papa, ndu dikina ladiku, ku dim’one avo ndjala lindu li! Dimi layunela, layutsho le papa; layutuwutela nti: Papa, dimi lakatshela ulungu kolo, lakatshi kolo ndu lu ashu aye. Ololo ami hakuki, dia vo mbetami ntu vati: On’aye; umbete uku ukambi aye omotshi. Ku ndi akunela, akayi le shi.”

Dikambo dimɔtshi diahombaso kana ladiɔ yimba diɔ nɛ: Otondoyala she akohamwɛhamwɛ la kɛlɛ lam’akandamɔ oma lakawɔ, tshike ondo ɔna ɔsɔ kombeya kɛnɛ kakandahombe sala. Ondo nde otɔsa tɛdikɔ dia kalola ko toyanga olimu dihole dikina, di’aha nde mɛnana la she nto. Koko, kanyi shɔ kondjala lo yimba yande. Nde akalange kalola lakawɔ!

Mbokɛmaka hwe dia, ombutshi wa pami wa lo wɛɛla wa Yeso ɔsɔ mɛnyaka didjidji dia Jehowa Nzambi, Shɛso lele l’olongo loludi la ngandji ndo la kɛtshi. Ondo ndo wɛ ambeya ɔnɛ ɔna lakashishɔ, lelɛwɔ nto ɔnɛ ɔna la lotshito, mɛnyaka didjidji di’atshi wa pɛkato wa mamba. Afarisɛ, wanɛ watɛ Yeso awui asɔ, wakawɔnyɔla ntondo l’ɔtɛ w’ɔnɛ nde mbalɛ l’anto wa ngasɔ. Ko ɔna l’enondo alembetshiyande na?

Etena kambɛnama ɔna lakashishɔ

Lo ndjela wɛɛla wa Yeso, woho akɔna wolongodiwɔ ɔna lakashishɔ, kana ɔna la lotshito, lam’okaludinde le she na? Tohokame woho watotɛ Yeso:

“Lam’akindi tshalula, shi akawenyi, akangasana la ketshi, akalawo, akatûkhumbatela lu kingu, akanonana la ndi.” Ombutshi wa ngasɔ wa kɛtshi ndo woludi la ngandji mɛnyaka mɛtɛ didjidjdi dia Jehowa, Shɛso lele l’olongo!

Ondo papa kɛsɔ akoke nsango y’endana la lɔsɛnɔ la mindo lambɔsɛnaka ɔnande. Koko nde ambôlongola, aha la mbosanya l’ɛkɔnya. Ndo Yeso lawɔ ekɔ la yimba ya ngasɔ, nɛ dia nde ntshɔ̂ka otsha le atshi wa pɛkato la elongodi w’elambo wolembetshiyami lo wɛɛla ɔnɛ oko ɔna la lotshito.

Mɛtɛ, ombutshi wa yimba wa lo wɛɛla wa Yeso ekɔ la kanyi mɔtshi lo dikambo dia ndjatshumuya k’ɔnande lam’ɛnyinde elungi kande koludi la lonyangu ndo la lɔkɔnyɔ. Koko, kɛnɛ kambosala ombutshi ɔsɔ woludi la ngandji kambokimanyiya ɔna ɔsɔ dia nde nsuya pɛkato yande, oko watotɛ Yeso ate: “Ona akawutela ati: Papa, dimi lakatshela ulungu kolo, ndu lakatshi kolo lu ashu aye. Ololo ami hakuki, dia vo mbetami ntu vati: On’aye.”

Kam’otumbi ɛtɛkɛta ɛsɔ oma l’onyɔ w’ɔnande, papa kɛsɔ ambotomɛ ekambi ande dui ate: “Nyela ukutu wuleki ololo, nyôlotsha, nyuwudji lohete lu lunya landi, la sabata l’ekulu andi. Nyela osongo wa ngombe wununyi, nyûdiaki, keli tuli, tongenengene. Ne dia on’ami one akavu, ku ambuyala la lumu ntu; ndi akashisho, ku ambenama.” Ko vɔ “wakatatela ngenangena.”

L’etena kɛnɛ, “ona l’enundu aki l’ekambo.” Nyɛsɔ tohokame etenyi ka komelo k’ɔkɔndɔ ɔnɛ kele tênde kana tayeya alembetshiya ɔna l’enondo ɔsɔ. Yeso ambota lo dikambo diande ate: “Lam’akandayayakaka, lam’akandasukana lasuki la luudu, ndi akuki wahuma la wano wenye. Ku ndi aketi ukambi omotshi, akawumbula akambu wakayala. Ku ndi akawutela ati: Onanyo kambuya. Sho ambûdiakela osongo wa ngombe wununyi, ne dia ndi ambûlungula la wulu ndu la ki. Keli ndi akumala kele, kunanga mboto lu luudu. Ku shi akatumbi, akayôsengasenga. Keli ndi akakaluya shi diui ati: Enda, deku efula ne diamumukukambela ulimu, dimi kundjaka elembe aye nduku lushi. Keli we atambisha kuyanga yana ya mbudi nduku lushi, dia dimi ngenangena l’engenyi ami. Keli lam’uyi on’aye one, lakali diango diaye la amantu a luseka, we ambûdiakela osongo a ngombe wununyi!”

Wa na wakoki nkɛlɛ oko ɔna l’enondo lam’ɛnyiwɔ ɔnɛ wamboka atshi wa pɛkato kɛtshi ndo wambowadja yimba na? Kema afundji l’Afarisɛ? Lam’ele Yeso ambowaokɛ wɛɛla ɔnɛ nɛ dia vɔ mbɔ̂nyɔlaka l’ɔtɛ walongolande atshi wa pɛkato, vɔ mɛtɛ mbele didjidji di’ɔna l’enondo.

Yeso ambodihiya ɔkɔndɔ ande l’ɛtɛkɛta wasɛngasɛnga ombutshi ɔsɔ ɔnande l’enondo, ata ate: “On’ami, we ndjalaka la mi nshi tshe. Kene tshe keli kami, kaye keto. Keli aki ololo mbola la ngenangena, ne dia onanyo one akavu, ku ambuyala la lumu; akashisho, ku ambenama.”

Yeso hɛnyisha kɛnɛ kayoyosala ɔna l’enondo. Koko mɛtɛ, sho mbeyaka ɔnɛ l’ɔkɔngɔ diko, l’ɔkɔngɔ wa nyɔi la eolwelo ka Kristo, “elombedi efula waketawo,” ondo l’atei awɔ, aki ndo wanɛ wakenga olui wa “ona l’enundu,” wanɛ wata Yeso lo wɛɛla ɔnɛ.

Ana ahende asɔ alembetshiyawɔ lo nshi yaso nyɛ na? Ekɔ paka wanɛ weya akambo efula w’endana l’asangwelo wa Jehowa dia vɔ monga l’ɔkɔkɔ wakokawɔ mbɔtɔ lande lɔngɛnyi. Ɔna l’enondo nembetshiyaka atɔi amɔtshi wa lo “limba la tshitshe l’ekoko,” kana “ekelizia wa ana wa nundu wambufundama kumbu yawo l’ulungu.” Akristo asɔ wakayala la dionga diele oko nɛ di’ɔna l’enondo. Vɔ konanga nongola olui okina w’anto wayɔsɛna lanɛ la nkɛtɛ, “ekoko ekina,” nɛ dia vɔ wakakanaka ɔnɛ anto asɔ wekɔ lo mbava lokumu lawɔ.

Ɔna la lotshito nembetshiyaka anto amɔtshi wamɔ oma l’atei w’ekambi wa Nzambi dia toyanga ɛngɛnɔngɛnɔ wa l’andja ɔnɛ. Koko, l’edjedja ka wonya, anto asɔ ndjoyatshumuyaka, ndjokalolaka ndo ndjɔtɔka l’ɔnɔngɔ w’ekambi wa Nzambi wele la wasaso. Mɛtɛ, Shɛso ekɔ la ngandji ndo la kɛtshi otsha le wanɛ wetawɔ dia wekɔ l’ohomba w’edimanyielo ndo wa kalola oya le nde! Luka 15:11-32; Akambu w’Asi Lewi 11:7, 8; Etsha 6:7; Luka 12:32; Heberu 12:23; Joani 10:16.

▪ Yeso wa na wôkɛnde wɛɛla ɔnɛ ndo lande na?

▪ Onto akɔna loleki tɛkɛtama l’ɔkɔndɔ ɔnɛ, ndo kakɔna kambôkomɛ?

▪ Lo nshi ya Yeso, wa na waki oko ombutshi wa pami la ɔna la kose?

▪ Woho akɔna wayela Yeso ɛnyɛlɔ k’ombutshi wa pami woludi la kɛtshi wa lo wɛɛla ande?

▪ Ɔna l’enondo ngande wɔsande olongwamelo wa kosɛnde lo asho ande, ndo lande na kakokaso mbuta ɔnɛ Afarisɛ wekɔ oko ɔna l’enondo?

▪ Kitshimudi yakɔna yele la wɛɛla wa Yeso lo nshi yaso nyɛ?