Tshapita 87

Yala la lomba l’oshika dia ndjâlɔngɔsɔlɛ nshi yâye

YESO oma la shidiya kɔndɔlɛ elui w’anto ɔkɔndɔ w’ɔna la lotshito, l’atei w’anto akɔ mbele ndo ambeki ande, elongodi w’elambo wa lokeso, atshi wa pɛkato wa mamba, kâmɛ ndo afundji l’Afarisɛ. Kakianɛ, nde ambotatɛ mbutɛ ambeki ande ndo ambowaokɛ wɛɛla wa kanga ɔngɔnyi ɔmɔtshi lambolongola nsango ya kɔlɔ lo lokombo la kapita kande, ɔnɛ lalama diangɔ diande.

Yeso ate: kanga ɔngɔnyi ɔsɔ ambelɛ kapita kande ndo ambowotɛ ate: layanga konya oma l’olimu. Ko kapita kakɔ oyambola ate: ‘Kakɔna kahombami ntsha lam’ele owandji ami ayanga minyami oma l’olimu wa kapita na? Dimi kema la wolo wa kamba nkɛtɛ, dimi mbokaka nsɔnyi nɔmba anto diangɔ ɔlɔmbalɔmba. Aah! Lambeya kɛnɛ kahombami ntsha, kele lam’ayowominya oma l’olimu, anto kawotanongolaka lawakawɔ.’

Kapita kɛsɔ ayangande ntsha na? Nde ambelɛ wanɛ tshɛ wokolami abasa le owandji ande. Nde amombola onto la ntondo ate: “Efula kakona kukulamiye le uwandji ami?”

La ntondo mbôkadimolande ate: ‘Litɛlɛ 2 200 y’esɔ k’ɔlivɛ mbokolamimi.’

Ko nde lande ate: ‘Ɔsa dikatshi diayɛ dia dibasa, djasɛ kele funda esadi esadi wate litɛlɛ 1 100.’

Mbambolande okina ate: ‘Ko wɛ angana wokolamiyɛ?’

Ko ɔsɔ mbawotɛnde ate: ‘mpaya lokama y’eponga.’

‘Ɔsa dikatshi diayɛ dia dibasa kele ofunde wate akumi enanɛi.’

Kapita kɛsɔ ekɔ la lotshungɔ la kitshakitsha abasa wokolamiwɔ le owandji ande, nɛ dia l’etena kɛnɛ ko nde êke olami w’okundji w’owandji ande. Lam’akitshɛkitshɛnde anto lofulo l’abasa wokolamiwɔ, nde ekɔ lo mbɔtɔ ɔngɛnyi la wanɛ wayokoka ndjôkimanyiya lam’ayondoyomɔ oma l’olimu.

Lam’oki owandji ande kɛnɛ kotshende, nde amamba heyama. Nde ‘ambândola kapita kɛsɔ, kânga mbende kɔlɔ, nɛ dia nde ambotsha awui w’onto lele la lomba l’oshika.’ Mɛtɛ, Yeso ambonyomota nto ate: ‘ana wa dikongɛ di’akambo nɛ wekɔ la mayɛlɛ efula le lɔlɔnga lawɔ vamɛ ndeka ndo ana w’osase.’

Oma lâsɔ, Yeso ambosha ambeki ande wetshelo oma lo wɛɛla ɔnɛ, awakeketsha ate: “Nyuyandeli engenyi uma lu ukundji w’akambu wa kolo. Okone lam’ayushila ukundji ako, vo wayunyulungula lu mvudu yawo ya pundju.”

Yeso handodi kapita kɛsɔ l’ɔtɛ wa lokeso lande, koko l’ɔtɛ wa kɛsɔ yande, l’ɔtɛ wa lomba l’oshika lele lande. Mbala efula, ‘ana wa dikongɛ di’akambo nɛ’ kambaka la falanga yawɔ la mayɛlɛ tshɛ kana la lowandji lawɔ dia vɔ mbɔtɔ ɛngɛnyi la wanɛ wakoka ndjâkimanyiya ndo vɔ lawɔ l’ɔkɔngɔ diko. Ɔnkɔnɛ, ekambi wa Nzambi, ‘ana w’osase,’ ndo vɔ lawɔ pombaka kamba la diangɔ diele lawɔ, ‘ekundji awɔ wa kɔlɔ,’ la lomba dia vɔ ndjakondjiyɛ wahɔ.

Koko, lo ndjela kɛnɛ kata Yeso, oma l’ekundji ɛsɔ mbahombawɔ mbɔtɔ ɛngɛnyi la wanɛ wakoka mbalongola lo “mvudu . . . ya pundju.” Le wanɛ wele l’atei a lemba la tshitshɛ l’ekɔkɔ, mvudu shɔ yekɔ l’olongo; le wanɛ wele l’atei w’“ekoko ekina,” mvudu shɔ yekɔ lo Paradiso ka lanɛ la nkɛtɛ. Lam’ele paka Jehowa Nzambi nde l’Ɔnande ato mbakoka nongola anto lo mvudu shɔ, sho pombaka kalangana dia mbɔtɔ lawɔ ɔngɛnyi, lo kambaka la ‘ekundji aso wa kɔlɔ’ dia sukɛ wahɔ wa Diolelo. Lam’ayoshila ekundji wa l’emunyi, nɛ dia ekundji akɔ mɛtɛ wayoshila, kete lâsɔ tambotashilaka ndjalɔngɔsɔlɛ nshi yayaye.

Yeso ambotetemala mbuta ɔnɛ wanɛ wele la kɔlamelo kânga lo diangɔ sɔ dioleki tshitshɛ, diangɔ dia l’emunyi, wayoyala ndo la kɔlamelo lo akambo woleki ohomba. Nde ambotetemala mbuta ate: “Ku naka nyu tanyaki la kolamelu l’ukundji wa kolo, akona ayunyukimiya ekundji wa mete [wahɔ wa lo nyuma, mbuta ate wahɔ wa Diolelo]? Naka tanyaki la kolamelu lu diango dia untu ukina [wahɔ wa Diolelo wakakitsha Nzambi l’anya w’ekambi ande], akona ayunyusha dieli dianyu [difuto dia lɔsɛnɔ lo mvudu ya pondjo]?”

Mɛtɛ, hatokoke ndjâla mbala kakɔ ɔtɔi ekambi wa Nzambi ko ndjâla ndo ɛhɔmbɔ w’ekundji wa kɔlɔ, ekundji wa l’emunyi, nɛ dia Yeso ambodihiya ate: “Nduku untu leya nkambela ewandji ehendi ulimu: ne dia ndi ayuhetsha omotshi, ayulanga ukina. Kuku kana ndi ayekama omotshi, ayonyola ukina. Nyu hanyeyi nkambela [Nzambi, NW] la ukundji ulimu.” Luka 15:1, 2; 16:1-13; Joani 10:16.

▪ Ngande wambosala kapita ka lo wɛɛla waki Yeso dia nde mbɔtɔ ɔngɛnyi la wanɛ wayokoka ndjôkimanyiya l’ɔkɔngɔ diko?

▪ “Ukundji wa kolo” kɛdikɛdi na, ndo woho akɔna wakokaso kamba lawɔ dia kondja ɛngɛnyi?

▪ Akɔna akoka tolongola lo “mvudu . . . ya pundju,” ndo mvudu yakɔ shɔ kɛdikɛdi na?