Tshapita 91
Lazaro ambolɔ
KAKIANƐ, Yeso nde la wanɛ watawotshindɛ wambokoma lo diombo dia Lazaro. Diombo diakɔ diekɔ wooko wodihami la dive dimɔtshi la soko. Yeso ambota ate: “Nyunya dive.”
Mata heye kɛnɛ kayanga ntsha Yeso. Diɔ diakɔ diamondota ate: “Khumadiondjo, udu aya sulu, ne dia aya nshi nyei loko.”
Koko Yeso ambowombola ate: “Dimi hakutedi nti: Naka we ayetawo, we ayena lutumbu la [Nzambi, NW]?”
Ko wambonya dive. Yeso ambedia asho l’olongo ko ambɔlɔmba ate: “Papa, lambukuka lusaka ne dia we mbukelakami. Dimi lakeyi nti: We atumbukelaka nshi tshe. Keli lambuta diui ne, ne dia ului w’antu wunyingi, wetawo vati: We kakantumi.” Yeso ambɔlɔmba lo asho w’anto tshɛ ɔnɛ kele weye ɔnɛ kɛnɛ kayangande sala kayosalema oma lo wolo wowosha Nzambi. Oma lâsɔ, nde ambota la dui dia wolo ate: “Lazaro, tumba!”
Wonya akɔ wâmɛ ko Lazaro ambotomba. Anya la ekolo ande wɔmbami la bɛtshi di’ahɔndɔ, ndo elungi kande kɔmbami la kitambala. Yeso ate: “Nyuwombole, ndi atshu.”
Lam’ɛnyiwɔ dihindo sɔ, Ase Juda efula woye dia ndjosamba Mariya nde la Mata wamboyala la mbetawɔ le Yeso. Koko, akina wambotshɔ dia totɛ Afarisɛ dikambo diambotshama. Aha la tshimbatshimba, vɔ l’ɛlɔmbɛdi wa lâdiko wambɔlɔngɔsɔla losanganya lɔmɔtshi l’Ase Sheke, mbuta ate tuminadi ta lâdiko t’Ase Juda.
Ase Sheke v’anɛ: Kayifasɛ, ɔlɔmbɛdi wa lâdiko, kâmɛ l’Afarisɛ la Asadukɛ, ɛlɔmbɛdi a weke, ndo ɛlɔmbɛdi wa lâdiko w’edjedja. Vɔ wekɔ lo ndjakiyanya ɔnɛ: “Atshasu na? ne dia untu one ntshaka tulimbitelu efula. Naka shu tayutshika okone, keti antu tshe mbêtawo. Ku asi Romo wayuya, wayosa kete yasu la wudja asu.”
Kânga mbetawɔ ewandji w’ɛtɛmwɛlɔ ɔnɛ Yeso “ntshaka tulimbitelu efula,” vɔ wekɔ lo ndjakiyanya paka lo dikambo dia dihole diawɔ la dia lowandji lawɔ. Eolwelo ka Lazaro kambohumuya Asadukɛ mpota ka mamba l’asolo, nɛ dia vɔ hawetawɔ ɔnɛ eolwelo kokaka ndjâla.
Ko Kayifasɛ, ɔnɛ lele ondo Osadukɛ, ambahola dui ate: “Nyu hanyeyi nduku dikambu. Nyu hanyukani yimba nyati: Eko ololo dia untu otoi mvwela antu, dia antu wa wudja tshe tawuvokaki.”
Nzambi mbakatshutshuya Kayifasɛ dia nde mbuta ɔsɔku, nɛ dia ɔpɔstɔlɔ Joani ayoyofunda ate: “[Kayifasɛ] kumvuta diui so dikambu diandi ndame.” Kayifasɛ akalange mbuta ɔnɛ pombaka ndjaka Yeso dia mbosekɛ dia nde kitshakitsha lowandji lawɔ la lokumu lawɔ. Koko, oko wata Joani, ‘Kayifasɛ akatatshi ɔnɛ Yeso akahombe mvɔ, aha paka lo dikambo dia wodja oto, koko dia tshumanya ana wa Nzambi.’ Ndo nto, sangwelo diaki Nzambi mɛtɛ ele di’Ɔnande mvɔ oko olambo w’etshungwelo lo dikambo di’anto tshɛ.
L’etena kɛnɛ, Kayifasɛ ambetawoya Ase Sheke dia vɔ nyanga woho wa ndjaka Yeso. Koko Yeso ambomɔ oma lo dihole sɔ, nɛ dia ondo Nikɔdɛmo, ɔmɔtshi a l’atei w’Ase Sheke lawôka ngandji efula, akawewuyisha sheke yakawawɔ̂twɛ. Joani 11:38-54.
▪ Lande na kambɔlɔmba Yeso lo asho w’anto tshɛ la ntondo ka nde mbolola Lazaro?
▪ Kakɔna kambosala wanɛ wɛnyi eolwelo ka Lazaro?
▪ Kakɔna kɛnya ɔnɛ Ase Sheke wekɔ akanga w’etema mindo?
▪ Kanyi yakɔna yaki la Kayifasɛ, ndo kakɔna kakôtshutshuya Nzambi dia nde mbuta?