Tshapita 93

Etena kayotomba ɔna onto sɛkɛ

YESO êke lo lɛkɛ la ngɛl’a nkushi (la Samariya kana la Ngalileya), ko Afarisɛ wamboya dia ndjowombola dikambo di’oyelo wa Diolelo. Vɔ fɔnyaka ɔnɛ diɔ diayoya lo yoho yayɛnama le anto tshɛ ndo nsɛlɛmɔnyi ya weke yayosalema, koko Yeso ate: “Diulelu dia [Nzambi hadiotoya, NW] la tulimbitelu t’antu mbeya. Ntu, vo hawuta vati: Enda, dio ne lane! kana ati: Dio diku leku! Keli diulelu dia [Nzambi diekɔ l’atei anyu, NW].”

Ɛtɛkɛta wa Yeso w’ɔnɛ “l’atei anyu” wakakadimwama esangɔ ɛmɔtshi ɔnɛ “l’atei w’etema anyu.” Diɔ diakɔ diakanyiya anto efula ɔnɛ Yeso akalange mbuta ate: Diolelo diaki Nzambi mbidjasɛ l’etema w’ekambi wa Nzambi. Koko, mbokɛmaka hwe dia Diolelo diaki Nzambi kema l’atei w’etema w’Afarisɛ asɔ waha la mbetawɔ, wanɛ watɛkɛta la Yeso l’etena kɛnɛ. Koko, diɔ diekɔ l’atei awɔ, nɛ dia Yeso Kristo, Nkumekanga kakasɔnama dia mbolɛ lo Diolelo diaki Nzambi ekɔ l’atei awɔ.

Ondo l’ɔkɔngɔ w’Afarisɛ minya ekolo mbambotetemala Yeso sawola l’ambeki ande lo dikambo di’oyelo wa Diolelo. Nde ekɔ lo ndeka kanyiya dikambo dia wôngelo ande wayaye lo lowandji la Diolelo lam’amondowaewola ate: “Antu wayunyutela vati: Enda, lene! kana ati: Enda lane! Tanyutshokaki, tanyâyelaki. Uku atungadimoka dingadimu dia ndjadi lu leke lomotshi l’ulungu ku dio menama lu leke lukina l’ulungu, wuhu ako mbayuyala On’a untu.” Ɔnkɔnɛ, Yeso ekɔ lo mɛnya ɔnɛ oko wɛnama dingadimu dia ndjadi lo lɛtshi la nkɛtɛ la woke, woho akɔ mbayɛnama djembetelo y’oyelo ande lo lowandji la Diolelo hwe le wanɛ tshɛ walanga ndjiɛna.

Oma lâsɔ, Yeso ambota akambo wakasalema lo nshi ya ntondo dia mɛnya kɛnɛ kayosala anto lam’ayondoya. Nde ambolembetshiya ate: “Uku akayala lu nshi [ya] Noa, mbayuyala lu nshi ya On’a untu. . . . Wuhu ako mbakayala ndu lu nshi ya Lota—vo wakalekaka, wakanokaka; wakasumbaka, wakasundjaka; wakuneka, wakahikaka mvudu. Keli lushi lakatshu Lota uma la Sodoma, dja ya tsho yakahulo uma l’ulungu, yakâdiaki vo tshe—wuhu oso mbayuyala lushi [layotomba Ɔna onto sɛkɛ, NW].”

Yeso hatshi ɔnɛ anto wa lo nshi ya Nɔa la wa lo nshi ya Lɔta wakalanyema paka l’ɔtɛ wakawasalaka elimu wokotshaka anto tshɛ, ɛnyɛlɔ oko: ndɛ, nɔ, somba, sondja, monɛ, ndo mbika mvudu. Kânga Nɔa nde la Lɔta la nkumbo yawɔ wakasalaka akambo asɔ. Koko, anto akina wakayatambiya tshavu l’elimu ɛsɔ wa lushi la lushi aha la mbidja yimba dia sala lolango la Nzambi, ndo l’ɔkɔkɔ akɔ ɔsɔ mbakawalanyema. L’ɔkɔkɔ akɔ wâmɛ mbayolanyema anto amɔtshi lam’ayotomba Kristo sɛkɛ lo fɔnu ka woke kayokomɛ dikongɛ di’akambo nɛ.

Lam’akande epole ɔsɛkɛ dia mɛnya ohomba wa mbɔsa tɛdikɔ esadi esadi lam’ayɛnama djembetelo ya wôngelo ande wayaye lo lowandji la Diolelo, Yeso ambota nto ate: “Lu lushi lako, naka untu eko ladiku dia luudu, la diango diandi dieko l’etei, ndi takitaki dia ntuditundja; pupu ndu le untu leli l’ekambo, ndi takalulaki. Nyuho wadi a Lota.”

Lam’ayɛnama djembetelo ya wôngelo wa Kristo, aha anto mamema ekundji awɔ wa l’emunyi ko ndjasekɛ dia mbɔsa tɛdikɔ esadi esadi. Lam’akandatatombaka oma l’osomba wa Sɔdɔma, wadi a Lɔta mɛtɛ akɛwɔ l’ɔkɔngɔ la lonyangu l’efula lo dikambo dia diangɔ diakandatshike, ko nde akahilɔ ekundji ka lɛɛhɔ.

Yeso ambotetemala kɔndɔla kɛnɛ kayosalema lo wôngelo ande, atɛ ambeki ande ate: “Utshu oso, apami ahendi wayuyala lu tangi: wayosa omotshi, wayutshika ukina. Amantu ahendi wayohela diango kame: wayosa omotshi, wayutshika ukina.”

Mbɔsama ekɔ dikambo diafɔna la wɔtwɛlɔ wa Nɔa nde la nkumbo kande lo wâto a luudu ndo otombelo wa Lɔta nde la nkumbo kande oma l’osomba wa Sɔdɔma l’ɛlɔmbwɛlɔ k’andjelo. Kɛdikɛdi kondja panda. Koko, tshikala kɛdikɛdi nanyema.

L’etena kɛnɛ, ambeki ande wambowombola vate: “Khumadiondjo, lendi na?”

Ko Yeso ambâkadimola ate: ‘Lɛn’ele demba mbatotshumanaka ndo wa mpongo.’ Wanɛ ‘wambɔsama’ dia kondja panda wekɔ oko wa mpongo yele la asho wɛna etale, nɛ dia vɔ tshumanaka lɛnɛ ele demba. Demba sɔ kɛdikɛdi Kristo ka mɛtɛ lam’ayondoya lo yoho yahɛnama lo lowandji la Diolelo ndo lo dambo dia lo nyuma diayokatɛ Jehowa anto. Luka 17:20-37; Etatelu 19:26.

▪ Lo yoho yakɔna yele Diolelo l’atei w’Afarisɛ?

▪ Lo yoho yakɔna yafɔna wôngelo wa Kristo la dingadimu dia ndjadi?

▪ Lande na kayolanyema anto amɔtshi l’ɔtɛ wa ditshelo diayowosala lo nshi ya wôngelo wa Kristo?

▪ Alembetshiya mbɔsama ndo tshikala?