Tshapita 94

Ohomba wa nɔmba la wa ndjâkitshakitsha

NTONDOTONDO, lam’akinde la Judeya, Yeso akoke wɛɛla ɔmɔtshi wɛnya ohomba wa monga l’etete lo dɔmbɛlɔ. L’etena kɛnɛ, lam’atandatshu mbala ka komelo otsha la Jerusalɛma, nde ambɛnya nto ohomba wa monga la tshete lo dɔmbɛlɔ. Ondo Yeso mɛtɛ ekɔ la Samariya kana la Ngalileya l’etena kamondokɛ ambeki ande wɛɛla okina ɔnɛ:

“L’usumba omotshi kaki [shushi, NW], laki kumbukaka [Nzambi, NW] woma, ndu laki konemiaka untu. Ndu wadi aki udu aki l’usumba ako. Ndi akayakaka le ndi, akataka ati: Onsombwele le utunyi ami. Nshi motshi, ndi kunanga. Keli l’okongo diku, ndi akati l’utema andi ati: Kuyanga dimi haluki [Nzambi, NW] woma, ndu halalemia untu, ku ne dia wadi aki udu one ambomenya pa, dimi layôsombweya. Ndi atukonembia la olendolendo andi.”

Kakianɛ, Yeso ambotondja wetshelo oma l’ɔkɔndɔ ande ɔsɔ, ata ate: “Nyulungi okone wata [shushi ya, NW] kolo. Ku [Nzambi, NW] hasombweya esonami andi watûlelelaka ndu la yanyi ndu l’utshu, ndi atâkungiyaka edja uka?”

Oma l’ɛtɛkɛta ɛsɔ, Yeso hɛnyisha ɔnɛ Jehowa Nzambi fɔnaka la shushi shɔ ya kɔlɔ lo yoho mɔtshi. Koko, naka shushi ya kɔlɔ mbetawɔka ntsha dui dimɔtshi l’ɔtɛ w’etete ka dikambo, kete mɛtɛ Nzambi, ɔnɛ lele kanga ɔlɔlɔ ndo losembwe, ayôkɛ ekambi ande naka vɔ tetemala nɔmba aha la mpekɔ. Diɔ diakɔ diambotetemala Yeso mbuta ate: “Dimi lambunyutela nti: [Nzambi, NW] ayâsombweya esadi.”

Tena efula, vɔ mɛngiyaka anto k’anto la ase weola lam’awahembolɛwɔ enongo, koko vɔ swɛka akanga w’ɛngɔnyi la wa lokumu. Koyanga mbediɔ ɔsɔku, Nzambi ayenda, aha paka dia mbisha atshi wa kɔlɔ dilanya diasungana lawɔ to, koko ndo dia sambwɛ ekambi ande la losembwe tshɛ lo mbasha lɔsɛnɔ la pondjo. Ko anto angana wayashikikɛ ɔnɛ Nzambi ayowasambwɛ esadi esadi na?

Lam’atɛkɛtande dikambo dia mbetawɔ k’endana la wolo wa dɔmbɛlɔ, Yeso amombola ate: “Lam’ayuya On’a untu, [onde] ndi ayutana mbetawo la kete?” Kânga mbahakadimwami dimbola sɔ, mbokɛmaka di’ɔnɛ anto efula hawotoyala la mbetawɔ ka ngasɔ lam’ayoya Kristo lo lowandji la Diolelo.

L’atei a wanɛ walonga Yeso mbele ndo anto wayaɔsa oko anto w’ɛlɔlɔ. Vɔ mbetawɔka l’etema awɔ vamɛ ɔnɛ anto w’ɛlɔlɔ mbeso, ndo vɔ mɔnyɔlaka anto akina. Ondo ndo ambeki amɔtshi wa Yeso mbele l’ɔnɔngɔ w’anto wa ngasɔ. Diɔ diakɔ diambondokɛ anto asɔ wɛɛla ɔnɛ:

“Apami ahendi wakoto lu [tɛmpɛlɔ, NW] dia ntolomba. Omotshi aki Ufarise, ukina aki ulungudi w’elambu. Ufarise akemala, akalombe ndame okone ati: [Nzambi, NW], lambukuka lusaka ne dia dimi kema uku antu akina, apotwanyi, akanga a lukesu, amunanyi, kana uku ulungudi w’elambu one. Dimi latukilaka mbu ya nde tena pendi lu lubingu la lubingu. Dimi latukimoka etenyi ka dikumi uma lu diango tshe diatumukundjaka.”

Afarisɛ mbeyamaka efula lo woho wɛnyawɔ losembwe lawɔ lo sɛkɛ dia mambia anto akina. Vɔ wekɔ la mbekelo ka nkilaka diangɔ dia ndɛ Lushi l’Ɔtɔi la Lushi la Nɛi oko akawayadjangɛ vamɛ, ndo vɔ hawohɛ dia futa etenyi ka dikumi kânga l’adiyo w’anyanya wa l’oswe. Lo Difɛstɔ dia Tabɛrnakɛlɛ, ambeta ngɔndɔ mɔtshi, vɔ wakɛnya woho wɔnyɔlawɔ anto k’anto lam’akawate ɔnɛ: “Ului w’antu ako waheyi elembe [mbuta ate woho wakalembetshiyaka Afarisɛ ɛlɛmbɛ akɔ], wambudjama mananu.”

Lam’atandatetemala mboka wɛɛla ande, Yeso ambɔtɛkɛta dikambo di’ɔmɔtshi a l’atei w’anto asɔ ‘wambodjama mananu,’ ata ate: “Ulungudi w’elambu akemala tshalula, kunanga mbedia ashu andi, keli akayakomola lu tulu; akati ati: [Nzambi, NW], umbuki ketshi, dimi untu a kolo!” Lam’ele olongodi w’elambu ekɔ la ndjakitshakitsha ndo ambosuya munga yande, Yeso ate: “Dimi lambunyutela nti: Untu oso akatshu lakandi uyindjami ndeka ukina; ne dia untu tshe layambiya, ayukitshakitshama; keli one layakitshakitsha, ayumbiyama.”

Ɔsɔku mbamboka Yeso epole ɔsɛkɛ nto dia mɛnya ohomba wa ndjâla la ndjakitshakitsha. Hatokoke mamba l’ɔtɛ w’ɔnɛ ndo ambeki wa Yeso mendanaka la dikambo sɔ, nɛ dia vɔ wakole lo wodja wele Afarisɛ, wanɛ wayaɛna ɛlɔlɔ lo asho awɔ hita, wekɔ la shɛngiya y’efula, ndo anto wa l’etena kakɔ ndekaka nɛmiya paka lokumu l’onto la dihole diande l’atei wa tshunda. Ko ande wetshelo w’amɛna wambotetsha Yeso lo dikambo dia ndjakitshakitsha lee! Luka 18:1-14; Joani 7:49.

▪ Lande na kamboyosala shushi ya kɔlɔ kɛnɛ kɔ̂lɔmba wadi aki odo, ndo wetshelo akɔna wakondjaso oma lo wɛɛla ɔsɔ waki Yeso?

▪ Mbetawɔ kakɔna kayoyanga Yeso lam’ayondoya?

▪ Lam’atande dikambo di’Ofarisɛ nde l’olongodi w’elambo, Yeso wa na wôkɛnde wɛɛla ɔsɔ?

▪ Dionga diakɔna di’Afarisɛ diahatakoke monga ladiɔ?