Tshapita 95
Wetshelo l’odiakelo wa diwala la dia mboka ana ngandji
YESO nde l’ambeki ande wotatshu otsha la Jerusalɛma lo difɛstɔ di’Elekanelo dia l’ɔnɔnyi 33 T.D. Vɔ wambotehɔ Ɔkɛdi wa Jɔrɔdana ko wambodjɛ lo mboka katenyanya lɛtshi la nkɛtɛ la Pereya. Ambeta oko mingu mɔtshi, Yeso aki la Pereya, koko wakayɔ̂sɛngasɛngaka dia nde ntshɔ otsha la Judeya nɛ dia ɔngɛnyi ande Lazaro aki la hemɔ. Lam’akinde la Pereya, Yeso akatɛkɛta la Afarisɛ dikambo di’odiakelo wa diwala, koko kakianɛ, vɔ wambovusola dikambo sɔ nto.
L’atei w’Afarisɛ, tokanyi efula totshikitanyi tekɔ lo dikambo di’odiakelo wa diwala. Mɔsɛ akate ɔnɛ onto kokaka sɛka wadiɛnde naka nde ambowoshola la “dikambu dimotshi dia sonyi.” Amɔtshi kanyiyaka ɔnɛ dikambo sɔ mendanaka paka la lɔkɛwɔ la kɔlɔ. Koko akina mbɔsaka oseka munga tshɛ ka tshitshɛ efula oko “dikambu dimotshi dia sonyi.” Ɔnkɔnɛ, dia vɔ mbidja Yeso l’ohemba, vɔ wambowoka dimbola nɛ vate: “Aha ekila dia pami nkimo wadendi lu akambu tshe?” Vɔ wekɔ lo kanyiya ɔnɛ oyadi kakɔna tshɛ kayokadimola Yeso, nde ayokakatana l’Afarisɛ amɔtshi wele la kanyi yotshikitanyi.
Koko, Yeso ambokadimola dimbola sɔ lo yoho ya diambo efula, aha lo ndjela tokanyi t’anto, koko lo ndjela sangwelo di’oma l’etatelo di’endana la diwala. Nde ambowambola ate: “Nyu nyatali nyati: One lakâtungi l’etatelu, akâtungi umi la wadi? Ndu mbakandati ati: Aha dia dikambu ne mbayutshika untu shi la nyangu, mbayundumamana la wadendi, ku vo ahendi wayuyala untu otoi? Okone vo kema antu ahendi ntu, wambuyala untu otoi. Untu tamamitulaki kene kakamamanya [Nzambi, NW].”
Yeso ambɛnya ɔnɛ sangwelo diaki Nzambi di’oma k’etatelo ele di’atshukanyi akɔ ahende tshikala kâmɛ, di’aha vɔ ndjaka diwala. Afarisɛ wambôkadimola ɔnɛ ko naka ɔsɔku mbediɔ, “okoko wana wakati Mose dia mbisha umuntu mukanda w’ediakelu ka diwala, la mbûkimo?”
Ko Yeso ambâkadimola ate: “Ne dia lunyu l’etema anyu, mbaketawo Mose nyu nkimo wadienyu, keli uma l’etatelu, kundjala osoku.” Mɛtɛ, lam’akalɔngɔsɔla Nzambi diwala dia ntondo l’ekambɔ k’Ɛdɛna, nde kosangoya odiakelo wa diwala.
Yeso ambotetemala mbutɛ Afarisɛ ate: ‘Lambonyotɛ nte: Onto tshɛ lakimɔ wadiɛnde, onyake lo dikambo dia monanyi [lo Grɛkɛ: por·neiʹa], ko ntshuka omoto okina, ambosala loseka.’ Oma l’ɛtɛkɛta ɛsɔ, nde ambɛnya ɔnɛ por·neiʹa, tshɛkɛta yɛnya lɔkɛwɔ la mindo l’akambo wa dieyanelo, mbele ɔkɔkɔ wâmɛ wetawɔ Nzambi di’onto ndjaka diwala.
Lam’ambowoshihodia ɔnɛ diwala pombaka ndjâla osanga wa pondjo wakoka kakitwama paka l’ɔkɔkɔ ɔtɔi oto, ambeki wambotɛ Yeso vate: “Naka dikambu dia umi la wadi dieko osoku, keti hasungana ntshukana.” Aha la tamu, onto tshɛ lasangoya tshukana pombaka kana yimba ɔlɔlɔ ɔnɛ amama wa lo diwala wekɔ amama wa pondjo!
Oma lâsɔ, Yeso ambɔtɛkɛta dikambo dia lonyemba. Nde ambolembetshiya ɔnɛ apami amɔtshi mbotɔka ɛlɛnga, vɔ hawokoke ntshuka wadi, nɛ dia vɔ kema la wolo wa mbeyana la amato. Akina wakatongoloma ɛlɛnga oma le anto, nɛ dia wakawanya tenyi dia demba dia dieyanelo. Amɔtshi mbikikɛka kana mbahemɛka saki yawɔ ya tshukana ndo ya mbeyana la amato dia vɔ ndjasha la tshondo l’akambo w’endana la Diolelo dia l’olongo. Yeso ambodihiya ate: “One leya nungula diui ne [dia tshikala onyemba], adilunguli.”
Kakianɛ, anto wambotatɛ mbela anawɔ oya le Yeso. Koko ambeki wambâhangwɛ ndo woyanga mbasekɛ, nɛ dia vɔ hawolange mɛtɛ dia Yeso nɛmba ɔlɛmbalɛmba. Koko Yeso ate: “Nyete tokendakenda wayi le mi, tanyâsikeki, ne dia diulelu dia [Nzambi, NW] dieli dia antu uku vo. Mete kanyutelami nti: Untu tshe lahalungula diulelu dia [Nzambi, NW] uku kiendakenda, mete ndi hoto loko.”
Ande wetshelo wa dimɛna efula wambosha Yeso lanɛ lee! Dia sho mbɔtɔ lo Diolelo diaki Nzambi, sho pombaka ndjakitshakitsha ndo mbetawɔ ndakanyema oko ana w’akɛnda. Koko ɛnyɛlɔ ka Yeso mɛnyaka nto ɔnɛ ekɔ ohomba, djekoleko le ambutshi, dia vɔ mbetshaka tena dimɔtshi kâmɛ l’anawɔ. Ko Yeso ambɛnya ndo ngandji kokande ana w’akɛnda, awaɛmba l’anya ndo âtshɔkɔla. Mateu 19:1-15; Euhwelu k’Elembe 24:1; Luka 16:18; Mako 10:1-16; Luka 18:15-17.
▪ Tokanyi takɔna totshikitanyi tele l’Afarisɛ lo dikambo di’odiakelo wa diwala, ndo woho akɔna wambowohemba Yeso?
▪ Woho akɔna wambokadimola Yeso dimbola di’Afarisɛ, ndo naa ɔkɔkɔ ɔtɔi washa onto dikimɔ dia nde ndjaka diwala?
▪ Lande na kambota ambeki wa Yeso ɔnɛ ndeka ɔlɔlɔ ntshikala onyemba, ndo dako diakɔna diambosha Yeso?
▪ Wetshelo akɔna wambotosha Yeso oma lo kɛnɛ kamondosalɛ ana w’akɛnda?