Tshapita 96

Yeso nde l’owandji wa dikɛnda w’ɔngɔnyi

LAM’ATATETEMALA Yeso la lɔkɛndɔ lande, atatenyanya lɛtshi la nkɛtɛ la Pereya otsha la Jerusalɛma, ɔlɔngɔlɔngɔ ɔmɔtshi ambokusɔ la lowango ko amboyoka adwe la ntondo kande. Vɔ mbelɛka ɔlɔngɔlɔngɔ akɔ ɔnɛ owandji, lâsɔ ondo nde ekɔ la dihole dimɔtshi dia lokumu lo luudu lɔmɔtshi l’ɔtɛmwɛlɔ la lo ngelo kawɔ kana ekɔ ɔtɔi ɔmɔtshi wa l’atei w’Ase Sheke. Ndo nto, nde ekɔ l’ɔngɔnyi efula. Nde amombola ate: “Umbetsha w’ololo, kayumutsha dia nkita lumu la pundju?”

Ko Yeso ambôkaloya dui ate: “Okoko wana wambetaye wati: Ololo? Nduku leli ololo, tshikima [Nzambi, NW] ndame.” Ondo ɔlɔngɔlɔngɔ ɔsɔ mɛtɛ ambɔsa tshɛkɛta “ololo” oko mpɛtɛ, diɔ diakɔ diambowotɛ Yeso ɔnɛ paka Nzambi oto mbasungana la mpɛtɛ kɛsɔ.

Yeso ambotetemala mbotɛ ate: “Naka we kalanga mboto lo lumu, ukitanyiaki elembe.”

Ko ɔlɔngɔ akɔ ambowombola ate: “Elembe akona?”

Yeso ambôkadimola lo mboshilɛ ɛlɛmbɛ etanu wa l’atei w’Ɛlɛmbɛ Dikumi, ata ate: “Tudiakaki. [Tosalake loseka, NW]. Tuvaki. Tumamanyiaki. Olemia sho la nyo.” Ko Yeso ambokotsha ɔlɛmbɛ okina w’ohomba efula, ata ate: “Ulangi unyaye uku ayalangaye.”

Ko pami kɛsɔ ambôkadimola oma ka tshina di’otema ate: “Akambu aso tshe mbatumutshaka umaka dikenda. Dikambu diakona diambutshikale?”

Lam’okinde dimbola sɔ dia woke ndo di’ohomba efula, Yeso ambowoka ngandji. Koko, oko wamondɛna ɔnɛ pami kakɔ mamemaka lomombo la l’emunyi, Yeso ambowɛnya kɛnɛ kahombande sala, awotɛ ate: “Dikambu otoi mbambutshikala le ye. Utshu, utusundja diango dieli la ye, kusha akanga a weula, ku we ayuyala la diango l’ulungu. Kuyi, kuyundjeli.”

Lam’okinde ɔsɔku, pami kɛsɔ ambonyanga efula ko ambonɛ, aha la tamu, Yeso ambowenda la kɛtshi tshɛ lam’atandatshu. Ɔngɔnyi ande wambôdiha asho di’aha nde mɛna nɛmɔ di’okundji wa mɛtɛ mɛtɛ. Yeso ambokiyana ate: “Eko wulu le akanga w’engonyi, dia vo mboto lu diulelu dia [Nzambi, NW]!”

Ambeki wa Yeso wamamba lam’okiwɔ ɛtɛkɛta ɛsɔ. Koko vɔ wamboleka mamba efula lam’amondota dikambo nɛ dieya anto tshɛ ate: “Eotwelo ka kamelo lu ushu wa tedi, kambuleka eotwelo ka kanga ongonyi lu diulelu dia [Nzambi, NW] dikambu dia tshitshe.”

Ko ambeki wambowombola vate: “Akona ayeya nshimbamela?”

Yeso ambowaenda tɛ ko ambâkadimola ate: “Le antu, dikambu ne hadieyama ntshama, keli le [Nzambi, NW] kema osoku. Akambu tshe mbeyaka ntshama le [Nzambi, NW].”

Lo mɛnya ɔnɛ vɔ wambosala ɔsɔnwɛlɔ wotshikitanyi efula la wɔnɛ wambosala owandji wa dikɛnda w’ɔngɔnyi, Petero ambota ate: “Enda, shu tambutshika tshe, tambukuyela.” Ko nde ambowombola ate: “Kayutukundja na?”

Yeso ambâlaka ate: “Lu lushi layuyala andja w’uyuyu, lam’ayudjase On’a untu lu kiti ka diulelu ka lutumbu landi, ndu nyu nyayudjase lu kiti ya diulelu dikumi la hyendi, nyayulumbuya wedja dikumi la ehendi wa Isariyele.” Mɛtɛ, Yeso ambɛnya ɔnɛ etongelo k’oyoyo k’akambo wa lanɛ la nkɛtɛ kayoyala, ko diangɔ tshɛ diayonga oko wakidiɔ l’ekambɔ k’Ɛdɛna. Ndo Petero l’ambeki akina wayolongola difuto dia mbolɛ kâmɛ la Kristo lâdiko dia Paradiso kɛsɔ kayokokanɛ lo nkɛtɛ k’otondo! Mɛtɛ, sunganaka dia sho mbetawɔ shisha kakɔna tshɛ dia kondja difuto dia ngasɔ!

Koko, kânga nshi nyɛ ambeki wa Yeso wekɔ lo nongola afuto, nɛ dia Yeso amboshikikɛ ate: “Nduku untu layutshika luudu, anangu, akadiyendi, nyangu, shi, ana kana [di]kambo dikambu diami ndu ne dia lukumu l’ololo, lahulungula kakiane l’etena kene: mvudu, anangu, akadiyo, wanyangu, ana, ndu dikambo, tena lukama, kame l’asui; ku l’etena kayayi, lumu la pundju.”

Oko wadita Yeso, lo dihole tshɛ diayotshɔ ambeki ande l’andja ɔnɛ, vɔ wekɔ la diokanelo di’oshika kâmɛ l’anyawɔ Akristo oleki ndo nɛ diewɔ l’ewotɔ awɔ wa l’emunyi. Ondo owandji wa dikɛnda w’ɔngɔnyi amboshisha difuto sɔ ndo nɛ dia lɔsɛnɔ la pondjo lo Diolelo diaki Nzambi dia l’olongo.

L’ɔkɔngɔ w’akambo asɔ, Yeso ambota nto ate: “Keli efula weli la ntundu, wayuyala l’okongo; la efula weli l’okongo, wayuyala la ntundu.” Dikambo sɔ alembetshiyadiɔ na?

Yeso nangaka mbuta ɔnɛ anto efula wele la “ntondo” lo kondja waɛsɛ wa l’atei w’ɛtɛmwɛlɔ, ɛnyɛlɔ oko owandji ɔsɔ wa dikɛnda w’ɔngɔnyi, hawotɔtɔ lo Diolelo. Vɔ wayoyala “l’okongo.” Koko anto efula, kâmɛ ndo ambeki wa Yeso wele la ndjakitshakitsha, wanɛ wɔnywama oma le Afarisɛ wayaɔsa anto w’ɛlɔlɔ, oko anto wele “l’okongo”—oko anto wa la nkɛtɛ, kana wa ‛am ha·’aʹrets—wayoyala la “ntundu.” Ndjâla la “ntundu” nembetshiyaka ɔnɛ vɔ wayokondja diɛsɛ dia mbolɛ kâmɛ la Kristo lo Diolelo. Mako 10:17-31; Mateu 19:16-30; Luka 18:18-30.

▪ Dikɛnda dia pami di’ɔngɛnyi ekɔ la lowandji la woho akɔna ondo?

▪ Lande na kambotona Yeso dia mbelamɛ ɔnɛ ɔlɔlɔ?

▪ Woho akɔna wɛnyama wâle wa monga ɔngɔnyi l’ɛnyɛlɔ k’owandji ɔsɔ wa dikɛnda?

▪ Afuto akɔna wambolaka Yeso ambeki ande?

▪ Woho akɔna wayoyala wanɛ wele la ntondo l’ɔkɔngɔ, ndo wanɛ wele l’ɔkɔngɔ ndjâla la ntondo na?