Tshapita 98

Ambeki wambowana l’etena kambosukana nyɔi ka Yeso

YESO nde l’ambeki oma la tehɔ Ɔkɛdi wa Jɔrɔdana dia vɔ mbeta lo lɛtshi la nkɛtɛ la Pereya dia mbɔtɔ lo lɛtshi la nkɛtɛ la Judeya. Anto akina efula wekɔ lo tatshu kâmɛ lawɔ dia tosala difɛstɔ di’Elekanelo dia l’ɔnɔnyi 33 T.D., difɛstɔ diakɔ diambotshikala oko lomingu ɔtɔi dia diɔ salema.

Yeso ekɔ lo takɛndakɛnda la ntondo k’ambeki ande, ndo vɔ wamamba dia mɛna dihonga diande. Ohɔ dia, ambeta oko mingu mɔtshi lam’akavu Lazaro ko Yeso ayalɔngɔsɔla dia monɛ oma la Pereya otsha la Judeya, Tɔmasɛ akakeketsha ambeki akina ate: ‘Nyɛsɔ totshu ndo sho lawɔ, kele totovu la nde.’ Ohɔ nto dia Ase Sheke wakatshu sheke ya ndjakisha Yeso l’ɔkɔngɔ wa nde mbolola Lazaro. Diɔ diakɔ mɛtɛ dioka ambeki ande wɔma lam’atawatshu nto la Judeya.

Dia nde mbalɔngɔsɔla lo kɛnɛ kayotosalema, Yeso ambɔsa apɔstɔlɔ 12, ambotshɔ la wɔ lo diɛta ko ambowatɛ ate: “Nyendi, shu ane wutatshu utsha la Jerusalema, On’a untu ayutukimwama le elombedi a waki la afundji. Vo wayutuwamia dia ndi mvo. Vo wayûkimo le asi wedja dia vo mbôsoka, la mbôkomola, ndu dia mbudiaka l’utamba [w’asui, NW]. Ku lushi la satu, ndi ayulwama.”

Ɔnɛ kele mbala ka sato kambotɛ Yeso ambeki ande dikambo dia nyɔi la eolwelo kande lo ngɔndɔ mɔtshi tsho. Kânga mbahokamɛwɔ awui ande, vɔ hawoshihodia kɛnɛ kalangande mbuta. Ondo nɛ dia vɔ fɔnyaka ɔnɛ diolelo d’Isariyɛlɛ diayolɛ lanɛ la nkɛtɛ, ndo vɔ wekɔ lo nongamɛ dia nongola lotombo la kɛnɛmɔ lo diolelo dia la nkɛtɛ vɔ la Kristo.

L’atei a wanɛ watatshu otsha lo difɛstɔ di’Elekanelo mbele ndo Salɔme, nyango ɔpɔstɔlɔ Jakɔba la Joani. Yeso mbelɛka apɔstɔlɔ asɔ ɔnɛ “Ana wa dikhungula dia mvula,” nɛ dia vɔ mɛtɛ wekɔ l’ohetoheto efula ndo la dihonga. Tatɛ oma l’etena kɛmɔtshi, vɔ akɔ ahende wekɔ lo kombola monga la dihole dia woke lo Diolelo dia Kristo, ko vɔ wambotɛ nyangɛwɔ saki kawɔ. Nyangɛwɔ amboya le Yeso, ambokusɛ adwe la ntondo kande, ko amboyâlɔmbɛ dikambo dimɔtshi.

Yeso ambowombola ate: “Alangaye na?”

Ko nde ambôkadimola ate: “Uti diui dia an’ami ahendi ane mbidjase: omotshi lu lunya laye la pami, la ukina lu lunya laye la lomoso, lu diulelu diaye.”

Yeso ambeya ɔnɛ Jakɔbɔ la Joani mbotomi nyangɛwɔ dia ndjâlɔmbɛ dikambo sɔ, ko nde lawɔ ate: “Nyu hanyeyi kene kalombanyu. Nyu mbeyaka no dikoho diayangami no?”

Ko vɔ wambôkadimola vate: “Shu mbeyaka.” Kânga mbowate Yeso ɔnɛ nde ayohomana l’ɛhɛnyɔhɛnyɔ wa mamba wayoyokonya ndo lo nyɔi, ondo vɔ hawoshihodia elɛwɔ “dikoho” diayanganɔ Yeso.

Koko Yeso ambowatɛ ate: “Mete nyu nyayono dikoho diami. Keli mbidjase lu lunya lami la pami kana lu lunya lami la lomoso, kema dikambu diami dia mbisha untu. Keli dio dieko dikambu dia wane wakalongoswela Papa.”

L’ɔkɔngɔ diko, apɔstɔlɔ dikumi wamboyeya kɛnɛ kakalɔmbi Jakɔba la Joani, ko vɔ wamboka nkɛlɛ. Ondo Joani nde la Jakɔba mbakaleke tɛkɛta efula l’owanu wakawawane dia mbeya ɔnɛ loleki woke l’atei awɔ. Kɛnɛ kambowoyɔlɔmba l’ɔkɔngɔ diko mɛnyaka ɔnɛ polo ndo l’etena kɛnɛ tshɛ ko vɔ watakitanyiya dako diakawasha Yeso lo dikambo sɔ. Lonyangu ko, polo ndo l’etena kɛnɛ ko saki kawɔ ka ndjâla anto a weke kekekɔ wolo.

Ɔnkɔnɛ, dia nde shidiya owanu ɔsɔ wa komelo ndo tokumbɛkumbɛ takatombe oma lɔkɔ, Yeso ambotshumanya apɔstɔlɔ ande 12. Nde ambowasha dako nɛ la ngandji tshɛ ate: “Embuledi w’asi wedja watuwâhamelaka. Antu awo a waki watuwaulelaka. Keli l’atei anyu tayalaki osoku. One lalanga ndjala wuki l’atei anyu, dieli la ndi dia ndjala ukambi anyu. One lalanga ndjala la ntundu kanyu, dieli la ndi dia ndjala fumbi kanyu.”

Yeso ambowasha ɛnyɛlɔ kahombawɔ mbokoya, awatɛ ate: “Ndu On’a untu, kundja dia antu mbukambela ulimu, keli akayi dia mbakambela ulimu, la dia mbakimwela lumu landi uku etshungwelu ka antu efula.” Yeso kokambɛ anto akina paka olimu oto, koko nde ayowavwɛ ndo mbavwɛ! Ambeki pombaka monga la yimba yakɔ yâmɛ yele la Kristo: vɔ pombaka kombola dia kambɛ anto, koko aha di’anto mbakambɛ, dia ndjâla l’ɛse k’anto koko aha dia ndjâla anto a weke. Mateu 20:17-28; Mako 3:17; 9:33-37; 10:32-45; Luka 18:31-34; Joani 11:16.

▪ Lande na kambondama ambeki wa Yeso la wɔma?

▪ Woho akɔna wambɔlɔngɔsɔla Yeso ambeki ande lo kɛnɛ kele suke la ntshama?

▪ Mama kɛmɔtshi amondoya dia ndjɔlɔmba Yeso, ndo kakɔna kambosala apɔstɔlɔ akina lam’ambowoyeya dikambo sɔ?

▪ Woho akɔna wambokandola Yeso okakatanu wele l’asa apɔstɔlɔ ande?