Tshapita 104

Dui dia Nzambi diambokɛma mbala ka sato

WONYA wende lo tɛmpɛlɔ, Yeso ambɛnya lonyangu lande lo dikambo dia nyɔi kayangande mvɔ. Kɛnɛ kaleka mbokiyanya ele woho wayoyala lokumu la She l’ɔtɛ wa nyɔi kɛsɔ, diɔ diakɔ dialɔmbande ate: “Papa, utumbuli lukumbu laye.”

Ko wonya akɔ wâmɛ, dui dimɔtshi dia wolo diamboya oma l’olongo, diata ate: “Dimi lambulutumbula, layulutumbula ntu.”

Olui w’anto wemadi lâwɔ wambokandakanda efula. Amɔtshi wambotatɛ mbuta ɔnɛ: ‘Ondjelo ɔmɔtshi mbɔtɛkɛtshi lande.’ Akina vate: ɔsɔ dikungola. Ko tete le Jehowa Nzambi mbɔtɛkɛtshi! Koko, ɔsɔ bu mbala ka ntondo kambokɛma dui dia Nzambi lo dikambo dia Yeso.

Lam’akabatizamaka Yeso, ambeta ɛnɔnyi esato l’etenyi, Joani Obatizanyi akoke Nzambi atɛkɛta lo dikambo dia Yeso ate: “On’ami la ngandji one, ndi atongenyangenyaka ololo.” Oma lâsɔ, yema l’ɔkɔngɔ wa difɛstɔ di’Elekanelo, lam’akahilɔ Yeso la ntondo kawɔ, Jakɔba, Joani la Petero wakoke Nzambi ata ate: “On’ami la ngandji one, ndi ambongenyangenya; nyuwukeli!” Ko, mbala ka sato kɛnɛ, lo ngɔndɔ ka Nisana 10, ambotshikala nshi nyɛi la ntondo ka Yeso mvɔ, anto wamboka Dui dia Nzambi nto. Koko l’etena kɛnɛ, Jehowa akatɛkɛtshi ɔnɛ kele elui w’anto wôke!

Yeso ambolembetshiya ate: “Diui so hadiuyi dikambu diami, keli dikambu dianyu.” Ɔsɔ ekɔ djembetelo yɛnya ɔnɛ Yeso mɛtɛ ekɔ Ɔna Nzambi, Mɛsiya wakalakema. Yeso ambota nto ate: ‘Etena kɛnɛ kamboyala elombwelo k’andja ɔnɛ, kakianɛ owandji w’andja ɔnɛ ayokadjema.’ Mɛtɛ, lɔsɛnɔ la Yeso la kɔlamelo mɛnyaka ɔnɛ Satana Diabolo, owandji w’andja ɔnɛ, sunganaka ‘mbikadjema,’ kana ndjakema.

Lo dikambo dia nyɔi kande kaya suke la di’etombelo atɔ, Yeso ambota ate: “Lam’ayumunyama uma lu kete, layukutula antu [wa weoho] tshe uya le mi.” Nde hatokita tatala lo nyɔi kande, nɛ dia l’ekimanyielo ka nyɔi kakɔ, nde ayokotola anto akina oya le nde dia vɔ ndjokondja lɔsɛnɔ la pondjo.

Koko olui w’anto wambotona dui sɔ, wata vate: “Takuki uma l’elembe vati: Kristu atuyalaka pundju. Ya ukundi ataye wati: Dieli la On’a untu munyiyama? Akona oso eli On’a untu?”

Koyanga mbakawɛnyi tolembetelo tshɛ, ndo mbokiwɔ dui dia Nzambi ndamɛ, efula hawetawɔ ɔnɛ Yeso mbele mɛtɛ Ɔna onto, Mɛsiya wakalakema. Koko, oko wakandasale lo Difɛstɔ dia Tabɛrnakɛlɛ, ambeta ngɔndɔ shamalo, Yeso ambota nto ate: ‘osase’ mbemi ndo ambokeketsha ampokami ande ate: ‘Lam’ekenyu la osase, nyoyale la mbetawɔ le osase, dia nyu ndjâla ana w’osase.’ L’ɔkɔngɔ wa nde mbuta akambo asɔ, Yeso ambotshɔ, ambotoyashɛ, nɛ dia lɔsɛnɔ lande laya mɛtɛ lo wâle.

Ase Juda kema la mbetawɔ le Yeso, ɔsɔku mbambokotshama ɛtɛkɛta wakate omvutshi Isaya ɔnɛ ‘asho w’anto akɔ wayodihama ndo etema awɔ wayoyala lonyû efula, ko vɔ hawotokadimɔ dia ndjɔkɔnɔ.’ Lo ɛnɛlɔ kakawawɛnya, Isaya akɛnyi sɛkɛ dia l’olongo diaki Jehowa, ndo Yeso ele suke la nde, la lotombo laki lande la ntondo ka nde ndjoyala onto la nkɛtɛ. Koko, lo ndjela ɛtɛkɛta wakatatshi Isaya, Ase Juda wekɔ la lohokotui ndo hawetawɔ tolembetelo tɛnya ɔnɛ Ɔnɛ mbele Otshungodi awɔ wakalakema.

Koko, anto efula wekɔ la mbetawɔ le Yeso, kânga ndo ewandji ɛmɔtshi (vɔ wekɔ mɛtɛ atɔi amɔtshi w’Ase Sheke, Tuminadi ta lâdiko t’Ase Juda.) Ndo Nikɔdɛmo la Yɔsɛfu y’Ose Arimateya mbele l’atei w’ewandji akɔ ɛsɔ. Koko l’etena kɛnɛ, ewandji akɔ hawɛnya mbetawɔ kawɔ lo sɛkɛ, nɛ dia wekɔ lo mboka wɔma wa mbitshanyema lo mvudu ya nsanganya ndo wa shisha ahole awɔ wa lowandji. Ande awui efula wahandjawɔ lee!

Yeso ambonyomota nto ate: “One lambetawo, hambetawo dime, keli ambetawo one lakantumi. One latomenaka, atenaka lakantumi. . . . Naka untu ayuka aui ami, ku ndi hakitanyia, dimi halulumbuya. Ne dia dimi kundja dia ndjulumbuya wa la kete, keli dia ndjâshimbela. . . . Diui diatami mbayûlumbuya lushi l’ekumelu.”

Oma lo ngandji kokande andja ɔnɛ, kana anto, Jehowa akatome Yeso ɔnɛ kele onto lawetawɔ ake. Anto wayoshimbamela kana hawotoshimbamela lo ndjela woho wayowokitanyiya kana wayowɔnyɔla awui wa Nzambi wakatɛkɛta Yeso. Elombwelo kayosalema “lushi l’ekumelu,” lo Diolelo dia Kristo di’Ɛnɔnyi Kinunu.

Dia nde kumiya, Yeso ambota ate: ‘Aha lo lolango lami dimɛ mbatɛkɛtami, koko Papa lakatome kakambisha dui lo kɛnɛ kahombami mbuta ndo tɛkɛta. Ndo nto, dimi mbeyaka nte dui diande kɛdikɛdi lɔsɛnɔ la pondjo. Ɔnkɔnɛ, awui watami, lekɔ lo mbata oko wakambutɛ Papa.’ Joani 12:28-50; 19:38, 39; Mateu 3:17; 17:5; Isaya 6:1, 8-10.

▪ Naa mbala shato yakokɛma dui dia Nzambi lo dikambo dia Yeso?

▪ Woho akɔna wakɛnyi omvutshi Isaya lotombo la Yeso?

▪ Naa ewandji wele la mbetawɔ le Yeso, ko lande na kahawakiɛnya lo sɛkɛ?

▪ “Lushi l’ekumelu” êlɔ, ndo lo ndjela awui akɔna wayolomboyama anto?