Tshapita 111

Djembetelo ya nshi y’ekomelo

TAYA Lushi la Hende, l’ɔkɔngɔ a midi. Yeso akadjashi lo Dikona di’Ɔlivɛ, ênda tɛmpɛlɔ l’ɛse kande, ko Petero Andɛlɛ, Jakɔba kâmɛ la Joani wamboya oya le nde vamɛ. Vɔ wekɔ lo tshimba yimba lo dikambo dia tɛmpɛlɔ, nɛ dia Yeso oma la mbuta ɔnɛ ndoko dive diatɔ diayotshikala lâdiko dia dikina.

Koko, ondo vɔ wekɔ la dikambo dikina nto lo timba tawɔ lam’ambowoya oya le Yeso. Ambeta oko mingu mɔtshi tsho, nde akawatɛ dikambo dia “[wôngelo, NW]” ande, l’etena ‘kayotomba Ɔna onto sɛkɛ.’ Ntondotondo, nde akawatɛ dikambo dia “[nshi y’ekomelo ya dikongɛ di’akambo nɛ, NW].” Diɔ diakɔ diayambola ambeki wembola efula.

Vɔ lande vate: “Ututeli, etena kakona kayuyala akambu aso [akambo wayela elanyelo ka Jerusalɛma la tɛmpɛlɔ kayɔ]? Ayuyala djimbitelu yakona ya [wôngelo ayɛ ndo ya nshi y’ekomelo ya dikongɛ di’akambo nɛ, NW]?” Mɛtɛ, dimbola diawɔ diekɔ la tenyi sato. Ntondotondo, vɔ nangaka mbeya dikambo di’ekomelo ka Jerusalɛma la tɛmpɛlɔ ka l’osomba akɔ, ko ndjeya kɛnɛ k’endana la wôngelo wa Yeso lo lowandji la Diolelo, ko l’ɔkɔngɔ diko, ndjeya kɛnɛ k’endana l’ekomelo ka dikongɛ di’akambo nɛ di’otondo.

Lo olembetshiyelo w’otale wambondowasha, Yeso ambokadimola lo tenyi sato tshɛ dia dimbola diakɔ. Nde ambowasha djembetelo yayɛnya anto etena kayokomɛ dikongɛ di’Ase Juda; koko nde hemadi paka lâsɔ ato. Nde ambokimɔ ndo djembetelo mɔtshi yayokimanyiya ambeki ande wa lo nshi yayaye dia vɔ mbeya ɔnɛ tekɔ lo sɛna lo nshi ya wôngelo ande ndo ekomelo ka dikongɛ di’akambo nɛ tshɛ kaya suke.

L’edja k’ɛnɔnyi wakatetaka, apɔstɔlɔ wakɛnyi ekotshamelo ka pɔlɔfɛsi kaki Yeso. Eelo, akambo wakandatatshi mɛtɛ wakatatɛ salema lo nshi yakiwɔ la lɔsɛnɔ. Ɔnkɔnɛ, Akristo waki la lɔsɛnɔ l’ɔkɔngɔ w’ɛnɔnyi 37, l’ɔnɔnyi 70 T.D., kokashimɔ dia mɛna elanyelo ka dikongɛ di’Ase Juda ndo ka tɛmpɛlɔ kawɔ.

Koko, wôngelo wa Kristo kosalema l’ɔnɔnyi 70 T.D. Wôngelo ande lo lowandji la Diolelo akayosalemaka edja k’efula l’ɔkɔngɔ diko. Ko l’etena kakɔna? Naka sho sɛdingola pɔlɔfɛsi kaki Yeso, kete tayeya dikambo sɔ.

Yeso ambotatshi ɔnɛ “ata la kumu ya ata” yayoyala. Nde ate: “Wudja ayolosha wudja ukina,” ndo ndjala ya kasha, adidimu wa nkɛtɛ la elando wayoyala. Ambeki ande wayohetshama ndo wayodiakema. Amvutshi wa kashi wayonela ndo wayonganyiya anto efula. Ɛɔnywɛlɔ k’ɛlɛmbɛ kayohama, ndo ngandji k’anto efula kayɔla. L’etena kakɔ kâmɛ, lokumu l’ɔlɔlɔ la Diolelo diaki Nzambi layosambishama oko ɔmɛnyi le wedja tshɛ.

Kânga mbakakotshama pɔlɔfɛsi kɛsɔ kaki Yeso lo yɛdikɔ ya tshitshɛ la ntondo ka Jerusalɛma nanyema l’ɔnɔnyi 70 T.D., ekotshamelo ka woke ka pɔlɔfɛsi kakɔ ntshamaka l’edja ka wôngelo ande ndo lo nshi y’ekomelo ka dikongɛ di’akambo nɛ. Naka sho ndjihola asho ɔlɔlɔ ko sɛdingola akambo weta l’andja ɔnɛ tatɛ oma l’ɔnɔnyi 1914, kete tayɛna ɔnɛ pɔlɔfɛsi kɛsɔ ka woke kakatatshi Yeso kakamɛ kotshama lo yɛdikɔ ya woke tatɛ oma l’ɔnɔnyi akɔ ɔsɔ.

Etenyi kekina ka djembetelo yakasha Yeso ele ɛnamelo ka “[ɛngɔ ka wɔnɔnyi keela elanyelo, NW].” L’ɔnɔnyi 66 T.D., ɛngɔ kɛsɔ ka wɔnɔnyi kakɛnama l’efanelo k’“elui w’alimbi” w’Ase Rɔmɔ wakadinge Jerusalɛma ko mbutola pele dia tɛmpɛlɔ. “Ɛngɔ ka wɔnɔnyi” kakemala lo dihole diakitɔ kokoka memala.

Lo ekotshamelo ka woke ka djembetelo shɔ, ɛngɔ ka wɔnɔnyi ekɔ la Société des Nations (Tshunda dia Wedja) ndo ɔhɛna adiɔ, Wedja Wosanganyi (O.N.U.). Lokristokristo mbɔsaka ɔlɔngɔswamelo ɔsɔ wakatonge anto dia mbidja wɔladi l’andja oko lo dihole dia Diolelo diaki Nzambi mbatshawɔ akambo asɔ. Ande kanyi ya wɔnɔnyi lee! L’edjedja ka wonya, ewandji wa pɔlitikɛ wosanganyi la O.N.U. wayokadimwɛ Lokristokristo (Jerusalɛma ya nshi nyɛ) ko wayoloshila oshiki.

Diɔ diakɔ diambotatshi Yeso ate: “[Fɔnu ka woke, NW] kayuya, wuhu wahatayala uma k’etatelu k’andja edja ndu kakiane, ndu wuhu wahayalaki pundju.” Elanyelo ka Jerusalɛma l’ɔnɔnyi 70 T.D. kakikɔ mɛtɛ fɔnu ka woke, ndo anto mbutaka ɔnɛ olekanyi miliyɔ ɔtɔi k’anto wakadiakema. Ekotshamelo koleki woke k’etenyi kɛsɔ ka pɔlɔfɛsi kaki Yeso kayoleka woke efula.

Wekɔ l’elongamelo lo nshi y’ekomelo

Oya l’ekomelo ka Lushi la Hende, lo ngɔndɔ ka Nisana 11, Yeso ambotetemala sawola l’apɔstɔlɔ ande lo dikambo dia djembetelo ya wôngelo ande lo lowandji la Diolelo ndo y’ekomelo ka dikongɛ di’akambo nɛ. Nde ambowaewola di’aha vɔ ndjela wa Kristo kana wa Mɛsiya ya kashi. Nde ambowatɛ ɔnɛ, wayohemba dia “munganyia ndu esonami, naka vo wayeya ntsha.” Koko, oko mpongo yele la asho wɛna etale, ɛsɔnami ɛsɔ wayotshumana lɛnɛ ele mma dia mɛtɛ dia lo nyuma, mbuta ate kâmɛ la Kristo ka mɛtɛ lo wôngelo ande wahɛnama. Vɔ hawotonganyiyama ndo hawototshumana le Kristo kɛmɔtshi ka kashi.

Wa Kristo ya kashi ndjaɛnyaka paka lo asho w’anto ato. Koko, wôngelo wa Kristo hawotɛnama. Yeso ate: l’ɔkɔngɔ wa fɔnu tatɛ: “Unya ayukadimo udjima, ngondo [howalɛ] ntu.” Mɛtɛ, ɔsɔ ayoyala etena koleki wodjima tshɛ lo lɔsɛnɔ l’anto. Ayonga wate kana wonya ambohinda la yanyi, ndo oko ngɔndɔ hayosha wɛɛdi l’otsho.

Yeso ambotetemala mbuta ate: “Diango dia wulu dia l’ulungu diayusutshasutshama.” Oma l’ɛtɛkɛta ɛsɔ, nde ambɛnya ɔnɛ olongo wɛ̂nama ɔnɛ wayoyala l’efanelo kayosha anto wɔma efula. Wɔma la akambo wa ngala wayoyala lo yɛdikɔ yahatongaka ndoko lushi lo lɔsɛnɔ l’anto.

L’ɔtɛ w’akambo asɔ, Yeso ambota ate: “Fono k’asi wedja kayuyala la kete. Vo wayukanana, ne dia luhelu l’ashi a wuki la asukhu. Antu wayuka yimba tshimba, ne dia woma la elungamelu k’akambu wayayi la kete.” Mɛtɛ, naka etena kɛsɔ koleki wodjima tshɛ lo lɔsɛnɔ l’anto kaya suke la komɛ, kete “djimbitelu ya On’a untu yayene l’ulungu. Wedja tshe wa la kete wayulela.”

Koko aha anto tshɛ mbayolela ‘lam’ayoya Ɔna onto la nkudu’ dia ndjolanya dikongɛ di’akambo nɛ dia kɔlɔ. “Esonami,” anto 144 000, wanɛ wayosangana kâmɛ la Kristo lo Diolelo diande dia l’olongo hawotolela, ndo asekawɔ, wanɛ wakelɛ Yeso ɔnɛ “ekoko ekina,” hawotolela. Kânga mbayowɔsɛna l’etena koleki wodjima tshɛ lo lɔsɛnɔ l’anto, ekeketshelo kɛnɛ kakawasha Yeso kayowahɛtshahɛtshaka: “Lam’ayutatela akambu aso ndja, kanyuwaleli, kanyedia ete anyu; ne dia etshungwelu kanyu kaya suki.”

Di’ambeki ande wayoyala la lɔsɛnɔ lo nshi y’ekomelo mbeya ɔnɛ ekomelo kaya suke, Yeso amboka wɛɛla ɔnɛ, ata ate: “Nyose wetshelu uma l’utamba a fingu. Lam’atuyalaka lutahi lawo woduwodu, lam’atuwutundjaka amonga awo, nyu nyateyaka nyati: Owo aya suki. Okone ndu nyu lam’ayunyena akambu ako tshe, nyayeya nyati: On’a untu aya kasuki, aya ka suku. Mete kanyutelami nti: Antu wa lolonga lone hawushila, tshikima akambu aso tshe wambushidiyama.”

Ɔnkɔnɛ, lam’ayɛna ambeki ande tenyi diotshikitanyi dia djembetelo yakɔ diakotshama, vɔ wayeya ɔnɛ ekomelo ka dikongɛ di’akambo nɛ kaya suke ndo Diolelo diaki Nzambi diayanga minya akambo wa kɔlɔ tshɛ. Mɛtɛ, ekomelo kayoya l’etena kele anto wakɛnyi ekotshamelo k’akambo wakatatshi Yeso wêke la lɔsɛnɔ! Yeso ambewola ambeki ande, wanɛ wayoyala la lɔsɛnɔ lo nshi shɔ y’ekomelo ndo ya wolo, ata ate:

“Nyulamaki, ne dia etema anyu watukuyala wutshu la dishi, la edjwelu ka wanu la edinganu wa lumu lone. Lushi loso, latukuya le nyu shashimuya, uku shuni ya djunga, ne dia osoku mbayuya lushi lako le antu tshe wudjashi ladiku dia kete. Keli nyendaki, nyolombaki l’osengosengo dia nyu mpanda lu akambu aso tshe wayuya, la dia memala la ntundu ka On’a untu.”

Esekaseka wa dimuma wele la lomba la wanɛ wa dinginya

Yeso akakadimudi apɔstɔlɔ ande, nɛ dia vɔ wakɔ̂lɔmbi djembetelo ya wôngelo ande lo lowandji la Diolelo. Oma lâsɔ, nde ambowaewoya akambo akina wa djembetelo yakɔ oma l’ekimanyielo ka wɛɛla esato.

Wanɛ wayɔsɛna lo nshi ya wôngelo ande wayɛna ekotshamelo ka wɛɛla la wɛɛla. Nde ambotatɛ wɛɛla wa ntondo ɔnkɔnɛ: “Lushi loso, diulelu dia l’ulungu diayuyala uku esekaseka dikumi wa dimuma, wakose atala awo, wakatshu la ntusangela utshuki a wadi. Atanu awo waki dinginya, atanu waki la yimba.”

Lo mbuta ɔnɛ “diulelu dia l’ulungu diayuyala uku esekaseka dikumi wa dimuma,” Yeso hatshi ɔnɛ etenyi kɛmɔtshi ka l’ahende ka wanɛ wayokita Diolelo dia l’olongo wekɔ akanga a dinginya ndo etenyi kekina ka l’ahende wekɔ akanga a timba! Koko, nde ekɔ lo mbuta ɔnɛ lo kɛnɛ k’endana la Diolelo dia l’olongo, weoho ehende w’anto asɔ wayoyala, kana akambo w’endana la Diolelo wayɛnama lo weoho ɛsɔ ehende.

Esekaseka dikumi wekɔ didjidji di’Akristo tshɛ wakoka, kana wayata ɔnɛ vɔ kokaka mbɔtɔ lo Diolelo dia l’olongo. Lo Pɛntɛkɔsta ka l’ɔnɔnyi 33 T.D. mbakalakema etshumanelo k’Akristo dia vɔ tshukama le Yeso Kristo, Otshuki a Wadi, ɔnɛ lakolwama ndo lakashile nongola lotombo. Koko diwala sɔ diakahombe salema l’olongo, l’ɔkɔngɔ wa deko efula, l’etena kaheyama.

Lo wɛɛla ɔsɔ, esekaseka dikumi wa dimuma wambotomba dia ndjolongola otshuki a wadi ndo dia ndjosangana l’ɔnɔngɔ w’anto wayaye oya lo diwala. Lam’ayondokoma, vɔ wayɔhɛtsha atala dia ngamula mboka kayadjɛ olui w’anto, ɔsɔku mbayowɔlɛmiya otshuki a wadi lam’ayondɔtɔla wadiɛnde otsha lo dihole diakawɔlɔngɔswɛla. Koko, Yeso ambolembetshiya ate: “Lam’akose akanga a dinginya atala awo, vo kombosa iso, [k]eli akanga a yimba wakatshu la iso lu sayi yawo ndu lu atala awo. Lam’akatubiya utshuki a wadi, esekaseka ako tshe wakanyingonyingo, wakalali djo.”

Woho waviya otshuki a wadi edja efula mɛnyaka ɔnɛ wôngelo wa Kristo oko Nkumekanga kôlɛ ayoyala lo nshi yayaye, l’ɔkɔngɔ w’edja k’efula. L’ɔkɔngɔ diko, nde amboyahema l’okudi l’ɔnɔnyi 1914. L’edja k’otsho w’otale wakete la ntondo ka dikambo sɔ, esekaseka tshɛ wakalale djɔ. Koko vɔ hawanyemi l’ɔkɔkɔ ɔsɔ. Esekaseka wa dinginya wambânyema nɛ dia vɔ bu l’esɔ lo akɔhɔ awɔ. Yeso ambolembetshiya woho wakawemudi esekaseka la ntondo k’otshuki a wadi koma: “L’asa [d]eki, wakadji dielu vati: Enda, utshuki a wadi! Nyuyi la ndjûsangela. Ku esekaseka eso tshe waketo, wakalongosola atala awo. Akanga a dinginya wakatela akanga a yimba vati: Nyutusha yema y’iso, ne dia atala asu wutsha nyimala. Keli akanga a yimba wakakaluya diui vati: Iso hukuka le su ndu le nyu, undu. Nyutshu le wane watusundjaka, nyutuyasumbeli.”

Esɔ ekɔ didjidji dia kɛnɛ kakimanyiya Akristo wa mɛtɛ dia vɔ mpɛtaka oko atala. Kɛdikɛdi Dui dia Nzambi diamamema Akristo, kâmɛ la nyuma kande k’ekila kawakimanyiya dia vɔ mana Dui diakɔ sɔ fundo. Esɔ ka lo nyuma kekɔ lo kimanyiya esekaseka wele la lomba dia vɔ mpɛtsha osase dia nongola otshuki a wadi l’etena kayaye olui w’anto oya lo dambo dia diwala. Koko, olui w’esekaseka wa dinginya kema l’esɔ ka lo nyuma le wɔ vamɛ, lo akɔhɔ awɔ. Diɔ diakɔ diakɔndɔla Yeso kɛnɛ kayoyotshama ate:

“Lam’akawatshu [esekaseka wa dinginya] dia ntusumba iso, utshuki a wadi akayi. Okone wane wakayalongosola, wakoto la ndi lu dambu dia tshuki, ku wakadihi lukuki. L’okongo diku, ndu esekaseka ekina wakayi, wakati vati: Khumadiondjo, Khumadiondjo, utudihula. Ku ndi akakaluya diui ati: Mete kanyutelami nti: Dimi halanyeyi.”

L’ɔkɔngɔ wa Kristo koma lo Diolelo diande dia l’olongo, olui w’esekaseka wa yimba, Akristo wa mɛtɛ w’akitami, wamboshihodia diɛsɛ diawɔ dia ngamula osase lo andja ɔnɛ wele lo wodjima, dia tombola Otshuki a Wadi lam’ayondokalola. Koko wanɛ walembetshiyama oko esekaseka wa dinginya hawoyalɔngɔsɔdi dia mbolongola la lotombo. Ɔnkɔnɛ, kam’okuki wonya wakashikikɛma, Kristo ambotona mbadiholɛ lokuke dia vɔ mbɔtɔ lo dambo dia diwala dia l’olongo. Nde ambâtshika l’andja, lo wodjima w’otsho woleki tshududu l’andja ɔnɛ, dia vɔ nanyema kâmɛ l’anto akina wɔnyɔla ɛlɛmbɛ. Yeso ambodihiya l’ɛtɛkɛta ɛnɛ ate: ‘Ɔnkɔnɛ nyambalɛke, nɛ dia nyu hanyeye lushi koyanga wonya.’

Wɛɛla wa talata

Yeso ambotetemala sawola l’apɔstɔlɔ ande lo Dikona di’Ɔlivɛ lo mbaokɛ wɛɛla okina, wɛɛla wa hende l’atei a wɛɛla esato wokakatanyi. Ambeta oko nshi mɔtshi, lam’akinde la Jeriko, nde akoke wɛɛla wa mina dia mɛnya ɔnɛ Diolelo diayoya lo nshi yayaye, l’ɔkɔngɔ w’edja k’efula. Kânga mbafɔnawɔ l’akambo efula, wɛɛla wa hende wambondowaokɛ l’etena kɛnɛ mɛnyaka akambo wayosalema lo nshi ya wôngelo ande lo lowandji la Diolelo. Vɔ mɛnyaka ɔnɛ, l’edja tshɛ kekewɔ lanɛ la nkɛtɛ, ambeki ande pombaka kamba olimu dia fudia “diango” diande.

Yeso ambotatɛ ate: “Dikambu ne [kɛdikɛdi akambo w’endana la Diolelo] dieli uku untu lakayangi ntsho lu kete kina. Ndi aketi ekambi andi, akâtshikela diango.” Yeso mbele pami kele, la ntondo ka nde ntshɔ otsha l’olongo, akatatshiki diangɔ diande l’anya w’ase olimu ande—mbuta ate ambeki wakoka mbɔtɔ lo Diolelo dia l’olongo. Diangɔ sɔ kema ekundji wa l’emunyi, koko diɔ mɛnyaka didjidji di’ekambɔ kɛmɔtshi kakatône Yeso dia kondja ambeki efula.

Yeso ambotshikɛ ase olimu ande diangɔ sɔ yema la ntondo ka nde mbudɛ l’olongo. Woho akɔna wambondotsha dikambo sɔ na? Nde ambowatɛ dia vɔ tetemala kamba olimu l’ekambɔ kɛsɔ, lo sambisha losango la Diolelo polo ndo l’ahole wa lanɛ la nkɛtɛ wanganyi etale. Oko wata Yeso: “[Ndi akasha omotshi talata tshanu, ukina talata hyendi, ukina otoi, le unto l’untu [lo ndjela akoka ande, NW], ku ndi akatshu [otsha lo wodja okina, NW].”

Talata enanɛi shɔ—diangɔ dia Kristo—yambokahanyema lo ndjela akoka w’ase olimu kana akoka awɔ wa lo nyuma. Ase olimu asɔ wekɔ didjidji di’elui w’ambeki. L’eleko ka ntondo, ondo ndo apɔstɔlɔ mɛtɛ mbaki l’atei w’olui a wanɛ wakalongola talata tshanu. Yeso ambota nto ɔnɛ ase olimu wakalongola ɔnɛ talata tshanu okina hiende, wakafudia diangɔ diawɔ l’ahende lo sambisha Diolelo ndo lo mbetɛ anto ambeki. Koko, ose olimu wakalongola lotalata ɔtɔi akalishɛ lo nkɛtɛ.

Yeso ambotetemala mbuta ate: “Lam’aketi nshi kambi, uwandji w’ekambi ako akayi, akali la wo diango.” Aha la ntondo k’eleko ka 20, l’ɔkɔngɔ w’ɛnɔnyi oko 1 900, mbakaye Kristo dia ndjokoya l’ase olimu asɔ, koko ‘l’ɔkɔngɔ w’etena k’otale.’ Oma lâsɔ, Yeso ambolembetshiya ate:

“One lakalungula talata tshanu akayi, akela talata kina tshanu. Ndi akati ati: Khumadiondjo, we akambisha talata tshanu, enda, dimi lakakundja talata kina tshanu. Khumendi akawutela ati: Kawo, we ukambi w’ololo la kolamelu. We aki la kolamelu lu diango tshitshe, dimi layukukitsha ladiku dia diango efula. Oto lu ongenongeno wa khumeye.” Lo yoho yakɔ yâmɛ, ose olimu wakalongola talata hiende, akatondja kina hiende, ko akalongola lowando lakɔ lâmɛ la difuto.

Ko woho akɔna wambɔtɔ ase olimu asɔ wa kɔlamelo lo ɔngɛnɔngɛnɔ wa Nkumɛwɔ na? Eelo, ɔngɛnɔngɛnɔ wa Nkumɛwɔ, Yeso Kristo, ele wa kondja Diolelo lam’akandatshu otsha le She l’olongo. Ase olimu wa kɔlamelo wa nshi nyɛ wekɔ l’ɔngɛnɔngɛnɔ wa woke lam’ɛnawɔ ɔnɛ wambowasha ɛkɛndɛ efula wa Diolelo, ndo lam’ayowoshidiya lowango lawɔ la lanɛ la nkɛtɛ, vɔ wayokondja ɔngɛnɔngɛnɔ woleki tshɛ lam’ayowolwama dia mbɔtɔ lo Diolelo dia l’olongo. Ko kayotota lo dikambo di’ose olimu wa sato na?

Ose olimu akɔ ambokiyana ate: “Khumadiondjo, dimi nkeyaka nti: Kanga ngala keye, . . . Ku dimi lakuki woma, lakatshu, lakatushe talata kaye lu kete. Henyi engo kaye kene!” Ose olimu ɔsɔ konanga kamba l’ekambɔ, mbuta ate sambisha ndo mbetɛ anto ambeki. Diɔ diakɔ diambowelɛ nkumɛnde ate okambi “wa kolo la shuasua” ndo mbambondowɔ̂sɛ yɛdikɔ nyɛ: “Nyôhotole talata . . . Nyukadja ukambi w’anyanya uku lu udjima a l’andja. Leko, [mbayondotolela ndo tɔkɛkɛtanya wanyu ande, NW].” Oko wambowokadjema l’andja, ase olui w’ose olimu wa kɔlɔ wambodimama ɔngɛnɔngɛnɔ tshɛ wa lo nyuma.

Ɔsɔ ekɔ wetshelo wa woke le wanɛ tshɛ wayasɛma ɔnɛ: Kristo mbatatayele. Naka vɔ nangaka nde mbawandola ndo mbasha difuto ndo mbewɔ di’aha vɔ mbikadjema lo wodjima wa l’andja ko tokondja elanyelo ka pondjo, kete vɔ pombaka kamba olimu dia fudia diangɔ dia Nkumɛwɔ kele l’olongo, lo monga l’ohetoheto l’olimu w’esambishelo. Onde wɛ kalanganaka l’olimu akɔ ɔsɔ?

Etena kayokoma Kristo lo lowandji la diolelo

Yeso êke kâmɛ l’apɔstɔlɔ ande lo Dikona di’Ɔlivɛ. Lam’awashande djembetelo yɔ̂lɔmbiwɔ lo dikambo dia wôngelo ande ndo ya nshi y’ekomelo ya dikongɛ di’akambo nɛ, kakianɛ nde ambowaokɛ wɛɛla wa komelo wa l’ɔnɔngɔ wa wɛɛla esato. Nde ambomɛ ate: “Lam’ayuya On’a untu lu lutumbu landi, la andjelo tshe kame la ndi, ndi ayudjase lu kiti [kande] ka diulelu ka lutumbu.”

Nde ayoya naka ekomelo ka dikongɛ nɛ kaya ka suke. L’oyango akɔna na? Yeso ambolembetshiya ate: “Wedja tshe wayusanganyema la ntundu kandi, ku ndi ayuwatanya uku atatanyaka ulami ekoko la mbudi. Ndi ayukitsha ekoko lu lunya landi la pami, ku mbudi lu lunya la lomoso.”

Lo dikambo dia kɛnɛ kayokomɛ wanɛ wɔtɔlami lo lɛkɛ l’ɔlɔlɔ, Yeso ate: “Ku Khum’ekanga ayutela wane weli lu lunya landi la Pami ati: Nyuyi, nyu etshokwami wa Papa, nyukiti diulelu diakawanyolongoswela umaka etatelu k’andja.” Ɛkɔkɔ wa lo wɛɛla ɔsɔ hawotolɛ kâmɛ la Kristo l’olongo, koko wayokita Diolelo lo yoho yayowoyala ambolami adiɔ wa lanɛ la nkɛtɛ. “Etatelu k’andja” kakatatɛ lam’akote Adama l’Eva ana wakahombe ndjokondja wahɔ lo tɛdikɔ takɔshi Nzambi dia tshungola anto wa l’andja ɔnɛ.

Ko lande na kambokitshama ɛkɔkɔ lo lonya la pami la Nkumekanga, dihole dia diɛsɛ na? Nkumekanga ambokadimola ate: “Ne dia dimi laki la ndjala, nyu nyakambisha mbu ya nde; dimi laki la pusa, nyakambisha dia no; dimi laki ongendangenda, nyu nyakambotshiya lu luudu. Dimi laki utakataka, nyu nyakandotsha; dimi laki la hemo, nyu nyakayumenda; dimi laki lu lukanu, nyu nyakayi le mi.”

Lam’ele ɛkɔkɔ wekɔ lanɛ la nkɛtɛ, vɔ nangaka mbeya woho akɔna wakawakoke salɛ Nkumekanga akambo w’ɛlɔlɔ wa ngasɔ. Mbawombolawɔ vate: “Khumadiondjo, etena kakona kakatakenyi la ndjala, kakatakusha mbu ya nde? kana la pusa kakatakusha dia no? Etena kakona kakatakenyi ongendangenda, kakatakulungula? kana utakataka, kakatakolotsha? Etena kakona kakatakenyi la hemo, kana lu luudu la lukanu, kakatayi dia ndjukenda?”

Ko Nkumekanga ambâkadimola ate: “Mete kanyutelami nti: Uku akanyatshela otoi omotshi a wane wuleki tshitshe l’atei w’analingu ane, dimi uku akanyatshela.” Wanɛ wele anango Kristo ko atshikadi wa 144 000 wayolɛ kâmɛ la nde l’olongo, wanɛ weke la lɔsɛnɔ lanɛ la nkɛtɛ. Yeso ate: mbâsalɛ ɔlɔlɔ kɛdikɛdi mbosalɛ nde ɔlɔlɔ.

Oma lâsɔ, Nkumekanga ambotɛ wa mbudi ate: “Nyumanganeli, nyu ambidjami mananu! Nyutshu lu dja ya pundju, yakawahetshiya uhimbanyi la andjelo andi, ne dia dimi laki la ndjala, nyu kumbishami mbu ya nde; dimi laki la pusa, nyu kumbishami dia no. Dimi laki ongendangenda, nyu kunungulami; dimi laki utakataka, nyu kondotshami; dimi laki la hemo ndu lu lukanu, nyu kundja dia ndjumenda.”

Koko wa mbudi wambokiyana vate: “Khumadiondjo, etena kakona kakatakenyi la ndjala kana la pusa, kana ongendangenda, kana utakataka, kana la hemo, kana lu lukanu, kakisu kunkukimanyia?” Wa mbudi wambokondja onongo lo dikambo diakɔ diamɛ dioyindjami ɛkɔkɔ. Yeso ambâkadimola ate: “Uku akinyu kuntshela otoi omotshi wuleki tshitshe l’atei a wane [analengo], dimi uku akinyu kuntshela.”

Ɔnkɔnɛ, ndo etena k’elombwelo mbayoyala l’atei a nshi ya wôngelo wa Kristo lo lowandji la Diolelo, la ntondo k’ekomelo ka dikongɛ di’akambo nɛ ndjâla lo fɔnu ka woke. Wa mbudi ‘wayotshɔ otsha l’elanyelo ka pondjo, koko anto w’ɛlɔlɔ [ɛkɔkɔ], wayotshɔ lo lɔsɛnɔ la pondjo.’ Mateu 24:2–25:46; 13:40, 49; Mako 13:3-37; Luka 21:7-36; 19:43, 44; 17:20-30; 2 Timote 3:1-5; Joani 10:16; Enyelo 14:1-3.

▪ Kakɔna kambotshutshuya apɔstɔlɔ dia vɔ mumbola dimbola dimɔtshi, ko dikambo diakɔna nto diele lawɔ lo tokanyi ondo?

▪ Etenyi kakɔna ka pɔlɔfɛsi kaki Yeso kakakotshama l’ɔnɔnyi 70 T.D., ko kakɔna kaki kosalema l’etena kɛsɔ?

▪ Etena kakɔna kakakotshama pɔlɔfɛsi kaki Yeso mbala ka ntondo, ko l’etena kakɔna kayokotshama pɔlɔfɛsi kakɔ kɛsɔ lo yɛdikɔ ya woke?

▪ Ele ɛngɔ ka wɔnɔnyi lo ekotshamelo ka ntondo ndo l’ekotshamelo ka komelo?

▪ Lande na kele elanyelo ka Jerusalɛma komonga fɔnu ka woke lo ekotshamelo katɔ ka komelo?

▪ Akambo akɔna watshama l’andja ɔnɛ wɛnya ɔnɛ taya lo nshi ya wôngelo wa Kristo?

▪ Etena kakɔna ‘kayoyatshatsha waoho tshɛ wa lanɛ la nkɛtɛ la lonyangu,’ ko kakɔna kayosalaka ambeki wa Kristo?

▪ Wɛɛla akɔna wamboka Yeso dia kimanyiya ambeki ande wa lo nshi yayaye dia vɔ mbeya ɔnɛ ekomelo kaya suke?

▪ Dako diakɔna diambosha Yeso dia mbewola ambeki ande wayoyala la lɔsɛnɔ lo nshi y’ekomelo nyɛ?

▪ Esekaseka dikumi wa dimuma wekɔ didjidji dia wa na?

▪ Etena kakɔna kakalakema etshumanelo k’Akristo dia tɔ tshukama le otshuki a wadi, ko etena kakɔna kakayokoma otshuki a wadi dia ndjɔsa wadiɛnde otsha lo dambo dia diwala?

▪ Esɔ alembetshiyatɔ, ndo esekaseka wa dimuma wa timba wele latɔ kokaka sala dikambo diakɔna?

▪ Lende asalema dambo dia diwala?

▪ Difuto diakɔna dia dimɛna efula diamboshisha esekaseka wa dimuma wa dinginya, ndo kakɔna kambâkomɛ?

▪ Wetshelo akɔna wakondjaso oma lo wɛɛla wa talata?

▪ Wa na wele ase olimu, ndo diangɔ diambowowasha kɛdikɛdi na?

▪ Etena kakɔna kamboya owandji dia ndjokoya l’ase olimu ande, ndo kakɔna kambondoyotana?

▪ Lo ɔngɛnɔngɛnɔ akɔna wambɔtɔ ase olimu wa kɔlamelo, ndo kakɔna kambokomɛ ose olimu wa sato, kanga kɔlɔ?

▪ Olimu akɔna w’elombwelo wasala Kristo lo nshi ya wôngelo ande?

▪ Lo yoho yakɔna yayokita ɛkɔkɔ Diolelo?

▪ “Etatelu k’andja” kakatatɛ l’etena kakɔna?

▪ Lo ndjela dikambo diakɔna diayodjama anto l’ɔnɔngɔ w’ɛkɔkɔ kana wa mbudi?