Tshapita 113

Wetshelo wa ndjakitshakitsha l’elekanelo ka komelo

LO NDJELA ɛtɛkɛta wa Yeso, Petero la Joani wakashidi nkoma la Jerusalɛma dia tɔlɔngɔsɔla kɛnɛ kahombama lo difɛstɔ di’Elekanelo. Ondo ndo Yeso ndo apɔstɔlɔ ande akina dikumi wamboyokoma l’ɔkɔngɔ diko, l’ɔkɔngɔ a midi. Wonya otadimana lam’ayaholɔ Yeso nde l’apɔstɔlɔ ande oma lo Dikona di’Ɔlivɛ. Ɔsɔ kele mbala ka komelo kambɛna Yeso osomba ɔsɔku oma lo dikona sɔ la ntondo ka nde mbolɔ.

Kem’edja, Yeso l’apɔstɔlɔ ande wambokoma l’osomba ko wambotshɔ lo luudu lahombawɔ sala difɛstɔ di’Elekanelo. Vɔ wambodɛ lo luudu la woke la la diko, ko wambototana diangɔ tshɛ diakalɔngɔswami dia vɔ sala difɛstɔ di’Elekanelo vamɛ. Yeso akakongɛka etena kɛsɔ l’asolo walomɔlomɔ, nɛ dia nde ambota ate: ‘Lakakombola efula dia sala la nyu difɛstɔ di’Elekanelo nɛ la ntondo ka dimi nsowa.’

Oko wele mbekelo k’anto, wanɛ wasala difɛstɔ di’Elekanelo nɔ̂ka akɔhɔ anɛi wa wanu. L’ɔkɔngɔ wa nde mbɔsa dikɔhɔ dimɔtshi, ondo dikɔhɔ dia sato, Yeso amboka losaka ko ambota ate: “Nyudiose, nyudikahani. Dimi lambunyutela nti: Umaka kakiane, dimi handjono uma l’elua w’ekodi, edja ndu diulelu dia [Nzambi, NW] diambuya.”

L’etena kɛmɔtshi, lam’ewɔ lo ndɛ, Yeso ambemala, ambonya ahɔndɔ ande wa lâdiko, ambɔsa kitambala, ko ambodja ashi tɔ lo dɔnga. Oko wokodiosalemaka nshi tshɛ, ɔnɛ lalongola angɛndangɛnda mbahomba mbidja yimba dia ekolo w’angɛndangɛnda ande mbɔtshama. Ko lam’ele l’etena kɛnɛ, ndoko ɔnɛ lalongola angɛndangɛnda lele lâwɔ, Yeso ndamɛ ambosala olimu ɔsɔ. Ɔpɔstɔlɔ ɔmɔtshi akakuki sala dikambo sɔ; koko ondo shɛmanɛdi yekekɔ polo ndo l’etena kɛsɔ l’atei awɔ, diɔ diakɔ diele ndoko onto losadi dikambo sɔ. Timba tawɔ tambotshimba lam’ɛnyiwɔ Yeso ambotatɛ sola ekolo awɔ.

Lam’oye Yeso oya le nde, Petero ambotona, ata ate: ‘Bu, wɛ hambɔtshaki ekolo pondjo.’

Ko Yeso nde lande ate: “Naka dimi halakotsha, keti we kema lu leke lami.”

Petero mbôkaloyande dui ate: “Khumadiondjo, aha ekulu etu, keli ndu anya ami ndu ote ami.”

Ko Yeso ambôkadimola ate: “One lambotshama, mpumbaka mbotsha paka ekulu andi etu, ku ndi ayediama tshe. Nyu nyambediama, keli aha nyu tshe.” Nde ambota ɔsɔku nɛ dia nde mbeyaka ɔnɛ Judasɛ Isakariyɔtɛ ekɔ lo ndjalɔngɔsɔla dia mbokimɔ l’anya w’atunyi.

Lam’oshidiyisha Yeso la mbɔtsha ekolo w’apɔstɔlɔ 12, ndo ekolo waki Judasɛ, ɔnɛ layowofunga, nde ambɔlɔta ahɔndɔ ande wa lâdiko, ko ambodjasɛ nto la mɛsa. Mbawambolande ate: “Nyu mbeyaka dikambu diunyutshedimi? Nyu mbetakami nyati: Umbetsha la Khumadiondjo. Ololo mbatanyu, osoku mbemi. Ku naka dimi Khumadiondjo la Umbetsha lakanyotshisha ekulu, ndu nyu nyambuhumba mbotshanya ekulu. Ne dia dimi lambunyusha djimbitelu ya ndu nyu ntsha, uku unyutshedimi. Mete, mete, kanyutelami nti: Ukambi haleki uwandji andi. Ndu one lakatumama, haleki one lakûtumi. Naka nyu mbeyaka akambu ane, nyu nyayuyala la otshoko lam’ayunyuwatsha.”

Ande wetshelo wa dimɛna wa ndjakitshakitsha lee! Apɔstɔlɔ hawohombe nyanga dia monga lo dihole dia ntondo, lo kanyiyaka ɔnɛ tekɔ anto a weke ndo anto akina pombaka tokambɛka olimu. Vɔ pombaka ndjela ɛnyɛlɔ kambâtshikɛ Yeso. Aha lo salaka nsɛlɛmɔnyi ka mbɔtshanyaka ekolo. Koko ɛnyɛlɔ ka monga la saki ka kambela anto akina olimu aha la shɔnɔdi, oyadi olimu wele kema ohomba efula kana wahangɛnyangɛnya. Mateu 26:20, 21; Mako 14:17, 18; Luka 22:14-18; 7:44; Joani 13:1-17.

▪ Etena kambɛna Yeso Jerusalɛma ndo katandɔtɔ l’osomba akɔ dia tosala difɛstɔ di’Elekanelo, lande na kotshikitanyi etena kɛsɔ la tena dikina?

▪ Lam’asalawɔ difɛstɔ di’Elekanelo, ondo dikɔhɔ diakɔna diambosha Yeso apɔstɔlɔ 12 l’ɔkɔngɔ wa nde ditshɔkɔla?

▪ Lo nshi yaki Yeso la nkɛtɛ, akasalɛka onto angɛndangɛnda ande, ndo bonde kahasadimi dikambo sɔ lam’asala Yeso difɛstɔ di’Elekanelo nde l’apɔstɔlɔ ande?

▪ Na oyango wele la Yeso lam’osadinde olimu wa ndjakitshakitsha wa mbɔtsha ekolo w’ɔpɔstɔlɔ ande?