Tshapita 120

Petero ambanguna Yeso

L’ƆKƆNGƆ wa vɔ tshika Yeso l’ekambɔ ka Ngɛtɛsɛmanɛ ko ndawɔ kâmɛ l’apɔstɔlɔ akina, nɛ dia wambondama la wɔma, Petero nde la Joani wambotemala lo dihole dimɔtshi. Ondo vɔ wambotosangana la Yeso lam’atawɔtɔlɛ otsha laka Anasi. Lam’ambôtoma Anasi otsha le Kayifasɛ, Ɔlɔmbɛdi a Lâdiko, Petero nde la Joani wotâyele tshalola, ondo vɔ wekɔ lo mboka wɔma dia mbidja nsɛnɔ yawɔ lo wâle ndo wekɔ la lonyangu efula lo kɛnɛ kayanga komɛ Nkumɛwɔ.

Lam’okumiwɔ laka Kayifasɛ, Joani ambɔtɔ l’etei ka lokombo, nɛ dia nde mbeyamaka le ɔlɔmbɛdi wa lâdiko. Koko Petero ambotshikala l’andja, suke la soko. Ko Joani amboyokalola, amboyɔtɛkɛta la olami wa soko, ose olimu wa omoto, ko wamboyosha Petero dikimɔ dia nde mbɔtɔ.

Lam’ele tshitshi kekɔ l’etena kɛnɛ, ase olimu la apulushi w’ɔlɔmbɛdi a woke wambɔhɛtsha dja y’akalanga. Petero amboya dia ndjôka dja kâmɛ la wɔ, akongɛ woho wayowohembolɛ Yeso onongo. Lâsɔ, l’osase wa dja, olami wa lokuke wakɔtshiyisha Petero ambowɛna ɔlɔlɔ. Ko nde lande ate: “Ndu we kaki la Jesu y’usi Ngalili.”

Petero ambotshimba yimba lam’ɛnyinde ate wambombishola, ko nde ambanguna ate: haleye Yeso kânga yema. Nde ate: “Dimi haleyi kene kataye.”

Oma lâsɔ, Petero ambotshɔ otsha lo soko dia lokombo. Lɛkɔ nto, omoto okina ambotowɛna ko ambotɛ wanɛ wakemadi lâwɔ ate: “Ndu untu one kaki la Jesu y’usi Nazareta.” Ko Petero ambanguna nto, atshiba ndo tshiba ate: “Dimi haleyi untu oso.”

Petero ambotshikala lo sɛkɛ, ahemba di’aha anto mbêya kânga yema. Ondo l’etena kɛnɛ, nde amboka wɔma lam’eki lekeeka wonya aya suke la mpotɔ. L’etena kakɔ, elombwelo ka Yeso kekɔ lo tatetemala tsho, ko wambotshɔ la nde ondo otsha lo etenyi kɛmɔtshi ka luudu kele lâdiko dia sɛkɛ. Aha la tamu, Petero nde l’anto akina wakongɛ l’ɛse wekɔ lo mɛna ɛmɛnyi efula wakɛlakɛla.

Ambeta oko oshidi a tango ɔtɔi tatɛ oma lam’akaweyi Petero ɔnɛ ndo nde mbele kâmɛ la Yeso. Kakianɛ, olui ɔmɔtshi a wanɛ wakemadi lâwɔ wambosukana oya le Petero ko wamboyowotɛ vate: “Mete ndu we keli usikawo, ne dia oteketa aye ambukushula.” Onto ɔmɔtshi lele l’olui akɔ mbotɔka la Malako, ɔnɛ lakanga tui diakahembola Petero. Nde lande ate: “Dimi kunkena la ndi l’ekambo uka?”

Ko Petero ambokadimola la wolo tshɛ ate: “Dimi haleye untu oso latanyu.” Mɛtɛ, nde ekɔ lo ndjatshutshuya dia mbaɛnya ɔnɛ vɔ wekɔ lo ndjakesa lam’akandatshike etunyi, nde ambotshika etunyi, ambotshiba ndo tshimba, mbuta ate amboyadja mananu naka aha mɛtɛ katande.

Kam’angunyi Petero mbala ka sato ko lekeeka lambeka. Ko l’etena kɛnɛ, Yeso, ondo lam’otumbinde l’andja, lo mbalasa kele lâdiko dia sɛkɛ, ambosekesɔ ko ambowenda. Kem’edja, Petero ambohɔ kɛnɛ kakawote Yeso, ambeta oko wenya ɛmɔtshi eto, lam’akiwɔ lo luudu la la diko ate: “[Ntundu, NW] lekeka lateki tena pendi, we ayumanguna tena satu.” Ko Petero ambonyanga efula l’ɔtɛ wa pɛkato kɛsɔ kambondotsha, ko nde ambotomba, atatele wolo efula.

Woho akɔna wakakuki dikambo sɔ ntshama na? Woho akɔna wakayokoka Petero manguna Nkumɛnde mbala shato y’etondo lo tshenyi ya wonya l’ɔkɔngɔ wa nde ndjata ɔnɛ: lekɔ nge lo nyuma? Petero amboyohomana l’akambo wahandalongamɛki. Wambotatɛ nanya mɛtɛ, ndo wambɔsa Yeso oko otshi w’akambo wa kɔlɔ. Ɔlɔlɔ amboyokadimɔ kɔlɔ, ndo ɔnɛ lele kema l’onongo, wamboyowosha onongo. Petero hakuki nshikimala lo menda akambo wa wolo waki l’etena kɛnɛ. Mbala kakɔ ɔtɔi, nde amboshisha kɔlamelo yande; nɛ dia nde ambondama la wɔma w’onto. Aha dikambo sɔ tokomɛ kânga lushi ɔtɔi! Mateu 26:57, 58, 69-75; Mako 14:30, 53, 54, 66-72; Luka 22:54-62; Joani 18:15-18, 25-27.

▪ Woho akɔna wambɔtɔ Petero nde la Joani l’etei ka sɛkɛ diaki ɔlɔmbɛdi a lâdiko?

▪ L’etena kele Petero nde la Joani wêke l’etei ka sɛkɛ diakɔ, kakɔna kasalema lo luudu?

▪ Mbala ngana yambeka lekeeka, ndo mbala ngana yambanguna Petero Kristo?

▪ Kakɔna kambosala Petero lam’ambondotshika etunyi ndo lam’ambondotshiba?

▪ Kakɔna kotshutshuyisha Petero dia nde manguna Yeso?