Tshapita 126

“Mɛtɛ, ɔnɛ aki ɔna Nzambi”

ohêta tshanda l’ɔkɔngɔ wa vɔ mpanɛ yeso l’otamba, midi ambokoka, wodjima wa mamba wamboyala lo wodja w’otondo l’edja k’eshidi esato a tango. Aha wonya la ngɔndɔ mbambɔlɔ l’etena kɛnɛ, nɛ dia wonya la ngɔndɔ tɔlɔka paka lam’awalɛ ngɔndɔ, koko ngɔndɔ mongaka emuma l’etena kasalema Elekanelo. Ndo nto, ta dialɔ wonya la ngɔndɔ nshilaka paka lo taahe tɔmɔtshi ta wenya toto. Lâsɔ Nzambi mɛtɛ mbosadi wodjima ɔnɛ! Aha la tamu, dikambo nɛ dia diambo diambotshutshuya wanɛ wasɔka Yeso dia vɔ kana yimba, ndo ndjiha enyɔ awɔ.

Naka wodjima ɔsɔ wakasadimi la ntondo k’ose ovi pangwɛ onyande ndo nɔmba Yeso dia nde mbôhɔ, kete ondo dui sɔ mbambôtshutshuya dia nde kadimola otema. Ondo lo wodjima akɔ ɔnɛ mbamboya amato anɛi, mbuta ate, nyango Yeso nde la Salɔme, koshɛnde ka omoto, Mariya Mangadala, kâmɛ la Mariya nyango ɔpɔstɔlɔ Jakɔba ya Dikɛnda, ko wambosukana oya l’otamba w’asui. Joani, ombeki walangema efula le Yeso, ekɔ kâmɛ la wɔ.

Nyango aya wate kana onto ‘lambohomɔ lokuwa l’asolo’ lam’ɛnyinde ɔnande lakandalɔnya ndo lakandôdia ohanemi l’otamba, l’atei w’asui wa mamba! Koko Yeso hayakiyanya dia pâ kande hita, koko ekɔ lo ndjakiyanya lo dikambo dia lɔsɛnɔ la nyango. Nde ambosala la wolo tshɛ ko ambɛwɔ le Joani, atɛ nyango ate: ‘Omoto, hɛnyi ɔnayɛ!’ Ko nde ambɛwɔ le Mariya, atɛ Joani ate: ‘He nyɔ!’

Oma l’ɛtɛkɛta ɛsɔ, Yeso ambokimɔ nyango l’anya w’ɔpɔstɔlɔ walangande efula, nɛ dia ondo l’etena kɛnɛ ko nde ambovushaka omɛnde. Nde ambosala ɔsɔku nɛ dia polo ndo l’etena kɛnɛ ko ana akina waki Mariya watayala la mbetawɔ le nde. Ɔsɔku mbambondotshika ɛnyɛlɔ k’ɔlɔlɔ k’aha mbidjaka yimba paka dia kotsha ehomba wa l’emunyi eto waki nyango, koko ndo ehomba ande wa lo nyuma.

Oya l’eshidi esato wa dikɔlɔ, Yeso ambota ate: “Dimi la pusa.” Yeso amboka di’oko She ambonya ekokelo kambondôkokɛka ɔnɛ kele kɔlamelo yande yahembame polo ndo l’ekomelo. Diɔ diakɔ diambondota la dui dia wolo ate: ‘Nzambi kami, Nzambi kami, bonde kamboyokalɛ nganɛ?’ Lam’okiwɔ awui asɔ, anto amɔtshi wemadi lâwɔ wambota vate: “Nyulungi, Elidja oso undeta.” Esadi eto, ɔmɔtshi l’atei awɔ ambolawɔ, ambototambiya dimbo lo wanu w’okai, ambodihakɛ la shɔdi ya longandjɔ, ko ambowosha dia nde nɔ. Koko akina vate: “Nyutukete, tutukenda kana Elidja ayuyûhanula.”

Lam’olongodi Yeso wanu w’okai, nde ambota la dui dia wolo ate: “[Diambokotshama, NW].” Mɛtɛ, nde amboshidiya kɛnɛ tshɛ kakôtome She dia ndjosala la nkɛtɛ. Yeso ambodihiya ate: “Papa, lambutshika lumu lami lu anya aye!” Lam’otshinde ɔsɔku, Yeso ambokitsha wolo ande wa lɔsɛnɔ l’anya wa Nzambi l’elongamelo k’ɔnɛ Nzambi ayoyôkaloyawɔ nto. Ko nde ambɔkɔlɛ ɔtɛ, ambovɔ.

Wonya wokitshiyishande, didimu dia nkɛtɛ dia wolo diambosalema ko ndo ave wa weke wambatɛ. Didimu diambosalema wolo efula ko waombo wele l’andja w’osomba wa Jerusalɛma wambodihɔ ko edo wambotomba l’andja. Ambetshi a mboka wambɛna edo akɔ, ko lam’ɔtwɛwɔ l’osomba, wambosanya akambo asɔ.

Ndo nto, wonya wovwe Yeso, dihɔndɔ di’okombɔ dia woke efula diele lo tɛmpɛlɔ ka Nzambi diakakitola dihole di’Ekila la dihole Dioleki Ekila, diambosambɔ l’ahende, oma l’olongo polo l’ɛse. Koko, dihɔndɔ sɔ diakawalɛngɛ dimɛna, diekɔ mɛtɛ la mɛtɛlɛ 18 l’otale ndo diekɔ wotsho efula! Oma lo dihindo sɔ, Jehowa ambɛnya, aha paka nkɛlɛ kande keto le wanɛ wodiaki Ɔnande koko ndo ɔnɛ anto kokaka mbɔtɔ lo dihole Dioleki Ekila, mbuta ate l’olongo, l’ekimanyielo ka nyɔi ka Yeso.

Wanɛ woki didimu dia nkɛtɛ ndo wɛnyi akambo akina wotshami, wambondama la wɔma efula. Dembe dialama dihole diakɔ ambotombola Nzambi. Nde ambota ate: “[Mɛtɛ, ɔnɛ aki Ɔna Nzambi, NW].” Ondo ndo nde mbaki lam’akawalomboyaka Yeso la ntondo ka Pilato ɔnɛ nde kambota ate: dimi kele ɔna Nzambi. Kakianɛ, lam’ambondɛna akambo asɔ wa diambo, nde amboyetawɔ ɔnɛ Yeso ekɔ Ɔna Nzambi, eelo, ɔnɛ mɛtɛ nde mbele onto loleki woke lo tena tshɛ.

Anto akina nto wamamba lo menda akambo wa diambo wambotshama, ko wambokalola, watayakɔmɔla lo tolo oko djembetelo ya lonyangu ndo nsɔnyi kawɔ k’efula. Ambeki wa Yeso efula wa amato wakemadi tshalola ko wekɔ lo menda akambo asɔ wa mamba la diambo di’efula. Ndo ɔpɔstɔlɔ Joani mbele lâwɔ. Mateu 27:45-56; Mako 15:33-41; Luka 23:44-49; 2:34, 35; Joani 19:25-30.

▪ Bonde kakokaso mbuta ɔnɛ wodjima wosadimi l’edja k’eshidi esato wa tango bu ɔnɛ wonya la ngɔndɔ mbɔlwɛ?

▪ Ɛnyɛlɔ kakɔna k’ɔlɔlɔ kambosha Yeso, yema la ntondo ka nde mvɔ, le wanɛ wele l’ambutshi waya esombe?

▪ Naa ɛtɛkɛta ɛnɛi wɔtɛkɛtshi Yeso la ntondo ka nde mvɔ?

▪ Ambosalema oma lo didimu dia nkɛtɛ, ndo woho wambâtɛ dihɔndɔ di’okombɔ dia lo tɛmpɛlɔ ekɔ la kitshimudi yakɔna?

▪ Ambosala dembe dialama dihole diakawadiaki Yeso lam’ɛnyinde ahindɔ asɔ?