Tshapita 132

Lo lonya l’omi la Nzambi

OTSHULWELO wa nyuma k’ekila lo Pɛntɛkɔsta ekɔ djembetelo yɛnya ɔnɛ Yeso ambokalola l’olongo. Ɛnɛlɔ kamboyɛna ombeki Stefano yema l’ɔkɔngɔ diko mɛnyaka ɔnɛ Nde ambokoma lɛkɔ mɛtɛ. Yema la ntondo ka vɔ mbôka ave l’ɔtɛ w’awui wa mɛtɛ wambondota, Stefano ate: “Enda, dimi lambena ulungu ambudiho la On’a untu emadi lu lunya la pami la [Nzambi, NW].”

Lam’ende lo lonya l’omi la Nzambi, Yeso ekɔ lo kongɛ dia She mbotɛ dui ɔnɛ: “Ntshɔka tôle l’atei w’atunyi ayɛ.” Ko kakɔna kasala Yeso lam’akongɛnde dia ndɔshana l’atunyi ande na? Nde ekɔ lo nɔmbɔla, kana mbolɛ, lâdiko di’ambeki ande w’akitami, lo mbalɔmbɔla l’olimu w’esambishelo ndo lo mbalɔngɔsɔla dia vɔ ndjoyala nkumi ya dikanga kâmɛ la nde lo Diolelo dia She oma l’eolwelo k’oma lo nyɔi.

Oko ɛnyɛlɔ, Yeso ambɔsɔnɔla Saulo (ɔnɛ lamboyeyama efula oko Paulo, lokombo lande l’Ose Rɔmɔ) dia nde pamia olimu wa mbetɛ anto ambeki lo wedja ekina. Saulo ekɔ l’ohetoheto lo Ɛlɛmbɛ wa Nzambi, koko ewandji w’ɛtɛmwɛlɔ w’Ase Juda wekɔ lo mbonganyiya. Omalɔkɔ, nde ambetawɔ dia vɔ ndjaka Stefano ko ambotshɔ ndo otsha la Damasɛkɛ la dikimɔ di’oma le Kayifasɛ, ɔlɔmbɛdi a lâdiko, dia tonda apami la amato wayondototana wele ambeki wa Yeso, ko mbakeleka ɛkɔdi ndo mbaela oya la Jerusalɛma. Koko, lam’atatshu Saulo lo mboka, osase a woke wambôngamwɛ la shashimuya ndo wambôdinga, ko nde ambɔkɔ la nkɛtɛ.

Ko dui diaheyama oma lɛnɛ oyediɔ diambowombola ɔnɛ: “Saulu, Saulu, okoko wana wansuyaye?” Saulo mbambolande ate: “Khumadiondjo, we na?”

Ko dui diakɔ diambôkadimola ɔnɛ: “Dimi Jesu, kasuyaye.”

Yeso ambotɛ Saulo, ɔnɛ laya tshungu oma l’osase wa diambo, dia nde mbɔtɔ la Damasɛkɛ dia tokongɛ awui amɔtshi. Ko Yeso ambɛnama lo ɛnɛlɔ le ombeki ande ɔmɔtshi welɛwɔ ɔnɛ Ananiya. Yeso ambotɛ Ananiya lo dikambo dia Saulo ate: “Ndi eko usi ulimu lambumusonola, dia ndi ntsho la lukumbu lami la ntundu k’asi wedja la ka khumi ya dikanga, ndu le asi Isariyele.”

Mɛtɛ, oma l’osukɔ wa Yeso, Saulo (ɔnɛ lelɛwɔ ɔnɛ Paulo) kâmɛ l’esambisha ekina w’evanjiliyɔ wambokondja etombelo w’ɛlɔlɔ efula l’olimu awɔ w’esambishelo ndo wa wetshelo. Ɛnɔnyi 25 l’ɔkɔngɔ wa Yeso mɛnama le nde lo mboka k’otsha la Damasɛkɛ, Paulo amboyofunda ɔnɛ “lukumu l’ololo” lambosambishama ‘le etongami tshɛ kele l’ɛse olongo.’

L’ɔkɔngɔ w’ɛnɔnyi efula mbeta, Yeso ambɛnya Joani, ɔpɔstɔlɔ ande wa ngandji, lokema la waɛnɛlɔ. Oma l’ekimanyielo ka waɛnɛlɔ akɔ asɔ wofundami lo dibuku dia lo Bible dielɛwɔ ɔnɛ Enyelo, mbambotshikala Joani la lɔsɛnɔ yema y’edja dia nde mɛna okalwelo wa Yeso lo lowandji la Diolelo. Joani ekɔ lo mbuta ɔnɛ “[oma lo wolo wa nyuma, NW]” mbakandɛmbama l’etena ka “lushi la Khumadiondjo.” “Lushi” lakɔ lɔsɔ kɛdikɛdi na?

Naka sho mbeka pɔlɔfɛsi ya lo Bible la yambalo tshɛ, mbeka ndo pɔlɔfɛsi kaki Yeso k’endana la nshi y’ekomelo, kete tayɛna ɔnɛ “lushi la Khumadiondjo” lɔsɔ lakatatɛ l’ɔnɔnyi 1914, ɔnɔnyi wahohamɛki! Ɔnkɔnɛ, l’ɔnɔnyi 1914 mbakakalola Yeso lo yoho yahɛnama, aha la vɔ mbuda amama ɔnɛ kele anto tshɛ weye, ndo paka ekambi ande wa kɔlamelo eto mbakeye ɔnɛ nde ambokalola. L’ɔnɔnyi akɔ ɔsɔ mbakalongola Yeso dui oma le Jehowa dia nde ntshɔ ko tôlɛ l’atei w’atunyi ande!

Lo ndjela didjango dia She, Yeso akɛdia olongo lo minya Satana nde l’ɛdiɛngɛ ande ko mbakasha oya lanɛ la nkɛtɛ. L’ɔkɔngɔ wa nde mɛna dikambo sɔ lo ɛnɛlɔ, Joani amboka dui dimɔtshi oma l’olongo diata ɔnɛ: “Kakiane panda kambuyala ndu wulu, ndu diulelu dia [Nzambi, NW], ndu luwandji la Kristu kandi.” Mɛtɛ, Kristo akatatɛ mbolɛ oko Nkumekanga l’ɔnɔnyi 1914!

Ande losango l’ɔlɔlɔ le atɛmɔdi wa Jehowa wa l’olongo lee! Wambowatɛ ɔnɛ: “Ulungu li, ongenengene, ndu wane watudjaseka loko.” Ko wanɛ wele la nkɛtɛ ngande? “Fono kayuyala la kete ndu l’ashi a wuki, ne dia [Diabolo, NW] akayi le nyu. Ndi eko la kele ka wuki; ndi mbeyaka ati: Etena kami kambusukana.”

Nshi nyɛ, tekɔ lo sɛna l’etena kɛsɔ ka tshitshɛ kambotshikala. Ɛlɔ kɛnɛ, anto wekɔ lo mɛnya dia kana vɔ kokaka mbɔtɔ l’andja w’oyoyo waki Nzambi kana nanyema. Lo mɛtɛ mɛtɛ, lɔsɛnɔ laso la lo nshi yayaye nemanɛka la kɛnɛ katshaso lam’okaso lokumu l’ɔlɔlɔ la Diolelo diaki Nzambi lele lo tasambishama lo nkɛtɛ k’otondo oma l’ɛlɔmbwɛlɔ ka Kristo.

L’ɔkɔngɔ diko, Yeso Kristo ayokamba olimu oko Dembe diaki Nzambi dia minya dikongɛ di’otondo diaki Satana kâmɛ la wanɛ tshɛ wadisukɛ oma lanɛ la nkɛtɛ. Yeso ayonya akambo asɔ tshɛ wa kɔlɔ lo ta dielamɛ lo Bible ɔnɛ Aramangɛdɔna kana Armagɛdɔ. L’ɔkɔngɔ w’akambo asɔ, Yeso, Onto loleki woke l’andja w’otondo oma la le Jehowa Nzambi ndamɛ, ayonda Satana nde l’ɛdiɛngɛ ande ko ayowakadja wokelekami ɛkɔdi l’edja k’ɛnɔnyi kinunu lo “difuku diaha l’ekumelu,” mbuta ate lo eongelo kahawatosala ndoko olimu wate kana wanɛ wambovɔ. Etsha 7:55-60; 8:1-3; 9:1-19; 16:6-10; Osambu 110:1, 2, NW; Heberu 10:12, 13; 1 Petero 3:22; Luka 22:28-30; Kolosai 1:13, 23; Enyelo 1:1, 10; 12:7-12; 16:14-16; 20:1-3; Mateu 24:14.

▪ L’ɔkɔngɔ wa Yeso mbudɛ l’olongo, lende ambondotodjasɛ, ndo kakɔna kakongɛnde?

▪ Yeso ekɔ lo mbolɛ lâdiko dia wa na l’ɔkɔngɔ wa nde mbudɛ l’olongo, ndo woho akɔna wɛnama lowandji lande?

▪ Etena kakɔna kakamɛ “lushi la Khumadiondjo,” ndo kakɔna kakasalema l’etatelo ka lushi lakɔ?

▪ Woho akɔna w’endana onto l’onto l’olimu w’esambishelo wasalema nshi nyɛ?

▪ Kakɔna kayoyosalema lam’ayoshila olimu w’esambishelo?