Ɔtɔmbɔkwɛlɔ lo andja wa lo nyuma
Etena kakakambe Satana l’oloyi dia ntɛkɛta la Eva, Eva nde la wɔ akatɔmbɔkwɛ Nzambi oko Satana
Ditongami dia lo nyuma tshɛ diakatonge Jehowa diaki ɔlɔlɔ. L’ɔkɔngɔ diko, ondjelo ɔmɔtshi akakome kanga kɔlɔ. Ondjelo akɔ ko Satana Diabolo. Satana akalange dia wanɛ wodjashi la nkɛtɛ mbɔɔtɛmɔla lo dihole dia ntɛmɔla Jehowa. Kakɔna kakatombe?
L’ekambɔ k’Ɛdɛna, aki etamba efula wakatɔɔka elowa waki dimɛna dia ndɛ. Jehowa akatɛ Adama la wadɛnde, Eva, dia vɔ wakakokaka ndɛ elowa w’oma lɔkɔ. Koko aki otamba ɔmɔtshi wakawatɛ Nzambi diaha vɔ ndɛ elowa w’oma lɔkɔ. Nde akate dia naka vɔ ndɛ elowa w’oma l’otamba akɔ, kete vɔ wayovɔ ndooko onyake.—Etatelo 2:9, 16, 17.
Lushi lɔmɔtshi laki Eva ndamɛ, oloyi akatatɛ nsawola la nde. Lo mɛtɛ, aha oloyi mbakatɛkɛtaka la nde; koko Satana Diabolo mbakasale dia mɛnama oko oloyi katɛkɛta. Satana akatɛ Eva dia naka nde ndɛ olowa wakasekɛma, kete nde ayoyala la lomba oko Nzambi. Satana akawotɛ nto dia nde hatovɔ. Awui wakandawotɛ asɔ waki kashi. Koko, Eva aketawɔ Satana ndo akale olowa. L’ɔkɔngɔ diko, nde akayoshaka Adama yema, ko ndo nde la wɔ akale.—Etatelo 3:1-6.
Lo tshimbo y’ɔkɔndɔ wa mɛtɛ ɔnɛ, tambeya dia Satana ekɔ ɔtɔmbɔki ndo kanga kashi. Nde akatɛ Eva dia nde hatovɔ kaanga nde kohindolɛka Nzambi. Dui sɔ diaki kashi. Eva akavu ndo Adama nde la wɔ akavu. Satana koomvɔ l’etena kɛsɔ; koko ndo nde ayovɔ nɛ dia nde akasale pɛkato. Koko la ntondo ka nde mvɔ, nde ekɔ lo ntetemala minganyiya anto. Nde ekɔ lo ntetemala mbuta kashi ndo nde salaka la wolo di’anto nsekola ɛlɛmbɛ wa Nzambi.—Joani 8:44.
Andjelo akina wambɔtɔmbɔkɔ
L’ɔkɔngɔ diko, andjelo akina wakayonga andjelo wa kɔlɔ. Andjelo akɔ wakɛnyi wamato w’amɛna la nkɛtɛ ko wakalange mbeyana la wɔ. Ɔnkɔnɛ, vɔ wakaholɔ la nkɛtɛ wɔlɔtshi alemba w’anto. Oma laasɔ, wakatshuke wamato akɔ. Dui sɔ diakalɔshana la sangwelo dia Nzambi.—Etatelo 6:1, 2; Judɛ 6.
Andjelo wa kɔlɔ wakaholɔ la nkɛtɛ dia ndjosala awui wa mindo la wamato
Dui sɔ diaki nto l’etombelo wa kɔlɔ efula le anto. Wadi wa andjelo asɔ wakote ana, koko ana akɔ komonga woho wele ana akina. Vɔ waki akongote, ngala ndo esehe. Yema yema, nkɛtɛ kakalole l’akambo wa ngala ndo Jehowa akɔshi yɛdikɔ ya ndanya anto wa kɔlɔ la mvula k’elola. Anto wakake lo elola kakɔ aki Nɔa laki onto ɔlɔlɔ nde la nkumbo kande.—Etatelo 6:4, 11; 7:23.
Andjelo wa kɔlɔ wakakalola l’andja wa lo nyuma, vɔ komvɔ. Koko, wakalongola dilanya. Vɔ kokalola nto lo nkumbo ka Nzambi kele la andjelo w’ɛlɔlɔ. Oma laasɔ, Jehowa kombasha nto dikoka dia ndɔta alemba w’anto. Ndo wayovɔ lo lushi la kilombo ka woke.—2 Petero 2:4; Judɛ 6.
Satana ambokashema oma l’olongo
Satana la andjelo ande wa kɔlɔ wakakashema oma l’olongo
L’etatelo ka ntambe ketshi, ta diakayala l’olongo. Dibuku dia lo Bible dia Ɛnyɛlɔ nembetshiyaka kɛnɛ kakete ɔnɛ: “Ta diakatombe l’olongo: Mikayɛlɛ [Yeso Kristo lakolwama] l’andjelo ande [w’ɛlɔlɔ] wakalɔ la dragɔ [Satana], ko dragɔ l’andjelo ande [wa kɔlɔ] wakaalɔsha, koko vɔ kombaleka wolo ndo vɔ komonga la dihole nto l’olongo. Ko wakakasha dragɔ dia woke, oloyi akɔ w’edjedja welamɛ Diabolo ndo Satana, ɔnɛ langanyiya nkɛtɛ k’otondo. Wakawokasha la nkɛtɛ nde l’andjelo ande [wa kɔlɔ].”
Etombelo akɔna waki la dui sɔ? Ɔkɔndɔ tetemalaka ɔnɛ: “Diakɔ diele olongo le, ɔngɛnɛngɛnɛ ndo wanɛ wodjashi lɔkɔ!” Andjelo w’ɛlɔlɔ wakakoke ngɛnangɛna nɛ dia Satana la andjelo wa kɔlɔ kana ɛdiɛngɛ komonga nto l’olongo. Ko kayotota lo dikambo dia wanɛ wodjashi la nkɛtɛ? Bible mbutaka ɔnɛ: “Mananu kayanga monga la nkɛtɛ ndo lo ndjale, nɛ dia Diabolo amboya le nyu ele la nkɛlɛ k’efula, eeya dia etena kambootshikalɛ kaya mondo.”—Ɛnyɛlɔ 12:7-9, 12.
Diakɔ diele, Satana l’anto ande wa kɔlɔ wekɔ lo minganyiya anto efula wa la nkɛtɛ. Andjelo wa kɔlɔ asɔ mbelamɛka ɛdiɛngɛ. Vɔ wekɔ atunyi wa Nzambi. Vɔ tshɛ wekɔ kɔlɔ.