Etini 11
Tatɛ kakiane etshina k’andja w’oyoyo keko lo mbikama
1, 2. Lo ndjela awui w’amvutshi, akambo akona wenaso nshi nye na?
DIKAMBO dikina ne dia dimena efula ko etshina k’andja w’oyoyo waki Nzambi keko lo mbikama kakiane, koko andja w’omusu waki Satana one weko lo talana. Lo washo aso, Nzambi atshumanyako anto w’oma lo wedja tshe ndo ambowaete etshina ka tshunda di’oyoyo dia anto wa la kete ne di’ayohena kema edja nto andja one wamboshila la mbatona ɛlɔ kene. Lo Bible, lo 2 Petero 3:13 (NW), tshunda diako di’oyoyo dia anto wa la kete mbelameka “kete y’oyoyo.”
2 Diewoyelo diakafundama edja la ntondo lo Bible mbutaka nto ate: “Lo nshi y’ekomelo [nshi y’eso nye], . . . wedja efula wayotsho ndo wayota voate: ‘Nyoye ndo tode l’okona waki Jehowa [otemwelo ande wa mete], . . . ko nde ayotolakanya mboka yande, ko sho tayokendakenda lo mboka yande.’”—Isaya 2:2, 3, NW.
3. (a) Dui di’omvutshi Isaya dieko lo kotshama le waana akona? (b) Dibuku di’ekomelo dia lo Bible atadio na?
3 Dikambo di’omvutshi so diakotshamako kakiane lateyi a wane walenya ‘mboka yaki Jehowa ndo wa kendakenda lo mboka yande.’ Dibuku di’ekomelo dia lo Bible teketaka dia anto ako a woladi wa l’andja w’otondo oko dia “ului a wuki . . . w’uma lu weoho w’antu tshe, ndu w’eteketa tshe,” wane wele la diwoto dia mete l’andja w’otondo dia kambe Nzambi kame. Bible kotshaka nto ate: “Vo weli wane wambuya uma lu paa ka wuki.” Keso menyaka dia vo wayoka l’ekomelo k’andja wa nshi nye wa kolo.—Enyelo 7:9, 14; Mateu 24:3.
Nkumbo kele la diwoto dia mete l’andja w’otondo
4, 5. Kakona kakimanyiya dia nkumbo k’Emenyi waki Jehowa kayale l’andja w’otondo na?
4 Miliyo y’Emenyi waki Jehowa wasalako la wolo awo tshe dia kotsha wetshelo kana alako waki Nzambi ndo kendakenda lo mboka yande. Dikongelo diakiwo dia loseno la pondjo diambodjama lo andja w’oyoyo waki Nzambi. Lo nemiya elembe waki Nzambi lo loseno lawo la nshi tshe, vo mɛnyaka dia lolango lakiwo ele dia ndjakitsha la tshina dia lowandji lakinde tatɛ kakiane polo ndo lo andja w’oyoyo. Oyadi dihole diakona, oyadi oma lo wodja akona wotumbiwo kana lokoho la demba lakona lele lawo, vo watolemiyaka elembe waki Nzambi ene watanema lateyi wa Dui diande. Dio diako diambowoyala nkumbo kele la diwoto dia mete l’andja w’otondo, nkumbo k’andja w’oyoyo kambotongama oma le Nzambi.—Isaya 54:13; Mateu 22:37, 38; Joani 15:9, 14.
5 Endaka Emenyi waki Jehowa wamboyala nkumbo ka l’andja w’otondo kele hedimi la kikina, kete aha oma lo wolo wakiwo voameme. Vo mbeyaka dia eko oma lo wolo wa nyuma kaki Nzambi katokambaka olimu lo nkumbo kene kalemiya mboka yande. (Etsha 5:29, 32; Ngalatiya 5:22, 23) Eko olimu a Nzambi. Woho ako mbakate Yeso ate: “Akambu weli wulu le antu kema wulu le Unyashungu.” (Luka 18:27) Nzambi one lakasale dia andja one woshikikadi wakoke la monga ayosala nto dia nkumbo k’andja w’oyoyo kashikikale.
6. Lande na kakokaso mbuta one diwoto di’Emenyi waki Jehowa dieko dihindo dia lo nshi yaso nye na?
6 Omaloko, kokaka sho mena tatɛ kakiane woho akona wayôlɛ Jehowa andja w’oyoyo lo menda kene kambondomɛ la sala dia mbika etshina ka andja ako kele lo salema lo nshi yeso nye. Ndo kene kambondoshila la salɛ Emenyi ande, eko lo woho omotshi, oko dihindo dia lo nshi yaso nye. Lande na? Ne dia nde amboshila la tshumanya Emenyi waki Jehowa lo nkumbo kele la diwoto dia mete l’andja w’otondo, nkumbo kene kele hakoke ndjâkakitola oma lo akambo wa shonodi ya wedja, ya lokoho la demba kana y’otemwelo. Kanga mbele lofulo lawo komaka lo wa miliyo ndo vo mbidjase lo wedja 200 oleki, vo tshe weko olui otoyi wele hakoke kakitona. Nkumbo kako k’andja w’otondo, kene kele atasalemaka ndoko lushi l’okondo w’anto, eko mete dihindo dia mamba ne diambosala Nzambi lo nshi yaso nye.—Isaya 43:10, 11, 21; Etsha 10:34, 35; Ngalatiya 3:28.
Woho wa mbeya nkumbo kaki Nzambi
7. Woho akona wokuki mbeyama ambeki waki Yeso oko akandate na?
7 Woho akona wakokaso mbeya one nkumbo kene kakamba Nzambi lato olimu oko etshina k’andja wakinde w’oyoyo na? Waana akona wakotsha eteketa waki Yeso ene wele lo Joani 13:34, 35 na? Nde akate ate: “Olembe w’uyuyo mbamumunyusha, dia nyu mbukana ngandji. Nyukani ngandji uku akamanyuki ngandji. Uma lu dikambu ne, antu tshe wayeya voate: Ambeki ami mbenyu, naka nyu nyayukana ngandji.” Emenyi waki Jehowa mbetawoka eteketa engo waki Yeso ndo mbakotshaka. Oko âlomba Dui dia Nzambi, vo “weko la ngandji k’otamanya lasawo.” (1 Petero 4:8, NW) Vo ‘ndjâlɔtshaka la ngandji, ne dia to keko okakatanyelo k’olowanyi.’ (Kolosai 3:14) Omaloko, ngandji ka diwoto eko “olembo” wâkakatanya kame l’andja w’otondo.
8. Dia mbeya ekambi waki Nzambi, 1 Joani 3:10-12 (NW) atande nto na?
8 Nto, 1 Joani 3:10-12 (NW) mbutaka ate: “Ana wa Nzambi la ana wa Djambolo mbeyamaka onkone: Onto tshe lahasale ololo haye oma le Nzambi, woho ako wame la one lahalange onango. Ne dia enda dikendji diakatoke oma lende oma k’etatelo: dia sho mbokana ngandji, aha oko lo woho waki Kena lakaye oma le kanga kolo ko akadake onango.” Woho ako mbele nkumbo kaki Nzambi keko la diwoto dia mete l’andja w’otondo, ndo hawosale akambo wa ngala.
Djembetelo kina
9, 10. (a) Olemu akona wakimanyiya dia mbeya ekambi waki Nzambi wa lo nshi y’ekomelo na? (b) Woho akona wamboshila la kotshama Mateu 24:14 oma le Emenyi waki Jehowa na?
9 Eko woho okina nto wa mbeya ekambi waki Nzambi. Lo diewoyelo diande di’endana la ekomelo k’andja, Yeso akatshimola akambo efula wakahombe menama oko djembetelo ya nshi y’ekomelo. (Enda Etini 9.) Otoyi a lateyi wa atshina w’akambo w’endana la diewoyelo diako tanemaka lo Mateu 24:14: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.”
10 Onde diewoyelo dingo diamboshila la kotshama? Eelo. Dikambo dia tatɛ kâma wakame nshi y’ekomelo lo 1914, Emenyi waki Jehowa weko lo sambisha lokumu l’ololo la Diolelo diaki Nzambi l’andja w’otondo, lo ndjela woho one wakakimo Yeso dui, dia komê anto lo wa mvudu yawo. (Mateu 10:7, 12; Etsha 20:20) Wa miliyo y’Emenyi tshokaka dia tenda nkumbo tshe y’anto dia tosawola lawo lo kene kendana la andja w’oyoyo. Dio diako diele biukubuku nye yambokoma l’anya aye, ne dia olimu w’Emenyi waki Jehowa sanganyaka kame otondjelo ndo okahanyelo w’efula k’ekanda wa teketa dia Diolelo diaki Nzambi. Onde we mbeyaka anto amotshi ane wasambisha kene kendana la Diolelo diaki Nzambi lo luudu la luudu l’andja w’otondo? Mako 13:10 menyaka dia olimu ako w’osambishelo ndo w’olakanyelo pombamaka salema “la ntundu,” ka ekomelo ndja.
Okadimwelo lo dimbola dia hende dia woke
11. Dikambo diakona diambokotsha Emenyi waki Jehowa nto lo ndjakitshakitsha kawo la tshina dia lowandji laki Nzambi na?
11 Lam’ele vo nemiyaka elembe ndo alako waki Nzambi, Emenyi waki Jehowa kotshaka dikambo dikina nto. Vo menyaka dia Satana akate kashi lam’akandaseme ate: anto hawotshikala la kolamelo le Nzambi la ntondo k’ehemba, onkone vo mbishaka okadimwelo lo dimbola diahende so di’endana la kolamelo y’anto. (Jobo 2:1-5) Lo menda olui a wa miliyo y’anto wane wambotomba oma lo wedja tshe, wele oko onto otoyi, Emenyi menyaka kolamelo yawo lo diolelo diaki Nzambi. Vo weko anto wele kema kokele, koko vo mbetaka la Nzambi wedi otoyi lo kene kendana la dikambo dia lowandji l’andja w’otondo, oyadi kanga la ntondo k’ehemba w’oma le Satana.
12. Oma lo mbetawo kawo, Emenyi ôkoyawo na?
12 Ɛlɔ kene, efula k’Emenyi waki Jehowa wambokotsha diewoyelo diawo l’onongo w’emenyi wa nshi ya ntondo wakenya kolamelo yawo otsha le Nzambi. Amotshi a lateyi awo waki Abele, Noa, Jobo, Abarahama, Sara, Davidi, ndo Danyele wakonge l’onongo ako. (Heberu, tshapita 11) Oko w’enya Bible, vo weko ‘diinge dia woke di’emenyi wa kolamelo.’ (Heberu 12:1) Vo ndo ambeki akina waki Yeso wakalame olowanyi awo otsha le Nzambi.
13. Eteketa akona w’endana la Satana wakate Yeso wenama mete?
13 Keso menyaka mete ka akambo ane wakateketa Yeso otsha le ewandji wa temwelo lo kene kendana la Satana ate: “Keli kakiane nyu nyangaka ndjakami, dimi lunyutedi akambu wa mete wakamuki uma le Unyashungu. . . . [Nyu ndja oma le Djambolo shenyu ndo nyu nangaka kotsha lolango la shenyu. Ondjakanyi w’anto mbende oma k’etatelo, nde kôkeketala la shikimala lo mete, ne dia mete kema l’otema ande. Lam’atande kashi, nde atoteketaka oko wele tokanyi tande ndameme, dikambo dia nde ele kanga kashi ndo she kashi, NW].”—Joani 8:40, 44.
Ayosonola na?
14. Dikambo diakona di’enama kakiane lo etshina ka andja w’oyoyo?
14 Etshina k’andja w’oyoyo kâka Nzambi kakiane lateyi wa nkumbo k’Emeyi waki Jehowa wa l’andja w’otondo keko lo takeketala. Ononyi tshe, efula k’anto wakambako olimu la diaaso diawo dia sona kene kalangawo, lo ndjasha lo ewo ka mete, dia mbetawo lowandji laki Nzambi. Weko lo mboto lo nkumbo k’andja w’oyoyo, wetako la Nzambi wedi otoyi lo dikambo di’endana la lowandji la andja w’otondo ndo vo menyaka dia Satana eko kanga kashi.
15. Olemu wa kakitola anto wayosalema lo nshi yaso nye na?
15 Lam’ele vo nsonolaka lowandji laki Nzambi, Kristo one la kakitola “ekoko” la “mbudi,” ayosambola dia vo kokaka monga “lo lonya lande l’omi.” Lo diewoyelo diakinde di’endana la nshi y’ekomelo, Yeso akate ate: “Wedja tshe wayotshumana la ntondo kande, ko nde ayokakitola anto oko atokakitolaka olami ekoko la mbudi. Nde ayokitsha ekoko lo lonya lande l’omi, ko mbudi lo lonya lande la wadi.” Ekoko ele anto w’okitshakitsha wane wasangana kame la anango Yeso ndo wâkimanyiya lo ndjakitshakitsha l’ɛse ka lowandji laki Nzambi. Mbudi ele akanga w’ete wolo, wane watona anango Yeso ndo hawosale ndoko engo dia sukɛ lowandji laki Nzambi. Kakona kayotomba na? Yeso ambokadimola onkone ate: “Anto ango [wa mbudi] wayotsho dia minyama pondjo, ko anto w’ololo [ekoko] wayokondja loseno la pondjo.”—Mateu 25:31-46, NW.
16. Ahombaye sala endaka we kombolaka monga la loseno lo Paradiso kene kayoya na?
16 Lo mete, Nzambi tokaneka! Kema edja nto nde ayosala paradiso ka dimena efula la kete. Onde we nangaka sena lo Paradiso kako? Kana ngaso, enya w’okelo aye wa losaka lo tediko tambosa Jehowa dia we nyanga woho wa mbeya ndo ntsha akambo ane wekaye. “[Nyoyange Jehowa, lam’ayande akakoke tanema, NW]. Nyôlombaki lam’ekindi lasuke. Untu a kolo aseke mbuka kande, La one latusanguyaka kolo akimo tukanyi tandi. Akalule le Latuyalaka, ku ndi ayuwuka ketshi.”—Isaya 55:6, 7.
17. Lande na kele wenya waya kema efula nto dia sona akona ahombaso kambe na?
17 Wenya wa shisha waya kema nto. Ekomelo k’andja w’omusu one kaya suke efula. Dui dia Nzambi mbishaka dako ne ate: “Tanyolangake andja koyanga diango diele loko. Endaka onto ambolanga andja, kete ngandji ka sheso kema le nde . . . Andja one lo tete kame ndo la saki yawo, koko one la ntsha lolango la Nzambi ayotshikala pondjo.”—1 Joani 2:15-17, NW.
18. Wanya akona wahombaye takula dia monga la dikongelo di’oshika dia ndjala la loseno lo andja w’oyoyo waki Nzambi wa dimena efula na?
18 Ekambi wa Nzambi wambolongoswama tatɛ kakiane dia monga la loseno la pondjo lo andja w’oyoyo. Wakondjako akoka wa lo nyuma ndo akina wele ohomba lewo dia nongosola Paradiso. Tambokokokomiya dia we nsonola Nzambi oko Omboledi ndo dia we mbisha lonya l’olimu wa eko wakambishande lo kete k’otondo. Eka Bible la Emenyi waki Jehowa, eka woho a we mbeya Nzambi kene katokane mete ndo kayoshidiya asui aso. Woho oso we lawo ayokoka mboto lateyi w’etshina ka andja w’oyoyo. We ayokoka monga la dikongelo dia kondja diɛkamelo oma le Nzambi ndo monga la loseno la pondjo lo andja w’oyoyo wa dimena efula.
[Osato wa lo lɛkɛ 31]
Emenyi waki Jehowa weko la diwoto dia mete l’andja w’otondo
[Osato wa lo lɛkɛ 32]
Tate kakiane etshina k’ andja w’ oyoyo waki Nzambi keko lo mbikama