Wekelo 9
Ekambi wa Nzambi Pombaka Ndjâla Pudipudi
Lande na kahombaso ndjâla pudipudi l’akambo tshɛ na? (1)
Elɛwɔ ndjâla pudipudi lo nyuma? (2) pudipudi lo lɔkɛwɔ? (3) pudipudi lo yimba? (4) pudipudi lo demba? (5)
Weoho akɔna w’ɛtɛkɛta wa mindo wahombaso mbewɔka na? (6)
1. Jehowa Nzambi ekɔ pudipudi ndo ekila. Nde nongamɛka di’ekambi ande ndjâlaka pudipudi—lo nyuma, lo lɔkɛwɔ, lo yimba, ndo lo demba. (1 Petero 1:16) Pombaka mbidja weolo efula dia ndjâla pudipudi lo asho wa Nzambi. Tekɔ lo sɛna lo andja wa mindo. Tekɔ lo ndɔsha ndo la nsaki yokongaka laso shamɛ ya sala akambo wa kɔlɔ. Koko, tatohekɔke.
2. Pudipudi ka lo Nyuma: Naka sho kombolaka kambela Jehowa, kete sho pombaka kakitɔna la wetshelo ndo la mbekelo tshɛ y’ɛtɛmwɛlɔ wa kashi. Sho pombaka tomba oma l’ɛtɛmwɛlɔ wa kashi ndo aha mbasukɛ oyadi lo weoho akɔna tshɛ. (2 Koreto 6:14-18; Enyelo 18:4) Kam’ekaso mɛtɛ k’endana la Nzambi, sho pombaka ndjâlama ɔlɔlɔ di’aha kesama oma le anto wetsha akambo wa kashi.—2 Joani 10, 11.
3. Pudipudi ka lo Lɔkɛwɔ: Jehowa nangaka di’ekambi ande salaka akambo w’ɛlɔlɔ nshi tshɛ oko Akristo wa mɛtɛ. (1 Petero 2:12) Nde mɛnaka awui tshɛ wasalaso, oyadi kânga lo woshɛshɛ. (Heberu 4:13) Sho pombaka mbewɔ akambo wa dieyanelo dia mindo, kâmɛ ndo ditshelo dikina dia mindo dia l’andja ɔnɛ.—1 Koreto 6:9-11.
4. Pudipudi ka lo Yimba: Naka sho ndodja yimba yaso la tokanyi ta pudipudi ndo t’amɛna, kete lɔkɛwɔ laso layoyala pudipudi. (Filipi 4:8) Koko, naka sho mbidjaka yimba paka l’akambo wa mindo ato, kete tayoyokitɛ lo ntsha akambo wa kɔlɔ. (Mateu 15:18-20) Sho pombaka mbewɔ weoho wa filmɛ kana dienenda diakoka nanya timba taso. Sho kokaka ndodja timba taso la tokanyi ta pudipudi lo mbekaka Dui dia Nzambi.
5. Pudipudi ka lo Demba: Lam’ele vɔ wekɔ atomami wa Nzambi, Akristo pombaka namaka alemba awɔ l’ahɔndɔ awɔ pudipudi. Sho pombaka solaka anya aso lam’atombaso oma lo komba, ndo sho pombaka mbasola la ntondo ka ndɛ diangɔ kana ka toka mma. Naka wɛ kema la komba kele l’ɛlɔnda w’amɛna wakɛdia mindo ya lo komba, kete wɛ pombaka kifɛka. (Euhwelu k’Elembe 23:12, 13) Naka tayolamaka demba diaso, kete tayonga la demba dia wolo. Luudu l’Okristo pombaka ndjâla pudipudi ndo kɔmba oyadi l’etei kana l’andja. Lɔ pombaka ndjâla ɛnyɛlɔ k’ɔlɔlɔ le anto akina.
6. Ɛtɛkɛta wa Pudipudi: Ekambi wa Nzambi pombaka mbutaka mɛtɛ keto nshi tshɛ. Akanga a kashi hawotɔtɔ lo Diolelo diaki Nzambi. (Efeso 4:25; Enyelo 21:8) Akristo hawotondja ɛtɛkɛta wa kɔlɔ oma l’enyɔ awɔ. Vɔ hawolonge kana hawosanya asawo kânga ɛkɔndɔ wa mindo. Oma l’ɛtɛkɛta awɔ wa pudipudi, vɔ tshikitanaka l’anto akina la kalasa, l’elimu, kana lo tenyi dia ngelo diodjashiwɔ.—Efeso 4:29, 31; 5:3.
[Diombwɛlo di’osato wa lo lɛkɛ 18, 19]
Ekambi wa Nzambi pombaka ndjâla pudipudi l’akambo tshɛ