Wekelo 1

Nzambi nangaka wɛ monga ɔngɛnyi ande

Nzambi nangaka wɛ monga ɔngɛnyi ande. Onde wɛ ambokanyiyaka lushi lɔmɔtshi dia wɛ kokaka monga ɔngɛnyi w’Onto loleki woke l’andja w’otondo? Abarahama, lakasɛnɛ deko aha nɛ, akelamɛ ɔnɛ ɔngɛnyi wa Nzambi. (Jakoba 2:23) Anto akina watɛkɛtama lo Bible wakonge vɔ lawɔ angɛnyi wa Nzambi ko wakakondja ɛtshɔkɔ efula. Ɛlɔ kɛnɛ, anto w’oma lo bɛkɛ tshɛ dia nkɛtɛ waya angɛnyi wa Nzambi. Wɛ lawɔ kokaka monga ɔngɛnyi wa Nzambi.

Monga ɔngɛnyi wa Nzambi ndeka monga ɔngɛnyi w’onto akɔna tshɛ dimɛna. Nzambi hashaka angɛnyi ande wa kɔlamelo nsɔnyi. (Osambu 18:25) Monga ɔngɛnyi wa Nzambi ndeka monga la lomombo dimɛna. Lam’avɔ kanga ɔngɔnyi, falanga yande tshɔka le anto akina. Koko, angɛnyi wa Nzambi wekɔ l’ɔngɔnyi wahakokaki onto okina mbɔsa.—Mateu 6:19.

Anto amɔtshi mbeyaka koshimba wɛ mbeka awui wa Nzambi. Kânga angɛnyi ayɛ amɔtshi kana ase nkumbo kayɛ mbeyaka koshimba wɛ mbeka awui wa Nzambi. (Mateu 10:36, 37) Naka anto akina wokɔla kana wokanɛ, yambola wate: ‘Alangami ngɛnyangɛnya: anto kana Nzambi?’ Ohokanyiya yema: Naka onto ɔmɔtshi nde la yɛ ate aha wɛ ndɛ nto, onde wɛ ayokitanyiya dui diande? Kema! Dia wɛ nsɛna, wɛ pombaka ndɛ. Koko Nzambi kokaka kosha lɔsɛnɔ la pondjo! Ɔnkɔnɛ, tetawɔke onto koshimba wɛ mbeka woho wakokayɛ monga ɔngɛnyi wa Nzambi.—Joani 17:3.