Wekelo 7

Bɛnyɛlɔ di’edjedja diatewola

Jehowa hatetawɔ di’anto wa kɔlɔ nanya paradiso. Paka angɛnyi ande ato mbayodjasɛ lɔkɔ. Kakɔna kayokomɛ anto wa kɔlɔ na? Dia sho mbeya dui sɔ, tênde ɔkɔndɔ wa mɛtɛ waki Nɔa. Nɔa akasɛnɛ ambeta ɛnɔnyi nunu efula. Nde aki pami k’ɔlɔlɔ kakayatshutshuyaka dia sala lolango la Jehowa. Koko anto akina wa la nkɛtɛ wakatshaka akambo wa kɔlɔ. Ɔnkɔnɛ, Jehowa akatɛ Nɔa ate nde ayanga ndɔsha mvula k’elola dia nanya anto asɔ tshɛ wa kɔlɔ. Nde akatɛ Nɔa dia sɛla wâto wa luudu di’aha nde la nkumbo kande ndjovɔ lam’ayɔlɔ Mvula k’Elola.—Etatelu 6:9-18.

Nɔa la nkumbo kande wakasɛlɛ wâto wa luudu. Nɔa akewola anto ɔnɛ Mvula k’Elola kaya suke la ndɔ, koko vɔ kombohokamɛ. Vɔ wakatetemala ntsha awui wa kɔlɔ. Lam’akandashidiya sɛla wâto wa luudu, Nɔa akadje waa nyama lɔkɔ, ndo nde la nkumbo kande wakɔtɔ lɔkɔ. Oma lâsɔ ko Jehowa ndɔsha mvula ngembe. Tɔ kakalɔ tanyi 40 l’etsho 40. Nkɛtɛ k’otondo kakafamɛ l’ashi.—Etatelu 7:7-12.

Anto wa kɔlɔ wakavu, koko Nɔa la nkumbo kande wakashimbamɛ. Jehowa akâtondja etondo eto oma lo Mvula k’Elola ko akawaela lo nkɛtɛ kambɛdiama oma l’akambo wa kɔlɔ. (Etatelu 7:22, 23) Bible mbutaka ɔnɛ etena kekina nto kayokoka ka Nzambi nanya anto watona ntsha awui w’ɔlɔlɔ. Anto w’ɔlɔlɔ hawotolanyema. Vɔ wayɔsɛna pondjo pondjo lo Paradiso ka la nkɛtɛ.—2 Petero 2:5, 6, 9.

Nshi nyɛ, anto efula wekɔ lo ntsha awui wa kɔlɔ. Andja ɔnɛ wambolola l’ofukutanu. Jehowa ekɔ lo toma Ɛmɛnyi ande mbala ko mbala dia mbewola anto, koko efula l’atei awɔ hawolange mpokamɛ ɛtɛkɛta wa Jehowa. Vɔ hawolange tshika awui awɔ wa kɔlɔ. Hawolange mbetawɔ kɛnɛ kata Nzambi ɔnɛ kekɔ ɔlɔlɔ kana kɔlɔ. Kakɔna kayowakomɛ na? Onde wokoyotshikitanya lɔkɛwɔ lawɔ lushi lɔmɔtshi? Efula hawolitshikitanyaki pondjo. Etena k’anto wa kɔlɔ nanyema ndo kahawongaki la lɔsɛnɔ nto pondjo kayanga koka.—Osambu 92:7.

Nkɛtɛ hatolanyema; tɔ kayokadimɔ paradiso. Angɛnyi wa Nzambi wayɔsɛna pondjo lo nkɛtɛ kayokadimɔ Paradiso.—Osambu 37:29.