Wekelo 9

Waa na wele angɛnyi wa Nzambi?

Yeso Kristo ekɔ Ɔnaki Jehowa ndo ɔngɛnyi ande w’oshika ndo wolekinde mboka ngandji. La ntondo ka nde ndjɔsɛna oko onto lanɛ la nkɛtɛ, Yeso aki l’olongo oko etongami ka lo nyuma kele la nkudu k’efula. (Joani 17:5) Oma lâsɔ ko nde ndjoya la nkɛtɛ dia ndjetsha anto akambo wa mɛtɛ wendana la Nzambi. (Joani 18:37) Nde akakimɔ ndo lɔsɛnɔ lande l’onto dia shimbɛ akanga w’okitanyiya oma lo pɛkato la nyɔi. (Romo 6:23) Yeso ekɔ kakianɛ Nkumekanga ka lo Diolelo dia Nzambi, lowandji la l’olongo layela Paradiso la nkɛtɛ.—Enyelo 19:16.

Andjelo wekɔ vɔ lawɔ angɛnyi wa Nzambi. Andjelo kotatɛ sɛna oko anto lanɛ la nkɛtɛ. Vɔ wakatongama l’olongo la ntondo ka Nzambi tonga nkɛtɛ. (Jobo 38:4-7) Andjelo wekɔ waa miliyɔ efula. (Danyele 7:10) Angɛnyi asɔ waki Nzambi wa l’olongo nangaka anto mbeka akambo wa mɛtɛ wendana la Jehowa.—Enyelo 14:6, 7.

Nzambi ekɔ nto l’angɛnyi la nkɛtɛ; nde mbaelɛka ɛmɛnyi ande. Onto lamboweta tɛmɔ kana ɔmɛnyi lo tuminadi totaka kɛnɛ keyande lo dikambo di’onto kana di’ɛngɔ kɛmɔtshi. Ɛmɛnyi wa Jehowa mbutɛka anto akina kɛnɛ keyawɔ lo dikambo dia Jehowa ndo dia sangwelo diande. (Isaya 43:10) Oko andjelo, Ɛmɛnyi wa Jehowa nangaka kokimanyiya dia wɛ mbeya akambo wa mɛtɛ wendana la Jehowa. Vɔ nangaka wɛ lawɔ monga ɔngɛnyi wa Nzambi.