Endaka ampokami

WASHO aso kɛnɛmɔlaka waonga ndo nsaki yaso. Vɔ koka mɛnya dia tekɔ la diambo kana la wɔma, kɛtshi kana la ngandji. Mbala mɔtshi, vɔ koka mɛnya dia tekɔ la tâmu kana la lonyangu. Lo dikambo di’asekande wa lo wodja wakasoyama efula, osombe ɔmɔtshi wa pami akate ate: “Sho tɛkɛtaka la washo aso.”

Anto akina koka mbeya woho weso kana kɛnɛ kataso lo menda tsho lɛnɛ ɛlɛ washo aso. L’ahole efula, anto mongaka la mbekelo ka ndjaɛkɛ le onto lawaka washo la lɔngɛnyi tshɛ. Lo yoho yotshikitanyi, naka onto hanyula ɔtɛ kana mendaka lam’akina lo dihole dia nde menda ɔnɛ latɛkɛta la nde, kete onto akɔ koka mbovɔ tshɔda kana mɔnyɔla diewo diande. L’ahole akina, onto laka anto washo, mbɔsamaka oko onto lele bu la loshilambo, onto la ngala, kana l’osolanyi. Ɔsɔku mbediɔ, djekoleko etena kele ɔtɛkɛtshi ekɔ lo tɛkɛta l’onto lele bu pami kana womoto oko nde kana etena katɛkɛtande l’owandji kana l’ɔnɛnɛ ɔmɔtshi. L’ahole amɔtshi, naka dikɛnda ayendaka ekumanyi kele lo tɛkɛta la nde tɛɛ, kete wayowɔsa dia nde bu la dilɛmiɛlɔ.

Koko, lɛnɛ ele dui sɔ bu kɔlɔ, menda onto etena katɛkɛtayɛ la nde dikambo dimɔtshi di’ohomba kokaka mbisha kɛnɛ katayɛ wotsho. Dui sɔ koka mɛnya dia ɔtɛkɛtshi ekɔ l’eshikikelo l’awui watɛkɛtande. Tende woho wakatshe Yeso etena kakâmbe ambeki ande woho w’anyanya ndo kakawate vate: “Akona ayeya nshimbamela?” Bible mbutaka ɔnɛ: “Jesu akawaende tee, akati ati: Antu haweyi ntsha dikambu so, keli [Nzambi] mbeyaka ntsha akambu tshe.” (Mateu 19:25, 26, sho mbɛnganyisha alɛta ango.) Afundelo mɛnyaka nto ɔnɛ ɔpɔstɔlɔ Paulo akasɛdingola l’ɔlɔlɔ tshɛ woho wakatshe ampokami ande. Lushi lɔmɔtshi, onto lakotɔ l’ɛkɔmɔ aki lam’akatɛkɛtaka Paulo. Etsha 14:9, 10 mbutaka ɔnɛ: “Ndi akuki Paulu ateketa. Paulu akawendi tee. Lam’akandenyi ati: Ndi ambetawo dia nkono, ndi akati la diui dia wulu ati: emala too l’ekulu aye.” (Sho mbɛnganyisha alɛta ango.)

Alako wendana l’olimu w’esambishelo. Lam’eyɛ l’esambishelo, sawola l’anto la lɔngɛnyi ndo l’osalosalo tshɛ. Lanɛ wɛnayɛ wate kokaka, kamba la wembola watshutshuya onto dia kana yimba dia tatɛ sawo diakoka monga la wahɔ le nyu akɔ ahende. Etena kasalayɛ dikambo sɔ, sala la wolo dia menda ɔnɛ latɛkɛta la yɛ, kana mbowenda l’elungi la dilɛmiyɛlɔ ndo la loshilambo tshɛ. Monga l’elungi k’ɔmɔnɔmɔnɔ ekɔ dikambo diasha ɔngɛnɔngɛnɔ efula. Ɛnamelo ka ngasɔ koka mɛnya ɔnɛ lasawola layɛ woho w’onto weyɛ ndo mbokimanyiya dia ndjaoka dimɛna wonya wenyu lo sawola.

Sɛdingola woho wele washo w’onto etena kɛnayɛ wate kokaka, koka kokimanyiya dia mbeya woho wa sawola la nde. Naka onto ekɔ la kɛlɛ, haleke ndjasha, hoke kɛnɛ katayɛ, kete wɛ koka mɛna dikambo sɔ. Naka nde bu la wenya efula wa kohokamɛ, kete wɛ ayeya woho wayoyowotɛ. Naka nde ngɛnangɛnaka awui akɔ efula, kete wɛ ayɛna dikambo sɔ. Woho wele washo ande koka kɛnya dia wɛ pombaka susa kana taloya sawo, kana sala la wolo dia nde lawɔ tɛkɛta, komiya sawo kana naka kokaka ko koma polo ndo lo wɛ mbɛnya woho wekaso l’anto Bible.

Oyadi l’esambishelo kana wekelo wa Bible mbalɔmbɔlayɛ, sala la wolo dia mendaka ɔnɛ latɛkɛta la yɛ la loshilambo tshɛ etena katɛkɛtayɛ. Koko tɔ̂tɔtɔmiyake washo lo yoho yamboleka di’aha wɛ mbotsha wɔma. (2 Khum. 8:11) Koko lo yoho yakoka, ndo la lɔngɛnyi tshɛ, endaka onto lasawola la yɛ mbala la mbala. Lo wedja efula, dikambo sɔ mɛnyaka dia wɛ ndjashaka l’otema ɔtɔi le onto. Lo mɛtɛ, etena kadiayɛ awui w’oma lo Bible kana w’oma l’ekanda ɛmɔtshi, washo ayɛ wayonga paka l’awui weyɛ lo mbadia. Koko dia wɛ tɔtɔmiya dui dimɔtshi, ayonga ɔlɔlɔ wɛ mbediaka washo dia menda onto yema. Naka wɛ ayowendaka l’ɔkɔngɔ wa tshanda mɔtshi, kete dui sɔ ayokokimanyiya dia mɛna woho wayondotsha la ntondo k’awui wadiema.

Naka ɔsɔnyi koshimbaka dia menda onto, kete tohekɔke. Naka wɛ ayohembaka sala dui sɔ, kete wɛ ayoyokoma lo monga la mbekelo ka mendaka onto wonya watɛkɛtayɛ, ndo dui sɔ diayokokimanyiya efula dia wɛ mbeya sawolaka l’anto akina.

Etena kashayɛ sawo. Bible totɛka dia la ntondo ka Yeso tatɛ la Dako diande dia lo Dikona, “[nde] akedia ashu andi le ambeki andi.” (Luka 6:20) Kondja wetshelo oma l’ɛnyɛlɔ kande. Naka wɛ ayanga tɛkɛta la ntondo k’olui w’anto kete endawɔ ndo emala sekɔndɛ mɔtshi ngana la ntondo ka wɛ tatɛ sawo diayɛ. L’ahole efula dui sɔ diayokɔlɔmba dia menda ampokami ayɛ amɔtshi. Wendelo ɔsɔ wa sekɔndɛ ngana tsho koka kokimanyiya dia minya wɔma waki layɛ. Dikambo sɔ diayokimanyiya nto ampokami dia vɔ tatshikitanyaka dionga ndo nsaki yawɔ lo ndjela kɛnɛ kayowɛnaka l’elungi kayɛ. Ndo nto, naka wɛ ayowaendaka, kete wɛ ayowakimanyiyaka dia vɔ mbidjasɛka ki ndo koyelaka la yambalo tshɛ.

Endaka ampokami ayɛ wonya washayɛ sawo diayɛ. Tendake tsho olui w’otondo tshɛ mbala ɔtɔi ko pe. Sala la wolo dia menda onto l’onto. Lo suke l’ahole tshɛ, vɔ nongamɛka di’ɔtɛkɛtshi wa lo sɛkɛ mendaka ampokami lo yɛdikɔ mɔtshi.

Mendaka ampokami ayɛ halembetshiya tsho mbɛwɛwa anto wa l’atshuku tshɛ. Ka onto ɔmɔtshi sso la dilɛmiyɛlɔ tshɛ, ko wɛ mbotɛ tɔtɛkɛta tɔmɔtshi naka kokaka. Oma lâsɔ, ko wɛ ndjênda onto okina, ko mbotɛ towui tɔmɔtshi. Aha wɛ mbika sso edja le onto ɔtɔi atokondoyokana ɔnɛ wɛ la nde la dikambo, ndo aha mendaka paka ampokami angana ato. Endaka ampokami ayɛ tshɛ, koko lam’endayɛ onto ɔmɔtshi, tɛ̂nde tɔtɛkɛta tɔmɔtshi ko wɛ menda elungi kande la ntondo ka wɛ mbeta le onto okina.

Kokitsha nɔtɛ yayɛ lo pipitrɛ kana ndjidja l’atei wa Bible kana ndjikimɛ lo lonya woho wa wɛ mbokaka sso lɔkɔ esadi eto. Ko naka wɛ pombaka kɔlɛ ɔtɛ tshɛ dia menda nɔtɛ yayɛ, kete wɛ ayonga l’okakatanu dia mendanaka l’ampokami. Pombaka mbeya mbala ngana ndo lo tena diakɔna diahombayɛ mboka sso lo nɔtɛ yayɛ. Naka wɛ mboka sso lo nɔtɛ yayɛ etena kamboyokoma lo kondoko ya sawo diayɛ, kete wɛ hatɛna woho wayaoka ampokami, ndo sawo diayɛ diayoshisha yema ya nkudu kadiɔ. Woho akɔ wamɛ mbele naka wɛ ayendaka nɔtɛ yayɛ mbala efula, kete wɛ hatendaka ampokami ayɛ.

Naka wɛ ambokɛ onto mponde, kete wɛ ayenda kana nde ambokiakola. Kanyi tshɛ ya lo sawo diayɛ ekɔ oko wɛ ambokɛ ampokami ponde kɛmɔtshi. Wɛ ayeya di’ampokami wambolongola tokanyi takɔ lo menda woho wayowotsha, vɔ koka kɔlɛ ɛtɛ, mbɔla yema, kana koyela la yambalo tshɛ. Naka wɛ ayendaka ampokami dimɛna, kete dui sɔ diayokokimanyiya dia ndjashikikɛ ɔnɛ vɔ wambolongola tokanyi tayɛ.

Naka wambokosha awui wa mbadia lâdia la ntondo k’etshumanelo, onde wɛ ayohombaka menda ampokami wonya wadiayɛ? Naka ampokami wekɔ lo ndjela wadielo ayɛ lo Bible yawɔ, kete efula l’atei awɔ hawoteya dia kana wɛ ekɔ lo mbaenda kana bu. Koko mendaka ampokami ayɛ koka kokimanyiya dia keketsha wadielo ayɛ nɛ dia wɛ ayɛna woho wayaoka ampokami ayɛ. Le ampokami tshɛ wahakambe la Bible yawɔ ndo wele ondo timba tawɔ tambekɔ l’ahole akina, vɔ mbeyaka ndjokoma lo ndjela awui wadiema, naka ɔtɛkɛtshi ayowaendaka. Wɛ koka menda ampokami ayɛ yema tshitshɛ, koko towaendake lo yoho yakoka ndjokotakanya lo wadielo ayɛ. Lâsɔ, ndeka dimɛna wɛ kimɛ Bible kayɛ l’anya ndo sungukadia ɔtɛ, koko aha kɔlɛ ɔtɛ kɔla.

Mbala efula, dikumanyi nongolaka asawo wa ladia wa tosha lo losanganya lɔmɔtshi la woke. Dia sala dikambo sɔ dimɛna, pombaka onto monga manamana, ndjalɔngɔsɔla dimɛna, ndo pemba mbala efula. Lo mɛtɛ, sawo dia ladia haleke mbisha onto diaaso dia nde mendaka ampokami ande. Koko, naka ɔtɛkɛtshi ndjalɔngɔsɔla dimɛna, kete nde ayokoka mendaka ampokami tena la tena aha la nde mindja lanɛ wamondokoma. Dui sɔ diayowokimanyiya dia kotolaka yambalo y’ampokami ndo mbakimanyiya dia vɔ kondja wahɔ efula oma lo wetshelo wa lo nyuma washama.