TSHAPITA 7

Okitanyiya Wayokokokɛ

NAKA wɛ monga la lotshungɔ la sala kɛnɛ tshɛ kalangayɛ, onde wɛ ayɔngɛnangɛna dikambo sɔ? Onde ekɔ tena dimɔtshi diahayakombola dia kânga onto ɔtɔi kofundɛ kɛnɛ kahombayɛ sala? Ohombutɛ lo mɛtɛ kɛnɛ kakanyiyayɛ.. . .

Ko kakɔna koleki dimɛna le yɛ? Onde ekɔ mɛtɛ dui dia lomba sala oseka dikambo tshɛ dialangayɛ? Kana onde wɛ kondjaka etombelo w’ɔlɔlɔ lam’ongayɛ l’okitanyiya otsha le papa la mama?. . . Nzambi mbutaka dia wɛ pombaka kitanyiya ambutshi ayɛ, ɔnkɔnɛ, ɔkɔkɔ ɔmɔtshi w’oshika wahombayɛ sala dikambo sɔ wekɔ. Tende kana sho koka mbeya ɔkɔkɔ akɔ.

Ɛnɔnyi engana waya layɛ?. . . Onde wɛ mbeyaka ɛnɔnyi engana wele la papa kayɛ?. . . Onde wɛ mbeyaka ɛnɔnyi engana wele la mama kayɛ kana wele la tshɛyɛ ka womoto kana ka pami?. . . Vɔ wambɔsɛna edja efula koleka. Ndo onto lambɔsɛna edja mbeyaka awui efula. Nde mbokaka, mɛnaka ndo salaka awui efula oseka ɔnɔnyi tshɛ. Lâsɔ, ana w’akɛnda koka mbeka akambo oma le epalanga.

Onde wɛ mbeyaka onto ɔmɔtshi lôleyɛ?. . . Onde wɛ mboleka mbeya awui efula?. . . Lande na kôlekiyɛ mbeya awui na?. . . Ele nɛ dia wɛ ambɔsɛna edja. Wɛ akakondja etena k’efula ka mbeka akambo oleki onto leke dikɛnda efula.

Onto akɔna ambɔsɛna edja koleka ndo ndekami kana ndeka anto akina tshɛ?. . . Jehowa Nzambi. Nde toleka mbeya awui. Lam’atotɛnde dia sho sala dikambo tshɛ, sho koka monga l’eshikikelo dia diɔ diekɔ dikambo di’ɔlɔlɔ dia sala oyadi kânga diɔ diekɔ wolo disala. Onde wɛ mbeyaka dia kânga Ombetsha a Woke akɛnyi wolo mbala kɛmɔtshi dia monga l’okitanyiya?. . .

Mbala kɛmɔtshi Nzambi akalɔmbɛ Yeso dia sala dikambo dimɔtshi dia wolo efula. Yeso akɔlɔmbɛ lo kɛnɛ kendana la dikambo diakɔ oko wɛnaso lanɛ. Nde akalɔmbɛ ate: “Naka we nangaka, uminyiya dikoho ne.” Yeso akɛnya oma lo dɔmbɛlɔ diande di’aha nshi tshɛ mbaki wɔdu dia sala lolango laki Nzambi. Ko ngande wakashidiya Yeso dɔmbɛlɔ diande na? Onde wɛ mbeyaka?. . .

Yeso akashidiya dɔmbɛlɔ diakɔ lo mbuta ate: “Kuku aha uku alangami, keli uku alangaye.” (Luka 22:​41, 42) Eelo, nde akalange dia lolango laki Nzambi salema, koko aha lakinde. Ndo Yeso akatetemala ndo akasale kɛnɛ kakalangaka Nzambi lo dihole dia kɛnɛ kakandafɔnyaka ɔnɛ tɔ koleki dimɛna.

Wetshelo akɔna wakokaso kondja oma lo dikambo sɔ na?. . . Sho mbekaka dia ekɔ nshi tshɛ dimɛna sala kɛnɛ kata Nzambi, oyadi tɔ bu wɔdu sala. Koko sho mbekaka dikambo dikina. Onde wɛ mbeyaka dikambo diakɔ?. . . Sho mbekaka dia Nzambi nde la Yeso bu onto ɔtɔi oko wata anto amɔtshi. Jehowa Nzambi mbolɛ Yeso ndo nde mbeyaka awui efula ndeka Yeso y’Ɔnande.

Sho mɛnyaka dia sho mbokaka Nzambi ngandji lo monga l’okitanyiya otsha le nde. Bible mbutaka ɔnɛ: “Ngandji ka Nzambi kene, dia shu nama elembe andi.” (1 Joani 5:⁠3) Lâsɔ wɛ kokaka mboka dia sho tshɛ pombaka monga l’okitanyiya otsha le Nzambi. Shi wɛ nangaka monga l’okitanyiya otsha le nde?. . .

Tofole Bible kaso kele tende kɛnɛ kalɔmba Nzambi ana dia vɔ sala. Totsha mbadia kɛnɛ kata Bible lo Efeso tshapita 6, divɛsa 1, 2 ndo 3. Bible mbutaka ɔnɛ: “Ana, nyukitanyiya ambutshi anyu le Khumadiondjo, osoku mbeli ololo. Olemia sho la nyo (oso keli olembe a ntundu weli la daka loko), dia we mpumo lukulu l’olo, la dia we ndjala la lulumbi la kete.”

Ɔnkɔnɛ, Jehowa Nzambi ndamɛ mbakotɛ dia wɛ monga l’okitanyiya otsha le papa la mama kayɛ. Ko ‘nɛmiya’ papa la mama kɛdikɛdi na? Kɛsɔ nembetshiyaka dia wɛ pombaka mbasha nɛmɔ. Ndo Nzambi ndakaka ate naka wɛ monga l’okitanyiya otsha le ambutshi ayɛ, kete wɛ ayokoka “mpumo lukulu l’olo.”

Hokamɛ kɔkɔndɔlɛ ɔkɔndɔ ɔmɔtshi wendana l’anto amɔtshi wele nsɛnɔ yawɔ yakashimbamɛ nɛ dia vɔ waki l’okitanyiya. Anto asɔ wakasɛnaka lo nshi y’edjedja l’osomba wa woke wa Jerusalɛma. Anto efula wa l’osomba ɔsɔ kompokamɛ kɛnɛ kakataka Nzambi, diakɔ diakewola Yeso anto asɔ ɔnɛ Nzambi ayanga la ndanya osomba awɔ. Yeso akawatɛ nto dia vɔ wayokoka panda naka vɔ nanga kɛnɛ kele ɔlɔlɔ. Nde akate ate: ‘Lam’ayonyɛna alembe wambodinga Jerusalɛma y’otondo, kanyeye dia elanyelo kayɔ kaya suke. Lâsɔ kete etena ka tomba oma la Jerusalɛma ndo ka ndawɔ otsha l’akona kambokoka.’​—⁠Luka 21:​20-22.

Oko wakadite Yeso, alembe wakaye dia ndjɔlɔsha Jerusalɛma. Alembe w’ase Rɔma wakadinge Jerusalɛma y’otondo. Koko, asɔlayi asɔ wakayomɔka l’ɔtɛ wa dikambo dimɔtshi. Anto efula wakafɔnya ɔnɛ wâle waya bu nto. Ɔnkɔnɛ, vɔ wakatshikala l’osomba akɔ. Ko kakɔna kakawatɛ Yeso dia vɔ pombaka kisala na?. . . Kakɔna kotoyosala otondonga ndo wɛ mbakadjasɛka la Jerusalɛma na?. . . Wanɛ waketawɔ mɛtɛ kɛnɛ kakate Yeso wakatshike ngelo yawɔ ndo wakalawɔ otsha l’akona w’anganyi etale la Jerusalɛma.

Ɔnɔnyi w’otondo, ndoko dikambo diakatombe la Jerusalɛma. Ɔnɔnyi wa hende, ndoko dikambo diakatombe. Ndo ɔnɔnyi wa sato, ndoko dikambo diakatombe. Ondo anto amɔtshi wakafɔnya ɔnɛ wanɛ wakalawɔ oma l’osomba wa Jerusalɛma ɔsɔ waki dinginya. Koko l’ɔnɔnyi wa nɛi, alembe w’ase Rɔma wakakawola. Wakadinge nto Jerusalɛma y’otondo. Etena kɛsɔ ndoko onto lakakoke ndawɔ nto. Mbala kɛsɔ, alembe asɔ wakalanya osomba. Efula k’anto waki l’etei k’osomba wakavu ndo wanɛ wakatshikala wakatɔlama lo fumbe.

Ko kakɔna kakakomɛ wanɛ wakakitanyiya ɛtɛkɛta waki Yeso?. . . Vɔ wakashimbamɛ. Vɔ waki etale efula mangana la Jerusalɛma. Diakɔ diakiwɔ kondanyema. Okitanyiya akâkokɛ.

Naka wɛ ekɔ l’okitanyiya, onde okitanyiya akɔ wayokokokɛ wɛ lawɔ?. . . Ambutshi ayɛ mbeyaka koshimba di’aha wɛ kɛnya l’otadimbo. Lande na kakoshimbawɔ dikambo sɔ na?. . . Nɛ dia wɛ koka tɛtama mutuka, mututu kana dikalo. Koko mbala mɔtshi wɛ mbeyaka kanyiya wate: ‘Wonya ɔnɛ ndoko mutuka, mututu kana dikalo diele lo shinga. Lâsɔ dimi hatohomɔ. Kana ɔnɛ ana akina kɛnyaka lo shinga koko dimi talɛnaka vɔ wahomɔ.’

Ngasɔ mbakakanyiyaka anto efula waki la Jerusalɛma. L’ɔkɔngɔ w’alembe w’ase Rɔma wakandinge Jerusalɛma mimɔ, akɛnamaka di’oko osomba ɔsɔ waya bu lo wâle. Anto akina wakatshikala l’osomba. Vɔ konanga ndawɔ l’akona. Wakawaewola, koko vɔ kombidja yimba. Etombelo wakonge ele vɔ wakashisha nsɛnɔ yawɔ.

Tɔshi ɛnyɛlɔ kekina. Onde wɛ ambɔkɛnyaka l’alumɛtɛ lushi lɔmɔtshi?. . . Mbeyaka monga oko kɛnyɔ dia menda woho watomba dja etena kahɛtshayɛ alumɛtɛ. Koko kɛnya l’alumɛtɛ koka monga dikambo dia wâle. Luudu l’otondo koka nongola ndo wɛ koka mvɔ!

Ohɔ dia, kema dimɛna monga l’okitanyiya paka l’etena kɛmɔtshi keto ko pe. Koko naka wɛ mongaka l’okitanyiya nshi tshɛ, kete dikambo sɔ diayokokokɛ mɛtɛ. Ndo onto akɔna ata ate: “Ana, nyukitanyia ambutshi anyu”?. . . Ekɔ Nzambi. Ndo ohɔ dia nde mbutaka dikambo sɔ nɛ dia nde kolangaka.

Kakianɛ adia avɛsa anɛ wɛnya ohomba wa monga l’okitanyiya: Tukedi 23:22; Undaki 12:13; Isaya 48:​17, 18; ndo Kolosai 3:⁠20.

[Osato wa lo lɛkɛ 42]

Lande na kahombayɛ mpokamɛ kɛnɛ kata epalanga w’anto?

[Osato wa lo lɛkɛ 43]

Akokaso mbeka oma lo dɔmbɛlɔ dia Yeso?

[Osato wa lo lɛkɛ 45]

Anto anɛ ngande wakawashimbamɛ lo kitanyiya dui dia Yeso?

[Esato wa lo lɛkɛ 46]

Lande na kahombayɛ monga l’okitanyiya kânga lam’ɛnama di’oko ndoko wâle?