Akambo asɔ tshɛ alembetshiyawɔ?

YESO KRISTO akate ate: ‘L’ekomelo ka dikongɛ nɛ di’akambo,’ ata, ndjala, hemɔ yasambemɛ esadi esadi ndo adidimu wa nkɛtɛ wayonga.​—Mateu 24:1-8; Luka 21:10, 11.

Tatɛ oma l’ɔnɔnyi 1914, anto wekɔ lo ndjakema oma l’ata wa lam’asa wedja ndo wa lam’asa waoho. Mbala efula ata ndjâka oma lo woho wayatambiya ewandji w’ɛtɛmwɛlɔ l’awui wa pɔlitikɛ ndo nshi nyɛ awui wa terɔrismɛ wekɔ lo salema efula.

Kânga mambohama awui wa siansɛ lo kɛnɛ kendana l’otondjelo wa diangɔ dia ndɛ, nkama ya miliyɔ y’anto wekɔ l’ohomba wokome tshɛ wa mbo ya ndɛ l’andja w’otondo. Ɔnɔnyi tshɛ, miliyɔ y’anto mvɔka la ndjala.

Elando wasambemɛ esadi esadi ekɔ etenyi kɛmɔtshi ka djembetelo yakasha Yeso. L’ɔkɔngɔ wa Ta dia Hende di’Andja w’Otondo, hemɔ ka lɔkɔsu kakadiake anto ndekana 21 000 000. Otshikitanyi la hemɔ yakɛnya paka anto wa l’ahole amɔtshi ato pâ, tɔ kakananda wedja wa lo nkɛtɛ k’otondo ndo asɛnga wa lo tale. Ɛlɔ kɛnɛ, anto efula wa l’andja w’otondo waya la SIDA ndo hemɔ yele oko lɔkɔsu la lohombia, malariya, hemɔ kola washo ndo hemɔ ka djɔ yekɔ lo tetemala lo wedja wa wola.

Alapɔlɔ mɛnyaka di’adidimu wa nkɛtɛ nunu akumi wele la wolo wotshikitanyi salemaka ɔnɔnyi tshɛ. Kânga mbele anto wekɔ la dihomɔ ndo la toho t’ɔlɔlɔ ta mbewola anto, mpokoso y’oma l’adidimu wa nkɛtɛ wonga l’ahole wele anto efula mbôleka mbewoyama nshi nyɛ lo tita sango.

Bible akate nto ɔnɛ: “Eyi wati: Lu nshi y’ekumelu, tena dia wulu diayuyala. Antu wayuyalanga, wayulanga ukundji, wayosema, wayutakula, wayotengana, wayutuna aui w’ambutshi, hawukana lusaka, waha ololo. Vo wayuyala waha la ngandji ka mete, akanga w’ududu, amamanyishi, wahayakimela, akanga w’usihi, atunyi w’akambu w’ololo. Vo wayuyala afungi, akanga a puki, akanga a ndjambiya, anangi wa engenongeno, wuleki wa [Nzambi]. Vo wayuyala l’efanelu ka ololo a [Nzambi], keli wayutuna wulu andi. Umo l’atei w’antu aso.”​—2 Timote 3:1-5.

Onde wɛ mbetawɔka dia tekɔ lo nsɛna lo ‘tena dia pâ dia wolo mbikikɛ’?

Onde wɛ ambɛna dia lo yoho yoleki, anto wekɔ lo ndjalanga, nanga falanga, ndo waya la lotamanya?

Shi sho tshɛ mbetawɔka di’andja ɔnɛ wambolola l’anto wele la lokaki, lɔhɛndɛ, anto wahokana ndo wele bu la kɔlamelo?

Onde wɛ mɛnaka di’ana wamboleka monga bu l’okitanyiya le ambutshi awɔ ndo anto waya bu la ngandji, aha tsho l’ahole amɔtshi ato koko l’andja w’otondo?

Aha la tâmu, wɛ mɛnaka dia tekɔ lo nsɛna l’andja wele anto wamboleka ndjala la ngandji k’ɛngɛnɔngɛnɔ koko aha k’akambo w’ɔlɔlɔ. Yoho shɔ mbakɔndɔla Bible waonga wayonga l’anto lo “nshi y’ekumelu.”

Onde tekɔ l’ohomba wa tolembetelo efula dia mbeya nshi yakɔna yeso lo nsɛna nyɛ? Yeso akate nto dia l’etena kakɔ kâmɛ kɛsɔ, lokumu l’ɔlɔlɔ la Diolelo diaki Nzambi layosambishama lo nkɛtɛ k’otondo. (Mateu 24:14) Onde dui sɔ diekɔ lo salema?

Tshoto y’Etangelo, mbut’ate jurunalɛ yalembetshiya awui wa lo Bible yele l’oyango wa mbewoya lokumu l’ɔlɔlɔ la Diolelo diaki Jehowa yekɔ lo tomba mbala la mbala l’ɛtɛkɛta efula oleki tojurunalɛ tokina tatomba mbala la mbala.

Ɔnɔnyi tshɛ, Ɛmɛnyi wa Jehowa mbetshaka miliyara ya wenya dia sambisha anto akina awui wendana la Diolelo diaki Nzambi.

Ekanda walembetshiya Bible wekɔ lo tomba nshi nyɛ l’ɛtɛkɛta oko 400, kânga ɛtɛkɛta watɛkɛtama l’ahole wa tale ndo oma le tolui tatotshitshɛ t’anto. Ɛmɛnyi wa Jehowa wamonanda wedja tshɛ la lokumu l’ɔlɔlɔ; vɔ wambosambisha nto l’asɛnga efula ndo lo bɛtshi dia nkɛtɛ dia totshitshɛ efula diele ase pɔlitikɛ hawodidje ndo yimba. Lo wedja efula, vɔ wekɔ l’ekongelo ka wetshelo wa Bible.

Lo mɛtɛ, lokumu l’ɔlɔlɔ la Diolelo diaki Nzambi lekɔ lo sambishama lo nkɛtɛ k’otondo, oko ɔmɛnyi. Tekɔ lo mbisha anto wa l’ahole tshɛ diaaso dia vɔ mɛnya kana wayonga la dilɛmiɛlɔ otsha le Otungi w’olongo la nkɛtɛ, kana wayɛnya dia vɔ nɛmiyaka ɛlɛmbɛ ande ndo kana wayɛnya anyawɔ anto ngandji kawɔ.​—Luka 10:25-27; Enyelo 4:11.

Kem’edja nto, Diolelo diaki Nzambi diayanga minya awui wa kɔlɔ tshɛ oma la nkɛtɛ ndo kikonya paradiso l’andja w’otondo.​—Luka 23:43.

[Kiombo ya lo lɛkɛ 6]

Nshi y’ekomelo ka na?

Aha nshi y’ekomelo k’anto, nɛ dia Bible mbishaka wanɛ wasala lolango la Nzambi elongamelo ka nsɛna pondjo pondjo.​—Joani 3:16, 36; 1 Joani 2:17.

Aha nshi y’ekomelo ka nkɛtɛ. Ɔtɛkɛta wa Nzambi ndakaka dia nkɛtɛ yodjashi anto nyɛ yayotshikala pondjo pondjo.​—Osambu 37:29; 104:5; Isaya 45:18.

Koko, ɔsɔ ekɔ nshi y’ekomelo ka dikongɛ nɛ di’akambo dioludi l’awui wa ngala ndo diele anto bu la ngandji ndo ɔsɔ ekɔ nto nshi y’ekomelo ka wanɛ wayakimɔ lo ditshelo di’anto wa l’andja ɔnɛ.​—Tukedi 2:21, 22.

[Kiombo/Osato wa lo lɛkɛ 7]

Onde Bible ekɔ mɛtɛ Ɔtɛkɛta wa Nzambi?

Mbala efula, amvutshi wakafunde vate: “Okone mbata [Jehowa].” (Isaya 43:14; Jeremiya 2:2) Kânga Yeso Kristo, Ɔna Nzambi akake epole ɔsɛkɛ dia nde ‘kɔtɛkɛtaka lo wolo ande hita.’ (Joani 14:10) Bible twamɛ mbutaka hwe ɔnɛ: ‘Afundelo tshɛ wakasambiyama oma le Nzambi.’​—2 Timote 3:16.

Atshunda amɔtshi welɛwɔ United Bible Societies (Atshunda wa Bible Wotshumanyi) mbutaka ɔnɛ: Ndoko dibuku dikina diambotomba l’ɛtɛkɛta efula, mbut’ate l’ɛtɛkɛta ndekana 2 200 oko Bible. Ndoko dibuku dikina diambofundama ɛlɔ kɛnɛ ndekana kɔpi miliyara nyɛi. Shi kɛsɔ mbahombayɛ nongamɛ lo kɛnɛ kendana la losango l’oma le Nzambi lendana l’anto tshɛ?

Dia mbeya awui efula wɛnya dia Bible akasambiyama oma le Nzambi, enda lo dibuku La Bible : Parole de Dieu ou des hommes ? diakatondja Ɛmɛnyi wa Jehowa.

Naka wɛ mbadia Bible la lowando tshɛ ndo mbetawɔ dia tɔ mɛtɛ kekɔ Ɔtɛkɛta wa Nzambi, kete wɛ ayokondja wahɔ efula.

[Kiombo/Esato wa lo lɛkɛ 8]

Diolelo diaki Nzambi kɛdikɛdi na?

Diɔ diekɔ lowandji la l’olongo lalɔmbwama oma le Jehowa, Nzambi ka mɛtɛ, Otungi w’olongo la nkɛtɛ.​—Jeremiya 10:10, 12.

Bible shikikɛka dia Yeso Kristo mbakalongola lowandji lɔsɔ oma le Nzambi. (Enyelo 11:15) Lam’akinde la nkɛtɛ, Yeso akɛnya dia nde aki la lowandji la diambo efula lakandalongola oma le Nzambi, lowandji lakawosha wolo wa mbahemɛ diangɔ diakatongama, kɔnɔla weho tshɛ wa hemɔ ndo mbolola anto. (Mateu 9:2-8; Mako 4:37-41; Joani 11:11-44) Prɔfɛsiya kɛmɔtshi ka lo Bible kakasambiyama kakate dia Nzambi ayowosha nto “luwandji, lutumbu, la diulelu dia antu tshe, wedja, la antu w’eteketa tshe [mbokambɛ].” (Danyele 7:13, 14) Lowandji lɔsɔ mbelamɛka ɔnɛ Diolelo dia l’olongo. Ndo oma l’olongo mbalɔmbɔla Yeso Kristo nshi nyɛ.

[Esato wa lo lɛkɛ 7]

Esambishelo ka lokumu l’ɔlɔlɔ l’andja w’otondo