Lande na kahombayɛ ntetemala mbeka?

1. Ɛlɔlɔ akɔna wayoyokondja naka wɛ ntetemala mbeka Bible?

Aha la tâmu, wetshelo w’etatelo wa lo Bible wamboyeka oma lo biukubuku nyɛ wambokeketsha ngandji kokayɛ Jehowa. Wɛ pombaka ntetemala nkeketsha ngandji kɛsɔ. (1 Petero 2:2) Elongamelo kayɛ ka lɔsɛnɔ la pondjo nemanɛka la woho wayoyotetemala ndjasukanya la Nzambi lo mbekaka Ɔtɛkɛta ande.​—Adia Joani 17:3; Jude 21.

Naka wɛ mpama l’ewo kaki Nzambi, kete mbetawɔ kayɛ kayokeketala efula. Mbetawɔ mbayokokimanyiya dia wɛ ngɛnyangɛnya Nzambi. (Heberu 11:1, 6) Tɔ kayokotshutshuya dia wɛ ndjatshumoya ndo nsala etshikitanu wahombama lo yoho yayɛ ya lɔsɛnɔ.​—Adia Etsha 3:19.

2. Ngande wakoka anto akina nkondja wahɔ oma l’ewo kaki Nzambi kamboyokondja?

Ekɔ mɛtɛ dia wɛ ayokombola dia nsambisha anto akina kɛnɛ kamboyeka nɛ dia sho tshɛ ngɛnangɛnaka mbewoya anto akina lokumu l’ɔlɔlɔ. Naka wɛ ntetemala mbeka Bible, kete wɛ ayeya woho wa nkamba la tɔ dia nembetshiya anto akina mbetawɔ kele la yɛ le Jehowa ndo dia nsambisha lokumu l’ɔlɔlɔ.​—Adia Romo 10:13-15.

Anto efula tatɛka nsambisha angɛnyi kana ewotɔ awɔ. Koko paka wɛ nsala dikambo sɔ l’ɔkɔmi. Lo dihole dia mbatɛ dia vɔ wekɔ l’ɔtɛmwɛlɔ wa kashi, tɛwɔ awui wendana l’alaka waki Nzambi. Ndo nto, ohɔ dia mbala efula lɔkɛwɔ layɛ l’ɔlɔlɔ mbayoleka mambiya anto, oleki kɛnɛ kawatɛyɛ.​—Adia 2 Timote 2:24, 25.

3. Diɔtɔnganelo dia ngande diakoka monga lam’asayɛ la Nzambi?

Wekelo w’Ɔtɛkɛta wa Nzambi wayokokimanyiya dia wɛ mpama lo nyuma. Lo nsala ngasɔ, wɛ ayonga la diɔtɔnganelo dia ma ma la Jehowa. Etena kɛsɔ mbayoyokoma onto ɔmɔtshi la lo nkumbo kande.​—Adia 2 Koreto 6:18.

4. Ngande wakokayɛ ntetemala mpama?

Wɛ kokaka ntetemala mpama lo nyuma lo ntetemala mbeka Ɔtɛkɛta wa Nzambi. (Heberu 5:13, 14) Lɔmba Ɔmɛnyi wa Jehowa ɔmɔtshi dia nde kêtshaka Bible l’ekimanyielo ka dibuku Bible etshatɔ mɛtɛ? Lam’ayoyotalekaka mbeya awui wa l’Ɔtɛkɛta wa Nzambi, mbayoyotalekaka ndowanya lɔsɛnɔ layɛ.​—Adia Osambu 1:1-3; 73:27, 28.

Lokumu l’ɔlɔlɔ ndja oma le Jehowa, Nzambi k’ɔngɛnɔngɛnɔ. Wɛ kokaka ndjasukanya la nde, naka wɛ ndeka ndjasukanya l’ekambi ande. (Heberu 10:24, 25) Naka wɛ ntetemala mbidja welo dia ngɛnyangɛnya Jehowa, kete wɛ ayokondja lɔsɛnɔ l’oshika, mbuta ate lɔsɛnɔ la pondjo. Ndjasukanya la Nzambi ekɔ mɛtɛ dui dioleki ohomba diahombayɛ nsala.​—Adia 1 Timote 1:11; 6:19.