Timɔte akalangaka nkimanyiya anto akina

Timɔte aki ɔlɔngɔlɔngɔ wakalangaka nkimanyiya anto akina. Nde akeeteta l’ahole efula dia nkimanyiya anto akina. L’ɔtɛ wa dui sɔ, nde aki la lɔsɛnɔ laki l’oyango wa shikaa. Onde wɛ nangaka mbeya akambo amɔtshi wendana la nde?—

Timɔte akoole l’osomba wa Lustɛra. Etena kakinde eke dikɛnda, Lɔyisɛ la tshɛnde ndo Eyunikɛ wa nyango wakatatɛ mbeetsha akambo wendana la Jehowa. Etena kakayoolaka Timɔte, nde akalangaka nkimanyiya anto akina dia vɔ mbeya akambo wendana la Jehowa.

Etena kakakome Timɔte ɔlɔngɔlɔngɔ, Pɔɔlɔ akɔɔlɔmbɛ dia nde ntshɔ la nde dia tosambisha l’ahole akina. Timɔte akate ate: ‘Eelo.’ Nde aki suke dia ntshɔ dia tokimanyiya anto akina.

Timɔte nde la Pɔɔlɔ wakatshu otsha l’osomba ɔmɔtshi wa la Makɛdɔniya wakawelɛka Tɛsalɔnika. Dia nkoma l’osomba ɔsɔ, vɔ wakahombe munda lɔkɛndɔ l’otale efula ndo oma laasɔ, vɔ tɔtɔ lo waato. Etena kakawakome, vɔ wakakimanyiya anto efula dia mbeya akambo wendana la Jehowa. Koko, anto amɔtshi wakawaoke nkɛlɛ ndo wakayange dia mbasalɛ kɔlɔ. Diakɔ diakamɔ Pɔɔlɔ nde la Timɔte oma l’osomba akɔ ko ntshɔ l’ahole akina.

L’ɔkɔngɔ wa ngɔndɔ mɔtshi, Pɔɔlɔ akalɔmbɛ Timɔte dia nde nkalola nto la Tɛsalɔnika dia teya woho waki anangɛwɔ. Timɔte mɛtɛ akahombe monga la dihonga di’efula dia nkalola l’osomba wa waale ɔsɔ. Koko, nde akatshu nɛ dia nde akayakiyanyaka efula dikambo di’anango waki l’osomba ɔsɔ. Nde akela Pɔɔlɔ nsango y’ɔngɛnɔngɛnɔ. Timɔte akatotana di’anangɛso wa la Tɛsalɔnika wakasalaka kɛnɛ kele ɔlɔlɔ.

Timɔte aketeta kaamɛ la Pɔɔlɔ ɛnɔnyi efula. Pɔɔlɔ akafunde lo diaaso dimɔtshi ate Timɔte mbaki onto loleki dimɛna lakokande ntoma dia tokimanyiya tshumanelo. Timɔte akokaka Jehowa ngandji ndo akalangaka wanyande anto.

Onde wɛ mbokaka anto ngandji ndo nangaka mbakimanyiya dia vɔ mbeka akambo wendana la Jehowa?— Naka wɛ nsala ngasɔ, kete wɛ ayonga l’ɔngɛnɔngɛnɔ ndo la lɔsɛnɔ lele l’oyango oko wakidiɔ le Timɔte.