Nyendɛke le Nzambi dia nyu monga la diwala di’ɔngɛnɔngɛnɔ

Jehowaa Nzambi mbakatonge diwala dia ntondo. Bible totɛka dia nde akatonge womoto la ntondo ndo ‘akɔɔtɔlɛ le pami.’ Ɔngɛnɔngɛnɔ waki la Adama akookonya dia nde mbuta ɔnɛ: ‘Ɔnɛ mɛtɛ ekɔ weka wa weka ami ndo omunyi w’omunyi ami.’ (Etatelu 2:22, 23) Polo ndo ɛlɔ kɛnɛ, Jehowa kombolaka di’atshukanyi monga l’ɔngɛnɔngɛnɔ.

Etena katshukanayɛ, wɛ mbeyaka mfɔnya di’akambo tshɛ wayongaka dimɛna. Koko kɛnɛ kele mɛtɛ ele, kaanga wadi l’omi wanɛ wokana ngandji efula koka monga l’ekakatanu ɛmɔtshi. (1 Kɔrɛtɔ 7:28) Lo biukubuku nyɛ, wɛ ayɛna atɔndɔ wa lo Bible wele, naka wɛ nkamba la wɔ, kete wɛ koka monga l’ɔngɛnɔngɛnɔ lo diwala ndo lo nkumbo kayɛ.​—Osambu 19:8-11.

1 ETAWƆ ƆKƐNDƐ WAKAKOSHA JEHOWA

KƐNƐ KETSHA BIBLE: Omi kele owandji wa nkumbo.​—Ɛfɛsɔ 5:23.

Naka wɛ ekɔ omi, kete eya dia Jehowa nongamɛka dia wɛ nkokɛ wadɛyɛ la ngandji tshɛ. (1 Petero 3:7) Nde akootonge oko okimanyedi ayɛ ndo nde nangaka dia wɛ mbosalɛ akambo la kɛnɛmɔ ndo la ngandji. (Etatelu 2:18) Wɛ pombaka nanga wadɛyɛ efula ndo mbetsha ehomba ande la ntondo ka wayɛ.​—Ɛfɛsɔ 5:25-29.

Naka wɛ ekɔ wadi, kete eya dia Jehowa kɔlɔmbaka dia wɛ monga la dilɛmiɛlɔ di’efula otsha le omɛyɛ ndo mbokimanyiya dia nde nkotsha ɔkɛndɛ ande. (1 Kɔrɛtɔ 11:3; Ɛfɛsɔ 5:33) Wɛ pombaka nsukɛ tɛdikɔ tande ndo nkamba kaamɛ la nde l’otema ɔtɔi. (Kɔlɔsayi 3:18) Naka wɛ nsala ngasɔ, kete wɛ ayonga la nɛmɔ di’efula lo washo w’omɛyɛ ndo wa Jehowa.​—1 Petero 3:1-6.

KƐNƐ KAKOKAYƐ NSALA:

• Mbola olonganyi ayɛ woho wakokayɛ monga omi kana wadi l’oshika. Hokamɛkande la yambalo tshɛ ndo sala kɛnɛ keyɛ l’akoka dia ndjalowanya

• Onga la solo dia lotutsha. Etena k’otale kayeta dia nyu ahende ndjeya woho wa ngɛnyangɛnyana

2 KOTSHAKA NSAKI Y’OLONGANYI AYƐ

KƐNƐ KETSHA BIBLE: Wɛ pombaka ndjakiyanya dia wahɔ w’olonganyi ayɛ. (Filipɛ 2:3, 4) Salɛka olonganyi ayɛ akambo lo yoho yɛnya dia wɛ mbɔɔsaka la nɛmɔ, ndo ohɔka dia Jehowa nɔmbaka ekambi ande dia vɔ monga “la memakana otsha le anto tshɛ.” (2 Timɔte 2:24) “Aui wa wutata watuhumuyaka untu uku yombo. Keli lulimi la kanga yimba mbatôkonoyaka.” Diakɔ diele wɛ pombaka sɔnaka ɛtɛkɛta wa ntondja. (Tukedi 12:18) Nyuma ka Jehowa kayokokimanyiya dia wɛ ntɛkɛta la lotutsha ndo la ngandji.​—Ngalatiya 5:22, 23; Kɔlɔsayi 4:6.

KƐNƐ KAKOKAYƐ NSALA:

• Lɔmba Jehowa ekimanyielo dia wɛ ntetemala monga la wɔlamu ndo la yimba y’ɔlɔlɔ la ntondo ka nkɛtshanya akambo wa weke wɛ l’olonganyi ayɛ

• Kana yimba dimɛna lo kɛnɛ kayoyɔtɛkɛta ndo woho wayoyokitɛkɛta

3 NYOKANAKE YIMBA KAAMƐ

KƐNƐ KETSHA BIBLE: Etena katshukananyu, nyu komaka “demba ɔtɔi” wɛ l’olonganyi ayɛ. (Mateo 19:5).Koko nyekɔ paka anto ahende ndo nyu mbeyaka monga la tokanyi totshikitany Ɔnkɔnɛ, ekɔ ohomba nyu mbeka woho wa monga kaamɛ lo tokanyi ndo lo nsaki yanyu. (Filipɛ 2:2) Kaamɛ ekɔ ohomba efula etena kɔsanyu tɛdikɔ. Bible mbutaka ɔnɛ: “Sangweyu tshe diatushikikalaka uma le ului w’andaki a yimba.” (Tukedi 20:18) Etawɔ di’atɔndɔ wa lo Bible kɔlɔmbɔla etena kɔsayɛ tɛdikɔ kaamɛ l’olonganyi ayɛ.​—Tukedi 8:32, 33.

KƐNƐ KAKOKAYƐ NSALA:

• Kahana l’olonganyi ayɛ nsaki yayɛ, nsango kana tokanyi

• Taakɛtshanyisha kaamɛ l’olonganyi ayɛ la ntondo ka wɛ mbisha daka