Etena katomba mpokoso

Kaanga mbakokanyu nsala la wolo dia monga la diwala ndo la nkumbo k’ɔngɛnɔngɛnɔ, awui wa shashimoya wakoka nyoshishɛ ɔngɛnɔngɛnɔ koka nyokomɛ. (Undaki 9:11) Nzambi tokimanyiyaka la ngandji tshɛ etena kahomanaso l’ekakatanu. Naka wɛ ndjela atɔndɔ wa l’Afundelo wayela anɛ, kete wɛ la nkumbo kayɛ nyayonga l’akoka wa mbikikɛ kaanga ekakatanu woleki wolo.

1 NYOYAƐKƐ LE JEHOWA

KƐNƐ KETSHA BIBLE: “Nyokitsha ekiyanu anyu tshɛ le nde, nɛ dia nde ndjakiyanyaka dikambo dianyu.” (1 Petero 5:7) Nyohɔke nshi tshɛ diaha Nzambi mbele lo kiɔkɔ y’ekakatanu anyu. (Jakɔba 1:13) Naka nyu ndjasukanya la nde, kete nde ayonyokimanyiya lo yoho yoleki dimɛna. (Isaya 41:10) ‘Nyoodihole etema anyu.’​—Osambu 62:8.

Ndo nto, nyu koka nkondja esambelo lo mbadiaka ndo mbekaka Bible lushi tshɛ. Etombelo wayonga la dui sɔ ele, nyayɛna dia Jehowa ekɔ ɔnɛ “latosamba lo asui aso tshɛ.” (2 Kɔrɛtɔ 1:3, 4; Rɔmɔ 15:4) Nde nyolakaka dia nyosha “wɔladi wa Nzambi woleki tokanyi tshɛ.”​—Filipɛ 4:6, 7, 13.

KƐNƐ KAKOKAYƐ NSALA:

• Lɔmba Jehowa ekimanyielo dia wɛ monga la wɔlamu ndo nkana yimba dimɛna

• Sɛdingola ɛsɔnwɛlɔ ayɛ ndo nsɔna woleki dimɛna wakoka kokimanyiya

2 YAKOKƐ WƐMƐ NDO NKOKƐ NKUMBO KAYƐ

KƐNƐ KETSHA BIBLE: “Utema a kanga yimba atukundjaka ewu, ndu tui dia kanga yimba atukundjaka ewu.” (Tukedi 18:15) Sɛdingola akambo tshɛ ndo ehomba w’ase nkumbo kayɛ. Sawolaka la wɔ ndo hokamɛkawɔ.—Tukedi 20:5.

Ko kayotota naka lakiyɛ ɔmɔtshi la ngandji ambovɔ? Tookake wɔma dia ndela. Ohɔ dia kaanga Yeso “akalele.” (Joani 11:35; Undaki 3:4) Ekɔ ohomba wɛ momuyaka efula ndo ndalaka dimɛna. (Undaki 4:6) Kɛsɔ ayokokimanyiya dia wɛ ntondoya ɔkɛi wele la yɛ.

KƐNƐ KAKOKAYƐ NSALA:

• La ntondo k’okakatanu ndjotomba, onga la mbekelo ka sawolaka l’ase nkumbo kayɛ. Etena katomba dui dimɔtshi, vɔ wayonga suke dia nsawola la yɛ

• Sawola l’anto akina wambohomanaka l’okakatanu akɔ waamɛ

3 YANGA EKIMANYIELO KEYƐ L’OHOMBA

KƐNƐ KETSHA BIBLE: “Ongenyi atukaka untu ngandji tena tshe. Ndu lu nshi ya pa ndi atuyalaka uku onangu.” (Tukedi 17:17) Mbeyaka monga ko asekayɛ nangaka kokimanyiya, koko haweye kɛnɛ kahombawɔ nsala. Teengengake dia mbatɛ kɛnɛ keyɛ l’ohomba. (Tukedi 12:25) Ndo nto, yanga ekimanyielo ka lo nyuma oma le wanɛ washihodia Bible dimɛna. Ekimanyielo k’oma lo Bible kayowokosha kayokokimanyiya efula.​—Jakɔba 5:14.

Wɛ ayokondja osukɔ weyɛ l’ohomba etena kayoyosanganaka mbala la mbala kaamɛ l’anto akina wele la mbetawɔ le Nzambi ndo wayaɛkɛ lo alaka ande. Ndo nto, wɛ ayokeketshama efula etena kayoyokimanyiyaka anto akina wele l’ohomba w’ekeketshelo. Tɛkawɔ awui wendana la mbetawɔ kele la yɛ le Jehowa ndo l’alaka ande. Ongaka suke dia nkimanyiya anto wele lo dihombo, toyanganyake la wanɛ wakoka ngandji ndo wayakiyanya dikambo diayɛ.​—Tukedi 18:1; 1 Kɔrɛtɔ 15:58.

KƐNƐ KAKOKAYƐ NSALA:

• Tɛ ɔngɛnyi ayɛ wɛkɛyɛ otema okakatanu ayɛ ndo etawɔ dia nde kokimanyiya

• Sembɔ tɔɔ lo dikambo ndo tɛnde kɛnɛ keyɛ l’ohomba