TSHAPITA 23
Yeso ambosala awui wa diambo la Kapɛrnauma
MATEO 8:14-17 MAKƆ 1:21-34 LUKA 4:31-41
YESO AMBOTONDJA ƆDIƐNGƐ
OKILO WA PETERO WA WOMOTO AMBƆKƆNƆ
Yeso ambelɛ ambeki anɛi, mbuta ate Petero, Andɛlɛ, Jakɔba la Joani dia monga amundji w’anto. Kakianɛ, lushi la Sabato, wambotshɔ vɔ tshɛ lo shinangɔnga ka la Kapɛrnauma. Yeso ambotatɛ mbetsha lo shinangɔnga, ndo mbala kɛnɛ nto anto wambamba efula lo yoho yande ya mbetsha. Nde aketshaka oko onto lele la lowandji koko aha oko afundji.
Lushi la Sabato lɔsɔ, pami kaki l’ɔdiɛngɛ akikɔ lawɔ. Lo shinangɔnga, pami kɛsɔ akate la dui dia wolo ate: “Kasaso la yɛ na, Yeso y’ose Nazarɛtɛ? Onde wɛ amboya dia ndjotolanya? Dimi mbeyaka mɛtɛ eeyɛ, wɛ l’Ekila laki Nzambi!” Yeso akahangwɛ ɔdiɛngɛ wakahema pami kɛsɔ ate: “Ɔlama ndo tomba oma le nde!”—Makɔ 1:24, 25.
Ko ɔdiɛngɛ wa kɔlɔ ɔsɔ akakɔsha pami kɛsɔ la nkɛtɛ ndo akade ekoko la wolo ande tshɛ. Ko ɔdiɛngɛ akatombe oma le pami kɛsɔ “aha la mbosalɛ kɔlɔ.” (Luka 4:35) Anto waki suke la pami kɛsɔ lo shinangɔnga wakatshikala enyɔ hwe la diambo! Vɔ wakambola ɔnɛ: “Diakɔna nɛ? Nde mbidjangɛka kaanga ɛdiɛngɛ la lowandji tshɛ ko vɔ mbokitanyiyaka!” (Makɔ 1:27) Aha la taamu, nkumu yendana la dui dia diambo sɔ yakahandjɔnɛ lo Ngalileya k’otondo.
Yeso l’ambeki ande wakamɔ oma lo shinangɔnga, ko wakatshu otsha laka Simɔna Petero. Lɛkɔ okilo wa womoto waki Petero aki la demba dja dia wolo. Vɔ wakasɛngasɛnga Yeso dia nde mbokimanyiya. Ko Yeso akatshu otsha le nde, akokimɛ lo lonya ndo akawetola. Ko wonya akɔ nde akakɔnɔ ndo akatatɛ kambɛ Yeso la ambeki ande, ondo lo mbakatɛ yangɔ ya ndɛ.
La dikɔlɔ di’otsho, anto w’oma lo ahole tshɛ wakaye lo luudu la Petero l’anto awɔ waki la hemɔ. Kem’edja akɛnama oko osomba w’otondo wakatshumana la soko. Lande na? Vɔ wakayangaka ɛkɔnwɛlɔ. Lo mɛtɛ, ‘wanɛ tshɛ waki l’ɛkɔnyi wa weho la weho wakaye la wɔ le nde. Yeso akaakɔnɔla lo mbahɛ onto l’onto anya.’ (Luka 4:40) Eelo, oyadi weho akɔna wa hemɔ yaki la wɔ, Yeso akaakimanyiya oko akadiatama la ntondo. (Isaya 53:4) Nde akakome polo ndo lo ntondja ɛdiɛngɛ. Etena kakatombaka ɛdiɛngɛ, vɔ wakataka la dui dia wolo ɔnɛ: “Wɛ ekɔ Ɔna Nzambi.” (Luka 4:41) Koko, Yeso akaahangwɛka ndo nde kombetawɔ dia vɔ ntɛkɛta. Vɔ wakeyaka dia Yeso kele Kristo, ndo nde konanga dia ɛdiɛngɛ mɛnya dia vɔ wekɔ lo kambɛ Nzambi ka mɛtɛ.