Ekambi wa lokumu l’ɔlɔlɔ

JEHOWA akatosha ɛnyɛlɔ ka kokele ka ndjela, mbuta ate Ɔnande Yeso Kristo. (1 Pe. 2:21) Etena kakoma onto tshɛ ombeki wa Yeso, onto ɔsɔ sambishaka lokumu l’ɔlɔlɔ oko okambi wa Nzambi. Dia mɛnya dia olimu ɔsɔ mbishaka ekeketshelo ka lo nyuma, Yeso akate ate: “Nyoye le mi, nyu wanɛ tshɛ wele la paa ndo wele la wetsho, ko dimi layonyokeketsha. Nyɛmbɛ osembe ami ndo nyeke akambo oma le mi, nɛ dia dimi lekɔ la memakana ndo la otema w’okitshakitsha, ko nyu nyayoyakondjɛ ekeketshelo.” (Mat. 11:28, 29) Daka diaki Yeso sɔ diekɔ lo kotshama le wanɛ tshɛ waketawɔ leeta lande lɔsɔ.

² Oko wende Okambi wa Nzambi Woleki tshɛ, Yeso akete anto amɔtshi dia monga ambeki ande. (Mat. 9:9; Jni. 1:43) Nde akawasha olowanyelo wendana l’esambishelo ndo akaatome dia tokamba woho w’olimu wakandakambaka. (Mat. 10:1–11:1; 20:28; Luka 4:43) L’ɔkɔngɔ diko, nde akatome ambeki 70 akina dia tewoya lokumu l’ɔlɔlɔ la Diolelo diaki Nzambi. (Luka 10:1, 8-11) Lam’akatome Yeso ambeki ande, nde akawatɛ ate: “Onto tshɛ lanyohokamɛ, ambompokamɛ ndo dimi. Ndo nto, onto tshɛ lantona, ambotona ndo Ɔnɛ lakantome.” (Luka 10:16) Ngasɔ mbakadje Yeso dikako vɔlɛ lo ɔkɛndɛ wa woke wakalongola ambeki ande. Vɔ wakahombe monga enyimpala wa Yeso ndo wa Nzambi Kaheme-Tshɛ! Ngasɔ mbahombadiɔ monga ndo lo nshi yaso nyɛ le wanɛ tshɛ wayetawɔ leeta laki Yeso l’ɔnɛ: “Yaka, ondjele.” (Luka 18:22; 2 Kɔr. 2:17) Anto tshɛ wetawɔ leeta lɔnɛ nongolaka ɔkɛndɛ w’oma le Nzambi wa nsambisha lokumu l’ɔlɔlɔ la Diolelo ndo mbetɛ anto ambeki.​—Mat. 24:14; 28:19, 20.

³ Oko wakatetawɔ leeta laki Yeso la mboyela, tambokondja diɛsɛ dia ‘mbeya’ Jehowa Nzambi ndo Yeso Kristo. (Jni. 17:3) Tambetshama mboka ya Jehowa. Oma lo ekimanyielo kande, tambonga la akoka wa monga la timba t’eyoyo, ndɔta lonto l’oyoyo, ndo mbɔtɔnganyiya lɔkɛwɔ laso la ɛlɛmbɛ wa Jehowa wosembwe. (Rɔmɔ 12:1, 2; Ɛf. 4:22-24; Kɔl. 3:9, 10) Lowando laso l’oma k’ɛse otema akatotshutshuya dia nkimɔ nsɛnɔ yaso le Jehowa ndo mɛnya dui sɔ lo batisimu ka lo ashi. Lo batisimu, sho komaka ekambi.

⁴ Tatohɛke pondjo dia sho pombaka nkamba olimu wa Nzambi l’anya waha l’onongo ndo la otema wa pudipudi. (Os. 24:3, 4; Isa. 52:11; 2 Kɔr. 6:14–7:1) Diɛsɛ oma lo mbetawɔ kele la so le Yeso Kristo mbeso la nkum’otema ka pudipudi. (Hɛb. 10:19-23, 35, 36; Ɛny. 7:9, 10, 14) Ɔpɔstɔlɔ Pɔɔlɔ akalɔmbɛ Akristo dia nsala dui tshɛ dikambo dia lotombo la Nzambi lo yoho yaha ntakanya anto akina. Ɔpɔstɔlɔ Petero nde la wɔ akɛnya dia lɔkɛwɔ la dimɛna lasha ɛnyɛlɔ k’ɔlɔlɔ koka nkotola wanɛ wele bu ambetawudi l’akambo wa mɛtɛ. (1 Kɔr. 10:31, 33; 1 Pe. 3:1) Ngande wakokayɛ nkimanyiya onto dia nde nkotsha kɛnɛ kalɔmbama dia nkoma okambi wa lokumu l’ɔlɔlɔ?

APANDJUDI W’EYOYO

⁵ Kam’atatɛyɛ mbeka l’onto Bible, keketshande dia nde mbewoyaka anto akina kɛnɛ kekande. Nde koka nsala dikambo sɔ lo tshakitudi la ase nkumbo kande, angɛnyi ande, asekande wa l’olimu ndo anto akina. Ɔsɔ ekɔ nna di’ohomba efula etena ketshaso eyoyo dia monga ambeki wa Yeso Kristo oko ekambi wa lokumu l’ɔlɔlɔ. (Mat. 9:9; Luka 6:40) Etena kahama oyoyo lo nyuma ndo kongande la diewo l’esambishelo ka lo tshakitudi, aha la taamu nde ayɛnya nsaki ka ntatɛ nsambisha.

KƐNƐ KALƆMBAMA

⁶ La ntondo ka nɔmba onto dia nde ntomba l’esambishelo ka lo luudu la luudu mbala ka ntondo, wɛ pombaka ndjashikikɛ dia nde kotshaka awui amɔtshi walɔmbama. Naka onto otomba la so l’olimu w’esambishelo, kete nde ɛnya lo sɛkɛ dia nde aya kaamɛ l’Ɛmɛnyi wa Jehowa. Diakɔ diele, pombaka nde monga onto lamboshilaka la mbɔtɔnganyiya lɔsɛnɔ lande la atɔndɔ wa Jehowa wosembwe ndo nde koka monga opandjudi wahatabatizama.

⁷ Lam’atayeke l’onto ndo wakɛtshanyayɛ la nde atɔndɔ wa lo Bible, wɛ ayeya awui ande efula. Ondo wɛmɛ mbeyaka mɛna dia kana nde ekɔ lo nsɛna lo yoho yɔtɔnɛ la kɛnɛ kekande. Koko ekɔ awui amɔtshi wa lo lɔsɛnɔ l’ombeki wa Bible wahomba dikumanyi nkɛtshanya la nyu nyu ahende.

⁸ Ɔnɔmbɔdi w’olui wa dikumanyi ayosala dia dikumanyi pende (ɔmɔtshi oma lo kɔmite k’olimu) nsawola akambo asɔ vɔ la yɛ ndo la ombeki wa Bible. Lo tshumanelo diele dikumanyi bu efula, ekumanyi la okambi wakimanyiya wele l’akoka koka nsala dui sɔ. Anangɛso wayɔsɔnama pombaka nsala la wolo dia nsala ɔkɛtshanyelo ɔsɔ aha la ntshimbatshimba. Ɔnkɔnɛ, naka vɔ wambeya nsaki kele l’ombeki lo losanganya lɔmɔtshi la l’etshumanelo, vɔ mbeyaka nsala dia nsawola la yɛ ndo l’ombeki ayɛ l’ɔkɔngɔ wa losanganya. Ɔkɛtshanyelo akɔ pombaka salema la lɔngɛnyi tshɛ. La ntondo k’ombeki mbetawɔma oko opandjudi wahatabatizama, pombaka mbeya dia kana nde kotshaka akambo wayela anɛ:

1. (1) Nde mbetawɔka dia Bible kekɔ Ɔtɛkɛta wa Nzambi wakasambiyama.​—2 Tim. 3:16.

2. (2) Nde mbeyaka ndo mbetawɔka wetshelo w’etatelo wa l’Afundelo woho ɔnɛ wele etena kawokawɔ ambola, nde ayokadimola lo ndjela kɛnɛ kata Bible koko aha lo ndjela wetshelo w’ɛtɛmwɛlɔ wa kashi kana tokanyi tande hita.​—Mat. 7:21-23; 2 Tim. 2:15.

3. (3) Nde kitanyiyaka didjango dia lo Bible diata dia sanganaka l’ekambi wa Jehowa lo nsanganya ya l’etshumanelo naka nde ekɔ l’akoka wa nsala dui sɔ.​—Os. 122:1; Hɛb. 10:24, 25.

4. (4) Nde mbeyaka kɛnɛ ketsha Bible lo dikambo di’awui wa mindo wa dieyanelo, mbidja ndo loseka, ɔsɛngɛ, dieyanelo dia lam’asa pami la pami kana womoto la womoto, ndo nde ekɔ lo nsɛna lo yoho yɔtɔnɛ la wetshelo ɔsɔ. Naka nde mbidjasɛ l’olonganyi, vɔ ahende pombaka tshukana lo yoho yetawɔma l’ɛlɛmbɛ.​—Mat. 19:9; 1 Kɔr. 6:9, 10; 1 Tim. 3:2, 12; Hɛb. 13:4.

5. (5) Nde kitanyiyaka ɔlɛmbɛ wa lo Bible washimba wodjwelo wa wanu ndo nde hanɔ ekanga tshɛ wadjoya kana didjoyadjoya diele wolo onto ntshika, aha la dikimɔ di’enganga.​—2 Kɔr. 7:1; Ɛf. 5:18; 1 Pe. 4:3, 4.

6. (6) Nde mɛnaka ohomba wa mbewɔ lɔngɛnyi la kɔlɔ.​—1 Kɔr. 15:33.

7. (7) Nde ambohembola lo pondjo diɔtɔnganelo tshɛ l’ɛtɛmwɛlɔ wa kashi tshɛ wakinde ntondo. Nde hayɔtɔ lo nsanganya yawɔ, hayoyatambiya lo awui awɔ kana mbasukɛ.​—2 Kɔr. 6:14-18; Ɛny. 18:4.

8. (8) Nde hayatambiya kaanga yema lo awui wa pɔlitikɛ wa l’andja ɔnɛ.​—Jni. 6:15; 15:19; Jak. 1:27.

9. (9) Nde mbetawɔka ndo sɛnaka lo yoho yɔtɔnɛ la Isaya 2:4 lo dikambo dia awui wa wedja.

10. (10) Nde nangaka mɛtɛ monga Ɔmɛnyi wa Jehowa.​—Os. 110:3.

⁹ Naka dikumanyi hawɛnyi wɛma lo woho wayaoka ombeki lo dui dimɔtshi l’awui anɛ, vɔ mbeyaka mbombola, ondo lo nkamba l’avɛsa woshilami lanɛ. Ekɔ ohomba di’ombeki nshihodia ɔnɛ wanɛ watomba la Ɛmɛnyi wa Jehowa l’olimu awɔ w’esambishelo pombaka nsɛna lɔsɛnɔ lɔtɔnɛ l’awui walɔmba Afundelo. Kɛnɛ katande ayokimanyiya dikumanyi dia nshikikɛ kana nde mbeyaka kɛnɛ kalongamɛwɔ le nde ndo kana nde kotshaka kɛnɛ kalɔmbama lo yoho yakoka dia nde ntatɛ nsambisha.

¹⁰ Naka nde kotshaka kɛnɛ kalɔmbama, kete dikumanyi pombaka mbewoya ombeki dui sɔ aha la ntshimbatshimba. Mbala efula, dui sɔ koka salema l’ekomelo k’ɔkɛtshanyelo. Naka nde kotshaka kɛnɛ kalɔmbama, kete dikumanyi kokaka mboyayola la wangasanu tshɛ oko opandjudi. (Rɔmɔ 15:7) Pombaka mbokeketsha dia nde ntatɛ ntomba l’esambishelo aha la ntshimbatshimba ndo nkimɔ alapɔlɔ ande w’olimu l’ekomelo ka ngɔndɔ. Dikumanyi koka mbolembetshiya dia naka ombeki wa Bible ambokotsha kɛnɛ kahombama dia monga opandjudi wahatabatizama ndo ambokimɔ alapɔlɔ ande w’olimu mbala ka ntondo, kete wayowosalɛ Fishi k’olimu w’opandjudi wa lo etshumanelo ndo wayomba fishi kakɔ lo dɔsiye di’etshumanelo. Dikumanyi mbɔsaka awui w’oma lo fishi kɛsɔ dia nkimanyiya okongamelo dia mbeya woho wakambema elimu wa lo nyuma w’Ɛmɛnyi wa Jehowa wa l’andja w’otondo ndo dia opandjudi ndjasha l’awui wa lo nyuma ndo nongola ekimanyielo ka lo nyuma. Laadiko dia laasɔ, dikumanyi koka mbohola apandjudi w’eyoyo dia sho kambaka l’awui tshɛ wendana l’onto ndamɛ lo ndjela Ɛlɛmbɛ wendana l’awui wa sheke w’Ɛmɛnyi wa Jehowa l’andja w’otondo, watanema lo jw.org.

¹¹ Naka sho nyanga dia mbekesanɛ dimɛna la opandjudi w’oyoyo ndo ndjasha lo kɛnɛ kasalande, kete kɛsɔ koka nkeketsha onto akɔ. Kɛsɔ koka mbookeketsha dia nde kimɔka alapɔlɔ w’olimu mbala la mbala ndo nde nyomoleka mbidja welo dia kambɛ Jehowa.​—Flpɛ. 2:4; Hɛb. 13:2.

¹² Kam’ɛna dikumanyi dia ombeki wa Bible ambokotsha kɛnɛ kalɔmbama dia nsambisha, nde koka nongola dibuku Tamboyakongɛ dia nsala lolango la Jehowa. L’ɔkɔngɔ wa nde nkimɔ alapɔlɔ ande w’esambishelo mbala ka ntondo, diewoyelo dia lo tshena pe diayoshama l’etshumanelo ɔnɛ nde aya opandjudi wahatabatizama.

TOKIMANYIYA AKƐNDA

¹³ Ana w’akɛnda vɔ lawɔ koka nkotsha kɛnɛ kalɔmbama dia nkoma apandjudi wa lokumu l’ɔlɔlɔ. Yeso akalongola ana w’akɛnda ndo akaatshɔkɔla. (Mat. 19:13-15; 21:15, 16) Kaanga mbele ntondotondo ambutshi mbele la ɔkɛndɛ w’anawɔ, anto akina wa l’etshumanelo koka nyanga dia nkimanyiya ana w’akɛnda wakombola l’otema ɔtɔi dia nsambisha lokumu l’ɔlɔlɔ la Diolelo. Naka wɛ ekɔ ombutshi, kete ɛnyɛlɔ k’ɔlɔlɔ kawashayɛ l’olimu w’esambishelo ayoleka nkeketsha anayɛ dia vɔ monga l’ohetoheto l’olimu wa Nzambi. Naka ɔna lele la lɔkɛwɔ lasha ɛnyɛlɔ k’ɔlɔlɔ ambotshutshuyama oma k’ɛse otema ande dia mbewoya anto akina akambo wendana la mbetawɔ kande, ahomba salema nto dia mbookimanyiya na?

¹⁴ Ayonga dimɛna dia papa kana mama kande mbewoya ekumanyi kɛmɔtshi ka lo Kɔmite k’olimu ka l’etshumanelo dia nkɛtshanya la nde dia nshikikɛ kana ɔnakɔ kotshaka kɛnɛ kalɔmbama dia monga opandjudi. Ɔnɔmbɔdi w’olui wa dikumanyi ayosala dia dikumanyi pende (ɔmɔtshi oma lo kɔmite k’olimu) nsangana la ɔna la ombutshi (ambutshi) ande wele ombetawudi kana ɔnɛ lawodia. Naka ɔna mbeyaka wetshelo w’etatelo w’akambo wa mɛtɛ wa lo Bible ndo mɛnyaka dia nde nangaka nsambisha, dui sɔ ayɛnya dia nde ambohama dimɛna. L’ɔkɔngɔ wa vɔ nsɛdingola awui anɛ ndo awui akina wele oko wanɛ walɔmbama le epalanga, dikumanyi pende sɔ koka nshikikɛ kana kokaka mbetawɔ ɔnakɔ oko opandjudi wahatabatizama. (Luka 6:45; Rɔmɔ 10:10) Etena kasanganawɔ l’ɔna dikɛnda, bu ohomba nkɛtshanya la nde awui amɔtshi wendana paka l’opalanga koko mɛnamaka dia hawendana l’ɔna dikɛnda.

¹⁵ L’etena k’ɔkɛtshanyelo, dikumanyi pombaka mandola ɔna lo ehamelo wamondosala ndo mbokeketsha dia nde monga l’oyango wa batizama. Lam’ele aha la taamu ambutshi wakasale kɛnɛ tshɛ kakokawɔ nsala dia mbetsha ɔna akambo wa mɛtɛ, vɔ la wɔ nto kokaka mandɔma. Dia nkimanyiya ambutshi dia vɔ nyomoleka nkimanyiya ɔnawɔ, dikumanyi wayowatoma lo “Diewoyelo le ambutshi wele Akristo,” diele lo lɛkɛ 179-181.

NDJAKIMƆ NDO BATISIMU

¹⁶ Naka wɛ ambokondja ewo ka mɛtɛ ndo ambɛnya ngandji kokayɛ Jehowa lo mbɔtɔnganyiya lɔsɛnɔ layɛ la kɛnɛ kalɔmba Nzambi ndo ekɔ lo nsambisha, kete wɛ pombaka nyomokeketsha diɔtɔnganelo diasayɛ la nde. Lo woho akɔna? Lo nkimɔ lɔsɛnɔ layɛ le nde ndo mɛnya dui sɔ lo batisimu ka lo ashi.​—Mat. 28:19, 20.

¹⁷ Ndjakimɔ kɛdikɛdi ndjakitsha laande dikambo di’olimu w’ekila. Ndjakimɔ le Nzambi nembetshiyaka nsala dɔmbɛlɔ otsha le nde ndo mbidja dɔkɔlɔkɔ dia nkamba la lɔsɛnɔ layɛ l’olimu ande ndo nkɛndakɛnda lo mboka yande. Dui sɔ nembetshiyaka dia mbomamema paka ndamɛ pondjo pondjo. (Eoh. 5:9) Ɔsɔ ekɔ dui di’onto ndamɛ, diasalema lo woshɛshɛ. Ndooko onto okina lakoka nsala dui sɔ lo dihole diayɛ.

¹⁸ Koko, ekɔ awui akina wahombayɛ nsala laadiko dia wɛ mbutɛ Jehowa lo woshɛshɛ wate wɛ nangaka monga onto lakinde. Wɛ pombaka mɛnya anto akina dia wɛ amboyakimɔ le Nzambi. Dia vɔ mbeya dikambo sɔ, wɛ pombaka batizama lo ashi oko wakasale Yeso. (1 Pe. 2:21; 3:21) Naka wɛ ambɔsa yɛdikɔ ya kambɛ Jehowa ndo ambolanga batizama, ahombayɛ nsala na? Wɛ pombaka mbewoya ɔnɔmbɔdi w’olui wa dikumanyi. Nde ayosala dia dikumanyi dimɔtshi nsawola la yɛ dia nshikikɛ kana wɛ kotshaka kɛnɛ kalɔmba Nzambi dia batizama. Dia wɛ mbeya awui akina, lam’alangayɛ vusola “Diewoyelo le opandjudi wahatabatizama,” diele lo lɛkɛ 182-184 la dibuku nɛ, ndo “Ambola wendana la wanɛ walanga batizama,” wele lo lɛkɛ 185-207.

ALAPƆLƆ WA OHAMELO W’OLIMU W’ESAMBISHELO

¹⁹ Aya ɛnɔnyi efula wele alapɔlɔ wɛnya ohamelo w’ɔtɛmwɛlɔ wa pudipudi l’andja w’otondo okongaka kiɔkɔ y’ekeketshelo k’oshika le ekambi wa Jehowa. Ntatɛ oma lo etena kakatɛ Yeso Kristo ambeki ande ntondo dia lokumu l’ɔlɔlɔ layosambishama lo nkɛtɛ k’otondo, Akristo wa mɛtɛ ndjashaka efula dia mbeya woho watakambema olimu ɔsɔ.​—Mat. 28:19, 20; Makɔ 13:10; Ets. 1:8.

²⁰ Ambeki wa Yeso wa ntondo wakangɛnangɛnaka mboka alapɔlɔ w’awui w’amɛna weta l’esambishelo. (Makɔ 6:30) Dibuku dia lo Bible di’Etsha totɛka di’anto oko 120 waki etena kakatshulɔma nyuma k’ekila le ambeki lushi la Pɛntɛkɔsta ka lo 33 T.D. Kombeta edja, lofulo l’ambeki lakakome ambeki oko 3 000, ko oma laasɔ oko 5 000. Alapɔlɔ wakashama dia “Jehowa akatetemalaka mbakotshɛ lushi la lushi wanɛ wakashimbamɛka” ndo ɔnɛ “olui a woke w’ɛlɔmbɛdi wakakome ambetawudi.” (Ets. 1:15; 2:5-11, 41, 47; 4:4; 6:7) Nsango y’ohamelo shɔ yakahombe mɛtɛ nkeketsha ambeki! Alapɔlɔ ɛsɔ w’ɔngɛnɔngɛnɔ wakahombe mɛtɛ mbaatshutshuya dia nyomoleka mbidja welo dia nkotsha ɔkɛndɛ wakawasha Nzambi kaanga mbaki ɔhɛnyɔhɛnyɔ w’efula wakatombaka oma le ewandji w’ɔtɛmwɛlɔ w’ase Juda!

²¹ Oya lo ɔnɔnyi 60-61 T.D., Pɔɔlɔ akate lo mukanda wakandafundɛ ase Kɔlɔsayi dia lokumu l’ɔlɔlɔ ‘lekɔ lo ntɔ elowa ndo lekɔ lo mpama l’andja w’otondo’ ndo “lakasambishama lo etongelo tshɛ kele l’ɛse olongo.” (Kɔl. 1:5, 6, 23) Akristo wa ntondo wakakitanyiya Ɔtɛkɛta ndo nyuma k’ekila akawasha wolo wa nkamba olimu wa diambo w’esambishelo la ntondo k’ekomelo ka dikongɛ di’akambo di’ase Juda lo 70 T.D. Aki mɛtɛ ekeketshelo le Akristo asɔ wa kɔlamelo dia mboka alapɔlɔ w’etombelo w’olimu awɔ!

²² Woho akɔ waamɛ mbele, okongamelo wa Jehowa wa nshi nyɛ salaka la wolo dia mbeya alapɔlɔ w’olimu wakambema dia nkotsha Mateo 24:14, divɛsa diata ɔnɛ: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.” Oko weso ekambi wa Nzambi wakayakimɔ le nde, tekɔ l’olimu wahombaso nkamba la shamanya. Sho pombaka ndjasha dia mbeya kana olimu akɔ wambokambema dimɛna la ntondo k’ekomelo ndja. Jehowa mbayɛna dia olimu akɔ amboshila ndo naka sho nkamba olimu akɔ, kete tayetawɔma le Jehowa.​—Ɛzk. 3:18-21.

ALAPƆLƆ AYƐ W’OLIMU W’ESAMBISHELO

²³ Awui akɔna wahombaso mɛtɛ mfunda lo alapɔlɔ? Dikatshi dia Alapɔlɔ w’olimu diakatondja okongamelo mɛnyaka awui wahomba fundama. Koko ondo awui wayela anɛ wendana l’anto tshɛ wayokokimanyiya.

²⁴ Lo ɔnɔngɔ wata ɔnɛ: “Ekanda wakatasha anto (wa l’akatshi ndo wa l’Ɛtɛrnɛtɛ),” funda lofulo tshɛ l’ekanda, mbuta ate ekanda tshɛ wa l’akatshi kana wa l’Ɛtɛrnɛtɛ wakayasha anto wele bu Ɛmɛnyi wa Jehowa. Lo ɔnɔngɔ wata ɔnɛ: “Tovidɛo takatɛnya anto,” funda lofulo la mbala lakayɛnya anto vidɛo yaso mɔtshi l’olimu w’esambishelo.

²⁵ Lo ɔnɔngɔ wa “Wendelo w’eyoyo,” funda lofulo tshɛ la wendelo wakayasale l’oyango wa nyomoleka nomialomia nsaki kakɛnya onto ɔmɔtshi lele bu Ɔmɛnyi wambobatizama. Wendelo w’oyoyo koka salema lo nkalola tenda onto, lo mbofundɛ mukanda, lo mbelɛ lo telefɔnɛ, lo mbotomɛ mesajɛ kana lo mbotshikɛ okanda ɔmɔtshi. Mbala tshɛ kalɔmbɔlayɛ wekelo wa Bible, wɛ koka mbadia wendelo w’oyoyo. Ombutshi mbeyaka mbadia wendelo w’oyoyo ɔtɔi lomingu tshɛ etena kalɔmbɔlande ɔtɛmwɛlɔ wa lo nkumbo wele ndo la ɔna ɔmɔtshi lele atabatizama.

²⁶ Kaanga mbele mbala efula wekelo wa Bible nɔmbɔmaka lomingu tshɛ, pombaka mbadia oko ombeki ɔtɔi lo ngɔndɔ. Apandjudi pombaka mfunda lofulo la ambeki wa Bible wotshikitanyi wakawalɔmbɔla lo ngɔndɔ. Koka mbadia ambeki wa Bible etena kekaso l’anto wele bu Ɛmɛnyi wa Jehowa. Koka nto mbadia ombeki wa Bible etena kekayɛ l’ɔnangɛso kana kadiyɛso kambɔla lo nyuma naka ose kɔmite k’olimu ɔmɔtshi akakɔlɔmbɛ dia mbeka la nde kana etena kekayɛ l’onto leke kabatizama lele atashidiya mbeka dibuku Kakɔna kakoka Bible tetsha? ndo Woho wa ntshikala lo ngandji ka Nzambi.

²⁷ Ekɔ ohomba nkimɔ alapɔlɔ wele la lofulo la mɛtɛ la “Wenya.” Mbala efula wenya ɛsɔ ekɔ etena ketshayɛ l’esambishelo ka lo luudu la luudu, kasalayɛ wendelo w’eyoyo, kalɔmbɔlayɛ wekelo wa Bible kana kasambishayɛ lo tshakitudi kana, naka wɛ ekɔ lo nsambisha anto wele bu Ɛmɛnyi wa Jehowa. Naka apandjudi ahende wekɔ lo tasambisha kaamɛ, vɔ akɔ ahende koka mbadia wenya, koko paka opandjudi ɔtɔi mbayadia wendelo w’eyoyo kana ambeki wa Bible walɔmbɔma. Ambutshi wetsha vɔ akɔ ahende anawɔ lo Ɔtɛmwɛlɔ wa lo nkumbo, vɔ akɔ ahende mbeyaka mbadia wonya ɔtɔi ɔtɔi lo lomingu. Anangɛso mbeyaka mbadia wenya etena kashawɔ asawo wa lo sɛkɛ. Ɔnangɛso lɔɔmbɔla sawo dia lo sɛkɛ diashama l’ɔtɛkɛta okina nde la wɔ koka mbadia wenya. Ekɔ awui amɔtshi w’ohomba wahatahombe mbadia wenya, ɛnyɛlɔ etena kayalɔngɔsɔlaso otsha lo esambishelo, wonya weso lo losanganya l’otsha l’olimu w’esambishelo ndo etena kasombaso diangɔ kana kasalaso awui akina.

²⁸ Opandjudi tshɛ pombaka ndjela nkum’otema kande kambekiyama lo Bible etena kashikikɛnde l’ekimanyielo ka dɔmbɛlɔ etena ketshishande l’esambishelo. Apandjudi amɔtshi wekɔ lo nsambisha l’ahole wele anto efula ndo akina wekɔ lo nsambisha lo bɛtshi dia nkɛtɛ diele anto yema tshitshɛ dialɔmba dia minda l’ɔkɛndɔ l’otale. Oko wotshikitanyi bɛtshi dia nkɛtɛ, mbele ndo woho wasambisha apandjudi nto ntshikitana. Olui-walɔmbɔla hawotshutshuya la wolo nkum’otema k’etshumanelo ka l’andja w’otondo lo woho wa mbadia wenya wetshaso l’esambishelo ndo ndooko onto lakasɔnama dia monga shushi lo dikambo sɔ.​—Mat. 6:1; 7:1; 1 Tim. 1:5.

²⁹ Wenya wetshama l’olimu w’esambishelo pombaka monga wenya wa ntango w’etondo. Onyake naka opandjudi ɔmɔtshi aya bu la akoka l’ɔtɛ wa lotshundu, wende baka la hemɔ, wahandayotomba oma lo mvudu yakokɛwɔ esombe w’anto kana wende la woho okina w’okakatanu. Opandjudi wa ngasɔ koka nkimɔ alapɔlɔ w’esambishelo wele la minitɛ 15 lo dihole dia nkimɔ wonya wa ntango w’otondo. Oyadi nde akasambisha paka minitɛ 15 tsho lo ngɔndɔ, nde pombaka nkimɔ alapɔlɔ ɔsɔ. Nde ayadiema oko opandjudi wa Diolelo wasambisha mbala la mbala. Yɛdikɔ nyɛ mendanaka ndo la opandjudi wele bu l’akoka lo etena kɛmɔtshi ondo l’ɔtɛ wahandakoke nsala ndooko dui lo ngɔndɔ kɛmɔtshi kana l’ɔtɛ wende baka la hemɔ kana wamondohomɔ wolo. Yɛdikɔ nyɛ mendanaka paka la wanɛ wele bu l’akoka kaanga yema dia nkamba olimu awɔ. Kɔmite k’olimu ka l’etshumanelo mbahomba nshikikɛ opandjudi wendana la yɛdikɔ shɔ.

FISHI K’OLIMU W’OPANDJUDI WA L’ETSHUMANELO

³⁰ Alapɔlɔ ayɛ w’olimu w’esambishelo wa ngɔndɔ tshɛ fundamaka lo Fishi k’olimu w’opandjudi wa l’etshumanelo. Fishi k’olimu kɛsɔ kekɔ ka l’etshumanelo keyɛ. Naka wɛ otonɔ otsha l’etshumanelo kekina, kete ewoya dikumanyi diayɛ. Sekeletɛlɛ ka l’etshumanelo kayɛ ayoshikikɛ dia fishi kayɛ kambokoma l’etshumanelo kayɛ k’oyoyo. Etena kɛsɔ mbayeya dikumanyi woho wa vɔ kolongola ndo kosha ekimanyielo ka lo nyuma kahombama. Naka wɛ ayomɔ oma l’etshumanelo kayɛ lo edja kele l’ɛse ka ngɔndɔ shato, kete lam’alangayɛ ntetemala la ntoma alapɔlɔ ayɛ w’olimu l’etshumanelo kokoyongaka.

ƆKƆKƆ WAKIMƆSO ALAPƆLƆ W’OLIMU

³¹ Onde wɛ tohɛka tena dimɔtshi dia nkimɔ alapɔlɔ ayɛ w’olimu? Aha la taamu sho tshɛ tekɔ la ohomba wa vɔ toholaka tena dimɔtshi. Koko naka sho monga la kanyi y’ɔlɔlɔ lo kɛnɛ kendana la alapɔlɔ w’olimu ndo naka sho nshihodia lande na kele dikambo sɔ ohomba, kete ondo ayonga wɔdu dia sho mbohɔka dia nkimɔ alapɔlɔ aso w’olimu.

³² Amɔtshi mimbolaka ɔnɛ: “Lam’ele Jehowa mbeyaka kɛnɛ kasalami l’olimu ande, lande na kahombami nkimɔ alapɔlɔ l’etshumanelo?” Mɛtɛ, Jehowa mbeyaka kɛnɛ kasalaso, ndo nde koka mɛna dia kana tekɔ lo mbokambɛ la anima aso tshɛ kana tekɔ lo nkamba paka yema tshitshɛ tsho yahɛdimi ndo la kɛnɛ kakokaso mɛtɛ nsala. Koko, ohɔ dia Jehowa akafunde lofulo la nshi yakasale Nɔa lo waato a luudu ndo lofulo l’ɛnɔnyi lakakɛndakɛnda ase Isariyɛlɛ l’oswe wa shɛnga. Nzambi akafunde lofulo l’anto waki la kɔlamelo ndo la wanɛ wakatɔmbɔkɔ. Nde akafunde woho wakatalɛndjaka ase Isariyɛlɛ nkɛtɛ ya Kanana yema yema ndo kɛnɛ kakasale embadi w’Isariyɛlɛ wa kɔlamelo. Eelo, nde akafunde awui efula wendana la elimu w’ekambi ande. Nde akasambiya efundelo ɛsɔ wɛnya kɛnɛ kakete ndo kɛsɔ tɛnyaka hwe dia alapɔlɔ wa mɛtɛ wekɔ ohomba le nde.

³³ Ɛkɔndɔ efula wakafundama lo Bible mɛnyaka mɛtɛ ka alapɔlɔ ndo k’awui wakafunde ekambi wa Jehowa. Mbala efula, ɛkɔndɔ wa lo Bible totowokɛma tshɛ lo tshɛ otondonga hawofundji toshifidi shikaa. Ohɔsa bɛnyɛlɔ diayela nɛ: Etatelo 46:27; Etombelo 12:37; Embadi 7:7; 2 Nkumi ya dikanga 19:35; 2 Ɛkɔndɔ 14:9-13; Joani 6:10; 21:11; Etsha 2:41; 19:19.

³⁴ Kaanga mbele lo alapɔlɔ aso hatofunde oseka kiambokambo tshɛ yasalaso l’ɔtɛmwɛlɔ wa Jehowa, vɔ wekɔ ohomba l’okongamelo ande. Lo ntambe ka ntondo, lam’akakalola apɔstɔlɔ oma l’olimu w’esambishelo, vɔ wakayosha Yeso alapɔlɔ wa “akambo tshɛ wakawasale ndo wakawetsha.” (Makɔ 6:30) Lo tena dimɔtshi, alapɔlɔ aso mbeyaka mɛnya dia ekɔ ohomba nyomoleka mbidja yimba lo toho tɔmɔtshi t’esambishelo kaso. Toshifidi mbeyaka mɛnya dia kaanga mbambotosala ehamelo lo awui amɔtshi, koko l’awui akina okitekitelo wambonga, ɛnyɛlɔ oko ohamelo wa lofulo l’apandjudi. Mbeyaka monga ohomba wa mbisha ekeketshelo kana ohomba w’akambo amɔtshi kandɔma. Emendji sɛdingolaka dimɛna dimɛna fishi y’alapɔlɔ ndo salaka la wolo dia nkandola dikambo tshɛ diakoka nshimba apandjudi amɔtshi kana etshumanelo k’otondo dia ntshɔ otsha la ntondo.

³⁵ Alapɔlɔ wekɔ nto ohomba le okongamelo nɛ dia vɔ mɛnyaka ahole amɔtshi wele ohomba efula w’apandjudi l’olimu w’esambishelo. Bɛtshi diakɔna dioleki monga l’etombelo w’amɛna? Lende ele ehamelo bu efula? Ekanda akɔna wele ohomba dia nkimanyiya anto dia mbeka akambo wa mɛtɛ? Fishi y’alapɔlɔ kimanyiyaka okongamelo dia mbeya ekanda wele ohomba l’esambishelo lo bɛtshi dia nkɛtɛ diotshikitanyi dia l’andja w’otondo ndo dia ndjalɔngɔsɔla dia mbisha ekimanyielo.

³⁶ Le efula ka l’atei aso, alapɔlɔ wendana l’esambishelo wekɔ kiɔkɔ y’ekeketshelo. Shi sho mongaka l’ɔngɛnɔngɛnɔ w’efula etena kokaso olimu wakamba anangɛso wasambisha lokumu l’ɔlɔlɔ l’andja w’otondo? Alapɔlɔ wendana l’ohamelo tokimanyiyaka dia monga la kanyi lo kɛnɛ kendana l’ohamelo w’okongamelo wa Jehowa. Akambo wahomana la so l’esambishelo minandaka etema aso, tokimanyiyaka dia monga l’ohetoheto ndo totshutshuyaka dia nyomoleka ndjasha l’olimu w’esambishelo. (Ets. 15:3) Woho wakambaso kaamɛ lo nkimɔ alapɔlɔ w’esambishelo ekɔ ohomba ndo dui sɔ mɛnyaka dia sho ndjakiyanyaka lo dikambo dia anangɛso wa l’andja w’otondo. Lo tshelo ya tshitshɛ shɔ, sho mɛnyaka dia sho mongaka l’ɛse ka okongamelo wa Jehowa.​—Luka 16:10; Hɛb. 13:17.

TOYADJE EYANGO

³⁷ Sho keema l’ɔkɔkɔ wa mbɛdika olimu aso w’esambishelo la w’onto okina. (Ngal. 5:26; 6:4) Akoka w’onto l’onto tshikitana. Lo wedi okina, sho koka nkondja wahɔ efula naka sho ndjadjɛ eyango wakokaso nkotsha dia menda ohamelo aso l’olimu w’esambishelo. Sho koka monga la ɔngɛnɔngɛnɔ etena kakotshaso eyango akɔ.

³⁸ Mɛnamaka dia Jehowa mɛtɛ ekɔ lo nsala awui esadi esadi dia ntshumanya anto wayondokokɛ lo “mfɔnu ka woke.” Tekɔ lo nsɛna lo etena kakotshama prɔfɛsiya k’Isaya kata ɔnɛ: “Ɔnɛ lele tshitshɛ ayonga kinunu ndo ɔnɛ lele shekaseka wodja wa wolo. Dimi Jehowa dimɛ layosala dia dui sɔ salema esadi esadi lo etena kadiɔ.” (Ɛny. 7:9, 14; Isa. 60:22) Ande diɛsɛ diele la so dia monga esambisha wa lokumu l’ɔlɔlɔ lo tena di’ekomelo dia wolo nɛ lee!​—Mat. 24:14.