Tshikala suke l’okongamelo wa Jehowa

OMBEKI Jakɔba akafunde ate: “Nyoyasukanya la Nzambi, ko nde ayoyasukanya la nyu.” (Jak. 4:8) Eelo, Jehowa keema la diko efula kana etale amboleka dia nde mboka alɔmbɛlɔ aso kaanga mbeso keema kokele. (Ets. 17:27) Ngande wakokaso ndjasukanya la Nzambi? Sho koka nsala dui sɔ lo nyanga dia monga la diɔtɔnganelo la Jehowa, dialɔmba dia sawolaka la nde oma k’ɛse otema lo dɔmbɛlɔ. (Os. 39:12) Sho koka nto monga la diɔtɔnganelo dia wolo efula la Nzambi oma lo wekelo wa mbala la mbala w’Ɔtɛkɛta ande, Bible. Lo yoho shɔ mbakomaso lo mbeya Jehowa Nzambi, asangwelo ande ndo lolango lande lo dikambo diaso. (2 Tim. 3:16, 17) Lo nsala ngasɔ, tayeka dia mbooka ngandji ndo mbooka wɔma wa dimɛna waha mbonyangiya.​—Os. 25:14.

² Koko, dia monga suke suke la Jehowa paka mbeta oma le Ɔnande Yeso. (Jni. 17:3; Rɔmɔ 5:10) Ndooko onto lakoka pondjo tetsha tokanyi ta Jehowa ko ndeka woho wakasale Yeso. Nde akekesanɛ efula la She polo ndo lo nde mbuta ate: “Ndooko onto leya Ɔna paka Papa ndo ndooko onto leya Papa paka Ɔna, ndo onto tshɛ lele Ɔna nangaka mbosholɛnde.” (Luka 10:22) Ɔnkɔnɛ, etena kekaso kɛnɛ kɛnya Evanjiliɔ lo yoho yakakanyiyaka ndo yakayaokaka Yeso, kete tekɔ lo mbeka mɛtɛ woho wakanyiya ndo wayaoka Jehowa. Ewo kɛsɔ tokimanyiyaka dia ndeka ndjasukanya la Nzambi kaso.

³ L’ɛlɔmbwɛlɔ k’Ɔna Nzambi, sho mongaka la diɔtɔnganelo dia wolo la Jehowa lo tshikalaka suke la etenyi kɛnama k’okongamelo wa Jehowa katokimanyiya dia mbeya woho wa nsala lolango la Nzambi. Oko wakadiatama lo Mateo 24:45-47, Owandji Yeso Kristo akasɔnɛ “ɔhɔmbɔ wa kɔlamelo ndo kɛsɔ” dia mbishaka ase luudu la mbetawɔ “mbo ya ndɛ yawɔ lo etena kahombama.” Ɛlɔ kɛnɛ, ɔhɔmbɔ wa kɔlamelo ekɔ lo tosha lokema la mbo ya ndɛ ya lo nyuma. Lo tshimbo y’ehomɔ kɛsɔ, Jehowa tolakaka dia mbadiaka Ɔtɛkɛta ande lushi la lushi, dia mbɔtɔka lo nsanganya yaso y’Akristo mbala la mbala ndo dia ndjashaka efula l’esambishelo ka ‘lokumu l’ɔlɔlɔ la Diolelo.’ (Mat. 24:14; 28:19, 20; Jas. 1:8; Os. 1:1-3) Hatohombe pondjo mbɔsa ɔhɔmbɔ wa kɔlamelo lo yoho ya l’emunyi. Sho pombaka nsala la wolo dia tshikalaka suke la etenyi kɛnama k’okongamelo wa Jehowa ndo ndjelaka ɛlɔmbwɛlɔ katɔ. Kɛsɔ ayoleka tosukanya la Jehowa Nzambi kaso ndo ayotokeketsha ndo tokokɛ kaanga l’atei w’ehemba.

LANDE NA KATAFULANƐ EHEMBA?

⁴ Ondo aya ɛnɔnyi efula weyɛ lo akambo wa mɛtɛ. Naka ekɔ ngasɔ, kete wɛ mɛtɛ mbeyaka kɛnɛ kalembetshiya mbikikɛ ehemba w’olowanyi. Koko oyadi wɛ eke esadi wa mbeya Jehowa ndo wa monga l’atei w’ekambi ande, wɛ mbeyaka dia Satana Diabolo ndɔshaka onto tshɛ lele l’ɛse ka lowandji la Jehowa. (2 Tim. 3:12) Ɔnkɔnɛ, oyadi wɛ ambokikɛ l’etena ka tshitshɛ kana k’otale, wɛ ndooko l’ɔkɔkɔ wa mboka wɔma kana wa nkɔmɔ. Jehowa ndakaka dia nde ayokosukɛ ndo ayofuta ekikelo kayɛ lo kotshungola ndo kosha lɔsɛnɔ lo nshi yayaye.​—Hɛb. 13:5, 6; Ɛny. 2:10.

⁵ Sho tshɛ pombaka nongamɛ dia tayohomana l’ehemba lo nshi y’ekomelo ya dikongɛ dia Satana nɛ. Ntatɛ etena kakashikikɛma Diolelo diaki Nzambi l’ɔnɔnyi 1914, Satana komonga nto la lotshungɔ la monga l’olongo lɛnɛ ele Jehowa. Nde akakashema la nkɛtɛ, lɛnɛ ende nde l’andjelo ande wa kɔlɔ. Ofulanelo wa mfɔnu mbidja ndo ohamelo wa woho wahɛnyahɛnyama ekambi wa Jehowa wakayakimɔ, ekɔ etombelo w’oma lo nkɛlɛ kele la Satana ndo djembetelo yɛnya dia tekɔ lo nsɛna lo nshi y’ekomelo y’ɛlɔmbwɛlɔ kande ka kɔlɔ laadiko di’anto.​—Ɛny. 12:1-12.

⁶ Oko wende la nkɛlɛ lo woho wakawokitshakitsha, Satana mbeyaka dia etena kambootshikalɛ kaya mondo. Kaamɛ l’ɛdiɛngɛ ande, nde ekɔ lo nsala la wolo tshɛ dia mbidja wekamu l’olimu w’esambishelo ka Diolelo ndo dia ndanya kaamɛ kele l’ekambi wa Jehowa. Kɛsɔ todjaka lo ta dia lo nyuma diatama ɔnɛ “aha la emunyi la dikila, koko la mandji, la ewandji ndo la emboledi wa lo andja wa wodjima ɔnɛ, la ɛdiɛngɛ wa l’ahole wa l’olongo.” Naka sho nangaka mbidja otshumba lo ta sɔ ndo monga lo wedi wa Jehowa, kete sho hatohombe mpekɔ, sho pombaka ntetemala nkokɛ dimɛna dihomɔ diaso dia ta dia lo nyuma. Sho pombaka “ntshikala nge la ntondo ka totshelo ta mayɛlɛ” taki Diabolo. (Ɛf. 6:10-17) Kɛsɔ tɔlɔmbaka dia monga l’ekikelo.

TONGE L’EKIKELO

⁷ Ekikelo kɛdikɛdi “dikoka dia nshika ntanga la ntondo k’ekakatanu kana k’ɔlɔshamelo.” Lo yoho ya lo nyuma, ekikelo mendanaka la dionga dia ntshikala nge lo salaka kɛnɛ kele ɔlɔlɔ kaanga la ntondo k’ekakatanu, k’ɔlɔshamelo, k’ɛhɛnyɔhɛnyɔ kana k’awui akina wayanga dia ndanya yɛdikɔ yaso ya ntshikala la olowanyi le Nzambi. Dia monga l’ekikelo k’Okristo, pombaka ndjaekiya. Dikambo sɔ nɔmbaka etena k’otale. Etena katatahame lo nyuma mbatahame ndo dikoka diaso dia mbikikɛ. Lo mbikikɛ ehemba wa totshitshɛ wa mbetawɔ kaso waya l’etatelo ka lɔsɛnɔ laso l’Okristo, tayonga la wolo w’efula wayotokimanyiya dia mbikikɛ ehemba woleki wolo wayotokomɛ ndooko onyake. (Luka 16:10) Hatohombe nkonga dia paka etena katokomɛ ehemba wa weke ko sho ndjɔsa yɛdikɔ ya ntshikala nge lo mbetawɔ. Yɛdikɔ yaso ya ntshikala nge pombaka mbɔsama la ntondo k’ehemba tokomɛ. Dia mɛnya ohomba wa monga l’ekikelo kaamɛ la waonga akina wangɛnyangɛnya Nzambi, ɔpɔstɔlɔ Petero akafunde ate: “Nyosale la wolo tshɛ dia nkotsha ɔlɔlɔ laadiko dia mbetawɔ kanyu, laadiko di’ɔlɔlɔ nyokotsha ewo, laadiko dia ewo nyokotsha ndjakimɛ, laadiko dia ndjakimɛ nyokotsha ekikelo, laadiko dia ekikelo nyokotsha omamemelo le Nzambi, laadiko di’omamemelo le Nzambi nyokotsha lolango l’onto l’ɔnango, laadiko dia lolango l’onto l’ɔnango nyokotsha ngandji.”​—2 Pe. 1:5-7; 1 Tim. 6:11.

⁸ Jakɔba nde la wɔ akakotola yambalo yaso l’ohomba wa monga la ekikelo lo mfunda ate: “Analengo le, nyɔngɛnɛngɛnɛ etena kahomananyu la ehemba wa weho la weho, nyeya dia mbetawɔ kanyu kambohembama mbotaka ekikelo. Koko, nyotshike dia ekikelo nshidiya olimu atɔ, dia nyu monga kokele ndo aha la vadi lo akambo tshɛ, aha la mpomba ndooko ɛngɔ.” (Jak. 1:2-4) Jakɔba mbutaka di’Akristo pombaka mbetawɔ ehemba ndo ngɛnangɛna dikambo diawɔ nɛ dia vɔ tokimanyiyaka dia monga l’ekikelo. Onde yoho shɔ mbɛnayɛ akambo? Oma laasɔ, Jakɔba mɛnyaka dia ekikelo tɔamɛ pombaka nkamba olimu wa ndowanya lonto laso l’Okristo ndo nsala dia sho mbetawɔma tshɛ lo tshɛ le Nzambi. Eelo, ekikelo kaso keketshamaka lushi la lushi etena kahomanaso ndo katondoyaso ehemba. Ekikelo lo wedi atɔ tondjaka waonga akina w’amɛna weso lawɔ ohomba.

⁹ Ekikelo kaso ngɛnyangɛnyaka Jehowa ndo tɔ ayowotshutshuya dia tosha difuto dia lɔsɛnɔ la pondjo. Jakɔba akakotsha ɔnɛ: “Ɔngɛnɔngɛnɔ le onto latetemala mbikikɛ ehemba, nɛ dia lam’ayondetawɔma oma le Nzambi, nde ayolongola dɛmbɔ dia nkoso dia lɔsɛnɔ diakalake Jehowa wanɛ watetemala mbooka ngandji.” (Jak. 1:12) Eelo, tekɔ lo mbikikɛ l’ɔtɛ wa lɔsɛnɔ. Naka hatokike, kete ekɔ wolo sho ntshikala lo akambo wa mɛtɛ. Naka sho mpomana la tɔsɛngiya ta l’andja ɔnɛ, kete tayokalola nto l’andja akɔ. Naka hatokike, kete hatototetemala nkondja nyuma ka Jehowa ndo laasɔ kete hatotokoka ntɔ olowa atɔ lo nsɛnɔ yaso.

¹⁰ Dia sho ntetemala mbikikɛ lo tena nɛ dia wolo, sho pombaka monga la kanyi y’ɔlɔlɔ lo kɛnɛ kendana la asui watokomɛ l’ɔtɛ weso Akristo. Tohɔ dia Jakɔba akafunde ate: “Nyɔngɛnɛngɛnɛ.” Nsala dui sɔ mbeyaka monga wolo, nɛ dia ehemba mbelaka asui wa lo demba kana ekiyanu wa wolo lo tokanyi. Koko tatohɛke dia lɔsɛnɔ laso la lo nshi yayaye nemanɛka la dikambo sɔ. Dikambo dimɔtshi diakakomɛ apɔstɔlɔ tokimanyiyaka dia mɛna woho wakokaso ngɛnangɛna l’atei w’asui. Ɔkɔndɔ akɔ tanemaka lo dibuku di’Etsha ndo vɔ mbutaka ɔnɛ: “Vɔ wakelɛ apɔstɔlɔ, wakaakɔmɔla ndo wakawadjangɛ dia vɔ ntshika ntɛkɛta lo lokombo la Yeso, ko wakaakimɔ. Ɔnkɔnɛ, vɔ wakatombe oma lo tominadi ta laadiko t’ase Juda, watangɛnangɛna, nɛ dia vɔ wakɔsama oko anto wasungana mbishama nsɔnyi l’ɔtɛ wa lokombo lande.” (Ets. 5:40, 41) Apɔstɔlɔ wakashihodia dia asui awɔ aki djembetelo yakɛnya dia vɔ wakakitanyiya didjango dia Yeso ndo waketawɔma le Jehowa. Ɛnɔnyi efula l’ɔkɔngɔ, lo mukanda ande wa ntondo wakasambiyama, Petero akɛnya ohomba w’asui asɔ wakawasowe l’ɔtɛ wa losembwe.​—1 Pe. 4:12-16.

¹¹ Dikambo dikina diakete mendanaka la Pɔɔlɔ nde la Silasɛ. Etena kakawakambaka olimu awɔ wa misiɔnɛrɛ la Filipɛ, wakawande ndo wakaasɔngwɛ ɔnɛ wekɔ lo mbidja ofukutanu l’osomba ndo wekɔ lo mbetsha mbekelo yahɔtɔnɛ l’ɛlɛmbɛ. Ɔnkɔnɛ, vɔ wakakɔmama wolo ndo wakadjama lo lokanu. Ɔkɔndɔ wa lo Bible totɛka dia etena kakiwɔ lo lokanu wele la mpota yahatasakemɛ, “la midi k’otsho, Pɔɔlɔ la Silasɛ wakalɔmbaka ndo wakatombolaka Nzambi l’esambo ndo ase lokanu wakaahokamɛka.” (Ets. 16:16-25) Pɔɔlɔ nde la osekande wakɛnyi mɛtɛ dia asui awɔ l’ɔtɛ wa Kristo komonga tsho djembetelo ya olowanyi awɔ la ntondo ka Nzambi ndo k’anto, koko asui asɔ wakawasha nto diaaso dia vɔ nyomoleka nsambisha wanɛ wakakoke mpokamɛ lokumu l’ɔlɔlɔ. Nsɛnɔ y’anto akina yakendanaka la dikambo sɔ. Paka ko l’otsho ɔsɔ, olami wa lokanu nde la wa lo luudu lande wakahokamɛ ndo wakakome ambeki. (Ets. 16:26-34) Pɔɔlɔ nde la Silasɛ waki la wɛkamu le Jehowa, lo wolo ande ndo lo nsaki kande ka mbasukɛ lo asui awɔ. Vɔ kɔmɛmba ɛkɔndjɔ.

¹² Woho akɔ waamɛ mbele, ɛlɔ kɛnɛ Jehowa toshaka kɛnɛ tshɛ keso l’ohomba dia tosukɛ lo tena di’ehemba. Nde nangaka dia sho mbikikɛ. Nde akatosha Ɔtɛkɛta ande wakasambiyama dia sho nkondja ewo ka mɛtɛ k’asangwelo ande. Kɛsɔ keketshaka mbetawɔ kaso. Tekɔ la diaaso dia sanganaka la asekaso atɛmɔdi ndo dia nkamba olimu w’ekila. Tekɔ nto la diɛsɛ dia monga la diɔtɔnganelo dia wolo la Jehowa ndamɛ oma lo dɔmbɛlɔ. Nde pokamɛka alɔmbɛlɔ wootombolaso ndo wɔlɔmbaso oma k’ɛse otema dia tokimanyiya dia sho ntetemala monga pudipudi la ntondo kande. (Flpɛ. 4:13) Tatohɛke nto wolo wakondjaso etena kakanyiyaso elongamelo kele la ntondo kaso.​—Mat. 24:13; Hɛb. 6:18; Ɛny. 21:1-4.

TOKIKƐ EHEMBA WOTSHIKITANYI

¹³ Ehemba wahomana la so ɛlɔ kɛnɛ fɔnaka efula la wɛnɛ wakahomanaka la ambeki wa ntondo wa Yeso Kristo. Lo nshi yaso nyɛ, Ɛmɛnyi wa Jehowa tɛngamaka ndo pɛnyahɛnyamaka l’alemba oma le atunyi watɛwɔ awui wa kashi lo lokombo lawɔ. Paka oko wakidiɔ lo nshi y’apɔstɔlɔ, ɔlɔshamelo efula ndjaka oma le wanɛ wasukɛ la wolo tshɛ ɛtɛmwɛlɔ wele wetshelo wa kashi ndo wele ditshelo diawɔ mbishɔmaka l’Ɔtɛkɛta wa Nzambi. (Ets. 17:5-9, 13) Tena dimɔtshi, ekambi wa Jehowa mbɔdiaka yema ya demba lo mamɛ lotshungɔ lele la wɔ lo ndjela ɛlɛmbɛ wa lɛɛta. (Ets. 22:25; 25:11) Koko tokomaka dia ndo emboledi vɔamɛ mbidja ɔlɛmbɛ dia nshimba esambishelo kaso ndo nsala la wolo dia nkomiya olimu aso w’Okristo. (Os. 2:1-3) Etena kasalema dikambo dia ngasɔ, sho ndjelaka la dihonga tshɛ ɛnyɛlɔ ka apɔstɔlɔ wa kɔlamelo wanɛ wakate vate: “Sho pombaka nkitanyiya Nzambi oko wende owandji lo dihole dia nkitanyiya anto.”​—Ets. 5:29.

¹⁴ Oko wamboleka yimba ya ngandji k’otamanya ka wodja mpama lo nkɛtɛ k’otondo, apandjudi wa lokumu l’ɔlɔlɔ wamboleka pɛnyahɛnyama wolo dia vɔ ntshika olimu awɔ wakawasha Nzambi. Ekambi wa Nzambi tshɛ mbeyaka ohomba w’efula wele la ɔhɛmwɛlɔ watanema lo Ɛnyɛlɔ 14:9-12 wendana l’ɔtɛmwɛlɔ wa “nyama ka ngala la efanelo katɔ.” Sho shihodiaka kitshimudi y’ɛtɛkɛta wa Joani wata ɔnɛ: “Lanɛ kalɔmbama ekilami, wanɛ wakitanyiya ɛlɛmbɛ wa Nzambi ndo wakukutɛ mbetawɔ kele la wɔ le Yeso dia vɔ monga la ekikelo.”

¹⁵ Ehemba mbeyaka ndja l’ɔtɛ w’ata, w’ɔtɔmbɔkwɛlɔ kana w’ɛhɛnyɔhɛnyɔ wa lo sɛkɛ ndo w’oshimbelo w’oma le ewandji wa lɛɛta ndo dui sɔ mbeyaka nkonya ko wɛ hayokoka nsala ɔtɛmwɛlɔ w’Okristo lo sɛkɛ. Mbeyaka monga ko hanyoyokoka nsangana kaamɛ l’etshumanelo. Mbeyaka monga ko hanyoyosawola la filialɛ. Wembwelo w’emendji w’etshimbedi mbeyaka mpembɔ. Mbeyaka monga nto ko hanyoyolongola ekanda. Naka dikambo dimɔtshi dia ngasɔ ambonyokomɛ, ahombanyu nsala?

¹⁶ Okadimwelo ele nsala kɛnɛ tshɛ kakokanyu nsala ndo lo yɛdikɔ yakokanyu nsala lo tena dia wolo sɔ. Pombaka salaka wekelo w’onto ndamɛ. Mbala efula tolui ta totshitshɛ koka nsangana dia nsala wekelo lo mvudu y’anto amɔtshi. Nsanganya shɔ koka salema l’ekimanyielo k’ekanda wambekamaka edjedja ndo ka Bible tɔamɛ. Tanyohandjɔke wɔɔngɔ kana ndjakiyanya amboleka. Mbala tshɛ, Olui-walɔmbɔla nyangaka esadi eto dia ntana yoho mɔtshi ya nsawola l’anangɛso wele la ɛkɛndɛ.

¹⁷ Koko, oyadi kaanga wɛ ambotanema wɛmɛ mangana l’anangɛso w’Akristo tshɛ, tohɛke dia wɛ hanganyi la Jehowa nde la Ɔnande Yeso Kristo. Wɛ koka ntetemala monga la elongamelo ka wolo. Jehowa koka mboka alɔmbɛlɔ ayɛ ndo kokeketsha la nyuma kande. Yanga ɛlɔmbwɛlɔ kande. Tohɛke dia wɛ ekɔ okambi wa Jehowa ndo ombeki wa Yeso Kristo. Ɔnkɔnɛ, kamba dimɛna la waaso watanema dia nsambisha. Jehowa ayɔtshɔkɔla welo ayɛ ndo anto akina mbeyaka nsangana esadi eto la yɛ lo ɔtɛmwɛlɔ wa mɛtɛ.​—Ets. 4:13-31; 5:27-42; Flpɛ. 1:27-30; 4:6, 7; 2 Tim. 4:16-18.

¹⁸ Oyadi kaanga wambokofundɛ nyɔi oko wakawafundɛ apɔstɔlɔ ndo Akristo amɔtshi, yaɛkɛ le “Nzambi ɔnɛ lolola wanɛ wakavu.” (2 Kɔr. 1:8-10) Mbetawɔ kele la yɛ lo eolwelo koka kokimanyiya dia mbikikɛ kaanga ɛhɛnyɔhɛnyɔ woleki tshɛ wolo. (Luka 21:19) Kristo Yeso akatotshikɛ ɛnyɛlɔ ndo nde akeyaka dia kɔlamelo yande la ntondo k’ehemba ayokeketsha anto akina dia mbikikɛ. Woho akɔ waamɛ mbele, wɛ koka monga kiɔkɔ y’ekeketshelo le ananyɔ.​—Jni. 16:33; Hɛb. 12:2, 3; 1 Pe. 2:21.

¹⁹ Laadiko dia ɛhɛnyɔhɛnyɔ ndo ɔlɔshamelo, ekɔ ekakatanu ekina wahombayɛ ondo mbikikɛ. Ɛnyɛlɔ, apandjudi amɔtshi wakakɔmɔ l’ɔtɛ wa wendjudi wele l’anto wa l’ɛtshi kawɔ ka nkɛtɛ. Akina pombaka ndɔshana la hemɔ yawɔ ya lo demba kana ya lo yimba kana mbikikɛ elelo wawadjɛ demba diawɔ diaya bu dimɛna. Ɔpɔstɔlɔ Pɔɔlɔ nde la wɔ akahombe mbikikɛ woho ɔmɔtshi w’ohemba wakadjaka wekamu l’olimu ande kana waketɛka olimu akɔ wolo efula lo tena dimɔtshi. (2 Kɔr. 12:7) Ndo nto, Epafrodito, Okristo wa lo ntambe ka ntondo w’oma la Filipɛ ‘akakɔmɔ l’ɔtɛ wakoke angɛnyi ande dia nde akayondama la hemɔ.’ (Flpɛ. 2:25-27) Munga yaso ndo y’anto akina koka ntondja ekakatanu wa wolo efula mbikikɛ. Mbeyaka monga ekakatanu wa lam’asa Akristo kana lam’asa ase nkumbo. Koko anto wayela alako wa l’Ɔtɛkɛta wa Jehowa koka mbikikɛ ndo ntondoya ekakatanu wa weho ɛsɔ.​—Ɛzk. 2:3-5; 1 Kɔr. 9:27; 13:8; Kɔl. 3:12-14; 1 Pe. 4:8.

TOYASHIKIKƐ DIA NTSHIKALA LA KƆLAMELO

²⁰ Sho pombaka mamemaka nshi tshɛ paka onto lakasɔnama oma le Jehowa dia monga Ɔtɛ w’etshumanelo, mbuta ate Yeso Kristo. (Kɔl. 2:18, 19) Sho pombaka nkamba kaamɛ la “ɔhɔmbɔ wa kɔlamelo ndo kɛsɔ” ndo la wanɛ wakasɔnama oko emendji. (Hɛb. 13:7, 17) Naka sho ndjelaka dimɛna dimɛna tɛdikɔ tshɛ ta teokrasi ndo kambaka kaamɛ la wanɛ walɔmbɔla, kete tayoyakongɛ dia nsala lolango la Jehowa. Sho pombaka nkamba dimɛna la diɛsɛ dia dɔmbɛlɔ. Tatohɛke dia oyadi mpele dia luudu la lokanu kana lokanu le so shoamɛ hakoke toshimba dia nsawola la Shɛso ka ngandji lele l’olongo kana mfukutanya kaamɛ kele lam’asaso la asekaso atɛmɔdi.

²¹ La eshikikelo ndo la ekikelo tshɛ, nyɛsɔ tosale kɛnɛ tshɛ kakokaso nsala dia nkamba olimu wakawatosha wa nsambisha ndo totetemale l’olimu wakatshikɛ Yeso Kristo, ɔnɛ lakolɔ oma lo nyɔi ambeki ande dia nsala etena kakandawatɛ ɔnɛ: “Ɔnkɔnɛ, nyotshu ndo nyetɛ anto wa lo wedja tshɛ ambeki, nyaabatize lo lokombo la Papa ndo la Ɔna ndo la nyuma k’ekila, nyowaetshake dia nkitanyiya akambo tshɛ wamomonyodjangɛ.” (Mat. 28:19, 20) L’ɛnyɛlɔ ka Yeso, nyɛsɔ tokikɛ ndo toke washo aso l’elongamelo ka Diolelo ndo ka lɔsɛnɔ la pondjo, kɛnama hwe la ntondo kaso. (Hɛb. 12:2) Oko weso ambeki wa Kristo wambobatizama, tekɔ la diɛsɛ dia mbisha lonya l’okotshamelo wa prɔfɛsiya ka Yeso kendana “l’etena k’ekomelo ka dikongɛ di’akambo.” Nde akate ate: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.” (Mat. 24:3, 14) Naka sho ndjasha l’otema aso tshɛ l’olimu ɔsɔ nshi nyɛ, kete tayonga l’ɔngɛnɔngɛnɔ wa nkondja lɔsɛnɔ la pondjo l’andja w’oyoyo wa Jehowa wa losembwe!