DIMBOLA 5

Ahombami nsala naka wekɔ lo solami la kalasa?

OHOMBA WA DIMBOLA SƆ

Kɛnɛ kayoyosala koka nɔngɔsɔla—kana ndanya akambo.

KAKƆNA KOTOYOSALA?

Ohokanyiya dui nɛ: Thomas hayolanga ntshɔ la kalasa oyadi ɛlɔ, loyi kana pondjo pondjo. Ambeta oko ngɔndɔ shato, asekande wa la kalasa wakadianganya awui wa kɔlɔ lo lokombo lande. Oma laasɔ, vɔ wakamɛ mbɔlɛ nkombo. Tena dimɔ, ndjaka Thomas okime ekanda ande l’anya k’onto mbakɔsha ko nsala oko aha l’okonda mbotshende. Ndo kaanga onto ɔmɔtshi la l’olui wele l’ɔkɔngɔ ande mbɔkɔmɔla ɛkɔtshi, Thomas kɛwɔka, nde hakoke sombɔ mimbola onto losadi dui sɔ. Loyi, esolanyi ɛsɔ wakatamb’elelo etena kakawanɛɛ Thomas l’Ɛtɛrnɛtɛ . . .

Otondongaka wɛ mbaki Thomas, kakɔna kotoyosala?

OHOKANYIYA YEMA!

Ekɔ mɛtɛ dia wɛ bu ɔhɔdu. Eya dia, wɛ koka nshidiya esolanyi aha la nkamba l’akɔfi. Lo ngande?

TOSALAKE NDOOKO DUI. Bible mbutaka ɔnɛ: “Kanga enginya tondjaka nkɛlɛ kande tshɛ lo sɛkɛ, koko, kanga lomba kiahemɛka la lotutsha tshɛ.” (Tokedi 29:11) Naka wɛ ntshikala ki lo yɛdikɔ yakoka, wanɛ wakosola wayɔlɛmba.
TƆSƆMBƆYAKE. Bible mbutaka ɔnɛ: “Tanyokaloyake kɔlɔ lo kɔlɔ.” (Rɔmɔ 12:17) Naka wɛ nyanga dia nsɔmbɔya, kete ayoleka ntɔla akambo lo kɔlɔ.
TOYADJAKE LO EKAKATANU. Bible mbutaka ɔnɛ: “Kanga yewo atɛnaka waale, ko nde atoyashɛka.” (Tokedi 22:3) Lo yɛdikɔ yakoka, ewɔ anto wakoka ntondja mindjo ndo ewɔ awui wakonya lo esolanyi.
SHA OKADIMWELO WAHANDALONGAME. Bible mbutaka ɔnɛ: “Okadimwelo wa la memakana tutshaka nkɛlɛ.” (Tokedi 15:1) Wɛ koka mbuta awui wa tɔla. Ɛnyɛlɔ, naka ɔnɛ lakosola ambokotɛ ate wɛ aya la kilɔ efula, wɛ koka nyɔnya ahɛka ko mbotɛ wate “dimi fɔnyaka dia layokitshakitsha kilɔ mɔtshi.”
NYA DEMBA. Nora lele l’ɛnɔnyi 19 mbutaka ate: “Nɛmbɔhala mɛnyaka dia wɛ ekɔ onto lambotshunda ndo wɛ ekɔ la wolo ndeka onto lakosola. Dui sɔ mɛnyaka dia wɛ ekɔ la ndjakimɛ, dionga diele ɔnɛ lakosola bu la diɔ.”—2 Timɔte 2:24.
SALA AKAMBO LA DIHONGA. Mbala efula wanɛ wasolana mbisholaka wanɛ wele la kanyi ya kɔlɔ lo dikambo diawɔ ndo wanɛ wele tomalomala. Koko efula ka wanɛ wasolana tshikalaka enyɔ ku naka wambɛna dia wɛ hawasha diaaso dia kosola.
TƐ ONTO OKINA. Onto ɔmɔtshi laki ombetsha mbutaka ate: “Dimi keketshaka onto tshɛ lasolawɔ dia nde ntɛkɛta. Ɔsɔ mbele dui dia dimɛna dia nsala ndo diɔ koka nkimanyiya onto diaha vɔ mbosola.”

Ɔlɔngɔlɔngɔɔmɔtshi amboshika ntanga la ntondo k’esolanyi — Sala akambo lo ndjela dietawɔ diayɛ ayokosha wolo wele ɔnɛ lakosola bu la wɔ

ONDE WƐ AKEYAKA?

Esolanyi hakomɛ lo minanda onto lo demba, koko dui sɔ mendanaka ndo la:

Ntɛngɔ. Celine lele l’ɛnɔnyi 20 mbutaka ate: “Hambohɛki nkombo yakawambelɛka kana awui wakawataka. Vɔ wakankonya dia dimi ndjaoka oko onto laha la nɛmɔ, lahalangema ndo l’anyanya. Nɛmɔ diami tshɛ diakɔtɔ l’ashi.”
Ndjaemalɛ. Haley lele l’ɛnɔnyi 18 mbutaka ɔnɛ: “Asekami wa la kalasa wakamɛ mbewewɔmi. Wakɛnyaka oko ndooko dihole dia dimi todjasɛ l’oleelo wa la midi, diakɔ diakimi kokokaka mbidjasɛ la wɔ. Ɔnɔnyi w’otondo, lakalelaka ndo lakalɛka dimɛ.”
Esolanyi wa l’Ɛtɛrnɛtɛ. Daniel lele l’ɛnɔnyi 14 akate ate: “Naka wɛ mfunda kaanga awui angana ato l’Ɛtɛrnɛtɛ, wɛ koka ndanya lokumu l’onto ndo kaanga lɔsɛnɔ lande. Dui sɔ mbokɛmaka oko ambotamba elelo, koko diɔ koka salema.”

**AMBOLA WENDANA LA ESOLANYI**
MƐTƐ KANA KASHI	EKADIMWELO
1 Esolanyi aya ɛnɔnyi nunu.	1 Mɛtɛ. Ɛnyɛlɔ, Bible mbutaka dia waa Nefilimɛ, woho w’anto wele lokombo lawɔ nembetshiyaka ɔnɛ: “Wanɛ wakonya anto dia nkɔ.”—Etatelo 6:4.
2 Esolanyi ekɔ tsho shɛkɛsɛkɛ. Ɔsɔ bu dui dia kɔlɔ efula.	2 Kashi. Esolanyi ekɔ dui dia woke diakonya ɛlɔngɔlɔngɔ efula lo ndjadiaka.
3 Yoho yoleki dimɛna ya nkomiya esolanyi ele nsɔmbɔya.	3 Kashi. Mbala efula wanɛ wasolana wekɔ la wolo wa demba ndeka wanɛ wasolawɔ, ɔnkɔnɛ nyanga dia nsɔmbɔya ekɔ wetshelo wa wenya.
4 Naka wambokosola, ayoleka dimɛna minya yimba.	4 Kashi. Ndooko dui diele onto hakoke nkadimola. Naka wambokosola ko wɛ hatshi ndooko dui, wɛ mbeyaka ndjonga lo kiɔkɔ y’okakatanu lo dihole dia mona dia mboshidiya.
5 Laadiko di’ɛtɛkɛta wa ndjadiya, mbala efula wanɛ wasolana mongaka waale.	5 Mɛtɛ. Kaanga mbele anto amɔtshi wasolana wekɔ la ndjadiya, efula kawɔ hawoyaɛkɛ le wɔ vɔamɛ ndo vɔ mɔnyɔlaka anto akina dia vɔ ndjaoka dimɛna.
6 Akanga w’esolanyi koka ndjotshikitanya tokanyi tawɔ.	6 Mɛtɛ. Naka wanɛ wasolana kimanyiyama, kete vɔ koka ntshikitanya yoho yakanyiyawɔ ndo etsha awɔ.