DIMBOLA 7
Akokami nsala naka wɔsɛngiya dia nsala dieyanelo?
KAKƆNA KOTOYOSALA?
Ohokanyiya dui nɛ: Eke paka ngɔndɔ hiende yambɛnana Heather nde la Mike, koko nde mɛnyaka oko nde okoweyaka. Vɔ tomanɛka mesajɛ mbala la mbala, sawolaka wenya efula lo telefɔnɛ ndo wokoma polo nd’onto l’onto mbeya kɛnɛ kalanga osekande mbuta. Koko kakianɛ Mike oyanga ɛngɔ kekina laadiko dia sawo.
Lo ngɔndɔ hiende yetshi, Mike nde la Heather kosala ndooko dui dikina laadiko dia kimanɛ lo anya ndo mbishana bizɛ. Heather halange dia vɔ ntamba elelo. Koko nde halange nshisha Mike. Nɛ dia ndooko onto okina lawokonya dia nde ndjaɔsa dia nde ekɔ olangala efula. Nde ambota l’otema ate: ‘Laadiko dia laasɔ, ngandji kaya l’asami la Mike . . .’
Naka wɛ aya opalanga wokoka membɔna ko wɛ ambotanema la dui diakahomana la Heather, kakɔna kayoyosala?
OHOKANYIYA YEMA!
Dieyanelo ekɔ woshasha wakasha Nzambi paka wanɛ wambotshukana. Nsala dieyanelo la ntondo k’etena nkoka, ekɔ nanya woshasha ɔsɔ. Ekɔ oko mbɔsa dihɔndɔ dia dimɛna efula diakakokahɛ onto ɔmɔtshi ko kambaka la diɔ dia nkitolaka diangɔ
Naka wɛ hakitanyiyisha ɛlɛmbɛ wendana l’etongelo, ɛnyɛlɔ ɔlɛmbɛ w’okotwelo wa diangɔ oma l’olongo oya la nkɛtɛ, kete wɛ ayodiɛnɛ l’etombelo w’oma lɔkɔ. Ekɔ woho akɔ waamɛ naka wɛ nsekola ɔlɛmbɛ wendana la lɔkɛwɔ, ɛnyɛlɔ w’ɔnɛ wata ɔnɛ: ‘Nyotone awui wa mindo wa dieyanelo.’—1 Tɛsalɔnika 4:3.
Etombelo akɔna waya lo nsekola didjango sɔ? Bible mbutaka ɔnɛ: “Onto tshɛ lasala awui wa mindo wa dieyanelo ekɔ lo salɛ demba diande hita kɔlɔ.” (1 Kɔrɛtɔ 6:18) Lande na kele dui sɔ mɛtɛ?
Anyangiyangi wakashola dia ɛlɔngɔlɔngɔ efula wanɛ wakasale dieyanelo la ntondo ka diwala, pomanaka mbala efula la etombelo ɛmɔ l’atei wa wɛnɛ wayangaso nshila.
EKIYANU. Ɛlɔngɔlɔngɔ efula wakasale awui wa mindo wa dieyanelo ntondo ka diwala mbutaka dia vɔ wakayonyanga efula l’ɔkɔngɔ.
HAWƐKANƐ ETEMA. L’ɔkɔngɔ wa vɔ mbeyana mbala ka ntondo, onto l’onto ndjotatɛka ndjambola ɔnɛ: ‘Onto akɔna lakeyana la nde la ntondo kami?’
NDJAKESA LO TOKANYI. Kɛnɛ kele mɛtɛ ele, esekaseka efula kombolaka ntshukana la pami kayowakokɛ, koko aha kɛnɛ kalanga tsho nkotsha nsaki yawɔ. Ɛlɔngɔlɔngɔ efula mɛnaka dia hawoleke kotwama otsha le osekaseka wakeyana la wɔ.
Kɛnɛ kakokayɛ nkimɛ: Naka wɛ ndjasha lo awui wa dieyanelo la ntondo ka diwala, kete wɛ ekɔ lo ndjasalɛ kɔlɔ lo nanya ɛngɔ kɛmɔtshi ka nɛmɔ efula. (Rɔmɔ 1:24) Demba diayɛ diekɔ la nɛmɔ efula ndo wɛ hahombe didja lo waale.
Ɛnya dia wɛ ekɔ la dikoka dia “ntona awui wa mindo wa dieyanelo.” (1 Tɛsalɔnika 4:3) Oma laasɔ, naka lushi lɔmɔtshi wɛ amboyotshukana wɛ koka ndjosala dieyanelo. L’etena kɛsɔ, wɛ ayonga la ɔlɔ w’efula aha la ndjakiyanya, aha la lonyangu ndo aha la wɔma waya lo nsala dieyanelo la ntondo k’etena nkoka.—Tokedi 7:22, 23; 1 Kɔrɛtɔ 7:3.
KAKƆNA KAFƆNYAYƐ?
Onde onto lakolanga lo mɛtɛ, koka nanya demba diayɛ ndo tokanyi tayɛ?
Onde onto layakiyanya mɛtɛ dikambo diayɛ koka mpemba dia mbidja diɔtɔnganelo diasayɛ la Nzambi lo waale?—Hɛbɛru 13:4.