Ngande wakoka Bible kimanyiyami?

KAKƆNA KOTOYOSALA?

Ohokanyiya dui nɛ: David ekɔ lo teeteta lo dihole diahandeye ndooko ɛngɔ. Tolembetelo ta lo toshinga ndo ahole weyama wa lo ngelo mɛnyaka dia nde bu lo dihole diakandahombi monga. David amboshihodia dia nde ambonganɛ. Weho akɔ tshɛ nde akayɔtɔ lo sanga dia kɔlɔ etena kakandayayaka.

Otondonga wɛ mbaki David, kakɔna kotoyosala?

OHOKANYIYA YEMA!

Wɛ ekɔ la ɛsɔnwɛlɔ efula:

1. Mimbola mboka.

2. Nkamba la kartɛ kana la Système de repérage universel (GPS).

3. Ntetemala ntshɔ, lo nongamɛ dia ondo wɛ ayototomba lo mboka.

Mɛnamaka dia ɔsɔnwɛlɔ C mbahatoleka monga l’etombelo w’amɛna.

Ɔsɔnwɛlɔ B wekɔ la wahɔ efula ndeka wa ntondo. Nɛ dia kartɛ kana GPS kayonga lo anya etena keyɛ lo lɔkɛndɔ, kayotakokimanyiyaka dia kɔlɔmbɔla.

Woho akɔ waamɛ mbakoka Bible kokimanyiya.

Dibuku dia dimɛna efula sɔ koka

• kosha ɛlɔmbwɛlɔ lo ekakatanu wa lo lɔsɛnɔ

• kokimanyiya dia mbeka akambo wendana la yɛ ndo kolowanya

• kɛnya woho wakokayɛ monga la lɔsɛnɔ la dimɛna efula

EKADIMWELO LO AMBOLA W’OHOMBA WA LO LƆSƐNƆ

Kam’eyaso ɔtɛkɛta, sho mbokaka ambola.

• Lande na kele olongo bule?

• Ngande wele tɔɔtɔ?

Etena kolaso sho ndjotatɛka mboka ambola lo dikambo dia andja wotodingi.

• Lande na kasalema awui wa kɔlɔ?

• Lande na kavɔ anto?

Ko ayoyosala naka ekadimwelo wa ambola asɔ tshɛ tanemaka lo Bible?

Anto efula mbutaka dia Bible ekɔ dibuku dioludi la toshimu ndo ɛkɔndɔ wa kashi. Vɔ mbutaka ɔnɛ tɔ kambeta loowe ndo ɔnɛ tɔ kekɔ wolo nshihodia. Ko onde Bible mbele la dikambo, ko kana kɛnɛ kakoke anto lo kɛnɛ kendana la Bible mbele la dikambo? Onde wakawatɛ awui wa kashi?

Ɛnyɛlɔ, anto fɔnyaka dia Bible mbutaka ɔnɛ Nzambi mbalɔmbɔla andja ɔnɛ. Ko ngande wakoka dui sɔ monga ngasɔ? Andja ɔnɛ wambolola l’ekakatanu. Vɔ wambolola la paa ndo l’asui, la hemɔ ndo la lɔnyɔi, la wola ndo la mpokoso. Onde Nzambi ka ngandji koka monga lo kiɔkɔ y’awui asɔ tshɛ?

Onde wɛ nangaka nkondja okadimwelo? Okadimwelo washa Bible lo dikambo dia onto lalɔmbɔla andja ɔnɛ koka kaambiya.

Ondo wɛ amboshihodia dia alako watanema lo biukubuku nyɛ mbɔsama oma lo Bible. Ɛmɛnyi wa Jehowa mbetawɔka dia Bible kekɔ kiɔkɔ ya shikaa y’ɛlɔmbwɛlɔ. Ekɔ ngasɔ nɛ dia tɔ ‘kakasambiyama oma le Nzambi ndo kekɔ ohomba dia mbetsha, dia mpangwɛ, dia mbidja akambo l’ɔnɔngɔ.’ (2 Timɔte 3:16, 17) Tambokɔlɔmba dia wɛ nsɛdingola dibuku di’edjedja sɔ, koko diele ohomba nshi nyɛ.